གཟའ་ཕུར་བུའི་ཉིན་ཅཱ་ཆིན་ལིན་གྱིས་པེ་ཅིན་དུ་ཚོགས་འདུ་ཞིག་བསྡུས་ཏེ། བོད་ཁུལ་བརྟན་ལྷིང་ལས་དོན་ལ་ཤུགས་སྣོན་དགོས་སྐོར་བརྗོད་འདུག
རྒྱ་གཞུང་གི་ཚོགས་ཆེན་གཉིས་འཚོགས་ལ་ཉེ་བའི་སྐབས་དང་བསྟུན་ནས། ཟླ་འདིའི་ཕྱི་ཚེས་ ༡ ཉིན་རྒྱ་གཞུང་དབུས་དམར་ཤོག་ཆབ་སྲིད་ལྷན་ཁང་གི་རྒྱུན་ལས་ཅཱ་ཆིན་ལིན་གྱི་མགོ་འཛིན་འོག པེ་ཅིན་དུ་བོད་ཁུལ་བརྟན་ལྷིང་སྐོར་གྱི་ཚོགས་འདུ་ཞིག་ཚོགས་ཡོད་པ་དང་། ཚོགས་འདུ་དེར་རྒྱ་གཞུང་རྒྱལ་སྲིད་སྤྱི་ཁྱབ་ཁང་གི་དྲུང་ཆེ་མཱ་ཁའེ་དང་། རྒྱ་གཞུང་དབུས་ཉེན་རྟོག་སྡེ་ཁག་གི་འགན་འཛིན་ལིས་ཅན་ཀྲུའུ། འཐབ་ཕྱོགས་གཅིག་གྱུར་ཁང་གི་འགན་འཛིན་ཏུའུ་ཆིན་ལིན་སོགས་རྒྱ་གཞུང་དབུས་དམར་ཤོག་དཔོན་རིགས་ཁག་དང་། དེ་བཞིན། བོད་ཁུལ་ཞིང་ལྗོངས་ལྔའི་འབྲེལ་ཡོད་དཔོན་རིགས་དག་མཉམ་ཞུགས་བྱས་ཡོད་འདུག
ཚོགས་ཐོག་ཏུ་ཅཱ་ཆིན་ལིན་གྱིས་འདས་པའི་ལོ་གཅིག་རིང་བོད་ཁུལ་ཞིང་ལྗོངས་ལྔའི་ནང་། རྒྱ་གཞུང་དམར་ཤོག་དཔོན་རིགས་ཀྱི་སྣེ་ཁྲིད་འོག་འབྲེལ་ཡོད་སྡེ་ཁག་གིས་དངོས་ཤུགས་བརྒྱུད་གསུམ་ནས། རྒྱ་གཞུང་གི་བོད་ཀྱི་ལས་དོན་ཚོགས་འདུ་ཐེངས་ལྔ་པའི་སྲིད་ཇུས་ལག་ལེན་དོན་འཁྱོལ་བྱས་ཏེ། ལོ་ལྔ་ཚན་བཅུ་གཉིས་པའི་ལས་གཞི་མགོ་འཛུགས་ལེགས་པོ་བྱུང་ཡོད་པ་དེ་ཡིས། རྒྱ་དམར་གཞུང་གིས་བོད་ཐོག་འཛིན་པའི་ལས་དོན་བྱེད་ཕྱོགས་དང་སྲིད་ཇུས་ལ་ནོར་འཁྲུལ་མེད་པ་བདེན་དཔང་བྱས་ཡོད་སྐོར་དང་། ད་ལོའི་ལོ་མཇུག་ལ་རྒྱ་གཞུང་དམར་ཤོག་ཚོགས་ཆེན་ ༡༨ པ་ཚོགས་བཞིན་ཡོད་སྟབས། བོད་ཁུལ་ཞིང་ལྗོངས་ལྔའི་བརྟན་ལྷིང་ལས་དོན་ལེགས་པོ་སྒྲུབ་རྒྱུ་དེ་ནི། རྒྱ་ནག་རྒྱལ་ཁབ་དང་དམར་ཤོག་པའི་སྤྱིའི་གནས་བབ་ཐད་དོན་སྙིང་གལ་ཆེན་ལྡན་ཡོད་སྐོར་བརྗོད་འདུག
