མི་རིགས་དང་རིག་གཞུང་སྐྱོབ་འདོད་ཀྱིས་རང་ལུས་མེ་མཆོད་ལ་ཕུལ་བའི་བོད་མི་དཔའ་བོ་དཔའ་མོ་དག་ལ་དྲན་གསོ་ཞུ།
གཉའ་འབྲོང་ཐུ་བུ།
བར་སྐབས་འདིར་ང་ཚོས་ཕྱིར་འདང་རྒྱག་མི་དགོས་པར་ཡིད་ལ་ཁ་ཐུག་ལ་འཁོར་ཡོང་བ་ནི་ཁ་སང་དེ་རིང་བོད་ནང་གི་བོད་མི་དཔའ་བོ་དཔའ་མོ་ཚོའི་རང་ལས་མེར་བསྲེགས་ཀྱི་ལས་འགུལ་དེ་ཡིན་སྲིད། བདག་ལ་མཚོན་ན་ཅི་ཞིག་བཤད་རྩིས་བྱས་ཀྱང་ཁ་ནས་སྐད་ཆ་ཐོན་གྱི་མི་འདུག་སྟབས་ད་བར་ཁ་བཙུམས་ནས་བསྡད་པ་ཡིན། བོད་ནང་གི་དཔའ་བོ་དཔའ་མོ་ཚོས་རང་ལུས་མེ་རུ་ཇི་ལྟར་བསྒྲོན་པ་ཚབས་ཆེ་ན་བཙན་བྱོལ་དུ་དེའི་ཚོད་ཀྱིས་ལས་འགུལ་ཚགས་ཚུད་ཅིག་དཀའ་ཡང་ཚོགས་པ་དང་མི་སྒེར་གྱི་ལྟ་ཚུལ་ཙམ་པོ་བ་དྲ་ཚིགས་དག་ན་ཤིན་ཏུ་མང་། དེ་ཡང་བློ་འཚབ་དང་ཚོར་བས་དེད་པའི་འཆར་སྣང་རེ་ཡིན་ཆོག་པས་ཐུག་ཁག་ཅི་ཡོད་མོད། ཚོར་བ་དང་བསམ་ཚུལ་ལོགས་པ་ཡིན་པའི་གནས་ལུགས་ཤེས་རྒྱུ་གལ་ཆེན་དུ་མཐོང་།
བསམ་ཚུལ་ཁག་གི་ནང་འགལ་བ་རྟགས་སྤྲོད་དང་གླེང་སློང་མང་ཤོས་ནི་ ༢༠༡༢/༠༢/༠༧ཉིན་བོན་རྒྱ་བསྟན་འཛིན་རབ་རྒྱས་ཀྱིས་བོད་ཀྱི་དུས་བབ་དྲ་བའི་བསམ་ཚུལ་ཚན་པའི་ནང་བོད་ནང་གི་མེ་ལྕེ་དེ་དག་མུ་མཐུད་ནས་འབར་དགོས་ཞེས་པའི་ཁ་བྱང་འོག་བོད་ནང་ནས་མུ་མཐུད་རང་ལུས་མེ་ལ་སྒྲོན་དགོས་པར་བཤད་པ་དང་། ༢༠༡༢/༠༢ /༡༡ དབུ་མའི་ལམ་ལས་འགུལ་ཁང་གིས་གསར་འགོད་གསལ་བསྒྲགས་དོན་ཚན་དྲུག་ཅན་ཞིག་སྤེལ་བའི་ནང་གི་དོན་ཚན་དང་པོའི་ནང་གསེས་སུ་བོད་ནང་རང་ལུས་མེར་བསྲེགས་གཏོང་བཞིན་པའི་ལས་འགུལ་དེ་མཚམས་འཇོག་དགོས་པར་བཤད་པ་དེ་གཉིས་ཡིན་འདུག་མོད། བདག་གིས་ནི་དེ་གཉིས་ལ་ཕན་མེད་ཀྱི་བསམ་ཚུལ་དང་དགོས་མེད་ཀྱི་གསར་འགོད་གསར་བསྒྲགས་ཞེས་བཤད་འདོད་བྱུང་།
