ད་ནིང་ས་རཱ་མཐོ་སློབ་དབུ་བརྙེས་ནས་ལོ་ངོ་ ༡༤ འཁོར་བའི་དུས་དྲན་མཛད་སྒོ་ཞིག་ཚོགས་སོང་ལ། སྐུ་མགྲོན་གཙོ་བོར་དབུས་བོད་མིའི་སྒྲིག་འཛུགས་བཀའ་བློན་ཁྲི་པ་བློ་བཟང་སེང་གེ་མཆོག་ཕེབས་ཏེ་གཏམ་བཤད་གནང་སོང་།
དེ་རིང་སྔ་དྲོའི་ཆུ་ཚོད་ ༡༡ དང་ཕྱེད་ཀའི་སྟེང་ས་རཱ་མཐོ་སློབ་ཚོགས་ཁང་དུ་སྐུ་མགྲོན་གཙོ་བོར་བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གཙོས། རིག་ལམ་སློབ་གཉེར་ཁང་གི་འགན་འཛིན་བོད་མི་མང་སྤྱི་འཐུས་དགེ་བཤེས་སྐལ་བཟང་དགྲ་འདུལ་ལགས། ས་རཱ་མཐོ་སློབ་ཀྱི་སློབ་སྤྱི་རྒན་འཇམ་དཔལ་གྲགས་པ་ལགས། ཤེས་རིག་ལྷན་ཁང་གི་སྲོལ་རྒྱུན་སྡེ་ཚན་གྱི་འགན་འཛིན་ཚེ་རིང་བསམ་འགྲུབ་ལགས། དེ་བཞིན་ས་རཱ་མཐོ་སློབ་ཀྱི་དགེ་སློབ་ལྷན་འཛོམས་ཀྱིས། ས་རཱ་མཐོ་སློབ་དབུ་བརྙེས་ནས་ལོ་ ༡༤ འཁོར་བའི་དུས་དྲན་སྲུང་གཙིའི་མཛད་སྒོ་ཞིག་ཚོགས་སོང་།
ཐོག་མར་ས་རཱ་མཐོ་སློབ་ཀྱི་སློབ་སྤྱི་རྒན་འཇམ་དཔལ་གྲགས་པ་ལགས་ཀྱིས་དུས་དྲན་ངོ་སྤྲོད་དང་ལས་བསྡོམས་སྙན་སྒྲོན་ཞུས་པ་ལྟར་ན། ས་རཱ་མཐོ་སློབ་ནི་ངྷ་ས་རིགས་སློབ་ཀྱི་ཡན་ལག་ཅིག་དང་། མཐོ་སློབ་ཀྱི་དམིགས་ཡུལ་ནི་བོད་ཀྱི་སྲོལ་རྒྱུན་རིག་གནས་རྒྱུན་འཛིན་དང་འབྲེལ་བའི་མི་རབས་གསར་པ་དང་དགེ་རྒན་གསོ་སྐྱོང་བྱ་རྒྱུ། བོད་ཀྱི་རིག་གནས་དོན་གཉེར་ཅན་ཚོར་སློབ་སྦྱོང་གི་མཐུན་འགྱུར་གནང་རྒྱུ་ཡིན་པ། མཐོ་སློབ་འདི་ཐོག་མར་རྒན་དམ་པ་བློ་བཟང་རྒྱ་མཚོ་མཆོག་གིས་༧གོང་ས་མཆོག་ལ་སྙན་སེང་ཞུས་པ་ལྟར་༧གོང་ས་མཆོག་གིས་ཐུགས་དགྱེས་པ་ཆེན་པོས་ལམ་སྟོན་དང་རྒྱབ་སྐྱོར་གནང་པ་ལ་བརྟེན་ནས་མགོ་འཛུགས་བྱས་པ་ཞིག་དང་། ༡༩༩༨ ཟླ་ ༨ ཚེས་ ༡༣ ཉིན་དངོས་སུ་དབུ་འབྱེད་གནང་ཡོད་འདུག
