ཞི་ཅིན་ཕིན་གང་དུ་ཡོད།

དྷ་ས། འབའ་པ་ཡེ་ཤེས་ཀྱིས་བསྒྱུར།

གཤམ་གསལ་འདི་ནི་སྦི་སྦི་སིའི་དྲ་རྒྱའི་ཁོངས་ནས་ཨེ་ཤ་ཡའི་དཔྱད་གླེང་ཚན་པ་ནང་འདོན་སྤེལ་བྱེད་པའི་ཞི་ཅིན་ཕིན་གང་དུ་ཡོད་མེད་སྐོར་གྱི་དཔྱད་གཏམ་ཞིག་རེད། ཁ་སང་ཞི་ཅིན་ཕིན་རྒྱ་ནག་གི་དམག་སྤྱི་ཟུར་པ་འདས་གྲོངས་ཕྱིན་པའི་གཞུང་འབྲེལ་མྱ་ངན་གུས་འདུད་ཀྱི་མཛད་སྒོར་ཞུགས་ཡོད་སྐོར་གནས་ཚུལ་ཐོན་ཡོད་ཀྱང་ད་དུང་མང་ཚོགས་ཀྱི་མདུན་དུ་སྔ་ལྟར་མཐོང་རྒྱུ་མེད་པ་དང༌། ཁོང་མི་རིང་བར་རྒྱ་ནག་གི་སྲིད་འཛིན་གསར་པ་ཆགས་རྒྱུ་ཡིན་པར་བརྟེན། ད་ཆ་ཞི་ཅིན་ཕིང་འཚོལ་་མཁན་ནི་ཉིན་བཞིན་ཇེ་མང་དུ་འགྲོ་བཞིན་ཡོད། སྒྱུར་བ་པོས།

དེང་སང་མི་སུ་ཞིག་ནས་ཞི་ཅིན་ཕིན་གི་མཛད་འཆར་ཁག་གློ་བུར་ཕྱིར་འཐེན་བྱེད་དགོས་པའི་རྒྱུ་མཚན་གང་ཡིན་གཏན་ནས་ཤེས་ཀྱི་མེད། རྒྱ་ནག་ནི་དཔལ་འབྱོར་གྱི་ཆ་ནས་འཛམ་གླིང་ཐོག་སྟོབས་ཆེན་རྒྱལ་ཁབ་ཨང་གཉིས་པ་ཡིན་ཞིང༌། མུ་མཐུད་ནས་སྟོབས་ཆེན་རྒྱལ་ཁབ་ཕུལ་བྱུང་ཞིག་ཡོང་བར་མདུན་སྐྱོད་བྱེད་བཞིན་པའི་སྒང་རེད། མི་ལོ་བཅུ་རེའི་མཚམས་སུ་གུང་ཁྲན་ཏང་གི་མགོ་ཁྲིད་འཕོ་འགྱུར་ཐེངས་རེ་བྱེད་དགོས་ཀྱི་ཡོད་ནའང༌། རྒྱ་ནག་དམར་ཤོག་གི་མགོ་ཁྲིད་ཆགས་རྒྱུའི་རེ་བ་ཡོད་པའི་མི་དེ་ད་ཆ་འཛམ་གླིང་གི་མི་རྣམས་ཀྱི་མིག་འོག་ནས་མེད་པར་གྱུར་པ་མ་ཟད། རྒྱུ་མཚན་ཅིའི་ཕྱིར་ཁོང་མཐོང་ཡུལ་ནས་མེད་པར་གྱུར་པ་དེ་ང་ཚོས་ནམ་ཡང་ཤེས་ཐུབ་ཀྱི་མེད་པ་རེད།

