བཀའ་ཁྲིའི་ལོ་གཅིག་གི་ཕྱག་ལས།

བཀྲ་ཤིས་ཟླ་བ།

མ་གཞི་ནས་ང་ཚོའི་བཙན་བྱོལ་སྤྱི་ཚོགས་འདི་ཕྱོགས་གང་ཐད་ནས་འཕེལ་རྒྱས་འགྲོ་བཞིན་ཡོད་པ་ལྟར། ཤེས་ཡོན་གྱི་གནས་ཚད་ཀྱང་ཡར་རྒྱས་ཕྱིན་ཏེ་སྐབས་བཅུ་བཞི་པའི་བཀའ་ཁྲིས་བཏོན་པའི་ཆིག་སྒྲིལ་དང་གསར་བཏོད། རང་ཁ་རང་གསོ་བཅས་ཀྱི་ལྟ་གྲུབ་འདི་ཚོ་བཤད་ས་དང་ལག་ཏུ་ལེན་སའི་ཁོར་ཡུག་གང་འཚམ་རེ་གྲུབ་འདུག་པ་ཡིན། དེ་ལྟ་ནའང་ཕྱོགས་གང་ཐད་ནས་ཕུན་སུམ་ཚོགས་པ་ཞིག་ཡིན་ནམ་ཞེ་ན་མིན་ཏེ། ངྷ་སའི་ཆབ་སྲིད་པ་ཕྲག་དོག་ཅན་འདི་ཚོ་དང་། གྲྭ་སའི་དགེ་འདུན་པ་ཞེན་ཁོག་ཅན་དེ་ཚོས་ད་དུང་ཡང་གང་བྱུང་མང་བྱུང་ལབ་ཀྱི་ཡོད་པ་ལྟ་བུ་རེད། དེ་བས་ངས་བཀའ་ཁྲིའི་ལོ་གཅིག་གི་ལས་ཀའི་ཐད་སྐད་ཆ་མ་བཤད་གོང་རང་ཉིད་ངོ་སྤྲོད་ཕྲན་བུ་ཞིག་བྱེད་ན་བསམ། ཁོ་བོ་ནི་ལྟ་བ་དང་ལངས་ཕྱོགས་རྐྱང་རྐྱང་བཤད་ནས་བོད་དོན་ནར་འགྱངས་སུ་གཏོང་མཁན་ཚོའི་གྲས་སུ་མེད་ལ། འདུག་ས་དགོན་པ་བྱས་ནས་རྩོད་རྒྱུ་ཆོལ་ཁ་བྱེད་མཁན་གྱི་དགེ་འདུན་པའི་གྲལ་དུ་ཡང་མེད་ཅིང་། བཀའ་ཁྲི་དང་ལུང་ཚན་གཅིག་པ་མིན་ལ་ཆོས་རྒྱུད་གཅིག་པར་ཡང་ཕལ་ཆེར་བཞག་ཏུ་མེད་པ་འདྲ། དེ་བཞིན་དུ་ཐོབ་དང་གོ་ས་གང་ལའང་རེ་བ་མེད་པའི་བོད་མི་དཀྱུས་མ་ཞིག་ཡིན་པས་བཀའ་ཁྲི་ལ་བསྟོད་པ་བྱས་པས་ཡར་འགྲོ་རྒྱུ་དང་སྨད་པ་བྱས་པས་མར་ལྷུང་རྒྱུ་ཅི་ཡང་མེད། དེའི་ཕྱིར་གཤམ་དུ་སྨྲས་པའི་སྐད་ཆ་འདི་ཚོ་ཕྲག་དོག་གིས་སེར་པོ་བྱས་མེད་ལ་ཞེན་ ཁོག་གིས་དམར་པོ་ཡང་བྱས་མེད་པའི་ཡིད་ཆེས་ཡོད། 

གསལ་བཤད་བྱེད་དགོས་པ་ཞིག་ལ་ངྷ་སའི་ཆབ་སྲིད་པ་ཐམས་ཅད་ཕྲག་དོག་ཅན་རེད་ཟེར་གྱི་མེད་ལ། གདན་སའི་དགེ་འདུན་པ་ཡོངས་རྫོགས་ཞེན་ཁོག་ཅན་རེད་དེ་བས་ཀྱང་ཟེར་གྱི་མེད། གཟུར་གནས་ཚོས་གཟིགས་དང་། དོན་ཆེན་དང་ཕྲད་དུས་འཇམ་ཐིང་ངེར་ཡོད་ལ་དོན་དག་མེད་ས་ནས་དོན་དག་བཙལ་ཏེ་སྐོར་ཞིག་གིས་ངུ་ཟུག་བརྒྱབ་ཡོང་གི་རེད། དེ་ཚོའི་ནང་ན་ངས་གོང་དུ་བཤད་པའི་ཕྲག་དོག་ཅན་དང་ཞེན་ཁོག་ཅན་དེ་ཚོ་ཡོད་པ་རེད། དེ་ཚོས་རང་ཉིད་ཀྱི་ངོ་གདོང་སྟོན་མི་ཐུབ་ས་ནས་མི་ལ་མགོ་སྐོར་གཏོང་གི་རེད། འདི་ལྟར་གསལ་བཤད་རེ་མ་བྱས་ན་མཚམས་མཚམས་ལ་སྐབས་འཚོལ་བ་ཚོས་འགྲེལ་བཤད་ལོག་པར་བརྒྱབ་ནས་གཟུར་གནས་ཚོར་བློ་ཕམ་འབྱུང་དུ་འཇུག་གི་འདུག  