ད་དུང་། ཅཱ་ཆིན་ལིན་གྱིས་མཚོ་སྔོན་ཞིང་ཆེན་བོད་ཁུལ་དུ་ཁ་གཏད་རོགས་སྐྱོར་འཛུགས་རྒྱུ་ནི་རྒྱ་གཞུང་གི་སྲིད་ཇུས་གཏན་འབེབས་གལ་ཆེན་ཞིག་ཡིན་པ་དང་། འདས་པའི་ལོ་ ༡༥ རིང་བོད་ལྗོངས་ཁ་གཏད་རོགས་སྐྱོར་བཙུགས་པའི་ཉམས་མྱོང་དང་མཚོ་སྔོན་ཞིང་ཆེན་གྱི་གནས་སྟངས་གཉིས་མཉམ་འབྲེལ་ཐོག ཁ་གཏད་རོགས་སྐྱོར་འཆར་གཞི་གཏན་འབེབས་ཀྱིས་ནུས་པ་ལྡན་པའི་བྱེད་ཐབས་སྤྱད་དེ་མཚོ་སྔོན་རོགས་སྐྱོར་ལས་གཞི་གཏིང་ཟབ་ཏུ་སྤེལ་དགོས་པ་དང་། དེ་བཞིན། སི་ཁྲོན་དང་ཡུན་ནན། ཀན་སུའུ་བཅས་ཞིང་ཆེན་ཁག་གི་བོད་ཁུལ་དུའང་ཁ་གཏད་རོགས་སྐྱོར་ལས་གཞི་རྒྱ་ཆེ་རུ་གཏོང་དགོས་པ་དམིགས་འདོན་བྱས་ཡོད་པ་མ་ཟད། ཅཱ་ཆིན་ལིན་གྱིས་ “ཏཱ་ལའི་རུ་ཚོགས་ལ་འཐབ་རྩོད་བྱེད་ཤུགས་ཆེ་རུ་གཏོང་རྒྱུ་དེ་ནི། བོད་ཁུལ་ཞིང་ལྗོངས་ལྔ་འཕུར་བསྐྱོད་རང་བཞིན་གྱི་འཕེལ་རྒྱས་དང་ཡུན་རིང་བདེ་འཁོད་ཡོང་ཐབས་ཀྱི་གཞི་རྩའི་སྲུང་བྱ་ཡིན་ལ། རྒྱ་དམར་དབུས་གཞུང་གིས་ཏཱ་ལའི་རུ་ཚོགས་ལ་གཞི་རྩའི་འཐབ་རྩོད་བྱེད་ཕྱོགས་མུ་མཐུད་རྒྱུན་འཁྱོངས་བྱས་ཏེ། སྤྱི་ཚོགས་བརྟན་ལྷིང་གི་ལས་གཞི་ཁག་ལེགས་འགྲུབ་དང་བོད་བརྒྱུད་ནང་བསྟན་ཆོས་ལུགས་ཐད་ཀྱི་ལས་དོན་གཙུག་འཛིན། དམིགས་གཞི་ལྡན་པའི་ཐོག་ནས་བོད་དོན་ཕྱི་འབྲེལ་དྲིལ་བསྒྲགས་ལས་དོན་ལ་ཤུགས་བསྣན་ཏེ། བོད་ཁུལ་ཞིང་ལྗོངས་ལྔ་བརྟན་ལྷིང་འཕེལ་རྒྱས་ཀྱི་ལས་གཞིར་རྒྱལ་ཁབ་ཕྱི་ནང་གཉིས་སུ་ཁོར་ཡུག་ཡག་པོ་བསྐྲུན་དགོས།” ཞེས་བརྗོད་འདུག