གསལ་བསྒྲགས་དེ་དང་བསམ་ཚུལ་དེ་གཉིས་ཀྱི་དམིགས་ཡུལ་ནི་སྔ་མས་བོད་ནང་གི་མེར་བསྲེགས་ཀྱི་ལས་འགུལ་མཚམས་འཇོག་རྒྱུར་དམིགས་པ་དང་། ཕྱི་མས་མུ་མཐུད་མེར་བསྲེགས་རྒྱུར་དམིགས་པ་ཞིག་ཡིན་འདུག་པས་སྐད་ཆ་འདི་མི་བཤད་ཐབས་མེད་རེད། རྒྱུ་མཚན་ཅི་རེད་ཅེ་ན། བོད་ནང་གི་དཔའ་བོ་དཔའ་མོའི་ཚོའི་རང་ལུས་མེར་བསྲེགས་བཏང་དང་གཏོང་བཞིན་པ་དེ་ནི་གཞན་ཞིག་གིས་མཚམས་ཞོག་ལབ་པ་ཙམ་གྱིས་དུམ་སེ་ཆད་འགྲོ་བ་ཞིག་དང་། མུ་མཐུད་དུ་མེ་སྦར་རོགས་ལབ་ན་འུར་སེ་འབར་འགྲོ་བ་ཞིག་མིན་པར་དེ་ནི་ང་ཚོའི་ལོ་རྒྱུས་དང་གནས་བབ་མང་པོ་བརྒྱུད་དེ་གོམས་ཚར་བའི་སེམས་བསྐྱེད་ཅིག་རེད། སེམས་བསྐྱེད་དེ་ནི་བོད་མི་རྩམ་ཟན་ཚང་མར་ཡོད་པ་ཞིག་ཀྱང་མིན་ཏེ། དེ་ནི་རང་གི་རྩ་བའི་བླ་མ་རང་ཡུལ་དུ་གདན་དྲངས་ཏེ་མཇལ་སྙིང་འདོད་པའི་དད་པ་དང་། ཆོས་དང་རིག་གཞུང་སྲུང་སྐྱོབ། མི་རིགས་ཀྱི་མངོན་འདོད་ལ་དམིགས་པའི་སེམས་བསྐྱེད་ལ་མྱོང་བ་ཐོན་པའི་བློ་གྲོས་བཅས་ཀྱིས་ཁ་ལོ་བསྒྱུར་བ་ཞིག་རེད།
དེ་ཡིན་པ་མགོ་ལོག་སྟོང་སྐྱབས་དགོན་པའི་སྤྲུལ་སྐུ་བསོད་བྷ་ལགས་ཀྱི་ཞལ་ཆེམས་དང་མེར་བསྲེགས་ལས་འགུལ་ལ་དངོས་སུ་ཞུགས་པའི་དཔའ་བོ་དཔའ་མོ་དག་གི་འབོད་སྒྲ་ལས་ཀྱང་ཤེས་ཐུབ། ཆོས་དང་རིག་གཞུང་གི་ཆེད་རང་སྲོག་དངོས་སུ་བཏང་བའི་སེམས་བསྐྱེད་དེ་འདྲ་སྔ་རབས་པའི་ཁྲོད་དུའང་ལྷ་བླ་མ་ཡེ་ཤེས་འོད་ལྟ་བུ་རེ་ཟུང་ལ་མ་གཏོགས་བྱུང་མྱོང་མེད། དེའི་ཕྱིར་འཛམ་གླིང་གི་མི་དང་བྱེ་བྲག་བོད་མིའི་གྲངས་འབོར་དང་བསྡུར་ན་སེམས་བསྐྱེད་དེ་ཡོད་པའི་མི་ནི་ཉུང་ཉུང་ཞིག་ཡིན་རྒྱུ་རེད། ང་ཚོས་འདི་ལྟར་ཚོད་དཔག་ཅིག་བྱས་ན་ངས་གོང་དུ་བཤད་པ་བཞིན་བོད་ནང་གི་མེར་བསྲེགས་ཀྱི་ལས་འགུལ་འདིའི་མཚམས་ཚིགས་གཞན་གྱིས་འཛིན་རྒྱུ་ཞིག་མིན་པར་དེ་ནི་ཆོས་ཉིད་དང་གནས་ལུགས་ཀྱི་གཏན་ཁེལ་ལ་བསྒུག་རྒྱུ་དེ་རེད།