ཁོང་གིས་ས་རཱ་བོད་ཀྱི་སློབ་གཉེར་ཁང་ཇི་ལྟར་ཚད་ལྡན་གྱི་མཐོ་སློབ་ཅིག་ཏུ་ངོས་འཛིན་ཐོབ་པའི་སྐོར་ནས། བཀའ་ཤག་སྐབས་ ༡༡ དང་ ༡༢ གཉིས་ཀྱིས་ཤེས་རིག་ལས་ཁུངས་དང་ཟུང་འབྲེལ་ཐོག སློབ་གྲྭའི་སློབ་ཚན་གཏན་འབེབས་དང་སློབ་དཔོན་དག་གི་ཤེས་ཚད། འཛིན་སྐྱོང་དང་ཁོར་ཡུག་སོགས་ལ་གཟིགས་ཞིབ་ནན་དཔྱད་བརྒྱུད་མཐོ་སློབ་ཅིག་ཏུ་ངོས་འཛིན་བྱས་ཡོད་པ་དང་། ༢༠༠༡ ལོའི་ཕྱི་ཟླ་ ༤ ཚེས་ ༢༦ ཉིན་དངོས་སུ་༼བོད་ཀྱི་མཐོ་རིམ་སློབ་གཉེར་ཁང་༽ཞེས་པའི་མཚན་བྱང་བསྩལ་པ་ནས། གཞུང་དང་གཞུང་འབྲེལ་མིན་པའི་ཚོགས་སྡེ་ཁག་ཚང་མས་ས་རཱ་མཐོ་སློབ་ནས་ཐོན་པའི་ལག་འཁྱེར་ལ་མཐོ་སློབ་ཐོན་པའི་ཚད་ལྡན་ལག་འཁྱེར་དུ་ངོས་འཛིན་གནང་གི་ཡོད་པ་སོགས་ངོ་སྤྲོད་གནང་སོང་།
དེའི་རྗེས་ཤེས་རིག་ལས་ཁུངས་ཀྱི་སྲོལ་རྒྱུན་ཤེས་ཡོན་འགན་འཛིན་རྒན་ཚེ་རིང་བསམ་འགྲུབ་མཆོག་གིས་ཤེས་ཡོན་དང་འབྲེལ་བའི་གསུང་བཤད་གནང་པའི་ནང་། ས་རཱ་མཐོ་སློབ་ཀྱིས་བཙན་བྱོལ་སྤྱི་ཚོགས་ཀྱི་ཤེས་ཡོན་ཐད་ཞབས་འདེགས་རླབས་ཆེན་སྒྲུབ་བཞིན་ཡོད་པ། ༢༠༠༡ ཙམ་ནས་ས་རཱ་མཐོ་སློབ་དང་ཤེས་རིག་ལས་ཁུངས་གཉིས་ཟུང་འབྲེལ་ཐོག་དགེ་རྒན་འོས་སྦྱོང་སོགས་ལས་གཞི་མང་དག་ཅིག་བསྒྲུབས་དང་སྒྲུབ་བཞིན་ཡོད་པ། རྒྱ་བལ་འབྲུག་གསུམ་ནང་གི་བོད་དགེ་བརྒྱ་ཆ་ ༢༠ ལྷག་ས་རཱ་མཐོ་སློབ་ནས་ཐོན་པ་རྐྱང་ཆགས་ཡོད་སྐོར་དང་། སྤྱི་ཚོགས་གཞན་དག་དང་བསྡུར་ན་མི་འབོར་ལ་གཞིགས་པའི་བཙན་བྱོལ་སྤྱི་ཚོགས་ནང་མཐོ་སློབ་ཐོན་མཁན་ཧ་ཅིང་མང་པོ་ཡིན་ཡང་། གྲངས་འབོར་ལས་སྤུས་ཚད་གལ་ཆེན་ཡིན་པ། གཞན་སློབ་ཕྲུག་ཚོས་ཕུགས་རྒྱང་རིང་པོར་བལྟས་ཏེ་སོ་སོའི་དགའ་མོས་དང་ནུས་པ་ངོ་འཕྲོད་པའི་སྟེང་། སློབ་སྦྱོང་གི་རྨང་གཞི་སྲ་བརྟན་དང་དམིགས་བསལ་སློབ་ཚན་བྱེ་བྲག་པ་ཞིག་གི་སྟེང་རིག་གཅིག་རྐང་འཛིན་ནམ་ཆེད་མཁས་པ་ཞིག་ཡོང་རྒྱུར་ཧུར་བརྩོན་བྱ་དགོས་པའི་ལམ་སྟོན་གནང་སོང་།
མཐར་སྐུ་མགྲོན་གཙོ་བོ་བཀའ་ཁྲི་བློ་བཟང་སེང་གེ་མཆོག་གིས་ ༢༠༡༡ ནས་ ༢༠༡༢ བར་གྱི་མཐོ་རིམ་རིག་གནས་རབ་འབྱམས་པའི་ཡིག་རྒྱུགས་ཡང་རྩེར་སོན་མཁན་ཁག་ཅིག་ལ་བྱ་དགའ་དང་། མཐོ་སློབ་ནང་ཁུལ་དུ་རྒན་དམ་པའི་རྗེས་དྲན་རྩེད་འགྲན་གྱི་རྒྱལ་ཁ་ཐོབ་མཁན་བཅས་ལ་བྱ་དགའི་གཟེངས་རྟགས་ཕུལ་རྗེས། གསུང་བཤད་བཀའ་སློབ་གནང་པའི་ནང་། ༧གོང་ས་མཆོག་གིས་སྐུ་དབང་མི་མང་གིས་འོས་འདེམས་བྱས་པའི་དབུ་འཁྲིད་ལ་རྩིས་སྤྲོད་གནང་པའི་ལོ་གཅིག་རིང་ལས་དོན་ལ་འཐུས་ཤོར་ཕྱིན་མེད་པ་དང་། ད་ལྟའི་བཙན་བྱོལ་སྤྱི་ཚོགས་གཞན་ལས་ལྷག་ཅིག་བྱུང་ཡོད་པ་འདི་མི་རབས་རྒན་པ་དག་གི་བཀའ་དྲིན་ཡིན་པ། ད་ཆར་བཙན་བྱོལ་སྤྱི་ཚོགས་དང་སྒྲིག་འཛུགས་ཀྱི་རྨང་རྡོ་ཉིན་རེ་བཞིན་སྲ་བརྟན་དུ་འགྲོ་བཞིན་ཡོད་པ་དེས་བཙན་བྱོལ་སྤྱི་ཚོགས་འཐོར་ཞིག་ཏུ་མི་འགྲོ་བའི་བརྡ་ལན་ཞིག་པེ་ཅིན་ལ་སྤྲོད་བཞིན་ཡོད། དེ་བཞིན་བཀའ་ཤག་གི་སྲིད་ཇུས་ཆིག་སྒྲིལ་དང་གསར་གཏོད། རང་ཁ་རང་གསོ་གསུམ་གྱི་སྐོར་གསལ་བཤད་གནང་སྐབས་ཁོང་གིས། བོད་མི་ཚོར་གཞན་རྟེན་གྱི་བསམ་བློ་ཤུགས་ཆེན་པོ་ཡོད་པའི་ཚོར་སྣང་བྱུང་ཚུལ་དང་། གལ་སྲིད་སོ་སོར་རང་གི་རྐང་པའི་སྒང་ལངས་ཐུབ་པའི་གདེང་ཚོད་མ་བསླེབ་པར་དུ་བོད་ཀྱི་རྩ་དོན་འགྲུབ་ཁག་པོ་ཡིན་སྐོར་སོགས་གསུངས་སོང་།
