རྒྱ་གཞུང་གིས་ཤིན་ཅང་ནང་དམག་མི་ ༨༠༠༠ བསྡུ་རུབ་བྱས་ཏེ། སྡེ་བ་རེའི་ནང་ཉུང་མཐར་དམག་མི་རེ་གཏན་སྡོད་ཀྱི་དམ་དྲག་སྲིད་ཇུས་ལག་བསྟར་བྱ་བཞིན་འདུག
ཉེ་ཆར་རྒྱ་གཞུང་གིས་ཤིན་ཅང་ས་ཁུལ་གྱི་གྲོང་རྡལ་ཁག་ཏུ་སྲང་ལམ་དོ་དམ་ཁང་དང་། གཞི་རིམ་སྡེ་བ་སོ་སོའི་ནང་ཉེན་རྟོག་ལས་ཁུངས་རེ་གསར་འཛུགས་ཀྱི་མགོ་བརྩམས་ཤིང་། ཉེན་རྟོག་དམག་མི་ ༨༠༠༠ ལྷག་བསྡུ་རུབ་ཀྱིས་སྡེ་བ་རེའི་ནང་དམག་མི་གཅིག་རེ་དང་། ཡང་ན། དམག་མི་འགའ་རེ་གཏན་སྡོད་ཀྱི་སྲིད་ཇུས་ལག་བསྟར་བྱས་ཏེ། ཤིན་ཅང་གི་ས་ཁུལ་སོ་སོའི་ནང་མང་ཚོགས་ཀྱི་འགྲུལ་བཞུད་ལ་ལྟ་རྟོག་དྲི་གཅོད་དང་། ཆོས་ལུགས་ཀྱི་བྱེད་སྒོ་ཁག་ལ་སྔར་བའི་བཀག་སྡོམ་གྱི་སྲིད་ཇུས་སྤེལ་མགོ་བརྩམས་འདུག
ཟླ་འདིའི་ཕྱི་ཚེས་ ༣༡ ཉིན་རྒྱ་ནག་ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་ཤིན་ཅང་རང་སྐྱོང་ལྗོངས་ས་གནས་རྒྱ་གཞུང་དམར་ཤོག་རྒྱུ་ལས་ཀྱིས་ཐག་གཅོད་ལྟར། ད་ལོ་ཤིན་ཅང་ནང་ཉེན་རྟོག་དམག་མི་ ༨༠༠༠ ལྷག་བསྡུ་རུབ་ཀྱིས་གཞི་རིམ་ས་ཁུལ་ཁག་ནང་། “སྡེ་བ་རེའི་ནང་དམག་མི་གཅིག་རེ་དང་། སྡེ་བ་རེའི་ནང་དམག་མི་འགའ་རེ་” ཡི་སྲིད་ཇུས་གསར་བ་ལག་བསྟར་བྱས་ཏེ། གྲོང་རྡལ་ཁག་ཏུ་སྲང་ལམ་དོ་དམ་ཁང་དང་། སྡེ་བ་ཁག་ནང་ཉེན་རྟོག་ཁང་གསར་འཛུགས་བྱ་རྒྱུ་ཡིན་པ་མ་ཟད། ཆེད་མངགས་ཉེན་རྟོག་དམག་མི་ ༣ དང་དམངས་དམག་ ༦ ལས་མི་ཉུང་བའི་མཉམ་འབྲེལ་རུ་ཁག་བཙུགས་ཏེ། གཞི་རིམ་གྲོང་སྡེ་དང་ས་ཁུལ་ཁག་ནང་སྐོར་བསྐྱོད་ཀྱིས་མང་ཚོགས་ཀྱི་འགྲུལ་བཞུད་ཐད་ཕྱོགས་ཡོངས་ནས་ལྟ་རྟོག་ཞིབ་བཤེར་གྱི་ལས་གཞིར་ཤུགས་བསྣན་དེ་སྤྱི་ཚོགས་བརྟན་ལྷིང་བཟོ་རྒྱུ་ཡིན་སྐོར་བརྗོད་འདུག
