རང་དབང་གི་རྩོམ་པ་པོ་ས་རཱ་མཐོ་སློབ་ཀྱི་དགེ་རྒན་སྤྲེལ་ནག་པ་བློ་གྲོས་དཔལ་བཟང་ལགས་སུ། བོད་པའི་འཐབ་རྩོད་ཀྱི་གནས་བབ་དང་བཙན་བྱོལ་སྤྱི་ཚོགས་ཀྱི་ཤེས་ཡོན་བཅས་ཀྱི་ཐད་བཅར་འདྲི་ཞུས་ཡོད།
དྲི་བ། བོད་པའི་རྩ་དོན་འཐབ་རྩོད་གནང་ཕྱོགས་ཐོག་གདེང་འཇོག་དང་གཟིགས་ཚུལ་གང་འདྲ་ཡོད།
ལ
ན། སྔོན་མའི་ལོ་རྒྱུས་སྒང་ཨི་སི་རེལ་དང་རྒྱ་གར་སོགས་ཀྱིས། རྒྱལ་ཁབ་གཞན་པར་འཐབ་རྩོད་རྒྱག་སྐབས་རིམ་པ་གསུམ་གྱི་ཐོག་ནས་བརྒྱབ་ཡོད་པ་རེད། གཅིག སྒང་ནས་སྡོད་མཁན་ཆབ་སྲིད་པ་དག་གིས་འཐབ་རྩོད་བརྒྱབ་ཡོད་པ་རེད། གཉིས་པ། མི་མང་རང་བཞིན་གྱིས་འཐབ་རྩོད་བརྒྱབ་ཡོད་པ་རེད། གསུམ། བསམ་བློའི་སྣེ་འཁྲིད་མཁན་རིག་གནས་ཁོར་ཡུག་ནས་འཐབ་རྩོད་བརྒྱབ་ཡོད། འཐབ་རྩོད་ཀྱི་ངོ་བོ་དང་རྩ་བ་འཛིན་ས་དེ་ཆབ་སྲིད་ཆགས་ཡོད། རྒྱལ་ཁབ་ཞིག་ལ་གཞུང་བརྟན་པོ་ཞིག་དགོས་པ་དང་། དེ་ལ་ཆབ་སྲིད་འགྲོ་སྟངས་དང་གཞུང་གི་གྲུབ་སྟངས་ཡག་པོ་དགོས་པ། དེ་དག་ཚང་མ་ཆབ་སྲིད་པས་བསྒྲུབ་དགོས་པ་རེད། གཞུང་སྲ་བརྟན་ཡོད་མེད་དང་ཆབ་སྲིད་པ་གང་འདྲ་ཡོད་མེད་སྐོར་གཞུང་གིས་ཤེས་རྒྱུ་རེད། ང་དེ་ལ་རྒྱུས་ལོན་མེད། དེང་སྐབས་བོད་ནང་རང་ལུས་མེར་བསྲེགས་དང་ངོ་རྒོལ་སྐད་འབོད་བྱེད་བཞིན་པ་རྣམས་ནི། འུ་ཐུག་པའི་མི་མང་རང་བཞིན་གྱི་འཐབ་རྩོད་རེད། དེའི་ནང་ཆབ་སྲིད་ཀྱི་གོ་གནས་ཆེན་པོ་ཅན་དང་། ཡོན་ཏན་པ་ཆེན་པོ་གཅིག་ཀྱང་བསླེབས་ཡོད་པ་མ་རེད། གྲྭ་བ་དང་། ཞིང་འབྲོག་མང་ཚོགས། ལས་བྱེད་པ་ཕལ་བ་རྐྱང་རེད། བཙན་བྱོལ་ལ་མཚོན་ན་མི་མང་གི་འཐབ་རྩོད་ནི་སྐད་རྒྱག་པ་དང་མར་མེ་ཁྲོམ་སྐོར་བྱ་རྒྱུ་ཙམ་རེད། དེ་དག་གི་བར་དུ་ཤེས་ཡོན་པའི་འཐབ་རྩོད་ལྷག་བསྡད་ཡོད་པ་རེད། བོད་ནང་ལ་མཚོན་ནའང་དེ་བཞིན་རེད། སