སྔར་ལོའི་ཕྱི་ཟླ་བདུན་པའི་ནང་རྒྱ་ནག་གཞུང་གིས་བླ་བྲང་བསང་ཆུ་རྫོང་༼རྒན་གྱའི་ཕ་སྐད་དོ་དམ་ཚན་ཆུང་༽ཞེས་པའི་བོད་ཀྱི་སྐད་ཡིག་དང་ཁོར་ཡུག་སྲུང་སྐྱོབ་ཐད་ཕྱག་ལས་གནང་བཞིན་པའི་ཚོགས་པའི་ཚོགས་མི་ཁག་ཅིག་བཀག་ཉར་འདྲི་བརྩད་བྱས་མཐར། ཚོགས་པའི་ཡིག་ཆ་དང་ཐམ་ཀ་སོགས་གཞུང་བཞེས་བཏང་སྟེ་ལས་མཚམས་འཇོག་ཏུ་བཅུག་ཡོད་འདུག
ངྷ་རམ་ས་ལའི་དབུས་སྣེ་ལེན་ཁང་ལ་བོད་ནས་གསར་དུ་འབྱོར་བའི་གྲྭ་བསོད་ནམས་རྒྱ་མཚོ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༠༩ ཟླ་ ༡༡ ཚེས་ ༡༧ ཉིན་རྒན་གྱ་བྲག་དཀར་དགོན་པའི་དགེ་འདུན་པ་ཁག་ཅིག་གིས་མ་སྐུལ་དང་བླངས་ཐོག་༼རྒན་གྱའི་ཕ་སྐད་དོ་དམ་ཚན་ཆུང་༽ཞེས་པ་ཞིག་བཙུགས་ཡོད་པ་དང་། ཚན་ཆུང་དེས་དེང་གི་གསར་བྱུང་དངོས་པོ་མང་པོ་ཞིག་ལ་བོད་པ་རང་གི་བརྡ་དང་ཐ་སྙད་བེད་སྤྱོད་མ་བྱས་པར་རྒྱ་སྐད་དང་བསྲེས་ལྷད་ཅན་གྱི་སྐད་སྤྱོད་ཀྱི་ཡོད་པ་དང་། དམངས་ཁྲོད་ཀྱི་ཁ་བརྡའི་ནང་རྒྱ་སྐད་ཀྱི་ཐ་སྙད་མང་པོ་ཞིག་རྒྱུན་འབྱམས་སུ་སོང་སྟེ་མི་རིཊ་རང་གི་སྐད་ཡིན་མིན་ཐེ་ཚོམ་སྐྱེ་དགོས་པའི་གནས་སྟངས་ལ་སླེབས་པ་སོགས་ལ་གཞིགས་ཏེ། རྒན་གྱ་ས་ཁུལ་གྱི་སློབ་མ་རྒན་པ་ཚོས་གཞོན་པ་རྣམས་ལ་གུང་གསེང་སྐབས་དང་བསྟུན་ནས་ཟབ་སྦྱོང་འཛིན་གྲྭ་བཙུགས་ཏེ། བོད་ཡིག་བོད་སྐད་གཙང་མ་ཡོང་ཐབས་སུ་འབད་འབུང་བྱེད་ཀྱི་ཡོད་པར་རམ་འདེགས་བཅས་ཀྱི་ཆེད་དུ་ཡིན་འདུག
༢༠༠༩ ལོ་ནས་བཟུང་ལོ་རེར་ཚོགས་མི་རེ་ལ་རྒྱ་སྒོར་ ༡༥ ནས་ ༢༠ བསྡུ་བཞིན་པའི་མ་དངུལ་གྱིས་གསེར་རྟ་བླ་རུང་ལྔ་རིག་ནང་བསྟན་སློབ་གླིང་དང་། རྭ་རྒྱ་ཤེས་རིག་ནོར་བུའི་གླིང་གཉིས་ཀྱིས་པར་བསྐྲུན་བྱས་པའི་༼ ཐ་སྙད་ཕྱོགས་བསྒྲིགས༽ཀྱི་དེབ་ཕྲེང་གཉིས་ལས་རྒྱུན་སྤྱོད་ཀྱི་ཐ་སྙད་ ༢༠༠ ལྷག་ཟུར་འདོན་གྱིས་༼རྒྱུན་བཀོད་ཐ་སྙད་ཕྱོགས་བསྒྲིགས༽ ཞེས་པའི་དེབ་ཆུང་ ༢༠༠༠ ལྷག་པར་བསྐྲུན་གྱིས་རྒན་གྱའི་ཚོ་བ་དྲུག་གི་སྡེ་བ་ ༡༤ ཙམ་ནང་འགྲེམས་སྤེལ་དང་། ཟླ་ངོ་གཉིས་གསུམ་རེའི་མཚམས་སུ་སྡེ་བ་ཁག་ནང་འཚོགས་བཞིན་པའི་ཟབ་སྦྱོང་འཛིན་གྲྭར་ཕྱིན་ཏེ། པཎ་ཆེན་སྐུ་ཕྲེང་བཅུ་བ་མཆོག་གིས་བོད་སྐད་ཡིག་སྲུང་སྐྱོབ་ཐོག་གནང་བའི་བཀའ་སློབ་དང་། རྒྱ་ནག་གི་རྩ་ཁྲིམས་ནང་གྲངས་ཉུང་མི་རིགས་ཀྱི་སྐད་ཡིག་སྲུང་སྐྱོབ་ཀྱི་ཐོབ་ཐང་སྐོར་སོགས་ངོ་སྤྲོད། བོད་སྐད་གཙང་མའི་ཐ་སྙད་བློ་འཛིན་དང་བེད་སྤྱོད་ཡག་པོ་གཏོང་མཁན་དག་ལ་དཔེ་དེབ་དང་འབྲི་དེབ་ཀྱི་གསོལ་རས་གནང་བ་སོགས་ཀྱི་ཕྱག་ལས་གནང་ཡོད་འདུག
ཉིས་སྟོང་བཅུ་ལོར་ས་གནས་མང་ཚོགས་ཚོས་ཕ་སྐད་དོ་དམ་ཚན་ཆུང་དེས་སྐད་ཡིག་སྲུང་སྐྱོབ་གཅིག་པུ་མིན་པར། ས་གནས་ཀྱི་ཁོར་ཡུག་སྲུང་སྐྱོབ་ཐད་བྱ་འགུལ་ཞིག་སྤེལ་དགོས་པའི་རེ་བ་བཏོན་པ་ལྟར། ༢༠༡༠ ལོའི་ཟླ་ ༣ ཚེས་ ༢༤ ཉིན་ཕ་སྐད་དོ་དམ་ཚོགས་ཆུང་གི་གོ་སྒྲིག་འོག རྒན་གྱའི་ཚོ་བ་དྲུག་གི་སྡེ་བ་ ༡༤ དང་དགོན་སྡེ་ཁག་ ༣ བཅས་ཀྱི་མི་སྣ་བསྐངས་ཏེ། སུ་རུག་སྡེ་བའི་ནང་ཁོར་ཡུག་སྲུང་སྐྱོབ་སྐོར་གྱི་ཚོགས་འདུ་ཚོགས་རྒྱུའི་གྲ་སྒྲིག་བྱས་སྐབས། ཞང་སྲིད་གཞུང་གིས་བཀག་སྡོམ་བྱས་སྟབས། ཞང་སྲིད་གཞུང་གི་ཚོགས་ཁང་དུ་སྐྱ་སེར་མི་སྣ་ ༦༠ ཙམ་འདུ་འཛོམས་ཀྱིས་ལོ་རེའི་བོད་ཟླ་ ༤ ཚེས་ ༡ ནི་རྒན་གྱའི་ས་ཁུལ་ཡོངས་ཀྱི་ཁོར་ཡུག་གཙང་བཟོའི་ཉིན་མོར་གཏན་ཁེལ་བྱས་ཡོད་འདུག