རྒྱ་གཞུང་གིས་ཤིན་ཅང་ནང་དམག་མིས་དམ་དྲག་སྒྲིག་གཞི་སྔར་བས་ཤུགས་ཆེ་གཏོང་བཞིན་པའི་ཐད། འཛམ་གླིང་ཡུ་གུར་འཐུས་ཚབ་ཚོགས་པའི་མགྲིན་ཚབ་པ་སྐུ་ཞབས་ཏིས་ལིས་ཞཱ་ཏིས་ཀྱིས། “ ང་ཚོས་ངོས་འཛིན་ནི་རྒྱ་ནག་གཞུང་ལ་ཤིན་ཅང་གི་གནད་དོན་སེལ་འདོད་ཀྱི་ལྷག་བསམ་རྩ་བ་ནས་མི་འདུག དེང་སྐབས་རྒྱ་གཞུང་གིས་ལག་བསྟར་བྱེད་བཞིན་པའི་སྤྱི་ཚོགས་བརྟན་ལྷིང་གི་ལས་གཞི་དེ་དག་གིས་ཡུ་གུར་མི་མང་ལ་ཆབ་སྲིད་ཀྱི་འཇིགས་འཇིགས་སྣང་ཞིག་སྐྱེད་བཞིན་ཡོད་ལ། ཅང་ཤིང་ནང་ཟང་ཟིང་འབྱུང་རྐྱེན་མཐའ་དག་ནི་ད་ལྟའི་རྒྱ་གཞུང་གི་སྲིད་ཇུས་དེ་དག་ལ་བརྟེན་ནས་བྱུང་བ་རེད། ” ཅེས་བརྗོད་པར་མ་ཟད། ཁོང་གིས་གལ་སྲིད་རྒྱ་གཞུང་ལ་ལྷག་བསམ་རྣམ་གི་ཐོག་ནས་གནད་དོན་སེལ་འདོད་ཡོད་ན། ཐོག་མར་ཆ་རྐྱེན་གང་ཡང་མེད་པའི་ཐོག་ནས་ཡུ་གུར་མི་རིགས་ལ་ཆབ་སྲིད་ཐད་ནས་རང་དབང་གདམ་ག་བྱ་རྒྱུའི་དབང་ཆ་ཡོད་པ་དེར་བརྩི་བཀུར་བྱ་དགོས་པ་དང་། གཉིས་ནས་དཔལ་འབྱོར་ལམ་ལུགས་ཐད་ནས་རང་མོས་སྒྲིག་འགོད་ཀྱི་ཁེ་དབང་སྤྲོད་དགོས་པ་ནན་བརྗོད་བྱས་འདུག
ལོ་སྔོན་མའི་ཕྱི་ཟླ་ ༡༡ ཚེས་ ༢༣ ཉིན་དམག་མི་ ༣༠༠༠ ལྷག་ཤིན་ཅང་གཞི་རིམ་ས་ཁུལ་ཁག་ནང་ཆེད་གཏོང་འགྲེམས་འཇོག་བྱས་ཡོད་འདུག དེང་སྐབས་ས་གནས་ཡུ་གུར་མི་རིགས་ཀྱིས་ཤིན་ཅང་ས་ཁུལ་ནང་ཡོད་སྤྱིའི་མི་འབོར་གྱི་བརྒྱ་ཆ་ ༤༠ མ་གཏོགས་ཟིན་གྱི་མེད་པ་རེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རྒྱ་ནག་གིས་ངོས་ནས་བརྗོད་ན་ཐམས་ཅད་ལས་ལྷག་པའི་གནད་དོན་གལ་འགངས་ཅན་གཅིག་རང་ཡོད་པ་དེ་སྤྱི་ཚོགས་བདེ་འཇགས་ཟེར་བ་དེ་ཁོ་ན་ཡིན་པ་རེད།
ཡིན་ནའང་བདེ་འཇགས་ཀྱི་ཆེད་དུ་དྲག་པོའི་དམ་དྲག་ཆེ་དྲགས་ན་དེ་བས་མི་རྣམས་ཀྱི་སེམས་སྣང་འཇིགས་སྣང་དང་དངངས་སྐྲག་ཆེ་རུ་འགྲོ་བ་དེ་སྤྱི་ཚོགས་ཀྱི་ཆོས་ཉིད་གཅིག་རེད།
བྱས་ཙང་ཤིང་ཅང་། བོད་ལྗོངས། ནང་སོག རྒྱ་ནག་བཅས་ཀྱི་ནང་དུ་ཇི་ཙམ་གིས་དམ་དྲག་ཆེ་ན་དེ་ཙམ་གྱིས་མི་རྣམས་ལའང་རང་དབང་ཆུང་བའི་དབང་གིས་ཡང་ནས་བསྐྱར་དུ་ངོ་རྒོལ་ཟེར་བ་དེ་འབྱུང་འགྱུར་ཐེ་ཚོམ་མེད་པ་རེད།