ལོ་སྔོན་མའི་དེ་རིང་གི་ཉིན་མོ་འདི་ནི་བོད་ཀྱི་ལོ་རྒྱུས་ཁྲོད་ཀྱི་དཀྱོག་མཚམས་གལ་ཆེན་ཞིག་ཡིན། རྒྱུ་མཚན་ནི་ད་བར་ང་ཚོའི་ཤི་ས་དང་གསོན་ས་ཐམས་ཅད། ང་ཚོའི་འཕུར་ས་དང་འབབ་ས་ཡོངས་རྫོགས་སུ། ཁོང་གི་སྐུ་དང་གསུང་། ཐུགས་བཅས་ཀྱི་འཕྲིན་ལས་ཀྱི་མཛད་པ་རྣམས་ཅི་དགར་ལོངས་སྤྱོད་དུ་གནང་མཁན་གྱི་མི་རིགས་འདིའི་མ་ཡུམ་ལྟ་བུའི་རླབས་ཆེན་གྱི་མི་སྣ་སྟེ། ༸གོང་ས་བཅུ་བཞི་པ་ཆེན་པོས་བོད་མིའི་ཆབ་སྲིད་ཀྱི་དབང་ཆ་ཡོངས་རྫོགས་མི་མང་ལ་གསོལ་རས་སུ་གནང་སྟེ། ལོ་ངོ་སུམ་བརྒྱ་དྲུག་ཅུ་ལྷག་གི་ལོ་རྒྱུས་ཅན་གྱི་བོད་གཞུང་དགའ་ལྡན་ཕོ་བྲང་བའི་སྲིད་དབང་དེ་བཞིན་དམངས་གཙོ་མཚན་ཉིད་ཚང་བར་བསྒྱུར་བའི་ཉིན་མོ་ཆགས་ཡོད། ཉིན་མོ་དེར་༸གོང་ས་མཆོག་གིས་བརྩེ་བའི་འཛུམ་པ་གྲོལ་ཞིང་གསུང་གི་དབུགས་དབྱུང་བསྩལ་ནས། ད་ངའི་ཚབ་འདི་ཡིན་ཞེས་བཀའ་ཁྲིའི་ལག་པ་ནས་ཐེན་ཏེ་འཛམ་གླིང་ཡོངས་ལ་གསལ་སྟོན་གནང་བའི་ཉིན་མོ་ཡང་ཡིན། དེར་བརྟེན་དེ་རིང་ངས་བརྗོད་འདོད་པ་ནི་ཉིན་མོ་དེར་སྲིད་འགན་གཙོ་བོ་འཁུར་མཁན་བོད་ཀྱི་སྲིད་བློན་ནམ་བཀའ་བློན་ཁྲི་པའི་ལོ་གཅིག་རིང་གི་ལས་ཀའི་སྐོར་ནས་རང་གི་ཤེས་ཚོད་ཅིག་ཞུ་རྒྱུ་ཡིན།

བཀའ་ཁྲིས་ཆིག་སྒྲིལ་ཞེས་པའི་འབོད་ཚིག་ཅིག་བསྒྲགས་སོང་། ད་དུང་ཡང་ཤེས་ཡོན་ཅན་གྱི་གཟུགས་བརྙན་འགའ་ཞིག་གིས་ཆོལ་ཁ་རྩོད་ཀྱི་ཡོད་ལ། རྒྱུ་དངོས་མེད་པའི་ངྷ་སའི་འཁྱམས་པོ་འགའ་རེ་དང་། ཤེས་ཡོན་མེད་པའི་གདན་སའི་གྲྭ་པ་སྐོར་རེ་བེད་སྤྱད་ནས་ཆོལ་ཁའི་འགལ་བ་བསྒྲིགས་ཏེ། རང་ཉིད་སྤྱི་འཐུས་སོགས་ལ་ལངས་ཐབས་ཀྱི་ཁེ་བཟང་གཉེར་གྱི་ཡོད་མེད་ལ་མ་ལྟོས་པར། བཙན་བྱོལ་ནང་གི་ཤེས་ཡོན་ཅན་མང་ཆེ་བས་ཆོལ་ཁ་རྩོད་པ་ནི་བླུན་པོའི་བྱ་སྤྱོད་ཅིག་ཡིན་པ་ཧ་གོ་ཞིང་། ས་མཚམས་དང་ཆུ་མཚམས་རྩོད་ས་ངོ་མ་དེ་རྒྱ་ནག་ཡིན་པར་ངེས་ཤེས་གཏིང་ཟབ་རྙེད་བཞིན་ཡོད་པས་བཀའ་ཁྲིའི་ཆིག་སྒྲིལ་གྱི་ལངས་ཕྱོགས་འདིས་བོད་པའི་སྤྱི་ཚོགས་ནང་སྣེ་ཁྲིད་ལྟ་བུའི་ནུས་པ་འཐོན་གྱི་འདུག

དེ་བཞིན་དུ་བཀའ་ཁྲིས་གསར་བཏོད་ཅེས་པའི་འབོད་སྒྲ་ཞིག་བསྒྲགས་སོང་། འབོད་སྒྲ་འདི་གཞིས་ཆགས་ཁག་དང་དགོན་སྡེ་ཁག་ནས་ད་དུང་ཡང་ཐོས་ཀྱི་ཡོད་མེད་མི་ཤེས་ཏེ། ༸གོང་ས་མཆོག་སྐུ་དངོས་ཀྱིས་ཞལ་བཀོད་གནང་ནས་ཚན་རིག་གི་སློབ་ཚན་ཞིག་གདན་སའི་ཁྲིད་གཞིའི་ཁོངས་སུ་འཇུག་འཆར་ལ་མཁན་པོ་འགའ་ཞིག་གིས་རུབ་བརྒྱབ་ནས་ངོ་རྒོལ་བྱེད་སྟངས་ལ་བལྟས་ན་བཀའ་ཁྲིའི་བཀའ་མོལ་འདི་ཚོར་དེ་བས་ཀྱང་རྣ་བ་གཡོར་གྱི་ཡོད་མེད་མི་ཤེས་ལ། གཞིས་ཆགས་ཁག་ཏུ་གཞན་བརྟེན་བསམ་བློ་ཆེ་དྲགས་ནས་གསར་བཏོད་དང་རང་ཁ་རང་གསོ་ཞེས་ པ་འདི་ཚོ་ལེགས་བཤད་ཅིག་ཏུ་མཐོང་གི་ཡོད་ན་ལས་ལག་ལེན་བསྟར་རྒྱུ་ཞིག་ཡིན་པ་ཕལ་ ཆེར་ཤེས་ཀྱི་མེད་པ་འདྲ། འོན་ཀྱང་བཀའ་ཤག་གིས་བཀའ་ཤག་གི་ཕྱག་ལས་ནང་ལག་ལེན་བསྟར་བྱུང་།  དོན་ཆེན་རེར་ཐུག་ན་ལྷ་བསང་རེ་གཏོང་ཞིང་དར་ལྕོག་རེ་འཛུགས་རྒྱུ་ལྟ་བུ་མིན་པར་བཀའ་ཤག་གི་བཀའ་བློན་ཚོ་ཕྱོགས་སྐྱོད་དང་ངོ་སྐྱོད་གནང་སྟེ་ཐུག་དགོས་ས་ལ་ཐུག བཤད་དགོས་ས་ནས་བཤད་དེ་རྒྱལ་སྤྱིའི་ཆབ་སྲིད་ཀྱི་སྡིངས་ཆའི་སྟེང་བོད་ཀྱི་སྲིད་གཞུང་འདི་གསལ་ལ་མི་གསལ་བ་ཞིག་མངོན་པར་བྱེད་ཀྱི་འདུག འདི་ནི་ང་ཚོའི་གཞུང་འདི་སྲ་ཐག་ཐག་ཡོད་ཟེར་ནས་སོས་དལ་ལྷོད་སྡོད་ཀྱི་གནས་སྟངས་ལས་བརྒལ་ཡོད་ལ། འཐབ་རྩོད་ཀྱི་གོ་སྐབས་མི་འཛིན་པར་ལྷ་གསོལ་ཀླུ་གསོལ་བྱེད་པའི་འགྲོ་སྟངས་ལས་འདས་ཡོད། མ་གཞི་ནས་ཆབ་སྲིད་ཟེར་བ་ནི་འགལ་འབྲེལ་ལ་འཇུས་ནས་གོ་སྐབས་དམ་འཛིན་བྱེད་རྒྱུ་ དེ་ཡིན་པ་ལས། གལ་ལ་ཐུག་དུས་ལྷ་ལ་བཅོལ་རྒྱུ་དེ་ག་ལ་ཡིན། དེར་བརྟེན་བཀའ་ཁྲིའི་འབོད་སྒྲ་འདི་ནི་དགོས་ངེས་ཀྱི་འབོད་སྒྲ་ཞིག་ཡིན་ལ། ཡར་ཐོན་ཅན་དུ་གྲགས་པའི་ཨ་རི་དང་དབྱིན་ལན་སོགས་ཀྱིས་ཀྱང་འབོད་སྒྲ་འདི་བསྒྲགས་དང་སྒྲོག་བཞིན་པ་ཡིན།

