ཀུའུ་ལ་དུས་འགྱངས་སྲོག་ཁྲིམས་བཅད་འདུག

དེ་རིང་ཀུའུ་ཁའེ་ལའེ་ལ་ལོ་ ༢ དུས་འགྱངས་ཀྱི་སྲོག་ཁྲིམས་དང་། ཀྲང་ཞའོ་ཅོན་ལ་ལོ་ ༩ བཙོན་འཇུག་ཁྲིམས་ཐག་བཅད་འདུག

དེ་རིང་ཕྱི་ཚེས་ ༢༠ ཉིན་པེ་ཅིན་དུས་ཚོད་ ༩ སྐར་མ་ ༤༠ ཙམ་གྱི་སྟེང་། རྒྱ་ནག་ཨན་ཧའེ་ཧི་ཧྥེ་གྲོང་ཁྱེར་མི་དམངས་ཁྲིམས་ཁང་གིས་ཁྲིམས་ར་ཚོགས་ཏེ། ཀུའུ་ཁའེ་ལའེ་ལ་ལོ་ ༢ དུས་འགྱངས་ཀྱི་སྲོག་ཁྲིམས་དང་། ཀྲང་ཞའོ་ཅོན་ལ་ལོ་ ༩ བཙོན་འཇུག་ཁྲིམས་ཐག་བཅད་ཡོད་པ་དང་། ཀུའུ་ཁའེ་ལའེ་དང་ཀྲང་ཞའོ་ཅོན་གཉིས་ཀྱིས་ཀྱང་ཁྲིམས་ཆད་དང་ལེན་གྱི་རྣམ་འགྱུར་བསྟན་ཡོད་འདུག སྐབས་དེར་ཁྲིམས་རའི་ནང་གསར་འགོད་པ་གཅིག་ཀྱང་བཏང་མི་འདུག

ཀུའུ་ཁའེ་ལའེ་ལ་སྲོག་ཁྲིམས་བཅད་པ་ཕྱིར་བསྒྲགས་བྱས་ཡོད་ཀྱང་། ལོ་ ༢ ཀྱི་དུས་འགྱངས་བཟོས་ཡོད་སྟབས། རྒྱུན་ལྡན་གྱི་གནས་སྟངས་ལྟར་ན། ལོ་གཉིས་རྗེས་སུ་སྲོག་ཁྲིམས་ཕལ་ཆེ་བ་རང་བཞིན་གྱིས་ཚེ་བཙོན་གྱི་ངོ་བོར་བསྒྱུར་འགྲོ་བཞིན་ཡོད་པ་རེད།

ཟླ་འདིའི་ཕྱི་ཚེས་ ༩ ཉིན་ཀུའུ་ཁའེ་ལའེ་ཡི་གྱོད་དོན་ཞིབ་བཤེར་གྱི་ཁྲིམས་ར་ཚོགས་ཏེ། དུས་ཡུན་ཉིན་གཅིག་རིང་ཁྲིམས་བཤེར་བརྒྱུད་རིམ་ཆ་ཚང་མཇུག་སྒྲིལ་ཡོད་པ་རེད། པེ་ཅིན་གྱི་ཁྲིམས་ལུགས་ཆེད་མཁས་པ་རེ་འགས།  རྒྱལ་ཁབ་ཕྱི་ནང་གཉིས་སུ་འབྲེལ་བ་ཆགས་ཡོད་པའི་མི་གསོད་གྱོད་དོན་ཆེན་པོ་དེ་འདྲ་ཞིག་ཐག་གཅོད་ཐད། ཝང་ལིས་ཅོན་གཙོས་འབྲེལ་ཡོད་དཔང་མི་གཅིག་ཀྱང་ཁྲིམས་ར་འབོད་འགུགས་མ་བྱས་པ་དང་། དོགས་ཡོད་མི་སྣ་དང་ཞུ་གཏུགས་པ་ཕྱོགས་གཉིས་ཀྱི་ཁྲིམས་རྩོད་པར་ཕན་ཚུན་འདྲི་བརྩད་ཀྱང་བྱེད་མ་བཅུགས་པ་དེ་ནི་དོགས་གཞི་ཆེན་པོ་ཡིན་སྐོར་བརྗོད་འདུག 

ཟླ་འདིའི་ཕྱི་ཚེས་ ༡༣ ཉིན་ཟི་ཁྲོན་ཁྲིན་ཏུའུ་རུ་ཝང་ལིས་ཅོན་གྱི་གྱོད་དོན་ཁྲིམས་བཤེར་གྱི་ཁྲིམས་ར་ཚོགས་ཡོད་ཀྱང་། ཝང་གི་གནད་དོན་ནི་རྒྱལ་ཁབ་ངོ་ལོག་གྱི་གྱོད་དོན་ལ་ངོས་འཛིན་གྱིས།  རྒྱལ་ཁབ་ཀྱི་གསང་བ་དང་འབྲེལ་བ་ཡོད་པར་ཁ་གཡར་ཏེ། ཁྲིམས་བཤེར་གྱི་བརྒྱུད་རིམ་ཆ་ཚང་ཕྱོགས་ཡོངས་ནས་སྦས་གསང་བྱས་ཡོད་པ་རེད།

སྐབས་དོན་དབྱེ་ཞིབ་པ་དག་གིས། མ་གཞི་ཀུའུ་ཁའེ་ལའེ་ཡི་གྱོན་དོན་ནི་མི་གསོད་ཀྱི་ཉེས་དོན་རྐྱང་བ་ཞིག་མ་ཡིན་པར། དཔལ་འབྱོར་རུལ་སུངས་དང་ལྐོག་འབྲེལ་ནག་ཚོགས་ཀྱི་གྱོད་དོན་ཆེན་པོ་ཞིག་ཆགས་ཡོད་པ་མ་ཟད། ཝང་ལིས་ཅོན་དང་པའོ་ཞིས་ལའེ་གྱི་གནད་དོན་འབྲེལ་བ་དམ་པོ་ཡོད་ཀྱང་།  རྒྱ་གཞུང་ཁྲིམས་ཁང་གིས་གནད་དོན་དེ་དག་རྩད་གཅོད་གང་ཡང་མ་བྱས་པ་དེ་ནི། པའོ་ཞིས་ལའེ་ཡི་གནད་དོན་དང་འབྲེལ་བའི་རྒྱ་གཞུང་དཔོན་རིགས་ནང་ཁུལ་གྱི་དབང་ཆ་འཐབ་རྩོད་ཁྲོད། ཧུའུ་ཅིན་ཐའོ་དང་ཝུན་ཅ་པའོ་གཉིས་ཀྱིས་ཅཱང་ཤོག་ཁག་གི་སྟོབས་ཤུགས་ལ་ཡ་ལན་ཆེན་པོ་སྤྲོད་ཐུབ་ཀྱིན་མེད་པ་མཚོན་ཡོད་སྐོར་བརྗོད་འདུག

གསར་འགོད་པ། ཚེ་རིང་རྒྱལ།