ཞི་ཅིན་ཕིན་ནད་པ་ཆགས་པ་རེད་དམ། སྙིང་ནད་ཀྱིས་ཟིན་པ་རེད། ཡང་ན། རྐང་རྩེད་སྤོ་ལོའམ་ཆུ་སྐྱེལ་གྱི་སྤྲོ་སེང་གང་རུང་ཞིག་ནས་ཁོང་གི་ལྟག་རྒྱབ་ལ་རྨས་ཕོག་པ་རེད་དམ། ཡང་ན། ཁོང་ཟླ་བ་རྗེས་མའི་ནང་ཏང་གི་ཚོགས་ཆེན་ཐོག་སྲིད་འཛིན་ཧུའུ་ཅིན་ཐའོ་ཡི་ལག་ནས་སྲིད་དབང་རྩིས་ལེན་བྱེད་རྒྱུའི་གྲ་སྒྲིག་གི་ལས་རིམ་ཁག་ནང་བྲེལ་བ་ཆེན་པོ་ཞིག་ཡོད་པ་རེད་དམ། ཡང་མིན་ན་དབང་ཆ་འཐབ་རྩོད་ཀྱི་ངན་གཡོའི་འོག་ནས་ཁོང་ལ་མཚན་ལྟས་ངན་པ་ཞིག་བྱུང་བ་གང་རེད།

འདྲི་བ་འདི་ཚོ་ནི་ཟིར་སྒྲ་ཆེ་བའི་རྒྱ་ནག་གི་གསར་འགོད་པ་ཚོའི་བསམ་ཚུལ་དང་འགྲེལ་བཤད་སྣ་ཚོགས་ཡོང་སའི་གཞི་ཁུངས་ཤིག་ཡིན། ཁོང་སྣུམ་འཁོར་བརྡབ་སྐྱོན་འོག་ནས་རྨས་ཕོག་པ་རེད་ཟེར་གྱི་ཡོད། འདི་ནི་ཕལ་ཆེར་ཁོང་ལ་ལྐོག་ཇུས་ཀྱི་ངན་གཤོམ་འོག་སྦྱོར་ངན་བརྩམས་པ་རེད་ཟེར་ཡང་དེ་ནི་ཁུངས་ལུང་མེད་པའི་རྟོག་བཟོའི་སྐད་ཆ་ཞིག་ཏུ་མངོན། འོན་ཀྱང༌། རྒྱ་གཞུང་གི་དེའི་སྐོར་གནས་ཚུལ་ཅི་ཡང་བཤད་ཀྱི་མེད་པ་དང༌། གནས་ཚུལ་དེ་གཅིག་པུའི་ཐོག་ལ་འགྲེལ་བཤད་རྒྱག་མཁན་སྣ་ཚོགས་ཤིག་ཡོང་གི་ཡོད་པར་བརྟེན། དངོས་ཡོད་ཀྱི་གནས་ཚུལ་ཤེས་མཁན་ནི་སུ་ཡང་མེད་པ་རེད། རྒྱ་ནག་དམར་ཤོག་ཚོགས་པའི་གལ་ཆེའི་གནད་ཡོད་མགོ་ཁྲིད་ཅིག་མང་ཚོགས་མདུན་ནས་མཐོང་ཡུལ་དུ་མེད་པ་ཆགས་དུས་ནང་ཁུལ་ལ་ཆབ་སྲིད་ཀྱི་འགལ་ཟླ་ཞིག་ཡོད་པའི་རྟགས་མཚན་མངོན་ཡང༌། ད་ལྟའི་ཆ་ལ་དེའི་སྐོར་དཔང་རྟགས་གང་ཡང་རྙེད་སོན་བྱུང་མེད། འོན་ཀྱང་དེའི་སྐོར་གནས་ཚུལ་འགྲེལ་བཤད་ཅི་ཡང་མེད་སྟབས། གཏམ་འཆལ་འདྲ་མིན་སྣ་ཚོགས་ཤིག་སྤྱི་ཚོགས་ནང་མངོན་རྗན་དུ་ཐོན་ཡོང་གི་ཡོད།