ལོ་དེའི་བོད་ཟླ་ ༤ བའི་ཚེས་ ༡ ཉིན་ཕ་སྐད་དོ་དམ་ཚན་ཆུང་གིས་རྒྱན་གྱའི་སྡེ་བ་ཡོངས་སུ་ལྕགས་སྡོང་སྟེང་༼ ང་ཚོའི་ཁོར་ཡུག་ལ་འབག་བཙོག་བཟོ་མི་ཆོག ༽ཞེས་བསྐོས་ཡོད་པ་བཙུགས་ཏེ་ལས་འགུལ་དངོས་སུ་ལག་བསྟར་བྱས་ཡོད་པ་དང་། གཞན། སྡེ་བ་ཁག་ཏུ་ཡིག་རྨོངས་སེལ་ཆེད་༼ ཡིག་རྨོངས་སེལ་བའི་སྒྲོན་མེ། ༽ ཞེས་པའི་དེབ་ཆུང་ ༥༠༠ ཙམ་བཀྲམས་ཏེ་སློབ་ཁྲིད་མགོ་འཛུགས་ཀྱིས་ལོ་དེའི་ཕྱི་ཟླ་ ༡༢ པའི་ཚེས་ ༨ ཉིན་མཇུག་བསྡུ་རྒྱུའི་འཆར་གཞི་ཡོད་ཀྱང་། ཕྱི་ཚེས་ ༧ ཉིན་བླ་བྲང་བསང་ཆུ་རྫོང་བདེ་འཇགས་ལས་ཁུངས་དང་ཆོས་ལུགས་ལས་ཁུངས། རྒན་རྒྱ་ཞང་སྲིད་གཞུང་གི་ལས་བྱེད་བཅས་བྲག་དཀར་དགོན་པར་ཡོང་སྟེ། ཕ་སྐད་དོ་དམ་ཚན་ཆུང་གི་བྱ་འགུལ་དེ་དག་རྒྱལ་ཁབ་ཁ་བྲལ་དང་མང་ཚོགས་བསླུ་བྲིད་གཏོང་བའི་བྱ་འགུལ་ཡིན་སྐོར་བརྗོད་དེ། ཚོགས་མི་ཁག་ཅིག་ལ་ཚོཊ་པས་མ་དངུལ་གྱི་འབྱུང་ཁུངས་དང་ཕྱི་རྒྱལ་ལ་འབྲེལ་བ་ཡོད་མེད། གསེར་རྟ་དང་ར་རྒྱའི་དགེ་རྒན་ཚོས་བཀོད་འདོམས་བྱས་མིན། ཚོགས་མིའི་ཡོང་ཁུངས་སོགས་འདྲི་ཞིབ་དང་། གོང་རིམ་གྱི་ཆོག་མཆན་མེད་པར་བྱ་འགུལ་སྤེལ་བའི་ནག་ཉེས་འོག་གྲྭ་བ་ ༤ ལ་སྐྱོན་ངོས་ལེན་གྱི་ཡི་གེ་འབྲི་རུ་བཅུག་སྟེ། ཉིན་དེར་ཕ་སྐད་དོ་དམ་ཚན་ཆུང་གི་ལས་ཐམ་དང་ཡིག་ཆ་ཁག དཔེ་དེབ་སོགས་གཞུང་བཞེས་བཏང་ཡོད་པ་མ་ཟད། རྗེས་ཕྱོགས་དགོན་པའི་ནང་སློབ་མ་གཅིག་ལའང་སློབ་ཁྲིད་བྱེད་མི་ཆོག་པ་དང་། སོ་སོའི་ནང་མིར་ཡང་སློབ་ཁྲིད་བྱེད་མི་ཆོག་པའི་བཙན་བཀའ་བཏང་ཡོད་འདུག
དེའི་རྗེས་སླར་ཡང་ལས་བྱེད་ ༢༠ ལྷག་ཡོང་སྟེ། དགོན་པ་ཁག་དྲུག་ཏུ་བགོས་རྗེས་ཉིན་བཅུ་ལྷག་གི་རང་༼ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་སྲིད་སྤྱི་ཁྱབ་ཁང་གི་ཆོས་ལུགས་ལས་དོན་སྲོལ་ཡིག་ཨང་ ༤༢༦ པ། ༽ དང་༼ རྒན་གྱ་ཞང་བྲག་དཀར་དགོན་པའི་དོ་དམ་སྲོལ་ཡིག༽བཅས་པ་གཉིས་ཀྱི་ཐོག་ནས་སློབ་གསོ་བརྒྱབ་པ་མ་ཟད། ཕ་སྐད་དོ་དམ་ཚན་ཆུང་གི་ནག་ཉེས་དང་འབྲེལ་ཏེ། དགོན་པའི་གྲྭ་བ་ ༨༧ ལྷག་ལ་ངོས་ལེན་ཡི་གེ་འབྲི་རུ་བཅུག་ཡོད་འདུག