ཡང་བཀའ་ཁྲིས་རང་ཁ་རང་གསོ་ཞེས་པའི་ལངས་ཕྱོགས་ཤིག་བཏོན་སོང་། ང་ཚོས་བོད་ཕྱི་ནང་གཉིས་ཀར་ཐེངས་ཤིག་གཟིགས་དང་། བོད་ནང་དུ་རྒྱ་གཞུང་གིས་བོད་མི་ཚོར་ཕན་ཐོགས་པའི་ལས་ཀ་སྣ་གཅིག་ཀྱང་བྱེད་ཀྱི་མེད་ནའང་། རྐང་བཙུགས་ནས་ལས་ལ་བརྩོན་པའི་འདུ་ཤེས་འཕྲོ་བརླག་ཏུ་གཏོང་བྱེད་ཀྱི་སྐྱོབ་གསོ་ཟེར་བའི་དངུལ་དངོས་དེ་ཚོ་མི་དགོས་ཟེར་ནའང་སྤྲོད་ཀྱི་ཡོད་ཅིང་། བཙན་བྱོལ་ནང་དུས་ཡུན་རིང་བོར་སྒེར་ཚུགས་ཀྱི་འདུ་ཤེས་ཉམས་དམས་སུ་ཕྱིན་ཏེ་མགོ་སེར་ཚོས་མེད་ཟེར་ནའང་རོགས་སྐྱོར་དགོས་པའི་ཞུ་བ་འཐེན་གྱི་ཡོད། ངའི་ཤེས་ཚོད་ཀྱི་བོད་པའི་གྲོང་གསེབ་འདིའི་མི་ཚང་ལ་ལར་བཟའ་ཆས་སོགས་ཟླ་བ་འཁྱོལ་ནའང་ལོ་འཁྱོལ་དཀའ་བའི་གནས་སུ་ཡོད་ཀྱང་ངལ་རྩོལ་གྱི་འདུ་ཤེས་རྦད་དེ་ཉམས་ནས་ཐ་ན་རང་ཉིད་ཀྱི་ཁང་མཐའ་ར་མཐའི་རྩྭ་འབྲེག་དགོས་ནའང་རྒྱ་གར་བ་ཚོར་གླ་ཆ་གཏོང་གི་ཡོད། གལ་སྲིད་མི་ཞིག་གིས་རང་གི་ཁང་མཐའི་རྩྭ་འབྲེག་པ་ལྟ་བུ་མཐོང་ན་དེ་ནི་ཆེས་མི་འཇོན་མཁན་དང་ཆེས་ཐབས་སྐྱོ་ཤོས་དེ་ཡིན་པའི་ངོས་འཛིན་བྱེད་པར་དོགས་ཀྱི་ཡོད། དེ་ནི་ཁོང་ཚོའི་གནོན་ཤུགས་ཤིག་ཡིན་ལ་ཁོང་ཚོའི་རིག་གནས་ཤིག་ཀྱང་ཡིན། དེར་བརྟེན་རབ་བྱུང་ན་དབྱིན་ཇི་མགོ་སེར་ཞིག་གི་རྐུབ་ལ་རྒྱུག་རྒྱུ་ཨེ་རག་གི་རྨི་ལམ་རྨི་ཞིང་། ཐབས་སྡུག་ན་ཡར་གྱི་གཞིས་མགོ་དང་མར་གྱི་བརྒྱ་དཔོན་ཟེར་བ་དེ་ཚོའི་རྩར་ཕྱིན་ཏེ་མི་ཚང་ཉམ་ཐག་ཅེས་པའི་ངོ་སྦྱོར་ཞིག་ལ་འབད་བརྩོན་བྱེད་པ་ལས་ཕལ་ཆེར་ལས་ཀ་བྱེད་རྒྱུའི་ལུགས་སྲོལ་མེད་པ་ཡིན། མི་ཚང་ཉམ་ཐག་གི་ཁོངས་སུ་ཚུད་ཚེ་ད་གཟོད་སྐྱོབ་གསོ་རག་གི་ཡོད་པ་རེད། ཕོ་གཞོན་མོ་གཞོན། ཤ་དར་ཁྲག་དར། ལས་ལག་ཡས་གང་ཡང་བྱེད་མི་ཐུབ་པའི་མི་འདི་ཚོའི་བྱ་སྤྱོད་ཅིག་མཐོང་ཚེ། དངོས་གནས་བཀའ་ཁྲིའི་རང་ཁ་རང་གསོ་ཞེས་པའི་ལངས་ཕྱོགས་འདི་ཅི་འདྲའི་གལ་ཆེན་ཞིག་ཡིན་ཨང་མི་བསམ་རང་བསམ་ཡིན།