ཡང་ཁོང་གིས་མ་འོང་པར་བོད་རྒྱའི་གནད་དོན་ཐད་ཀྱི་ལས་དོན་སྒྲུབ་ཕྱོགས་སྐོར་ལ། མི་རིང་པར་རྒྱ་ནག་གི་དཔོན་རིགས་བརྗེ་སྤོར་བྱ་རྒྱུ་ཡིན་པ་དང་། རྒྱ་གཞུང་གི་དཔོན་རིགས་གསར་པ་ཚོ་བསླེབས་རྗེས་རྒྱ་གར་དང་ཨ་རི་སོགས་ལ་ཕྱི་འབྲེལ་སྲིད་ཇུས་གང་འདྲ་འཛིན་འཆར་ཡོད་མེད་དང་། ལྷག་པར་དུ་བོད་ཐོག་ལ་སྲིད་ཇུས་གང་འདྲ་འཛིན་རྒྱུ་ཡིན་པ་བཅས་ལ་གཞིགས་ཏེ། བཀའ་ཤག་གི་ངོས་ནས་ལས་དོན་ཇི་ལྟར་བསྒྲུབ་དགོས་པ་དེར་ཧུར་ཐག་བྱ་རྒྱུ་ཡིན་སྐོར་གསུངས་སོང་།
མཛད་སྒོ་གྲོལ་རྗེས་བཀའ་ཁྲི་མཆོག་ཟུར་དུ་ས་རཱ་མཐོ་སློབ་ཏུ་འཚོགས་བཞིན་པའི་གཞུང་ཞབས་གསར་བསྡུའི་ཟབ་སྦྱོང་ལ་ཞུགས་མཁན་སློབ་མ་ཚོར་ཐུག་འཕྲད་ཐོག ཟབ་སྦྱོང་སྐབས་སྦྱང་བརྩོན་གང་ལེགས་བྱ་དགོས་པ་དང་། དངོས་གཞིའི་ཚུད་རྒྱུགས་ཁྲོད་འདེམས་ཐོན་བྱུང་པ་རྣམས་གང་ཐུབ་ཐུབ་ཀྱིས་སོ་སོའི་སློབ་སྦྱོང་དང་འབྲེལ་བའི་ལས་གནས་ཁག་ཏུ་བསྐོ་འཇོག་བྱ་འཆར་ཡོད་ཀྱང་། རྩ་བའི་སྲི་ཞུ་བ་ཞིག་བྱ་འདོད་ཡོད་ཚེ་ལས་གནས་དང་ས་གནས་གང་ཞིག་ཏུ་བཏང་ཡང་འགྲོ་དགོས་ཡོད་སྐོར་བཀའ་གནང་སོང་། ས་རཱ་མཐོ་སློབ་ནི་བོད་ཀྱི་སྲོལ་རྒྱུན་རིག་གནས་སློབ་གཉེར་བྱེད་ཡུལ་གྱི་མཐོ་སློབ་ཅིག་དང་། མཐོ་སློབ་འདིར་མཐོ་རིམ་རིག་གནས་འཛིན་གྲྭ་དང་། མཚམས་སྦྱོར་འཛིན་གྲྭ ཟུར་སྦྱོང་འཛིན་གྲྭ ནང་དོན་རིག་པའི་འཛིན་གྲྭ དགེ་རྒན་འོས་སྦྱོང་། ལས་བྱེད་འོས་སྦྱོང་། ཕྱི་རྒྱལ་འཛིན་གྲྭ རྒྱ་ཡིག་ལོ་ཙཱ་བའི་འཛིན་གྲྭ་བཅས་ཀྱིས་གྲུབ་ཡོད་པ་དང་། ད་སྔ་སློབ་ཕྲུག་ ༡༠༠༠ ལྷག་ཐོན་ཡོད་ཅིང་། ད་ལྟ་དགེ་སློབ་ཁྱོན་ ༣༢༨ ཙམ་ཡོད་འདུག