དེ་མིན། བཀའ་བློན་ཁྲི་པའི་དམ་འབུལ་ཉིན་མོ་དང་ཕྱི་ཕྱོགས་ཀྱི་དུས་དྲན་མཛད་སྒོའི་ཉིན་མོ་ཁག་ཏུ་གྲྭ་བ་ཚོ་མི་མང་འདུ་འཛོམས་སར་སོང་མི་ཆོག་པ་དང་། མི་མང་གི་བསང་གསོལ་གཏོང་སར་འགྲོ་མི་ཆོག་པ་བཅས་ཀྱི་བཀའ་བཏང་ཡོད་པ་མ་ཟད། སྐབས་དེ་ནས་བཟུང་དགོན་པའི་ནང་དུ་དོ་དམ་པ་སོགས་མི་གསུམ་དང་རྫོང་གི་མི་གསུམ། ཞང་གི་མི་གསུམ་བཅས་མི་ ༩ ཆེད་དུ་བསྐོ་བཞག་བྱས་ཏེ། ནམ་རྒྱུན་གྲྭ་བ་ཚོས་འགྲོ་འདུག་སྤྱོད་གསུམ་ལ་ལྟ་རྟོག་བྱེད་ཀྱི་ཡོད་འདུག་ལ། ད་ལོའི་ལོ་མགོར་བསང་ཆུ་རྫོང་གི་རྫོང་དཔོན་གཞོན་པ་ཀླུ་འབུམ་ཐར་དགོན་པར་ཡོང་སྟེ། གྲྭ་མང་ལ་ ༢༠༠༨ ལོའི་ཚུན་ནས་བླ་བྲང་དགོན་པ་ལས་གཞན་ཡར་ལངས་བྱེད་མཁན་འབོ་ར་དགོན་ཡིན་པ་དང་། དེ་ལས་གཞན་ཞིག་ཡོད་པ་དེ་བྲག་དཀར་དགོན་པའི་ནང་ཕ་སྐད་གཙང་མ་དང་ཁོར་ཡུག་སྲུང་སྐྱོབ་ཀྱི་མིང་ཐོག་ནས་སྤྱི་ཚོགས་བརྟན་བརླིང་ལ་གནོད་པའི་བྱེད་སྒོ་རིགས་སྤེལ་ཡོད་ཚུལ་གྱི་སྐྱོན་བརྗོད་བཅས་བྱས་ཡོད་འདུག
གསར་འགོད་པ། དོན་གོ
༼ བོད་ཀྱི་དུས་བབ་ཚགས་པར་ལས་བདམས་བཀོད་བྱས། ༽
རྒན་གྱའི་སྒྲིག་འཛུགས་གཏོར་བར་སྐྱོ་སོང་།
རྡ་སར་ནང་འཁྲུག་མང་བར་སུན་སོང་།
བོད་གཞུང་གཤེད་དུ་སྒྲུབ་པར་ཞེད་སོང་།
རང་བཙན་ཉེས་པར་བཤད་པར་འཇིགས་སོང་།
བོད་ལ་དཔའ་རྒོད་མང་བར་གུས་སོང་།
རང་སྲོག་མེ་རུ་བསྒྲོན་པར་དད་སོང་།
རང་བཙན་གློད་ཀྱི་མེད་པར་དགའ་སོང་།
ཕྱིས་འབྱུང་བོད་ལ་ཐུག་པས་སྐྱིད་སོང་།