དེ་བཞིན། ཚོགས་འདུ་དེའི་ཐོག་རྒྱ་གཞུང་དབུས་རྩ་འཛུགས་སྡེ་ཁག་གི་མགོ་གཙོ་ལིས་ཡོན་ཁྲའོ་ཡིས་ཀྱང་། འབྲེལ་ཡོད་ལས་བྱེད་ཚོས་བོད་སྐྱོར་ལས་དོན་རྒྱུན་སྐྱོང་ཡོང་བར་མུ་མཐུད་ཤུགས་སྣོན་དགོས་པ་དང་། བོད་སྐྱོར་ལས་བྱེད་འདེམས་སྒྲིག་ཐད་ཆ་རྐྱེན་ནན་མོ་བཏོན་ཏེ་ལས་བྱེད་ཀྱི་རྒྱུས་སྤུས་མཐོར་འདེགས་དང་། ལས་བྱེད་རྣམས་བོད་དུ་མ་བསྐྱོད་སྔོན་ལ་ཟབ་སྦྱོང་ལེགས་པོ་སྤྲད་དེ་སྤྱི་ཚོགས་དོ་དམ་དང་། གནད་དོན་དབྱེ་ཞིབ། དཀའ་རྙོག་ལ་གདོང་ལེན་གྱི་ནུས་པ་འཐོར་འདེགས་གཏོང་དགོས་ལ། དེ་བཞིན། བོད་ཁུལ་ལས་བྱེད་དཔུང་སྡེ་འཛུགས་སྐྲུན་དང་། གཞི་རིམ་ཞིང་གྲོང་ཁག་ནང་དམར་ཤོག་ལས་བྱེད་པའི་ཤོག་ཁག་འཛུགས་སྐྲུན་བཅས་བྱས་ཏེ་བོད་ཁུལ་བརྟན་ལྷིང་ཡོང་རྒྱུ་ཁག་ཐེག་བྱེད་དགོས་སྐོར་བརྗོད་འདུག
ཆབ་སྲིད་དབྱེ་ཞིབ་པ་དག་གིས། ཉེ་སྔའི་རྒྱ་གཞུང་གིས་བོད་ཐོག་འཛིན་པའི་རྣམ་འགྱུར་དེ་ནི། སླེབས་ལ་ཉེ་བའི་བོད་མིའི་སྒེར་ལངས་གསུམ་བཅུ་དུས་དྲན་སྐབས་བོད་ནང་སྔར་ལས་ལྷག་པའི་ཡར་ལངས་དོན་རྐྱེན་འབྱུང་རྒྱུར་དོགས་སློང་དང་། འདི་ལོའི་ལོ་མཇུག་ལ་ཚོགས་གཏན་ཁེལ་པའི་རྒྱ་གཞུང་དམར་ཤོག་སྐབས་ ༡༨ པའི་ཚོགས་འདུའི་སྐབས། སྤྱི་ཚོགས་ཁྲོད་རྙོག་ཟིང་འབྱུང་རྒྱུར་བློ་འཚབ་སྐྱེས་བཞིན་པ་ཞིག་ཡིན་པར་ངོས་འཛིན་གནང་གི་ཡོད་འདུག
དྲང་བདེན་དང་འདྲ་མཉམ་མེད་པར་བོད་ཁུལ་ཞིང་ལྗོངས་ལྔ་བརྟན་ལྷིང་འཕེལ་རྒྱས་ཨེ། ཧ་ཧ། ཧུ་ཧུ།
བརྟན་བརླིངས་བྱེད་དགོས་ན། བོད་མི་རེ་རེའི་སེམས་ཀྱི་བརྟན་བརླིངས་ལ་འགན་འཁུར་དང་། ཉམས་ཞིབ་བྱེད་དགོས། དམར་གསོད་དང་། དྲག་དཔུང་གིས་ནམ་ཡང་བརྟན་བརླིང་བཟོ་མི་ཐུབ།