རྒྱུན་ལྡན་རྒྱ་ནག་གི་མགོ་ཁྲིད་ཚོ་ནི་ཡང་ཡང་མང་ཚོགས་ཁྲོད་དུ་མཐོང་རྒྱུ་དཀོན་ཞིང༌། ཁོང་ཚོའི་ཉིན་རེའི་བྱེད་སྒོ་ཁག་ཀྱང་མང་ཚོགས་སུ་ཕྱིར་བསྒྲགས་བྱེད་པ་ཧ་ཅང་ཉུང་ཉུང་ཡིན། ཡོངས་གྲགས་ཅན་གྱི་ཏང་གི་རྗེས་འཇུག་ལོ་ན་ ༥༩ ལ་སོན་པ་རྒྱ་ནག་གི་སྲིད་འཛིན་གཞོན་པ་སྐུ་ཞབས་ཞི་ཅིན་ཕིན་ཕྱི་རྒྱལ་ཁབ་ཀྱི་དཔོན་རིགས་ཚོ་དང་འཚམས་གཟིགས་མཇལ་མོལ་དང་སྣེ་ལེན་བྱེད་རྒྱུ་རྣམས་ཕྱིར་འཐེན་བྱས་པ་དེ་ནི་རྒྱུན་ལྡན་མིན་པའི་གནས་ཚུལ་ཞིག་ཏུ་གྱུར་ཡོད། མང་ཚོགས་ཀྱིས་ཁོང་མཐའ་མ་མཐོང་བའི་དུས་ཚོད་དེ་ནི་ཕྱི་ཟླ་ ༩ ཚེས་ ༡ རེད། བདུན་ཕྲག་སྔ་མའི་རེས་གཟའ་ལྷག་པ་ཉིན་ཁོང་གིས་ཨ་རིའི་རྒྱལ་དོན་དྲུང་ཆེ་ལྕམ་ཧེ་ལ་རི་ཀེམ་ཌོན་དང་མཇལ་མོལ་བྱེད་རྒྱུ་ཕྱིར་འཐེན་བྱེད་སྐབས་ཨ་རིའི་གཞུང་འབྲེལ་མི་སྣས་དེའི་རྒྱུ་མཚན་གཙོ་བོ་ནི། ཞི་ཅིན་ཕིན་གི་ལུས་པོའི་ལྟག་རྒྱབ་ལ་རྨས་ཕོག་ཡོད་པས་རྐྱེན་གྱིས་མཇལ་མོལ་བྱུང་མེད་སྐོར་བརྗོད་འདུག

དེ་རྗེས་ཌེན་མག་གཞུང་གིས་རེས་གཟའ་ཕུར་བུ་ཉིན་བརྗོད་གསལ། རེས་གཟའ་ཟླ་བ་ཉིན་གཏན་འཁེལ་ཟིན་པའི་ཌེན་མག་སྲིད་བློན་ (Helle Thorning-Schmidt)མཆོག་དང་ཞི་ཅིན་ཕིན་འཚམས་གཟིགས་ཐུག་འཕྲད་བྱེད་རྒྱུ་ཡིན་ཡང་ཁོང་གིས་ཕྱིར་འཐེན་བྱས་ཡོད་ཅེས་འགྲེལ་བརྗོད་བྱས་ཡོད། ཁོང་ཚོས་ཀྱང་ཞི་ཅིན་ཕིན་ཐུག་འཕྲད་བྱེད་མ་ཐུབ་པའི་རྒྱུ་མཚན་གང་ཡིན་མིན་ཤེས་ཐུབ་བྱུང་མེད། ཞི་ཅིན་ཕིན་སིང་གྷ་པུར་སྲིད་བློན་ (Lee Hsien Loong) དང་ཐུག་འཕྲད་བྱེད་རྒྱུ་ཡང་མཛད་འཆར་ནས་ཕྱིར་འཐེན་བྱས་པ་རེད། རྒྱུན་ལྡན་རྒྱ་ནག་གི་མགོ་ཁྲིད་ཚོ་ནི་གདན་ཐོབ་རྗེས་འབྲེལ་ལ་རྩོད་དད་ཆེན་པོ་ཡོད་པར་བརྟེན། ད་ལན་ཞི་ཅིན་ཕིན་གྱིས་རྒྱལ་དོན་འཚམས་གཟིགས་སུ་ཡོང་མཁན་ཕྱི་རྒྱལ་གྱི་དཔོན་རིགས་ཚོར་ཐུག་འཕྲད་བྱེད་རྒྱུ་ཕྱིར་འཐེན་བྱས་པ་དེ་རྒྱུན་ལྡན་མིན་པའི་གནས་ཚུལ་ཆེན་པོ་ཞིག་ཏུ་གྱུར་ཡོད།