བཀའ་ཁྲིས་བོད་དོན་ཞི་བའི་ལམ་ནས་རྩོད་རྒྱུ་ལ་འགྱུར་བ་མེད་ཟེར། རྒྱ་གུང་ཁྲན་གྱིས་བོད་མི་འབུམ་ཕྲག་བཅུ་གཉིས་ཙམ་གྱི་ཚེ་སྲོག་ཕྲོགས་ཡོད། མི་འབོར་དེའི་མང་ཤོས་ནི་བོད་ཀྱི་གྲོང་དམག་དང་རིག་གཞུང་འཛིན་མཁན། རྒྱལ་ཁབ་སྐྱོང་མཁན་དག་ཆགས་ཡོད། དེ་ཚོ་ཚང་མ་མེད་པར་བྱས་པས་དུས་སྐབས་ཤིག་གི་བོད་ཅེས་པ་དེ་ལང་རྒྱུ་མེད་པ་བཟོས་ཡོད། དེ་ནི་བོད་མིའི་རང་དབང་ཤོར་ཚུལ་ཡིན། ད་ལྟ་༸གོང་ས་བཅུ་བཞི་པ་ཆེན་པོའི་ཐབས་མཁས་ཐུགས་རྗེའི་འོག་ནས་བོད་ཕྱི་ནང་གཉིས་ཀར་གསོན་ཤུགས་གསར་བ་ཞིག་རྒྱས་ཡོད། སྟོབས་ཤུགས་ཆེན་པོ་ཞིག་ལྡན་ཡོད། གསོན་ཤུགས་འདི་དང་སྟོབས་ཤུགས་འདི་ལ་བརྟེན་ནས་བོད་ཀྱི་རང་དབང་ཞིག་ཨེ་ལོན་མ་བལྟས་ན། ད་ནི་དངོས་གནས་བོད་ཅེས་པ་འདི་ཀྲུང་ཧྭ་རིག་གནས་ནང་ཐིམ་འགྲོ་རྒྱུའི་སྐེ་མཚམས་ཏག་ཏག་ལ་སླེབས་ཡོད་པས་ཁ་ཤོབ་ཐེན་ནས་འདུག་ཚད་ཅིག་གཏན་ནས་མིན། ད་ལྟ་རྒྱ་གུང་ཁྲན་ཡང་བོད་མིའི་གསོན་ཤུགས་འདི་དང་སྟོབས་ཤུགས་འདི་ལ་མིག་ཚ་ཡི་ཡོད། འདི་ཉམས་དམས་སུ་གཏོང་ཐབས་ལ་ཁག་འདོགས་ས་ཞིག་མ་རག་པར་བསྡད་ཡོད། དེ་བས་མཚམས་རེར་ཏཱ་ལའི་ཡིས་དྲག་སྤྱོད་སྤེལ་སོང་ཟེར། ཡང་སྐབས་རེར་བཀའ་ཁྲི་དྲག་སྤྱོད་པ་རེད་ཟེར། གཉིད་བཤད་ལྟ་བུའི་སྐད་ཆ་འདི་ཚོས་རྒྱ་གུང་ཁྲན་གྱི་རེ་བ་དང་འདུན་པ་སྟོན་གྱི་ཡོད། བོད་མིའི་འཐབ་རྩོད་འདི་དྲག་ལམ་ལ་སྐུལ་འདེད་བྱེད་ཀྱི་ཡོད། དྲག་ལམ་ལ་ཕྱིན་ཚེ་དེ་ནི་ཁོ་ཚོའི་གོ་སྐབས་ཡིན། ཁེ་བཟང་ཡིན། དེ་ལ་ཁ་གཡར་ནས་བོད་མིའི་འཐབ་རྩོད་ཀྱི་གོང་བུ་འདི་བཅོམ་ཆག་སྐྱ་ཉིལ་དུ་གཏོང་རྩིས་ཡོད། དེ་བས་བཀའ་ཁྲིས་གོ་སྐབས་དེ་དང་ཁེ་བཟང་དེ་རྒྱ་གུང་ཁྲན་ལ་མི་སྤྲོད་རྒྱུའི་དམ་བཅའ་བཞག་སོང་། ཁས་ལེན་བྱས་སོང།

ད་དུང་བཀའ་ཁྲིས་གཞུང་གི་ལངས་ཕྱོགས་ཀྱང་ལམ་དབུ་མར་ཡང་མུ་མཐུད་དུ་ཤར་སྐྱོད་བྱ་རྒྱུ་ཟེར། ལམ་དབུ་མ་ཟེར་བ་འདི་བོད་ཀྱི་ཆོས་པ་དང་། སྲིད་དོན་པ། བོད་གཞིས་དང་བྱེས། བོད་ཀྱི་ལྷ་དང་མི། དྲག་ཤོས་དང་མང་ཤོས་ཀྱིས་ཐག་གཅོད་དང་མོས་མཐུན་ཡོད་པ་ཞིག་ཡིན་པ་མ་ཟད། གླེན་པའི་ཨུ་ཚུགས་ལྟ་བུ་མ་ཡིན་པར་བློ་གྲོས་ཞིབ་མོས་གོ་བསྡུར་དང་སྦྱང་བཤད་བྱས་ཡོད་པའི་འཐབ་ཇུས་ཤིག་དང་ཐབས་ལམ་ཞིག་ཡིན། ལམ་དབུ་མས་རྒྱ་ནག་རྒྱལ་ཁོངས་ཀྱི་བོད་སྐད་སྨྲ་བ་ཐམས་ཅད་ལ་ཁྱབ་ཀྱི་ཡོད་ལ། བོད་ས་ཡོངས་རྫོགས་ལ་སྙོབ་ཀྱི་ཡོད།  དེང་གི་རྒྱལ་སྤྱིའི་སྒྲིག་སྲོལ་དང་ཡང་མཐུན་གྱི་ཡོད་ལ། ལྷག་པར་དུ་རྒྱ་ནག་རང་གི་ཁྲིམས་གཞི་མང་པོ་ཞིག་དང་མཐུན་གྱི་ཡོད་པས་ལམ་དབུ་མར་གདོང་ལེན་བྱས་ཚེ་རང་གིས་བཟོས་པའི་ཁྲིམས་གཞི་མང་པོར་གདོང་ལེན་བྱེད་དགོས་ཐུག་གི་ཡོད། དེ་བས་ལམ་དབུ་མས་རྒྱལ་སྤྱི་དང་རྒྱ་ནག བོད་ཅེས་ཕྱོགས་ཕན་ཚུན་ལ་མགོ་རྙོག་ཅི་ཡང་མེད་པར་གནད་དོན་རྗེན་པར་ཕུད་ཡོང་གི་ཡོད། དེར་བརྟེན་རྒྱ་གུང་ཁྲན་ཅི་བྱ་བརྟོལ་མེད་དུ་གྱུར་ཏེ་རྒྱ་དཔོན་ཀྲུའུ་ཝེ་ཆོན་ཟེར་བ་དེ་ཚོས་ཀྲུང་གོའི་ནང་ད་ནས་མི་རིགས་ཟེར་བ་མེད་པར་བཟོ་དགོས་ཚུལ་གྱི་སྡུག་སྐད་ཤོར་གྱི་ཡོད་ཅིང་། རྒྱ་ནག་གི་མགྲིན་ཚབ་པ་ཡིན་ཟེར་མཁན་དེ་ཚོས་ཀྱང་བོད་དོན་སྐོར་གྱི་གསལ་བསྒྲགས་འདྲ་སྤེལ་ཚེ་གདོང་བ་དམར་བོ་དམར་རྐྱང་ཆགས་ནས་སྐད་ཆ་བཤད་ཀྱི་ཡོད། རྒྱུ་མཚན་ནི་མི་ཚང་མས་ཤེས་ཡོད་པ་ཞིག་རྫུན་བཤད་ཀྱི་ཡོད་པས་ལོས་ཡིན། འདི་དག་ནི་རྒྱ་གུང་ཁྲན་རང་གིས་བཟོས་པའི་ཁྲིམས་ཀྱི་དྲ་བར་རང་གི་རྐང་པ་ཐོགས་ཚུལ་རེད་ལ། རྒྱ་གཞུང་གིས་སྡིག་པ་མིག་བཙུམ་བྱས་ནས་འདུག་ཚུལ་ཡང་རེད། དེ་བཞིན་དུ་བོད་མིའི་བདེན་པ་དང་ལམ་དབུ་མའི་འཐབ་ཇུས་ཀྱིས་བྱིན་པའི་རྒྱ་གུང་ཁྲན་གྱི་ལེགས་སྐྱེས་དག་ཀྱང་རེད། དེའི་ཕྱིར་དེང་གི་ཆར་བཀའ་ཁྲིས་བདམས་པའི་ལམ་ཁ་འདི་ནི་ནོར་མེད་ལ་འཕྱུགས་ཀྱང་ མེད།