ངས་གསལ་བོར་བཤད་ན་སེམས་བསྐྱེད་དེ་ནི་མྱོང་བ་གཏིང་ཟབ་ཐོན་པའི་བསམ་བློ་ཞིག་ཡིན་པས་གང་ཟག་རང་ཉིད་དེའི་རྗེས་སུ་མི་འབྲངས་ཐབས་མེད་ལགས་པ་བློ་གང་ལ་མྱོང་གོམས་ཡོད་ན་དེའི་རྗེས་སུ་འགྲོ་བས་ཤེས་ནུས་ཤིང་། འདི་ལྟར་བསམ་བློ་བཏང་ན་བོད་ནང་གི་རང་ལུས་མེར་བསྲེགས་ཀྱི་མཚམས་ཚིགས་ནི་སེམས་བསྐྱེད་དེ་ལྡན་གྱི་བོད་མིའི་དམིགས་ཡུལ་མངོན་དུ་གྱུར་བའམ་ཡང་ན་སེམས་བསྐྱེད་དེ་ལྡན་གྱི་བོད་མི་མ་རྫོགས་པའི་བར་ཡིན་པ་སུ་ཞིག་གིས་བསྙོན། དེས་ན་ད་ནས་བཟུང་ང་ཚོ་གཞན་གྱི་སེམས་བསྐྱེད་བཀག་གཏོང་གི་རྟ་ཁར་མི་འཇུ་བར་ཤ་ཁྲག་གཅིག་ལས་གྲུབ་པའི་བོད་ནང་གི་བོད་མི་ཚོའི་གནས་སྟངས་ལ་གཞིགས་ཏེ་རང་རང་ས་ནས་ཀི་ཞིག་འདེབས་ཐུབ་ནའང་གནམ་འོག་གི་བོད་མིའི་ཚང་མའི་རེ་འདུན་དང་དམིགས་ཡུལ་ལ་ཁ་འཁོར་རྒྱུ་ཤིན་ཏུ་གལ་ཆེན་དུ་མཐོང་། ལྷག་པར་ཆབ་སྲིད་ཀྱི་རིག་ལམ་དེད་ན་བོད་ནང་གི་མེར་བསྲེགས་ལས་འགུལ་འདིའི་མཚམས་ཚིགས་ང་ཚོས་བཟུང་ན་རྒྱ་ནག་གིས་ལག་པ་འཆང་ས་ཞིག་ཀྱང་རྙེད་འགྲོ་བར་དོགས་ནས་བསམ་ཚུལ་གནད་བསྡུས་ཙམ་ཕུལ་བ་ལགས།།
༢༠༡༢ ། ༢ ། ༡༩
ཁྱེད་ཀྱི་རྩོམ་ཡིག་ཆ་ཚང་བཀླགས་ཚར་སོང་། བསམ་ཚུལ་ཡག་པོ་འདུག ངས་ཡག་པོ་འདུག་བཤད་ཡག་འདི། ཁྱེད་རང་གིས་བསམ་བློ་ཞིག་གཏོང་གི་ཡོད་པའི་བཟོ་ལྟ་བུ་ཞིག་མཐོང་བ་ལ་བལྟས་ནས་ཡིན། གཞན་དེང་སང་ང་ཚོས་སྤྱི་ཚོགས་ནང་སོ་སོ་རང་ཉིད་ལ་འབྱོན་རྒྱུ་ཐིགས་པ་གཅིག་མེད་ནའང་། སྤྱི་ཚོགས་ཕུ་བཀྲུག་མདའ་དཀྲུག་བྱེད་རྒྱུ་ལ་དགའ་པོ་ཡོད་མཁན་མང་པོ་འདུག
སླར་ཡང་ཞུ་རྒྱུར། བསམ་ཚུལ་འགྲིག་མིན་ལ་མ་བལྟོས་པར། ལྷག་བསམ་རྣམ་པར་དག་པས་ཀུན་ནས་བསླངས་ཏེ། སྤྱི་ཚོགས་དང་མི་རིགས་མཐུན་སྒྲིག་པ་ཕན་པའི་རྩོམ་ཡིག་འབྲི་ན་ཡག་པོ་ཡོང་ས་རེད།