གསར་འགོད་པ། བནྡེ་སྐྱབས།
ས་རཱ་མཐོ་སློབ་དབུ་བརྙེས་ནས་ལོ་ངོ་ ༡༤ འཁོར་བའི་དུས་དྲན་ལ་བཀྲ་ཤིས་བདེ་ལེགས་ཡོད།
རྒྱ་མའི་འགོ་ཁྲིད་གསར་པ་མ་སླེབ་བར་རྒུག་སྡོད་ལོངས་མི་འདུག བོད་ནང་གང་སར་མེ་ལྩེ་ཕྱུར་བཞིན་འདུག ཁ་སྟོང་པའི་བརྡ་ལན་དེ་དོན་དམ་པའི་ཕན་དོགས་མིན་འདུག ཉིད་ཀྱི་དབུ་ཁྲིད་ནས་ལས་འགུལ་སྤེལ་རོགས། ང་ཚོ་མི་མང་གི་དབུ་ཁྲིད་རོགས་གནང་།
ཨོ་ཡ། དོན་དམ་གྱི་བརྡ་ལན་ཞིག་སྤྲད་ན་མ་གཏོགས་་་་་་་་་་ཐ་སྙད་སྐམ་པོ་འདི་སྦེད་བྱེད་ནས་ལོ་གཅིག་འགོར་སོང་བ་མ་ཡིན་ནམ
བཀའ་ཁྲི་འདིར་བཤད་སླ་བའི་བརྡ་ལན་མང་བ་ལ། ལྟོས་དང་། ད་ལྟའི་བཙན་བྱོལ་སྤྱི་ཚོགས་འདི་གཞན་ལས་ལྷག་ཅིག་བྱུང་ཡོད་ཟེར་བ་དང་། ད་ཆར་བཙན་བྱོལ་སྤྱི་ཚོགས་དང་སྒྲིག་འཛུགས་ཀྱི་རྨང་རྡོ་ཉིན་རེ་བཞིན་སྲ་བརྟན་དུ་འགྲོ་བཞིན་ཡོད་པ་དེས་ཞེས་སོགས་ཀྱི་འུར་ཤོབ་དེ་ཚོར་་་་་་
གོང་དུ་མཛད་སྒོ་ཡག་པོ་འཚོགས་འདུག་པར་ཐུགས་རྗེ་ཆེ། འོན་ཀྱང་། གོང་གི་མཐོ་རིམ་རིག་གནས་རམ་འབྱམས་པའི་ནང་དུ་འཕྲིན་ཡིག་འབྲི་ཤེས་མཁན་ག་ཚོད་ཡོད་དམ། མིང་ཆེན་པོ་ཞིག་གིས་འོག་ནས་མཐར་ཕྱིན་པའི་ལག་འཁྱེར་དེས་སྤྱི་ཚོགས་ལ་ཞབས་ཞུ་བྱེད་ཐུབ་བམ། ངོ་མ་འུ་ཚང་གི་ཤེས་ཡོན་སྲིད་ཇུས་ཟེར་ཡོད་དུས་དེ་འདྲ་ཞིག་ཡིན་རྒྱུ་རེད། ད་དུང་གོང་གི་ཁ་བྱང་ལ་རྒྱ་ནག་ལ་བརྡ་ཞིག་སྟོན་ཡོད་ཟེར་ནས་གསར་འགྱུར་བཀོད་ན་འུ་ཚང་གི་ངོ་ཚ་མ་རེད་དམ། ངེད་ཚང་གི་རྒྱ་ནག་ལ་བརྡ་སྟོིན་བྱེད་ཁོ་ཚོ་ལས་ཡོད་པར་མ་རེད་དམ ང་ཚོས་སྐད་ཆ་དེ་ལྟར་བཤད་དགོས་ན་རྨང་གཞི་ཇེ་བརྟན་ལ་འགྲོ་དགོས་ཀྱི་འདུག