ཡང་བཀའ་ཁྲིས་དབང་ཡོད་དང་སྒེར་གཅོད་མི་བྱེད་པར་བཀའ་བློན་ཡོངས་རྫོགས་དང་མཉམ་ལས་དང་ནུས་པ་མཉམ་འདོན་བྱེད། ཤེས་འཇོན་དང་ལྷག་བསམ་གྱིས་ཕྱུག་པའི་བཀའ་བློན་གཞན་དང་གཞན་ཚོའི་འཇོན་ནུས་ལ་གོ་སྐབས་བྱིན་པས་བཀའ་ཤག་གི་ནུས་པ་ཆེ་རུ་ཕྱིན། དེ་བཞིན་དུ་དམངས་གཙོའི་འགྲོ་སྟངས་ཡིན་ཟེར་ནས་སྤྱི་འཐུས་དང་དགྲ་ཁ་གཏད་ལྟ་བུར་མ་བལྟས་པར་མཉམ་ལས་དང་མཉམ་ལངས་བྱས། དེང་གི་ཆར་སྤེན་པ་ཚེ་རིང་གིས་མགོ་ཁྲིད་པའི་སྤྱི་འཐུས་ཀྱང་སྔར་གྱི་ཆོལ་ཁའི་ཞེན་ཁོག་རྩོད་ས་དང་མི་འདྲ་བར་བོད་མིའི་བདེན་དོན་རྩོད་སའི་གྲོས་ར་གལ་ཆེ་ཤོས་དེ་ཆགས་ཡོད། སྔར་ལྟར་སྤྱི་འཐུས་ཁྲིམས་བཟོ་ཡིན་པས་འདུག་དགོས་པ་དང་། བཀའ་ཤག་འཛིན་སྐྱོང་ཡིན་པས་རྒྱུག་དགོས་པ་ལྟ་བུའི་བསམ་ཚུལ་དེ་ཚོ་དོར་ཏེ་ཛ་དྲག་གི་སྐབས་ཐམས་ཅད་མཉམ་ལངས་བྱས། གཞིས་བྱེས་བོད་མི་ཡོངས་ལ་སེམས་འགུལ་དང་རེ་བ་བསླངས། དེ་བས་ངྷ་སའི་བོད་ཀྱི་སྲིད་གཞུང་འདི་ཡོད་པ་ནས་མངོན་གསལ་གྱི་ཕྱོགས་ལ་མངོན་ཡོང་གི་ཡོད།