རའུ་ཊིར་གསར་ཁང་གིས་གནས་ཚུལ་བཀོད་པ་གཞིར་བཟུང་བྱས་ན། པེ་ཅིན་གྱི་མགོ་ཁྲིད་ཚོ་དང་བློ་ཐག་ཉེ་པོ་ཡོད་པའི་གནས་ཚུལ་རྗོད་མཁན་ཞིག་གིས་ཞི་ཅིན་ཕིན་རྒྱུན་ལྡན་སྤྲོ་སེང་བྱེད་སྒོ་ཆུ་སྐྱེལ་བརྒྱབ་པའི་རྐྱེན་གྱིས་ཁོང་གི་ལུས་པོའི་ལྟག་རྒྱབ་ལ་རྨས་ཕོག་པ་རེད་ཅེས་བརྗོད་འདུག འོན་ཀྱང་གནས་ཚུལ་རྗོད་མཁན་དེས་དུས་ཚོད་གང་དང་ས་ཆ་གང་ཞིག་ཏུ་དོན་རྐྱེན་དེ་བྱུང་བའི་གནས་ལུགས་ལ་གསལ་བཤད་གང་ཡང་བྱེད་ཐུབ་མེད་པ་རེད། གནས་ཚུལ་འབྱུང་ཁུངས་གཉིས་པ་ནི། ཞི་ཅིན་ཕིན་དང་ཉེ་བར་འདུག་མཁན་ཞིག་གིས་བརྗོད་དོན་ལྟར་ན། ཞི་ཅིན་ཕིན་ལུས་ཁམས་བདེ་མིན་གནས་ཚུལ་ཡོད་ཀྱང༌། དེ་ཙམ་དཀའ་ཁག་ཆེན་པོ་མེད་ཅེས་བརྗོད་འདུག

རྒྱ་ནག་གི་གནས་བབས་གསར་པ་ཞིག་གི་ངོས་ན་བཤད་ན། ཁ་གསལ་གཏིང་གསལ་མེད་པའི་གནས་ཚུལ་དེ་རྒྱ་ནག་གི་དཔལ་འབྱོར་དང༌། ཆབ་སྲིད་ལ་ལྡོག་ཏུ་མེད་པའི་དཀའ་ངལ་གསར་པ་ཞིག་འཕྲད་ཀྱི་ཡོད་པ་དང༌། སྐུ་ཞབས་ཞི་ཅིན་ཕིན་རྒྱ་ནག་གི་མགོ་ཁྲིད་ཆགས་ལ་ཉེ་བའི་སྐབས་དང༌། འབྱུང་འགྱུར་ལོ་བཅུའི་རིང་ཁོང་གི་ལུས་ཁམས་ཀྱི་བདེ་ཐང་ནི་རྒྱ་ནག་དམར་ཤོག་དང༌། རྒྱ་ནག་མི་སེར། དེ་བཞིན་འཛམ་གླིང་ཧྲིལ་པོ་བཅས་ལ་གནད་འགག་ཆེ་བའི་གནད་དོན་ཞིག་ཆགས་ཡོད། འདས་པའི་ལོ་བཅུའི་རིང་སྲིད་འཛིན་ཧུའུ་ཅིན་ཐའོ་ཡི་མགོ་ཁྲིད་ཀྱི་འོག་ནས་རྒྱ་ནག་ལ་འགྱུར་ལྡོག་ཆེན་པོ་ཕྱིན་ཡོད། ཡིན་ནའང༌། འགྱུར་ལྡོག་གང་ཡང་འགྲོ་རྒྱུ་མེད་པ་དེ་ནི་རྒྱ་ནག་གི་མགོ་ཁྲིད་ཚོའི་བར་ན་གནས་པའི་གསང་བ་ལྐོག་འགྱུར་དེ་དག་ཡིན་པ་རེད། མགོ་ཁྲིད་དེ་ཚོའི་ལུས་ཁམས་བདེ་ཐང་དང༌ཉིན་རེའི་འཚོ་བ་སྐྱེལ་སྟངས། ནང་མིའི་གནས་བབས། དེ་དང་དེས་མཚོན་པའི་གནས་ཚུལ་གང་མང་ཞིག་ལ་ཡང་ཡང་སྦ་གསང་བྱེད་ཀྱི་ཡོད་ཀྱང༌། གནས་སྟངས་དེ་བཞིན་མུ་མཐུད་གསང་གནས་སུ་གནས་རྒྱུ་ནི་ཉིན་རེ་བཞིན་དཀའ་ཁག་ཅན་དུ་འགྱུར་གྱིན་ཡོད།
 