བཀའ་བློན་ཁྲི་པ་སྲིད་སྐྱོང་བློ་བཟང་སེང་གེ་མཆོག་གིས་སྐུ་ངལ་འཛེམ་མེད་ཐོག ཕྱིའི་རྒྱལ་ཁབ་ཁག་གི་ཆེའི་མཐོའི་དབུ་ཁྲིད་རྣམ་པ་དང་གྲོས་ཚོགས་འཐུས་མི། བོད་དོན་རྒྱབ་སྐྱོར་བ་དང་དེ་གའི་བོད་མི་སྐྱབས་བཅོལ་བ་ཚོར་ཐུག་འཕྲད་དང་། བོད་དོན་ཁྱབ་བསྒྲགས་ཀྱི་ཕྱག་ལས་ཤུགས་ཆེན་པོ་གནང་གི་ཡོད་པ་མ་ཟད།
བཙན་བྱོལ་ནང་གི་ས་གནས་གཞིས་ཆགས་ཁག་དང་སློབ་གྲྭ་ཁག ས་དགེ་བཀའ་རྙིང་བོན་དང་བཅས་པའི་དགོན་པ་ཁག་བཅས་སུ་གཟིགས་སྐོར་གནང་སྟེ་ས་གནས་མི་མང་གི་བདེ་བ་སྡུག་བསྔལ་ལ་རྟོགས་ཞིབ་མཛད་ཀྱི་ཡོད་པ་མ་ཟད།
ས་གནས་ཁག་ནང་གི་རྒན་གསོ་ཁང་དང་བྱིས་གཉོར་ཁང་། བཟོ་གྲྭ། སྨན་ཁང་བཅས་སུ་ཡང་ལྟ་སྐོར་ཞིབ་ཚགས་གནང་སྟེ་མི་མང་གི་བདེ་སྡུག་ཕྲག་ཏུ་བཞེས་ཏེ་ཕྱག་ལས་གནང་གི་ཡོད་པ་དེར་རྗེས་སུ་ཡི་རངས་དང་བསྔགས་བརྗོད་གྲངས་མེད་སྙིང་ཁུངས་རུས་པའི་གཏིང་ནས་ཞུ་བཞིན་ཡོད་ལགས།
བཀའ་ཁྲི་བློ་བཟང་སེང་གེ་མཆོག་ལ་ནམ་བཞག་རྒྱུན་དུ་ནས་བཀའ་སློབ་གསར་པ་དང་གནད་འགག་ཅན་གང་ཡང་གསུང་རྒྱུ་མེད་པར་བསྐྱར་བཤད་ཡང་བཤད་བྱས་ནས་སྡོད་པའི་ལུགས་སྲོལ་ཞིག་ཡོད་པ་དང་གཅིག གསར་འགོད་པ་བནྡེ་སྐྱབས་ལགས་ཀྱིས་གསར་འགྱུར་ནང་གི་གནད་འགག་ལ་ཐུག་ཡོང་དུས་ཞིབ་འབྲི་མི་བྱེད་པར་ཚིག་ཉོག་རྣམས་སྤུངས་ནས་ལས་བསླ་འབྲི་བྱེད་པའི་རྒྱུ་ལུགས་ཀྱི་རང་གཤིས་ཤིག་ཡོད་པ་དང་གཉིས། ས་ར་མཐོ་སློབ་ཀྱི་འགན་འཛིན་འཇམ་དཔལ་ལགས་དང་དེའི་ལས་བྱེད་རྣམ་པར་མཐོ་སློབ་འཛིན་སྐྱོང་སྤེལ་གསུམ་གྱི་ཐབས་རྩལ་དང་ཤེས་ཡོན་མེད་པ་དང་གསུམ་སོགས་ཀྱི་་རྒྱུ་རྐྱེན་འདི་དག་གི་དབང་གིས་གོང་གསལ་གསར་འགྱུར་འདི་ཀློག་འདོད་ཁྱོན་ནས་བྱུང་མ་སོང་ངོ།