བཀའ་ཁྲི་མཆོག་གཞིས་ཆགས་ནས་སྐྱེས་ཤིང་གཞིས་ཆགས་ནས་འཚར་བས་གཞིས་ཆགས་ཀྱི་ཤེས་ཡོན་ཅན་མང་པོའི་སེམས་པ་ངྷ་སར་འཁོར་བཞིན་ཡོད་ཅིང་། ཁ་འཐོར་དུ་གནས་པའི་རྒྱལ་སྤྱིའི་སྤྱི་ཚོགས་ཁྲོད་ཀྱི་བོད་མིའི་རེ་བ་ཡང་ངྷ་སར་བརྒྱབ་ཡོང་གི་ཡོད། དེ་བཞིན་དུ་བཀའ་ཁྲིས་བཀའ་ཁྲི་འགྲན་རྩོད་སྐབས་ནུབ་ཕྱོགས་དམངས་གཙོའི་འགྲོ་ སྟངས་ལྟར་གྱི་འགྲན་རྩོད་བྱས་པས་གཉིད་ལ་ཤོར་བའི་ཕྱི་སྡོད་བོད་མིའི་སྤྱི་ཚོགས་འདི་འུར་སེར་བཏང་སོང་ལ། དེ་ལ་བརྟེན་ནས་གཞིས་ལུས་བོད་མིའི་འདུན་པ་ཆེ་རུ་ཕྱིན་སོང་། ད་དུང་འདི་དང་འདི་འདྲ་བའི་གླེང་འོས་པ་མང་དག་ཅིག་ཡོད་ཀྱང་རེ་ཞིག་མཚམས་འཇོག་གི་ཡིན། བཀའ་ཁྲིའི་ལོ་ཡུན་ནང་གི་བརྒྱ་ཆ་ཉི་ཤུ་ལས་སོང་མེད་པའི་སྐབས་འདིར་བསྟོད་ར་གཏོང་རྒྱུ་མང་དྲགས་ན་བཀའ་ཁྲི་མི་བཟི་ཡང་བཀའ་ཁྲིའི་འཁོར་ཡིན་ཟེར་མཁན་དེ་ཚོ་བཟི་འགྲོ་བར་དོགས་པས། བསྟོད་པ་ལྷག་མ་རྣམས་དུས་ནས་དུས་སུ་སྤྲོ་བར་བྱ།

དེང་གི་ཆར་བཀའ་ཁྲི་མཆོག་བོད་པའི་གཞིས་ཆགས་ཁག་དང་དགོན་སྡེ་ཁག་ཏུ་ཕེབས་ཚེ་བརྩི་མཐོང་དང་དགའ་བསུ་རྒྱ་ཆེན་པོ་བྱེད་ཀྱི་ཡོད་ལ། རྒྱལ་ཁབ་གཞན་དུ་ཕེབས་ཚེ་སྐུ་སྲུང་དམག་མི་གཏོང་བ་སོགས་ཀྱི་ཆེ་མཐོང་སྤྲོད་ ཀྱི་ཡོད་པ་མ་ཟད། བོད་ནང་དུ་གཞོན་སྐྱེས་ཚོས་བཀའ་ཁྲི་ལ་བསྟོད་གླུ་ལེན་པ་དང་རང་གི་ལག་ཐོགས་ཁ་པར་ནང་བཀའ་ཁྲིའི་སྐུ་པར་ཉར་བ་སོགས་དགའ་མོས་ཆེན་པོ་བྱེད་ཀྱི་འདུག དེ་ལ་མ་གཞི་ནས་རྒྱུ་མཚན་འདྲ་མིན་རེ་ཡོད་སྲིད་ཀྱང་ངའི་ལྟ་ཚུལ་ལྟར་ན་རྒྱུ་མཚན་གཙོ་བོ་བཞི་ཙམ་ཞིག་རེད་སྙམ། དང་པོ་༸གོང་ས་མཆོག་གིས་ངའི་ཚབ་འདི་ཡིན་ཞེས་གསུང་གི་དབུགས་དབྱུང་བསྩལ་ཡོད་པ་དེ་གཙོ་བོ་རེད་སྙམ། ༸གོང་ས་མཆོག་ལ་བོད་རང་དང་རྒྱལ་སྤྱིའི་སྤྱི་ཚོགས་ཁྲོད་ཆེ་མཐོང་ཅི་འདྲ་ཡོད་མིན་ནི་ཞུ་མི་དགོས་པ་ཡིན་ལ། ཁོང་གིས་ངའི་ཚབ་འདི་ཡིན་གསུངས་ཚེ་རང་བཞིན་གྱིས་ཆེ་མཐོང་སླེབས་ཡོད། གཉིས་པ་བོད་ཕྱི་ནང་གི་མེར་བསྲེགས་ཀྱི་ལས་འགུལ་འདི་ཡིན། འདིའི་ཐད་རྒྱལ་སྤྱི་སྲིད་གཞུང་མང་པོ་ཁ་རོག་གེར་ཡོད་ནའང་། ལས་འགུལ་འདིས་བོད་མིའི་སེམས་པ་བསྒུལ་གྱི་ཡོད་ལ། འགྲོ་བ་མིའི་རིགས་ཀྱི་སེམས་པ་བསྒུལ་ཡོང་གི་ཡོད། རྒྱུ་མཚན་ནི་བསྲེག་བྱ་དེ་ནི་རྩྭ་དང་ཤིང་མིན་པར་སྨྲ་ཤེས་ཤིང་དོན་གོ་བའི་འགྲོ་བ་མི་ཡིན་པས་རེད། གསུམ་པ་བཀའ་ཁྲི་མཆོག་ཨ་རིའི་ཧ་ཝར་ཌིའི་སློབ་ཐོན་པ་དང་དེང་རབས་ཀྱི་ཤེས་ཡོན་ཚད་ལོངས་པ་ཡོད་པ་དེ་ཡིན། བཞི་པ་གོང་ཞུས་ལྟར་བཀའ་ཁྲིའི་ལོ་གཅིག་གི་ཕྱག་ལས་འདི་དག་དང་འབྲེལ་བ་དམ་པོ་ཡོད་པར་འདོད། འདི་དག་ལས་རྒྱུ་མཚན་དང་པོ་དང་གཉིས་པ་འདི་མི་མཐོང་མཁན་ནི་བཀའ་ཁྲི་ལ་རྒྱབ་སྐྱོར་ཞུ་མཁན་དུ་རློམ་པ་དག་གི་ནང་དུ་ཡོད་ལ། མི་འདིིའི་རིགས་ཀྱིས་ཡོད་ཚད་བཀའ་ཁྲིས་འཇོན་བཞག་པ་ཞིག་ཏུ་བརྩིས་ཏེ་གནས་ལུགས་ ངོ་མ་དེ་མཐོང་གི་མེད་པ་མ་ཟད། གཅིག་བྱས་ན་བླང་དོར་མི་ཤེས་པའི་རྒྱབ་སྐྱོར་བྱེད་སྟངས་འདིས་བཀའ་ཁྲི་ནག་པོ་ བཟོ་སྲིད་པ་ཞིག་རེད། རྒྱུ་མཚན་གསུམ་པ་འདི་མི་ཤེས་མཁན་ནི་བཀའ་ཁྲི་ལ་འགྲན་སེམས་ཅན་དག་སྟེ། བཀའ་ཁྲིིའི་བོད་ཡིག་གི་ཆུ་ཚད་ཞན་པས་བཀའ་ཁྲི་མཆོག་བོད་ཀྱི་རིག་གཞུང་ལ་དགའ་མོས་མེད་པ་ལྟ་བུའི་རྒྱུ་མཚན་ལྟར་སྣང་འགོད་མཁན་གྱི་གྲས་དེ་རེད་ལ། འདི་ཚོས་ནམ་ཞིག་བཀའ་ཁྲི་དགེ་སློང་མིན་པས་ཆོས་ལ་མི་དགའ་ཚུལ་ཡང་བཤད་སྲིད་པ་ཞིག་རེད། རྒྱུ་མཚན་བཞི་པ་འདི་མི་རྟོགས་མཁན་ནི་ཤེས་ཡོན་མེད་ཅིང་འཕྲལ་ཕུགས་ཀྱི་ཁེ་ཉེན་མི་ཤེས་མཁན་དང་། སྤྱི་ཚོགས་ལ་འགན་ཁུར་མེད་མཁན། གཞན་གྱི་གཡོ་འོག་ཏུ་ཤོར་བ་ཚོ་རེད། འདི་ཚོས་ཐ་ན་བཀའ་ཁྲི་འགྲོ་རྒྱུ་མང་བས་འགྲོ་སོང་མགོ་ཐུག་མིན་ལྟ་བུའི་སྡུག་སྐད་རྒྱག་གི་ཡོད།