རྒྱ་ནག་གི་ཕྱི་སྲིད་བློན་ཆེན་གྱིས་ཞི་ཅིན་ཕིན་གང་དུ་ཡོད་མེད་དང་མཛད་འཆར་རིམ་པ་ཁག་ལ་ཁོང་ངོ་གདོང་མ་བསྟན་པའི་རྒྱུ་མཚན་གང་ཡིན་མིན་སྐོར་གསལ་བཤད་གང་ཡང་བྱས་མེད། དེའི་སྐོར་གསལ་བཤད་ཡོང་རྒྱུར་ཡང་ཡང་ཚ་འདྲི་མདའ་འདེད་བྱས་སྐབས། རྒྱ་ནག་གི་ཕྱི་སྲིད་བློན་ཆེན་གྱི་མགྲིན་ཚབ་པ་ཧོམ་ལེ་ཟེར་བ་དེས་ངས་གནས་ཚུལ་ཡོངས་སུ་རྫོགས་པ་བཤད་ཟིན་པ་ཡིན། དེ་འབྲེལ་གྱི་གནས་ཚུལ་གསར་བསྣོན་བྱེད་རྒྱུ་གང་ཡང་མེད་ཅེས་བརྗོད་ཡོད། རྒྱ་ནག་གི་ཕྱོགས་ཡོངས་ཀྱི་གནས་ཚུལ་གསར་པ་ཞིག་ནི་གཅུས་སྒྲིམ་ཆེ་ཞིང༌། བརྟན་ལྷིང་མེད་པའི་མགོ་ཁྲིད་འཕོ་འགྱུར་བྱེད་རྒྱུ་དེ་ཡིན་ཞིང༌། གོ་གནས་མཐོ་ཤོས་སུ་སླེབས་པའི་སྐུ་ཞབས་པོའུ་ཞི་ལིའི་ཐོག་ཏུ་ལྷུང་བའི་རྙོག་གླེང་དེས་རྒྱ་ནག་གི་སྲིད་དབང་བརྒྱུད་སྤྲོད་དེ་ནམ་ཡང་དཀའ་རྙོག་ཅན་ཞིག་ཏུ་འགྱུར་ཟིན་པ་རེད།

རྒྱ་ནག་ནང་ལ་ཆ་མཚོན་ན་ལོ་བཅུ་རེའི་མཚམས་སུ་ཏང་གི་དམར་ཤོག་ཚོགས་པའི་མགོ་ཁྲིད་བརྗེ་འགྱུར་དེ་ངེས་པར་དུ་ཞི་འཇམ་བརྟན་ལྷིང་ཐོག་ནས་འགྲོ་དགོས་པ་གལ་ཆེན་ཆགས་ཡོད་ཀྱང༌། ཞི་ཅིན་ཕིན་མང་ཚོགས་ཀྱི་མདུན་དེར་ཡང་བསྐྱར་ངོ་གདོང་མ་བསྟན་གྱི་བར་བརྟན་ལྷིང་མེད་པའི་གནས་ཚུལ་དེ་ཆུང་དུ་འགྲོ་རྒྱུ་ནམ་ཡང་མེད། ད་ཆ་མི་མང་དེང་རབས་ཀྱི་དྲ་ལམ་ལ་ཁ་ཕྱོགས་པའི་དུས་སྐབས་འདིར་འཛམ་གླིང་ཐོག་ཕྱི་འབྲེལ་སྲིད་ཇུས་ཀྱི་གནས་བབས་དང༌། འཛམ་གླིང་གི་དཔལ་འབྱོར་གྱི་འབྲེལ་ལམ་ནང་གལ་འགངས་ཆེན་པོ་ཆགས་ཟིན་པའི་རྒྱལ་ཁབ་དེའི་ནང་དུ་སྲོལ་རྙིང་དུ་ལྷག་པའི་དམར་ཤོག་ཚོགས་པའི་ནང་ཁུལ་གྱི་གསང་བ་དང་མགོ་ཁྲིད་ཚོ་ནི་འཛམ་གླིང་ནང་ཉེན་སྲུང་དཀའ་བའི་གནས་ཚུལ་ཆེན་པོ་ཞིག་ཏུ་གྱུར་ཟིན་ཡོད།

གནས་ཚུལ་འབྱུང་ཁུངས་ཀྱི་དྲ་ཐག  http://www.bbc.co.uk/news/world-asia-china-19553903