མའོ་ཙེ་ཏུང་གིས་བཤད་པ་ལྟར་རེད། གང་དུ་དྲག་གནོན་ཡོད་ན། དེ་རུ་ངོ་རྒཽལ་ཡོད། ཅེས་པ་དེ་བོད་ལྗོངས་ཀྱི་གཙོས་པའི་གྲངས་ཉུང་མི་རིགས་ཙམ་མ་ཟད་རྒྱ་ནག་ནང་ཁུལ་ལའང་ངོ་རྒོལ་བསྟུད་མར་ཡོང་རྒྱུ་ཡིན་པའི་རྒྱུ་རྐྱེན་གསོག་འཇོག་བྱེད་བཞིན་པ་རེད།
བྱ་དངོས་གང་ཞིག་ཡིན་ཡང་རྒྱུ་རྐྱེན་བསགས་པ་ལ་བརྟེན་ནས་རྒྱུ་ཚོགས་པ་ལས་འབྲས་བུ་བྱུང་ཟེར་བའི་ཆོས་ཉིད་ཀྱི་རྣམ་གཞག་དེ་འདྲ་ཞིག་རེད།
ང་ཚོའི་ངོས་ནས་བཤད་ནའང་ཇི་ཙམ་གྱིས་དམ་དྲག་བྱས་ན་དེ་ཙམ་གྱི་མི་རྣམས་ཡར་ལངས་བྱེད་དགོས་པའི་བསམ་ཚུལ་ཡང་ཡང་ཡོང་ངེས་རེད། དེས་གནས་སྐབས་གཅིག་རིང་མི་མང་པོའི་ཚེ་སྲོག་དང་། སྤྱི་ཚོགས་ཀྱི་བདེ་འཇགས། དཔལ་འབྱོར། ཤེས་རིག་སོགས་གང་སར་དོ་ཕོག་ཚབས་ཆེན་འགྲོ་རྒྱུར་ངེས་ཀྱང་མཐར་གཏུགས་ན་རང་རང་སོ་སོའི་མི་རིགས་ཁག་ལའང་བདེ་སྐྱིད་ཟེར་བའི་དམངས་གཙོ་དང་རང་དབང་བཅས་ཡོང་རྒྱུའི་མངོན་བརྡ་ཞིག་སྟོན་པ་རེད།
བྱས་ཙང་རྒྱ་མིས་དྲག་གནོན་ཇི་ཙམ་བྱས་ན་མི་རྣམས་གནས་གཟོད་མི་བདེ་བ་ཞིག་ཡོང་ངེས་ཡིན། གནས་གཟོད་ཇི་ཙམ་གྱིས་བདེ་པོ་མེད་ན་དེ་ལས་ཐར་བའི་ཐབས་ལམ་ཞིག་རང་བཞིན་གྱིས་འཚོལ་ངེས་རེད། ཐབས་ལམ་དེ་ནི་ངོ་རྒོལ་ཟེར་བའི་ཚིག་འདི་ཁོ་ན་རེད།
ངོ་རྒོལ་ཇི་ཙམ་བྱས་ན་དེ་ཙམ་གྱིས་ང་ཚོའི་མཐའ་འཇུག་གི་རེ་བ་མངོན་འགྱུར་ཐུབ་པ་རེད། དེ་ཡང་རྐྱེན་ངན་གྲོགས་སུ་ཤར་བའི་རྟགས་མཚན་ཡག་པོ་རེད།
ཤིན་ཅང་དུ་སྡེ་བ་རེའི་ནང་དམག་མི་རེ་འཇོག་རྒྱུ་མ་རེད།
ཤིན་ཅང་དུ་སྡེ་བ་རེའི་ནང་དམག་སྒར་རེ་འཇོག་རྒྱུའི་འཆད་འགོད་རེད།
འདི་ནི་ཡུ་གུར་བས་དྲག་པོའི་རྒོལ་ལན་ཡང་སློག་རྒྱུར་དོགས་ཟོན་བྱས་པ་ཞིག་ཡིན། གལ་ཏེ་བོད་མི་ཚོ་ཡང་འུ་ཐུག་ནས་གང་ས་གང་ནས་དྲག་སྤྱོད་རིགས་སྤེལ་ཚེ་བོད་ས་ཡོངས་ཀྱི་དགོན་སྡེ་དང་བཅས་པ་དམག་མིས་དམ་བསྒྲགས་བྱེད་ངེས་ལ། མི་མང་པོ་ཞིག་དོན་མེད་དུ་དམར་གསོད་བྱེད་ངེས། ཡིན་ན་ཡང་འཛམ་གླིང་ན་དམག་རོགས་བྱེད་མཁན་སུ་ཡང་མེད། གལ་ཏེ་བྱུང་ན་འཛམ་གླིང་དམག་ཆེན་གསུམ་པ་ཞིག་བསླངས་པ་མ་ཡིན་ནམ།