གང་ལྟར་རྒྱུ་མཚན་དང་དངོས་ཡོད་གཞི་ལ་བཞག་ནས་བཀའ་ཁྲིའི་ལོ་གཅིག་གི་ཕྱག་ལས་སྐོར་ལ་དབྱེ་ཞིབ་ཅུང་ཟད་བྱས་པའི་ཁུལ་ཡིན་ལ། དེ་དང་མཉམ་དུ་གདེང་འཇོག་ཀྱང་གང་འཚམ་ཞུས་པ་ཡིན། འོན་ཀྱང་དེང་གི་གྲྭ་པ་དང་གྲྭ་ལོག་འགའ་ཞིག་གི་རྩོམ་ཡིག་ལྟར་བསྟོད་སྨད་ཆེ་དྲགས་པའི་མཐའ་ལ་ལྷུང་དུ་བཅུག་མེད། བསྟོད་སྨད་ཆེ་དྲགས་པའི་རྩོམ་ཡིག་དེ་ཚོ་ནི་བཟི་སྨན་ཞིག་དང་འདྲ་བར་ཡར་སྐུལ་གྱི་ནུས་པ་ཅི་ཡང་མེད་པར་སྣང་།

མདོར་ན་བཟང་པོ་ལ་ལེགས་གསོལ་འབུལ་རྒྱུ་ཞིག་དང་ངན་པ་ལ་སྐྱོན་མཚང་འདོན་རྒྱུ་ཞིག་གི་ལས་ལ་ངེས་པར་དུ་ཞུགས་དགོས་པ་ལས། ཁྱད་པར་ཅི་ཡང་མེད་པར་བཏང་སྙོམས་ཀྱི་བཞུགས་འདུག་རྒྱུ་དེ་ནི་རྒྱལ་ཁ་ཐོབ་སའི་ལམ་ཁ་དེ་མ་རེད་འདོད། དེ་བས་སྐད་ཆ་འགའ་ཞིག་བཤད་པ་ཡིན་ལ། སྐད་ཆ་དག་གནད་ལ་མ་ཁེལ་བ་དང་། ལོག་པར་བཤད་པ། སྐབས་སུ་མ་བབ་པ། དགེ་མཚན་ཅི་ཡང་མེད་པ་དེ་འདྲ་ཡོད་ན་ཀློག་མཁན་དག་ལ་དགོངས་དག་ཞུ་རྒྱུ་ཡིན།

 ༢༠༡༢།༨།༨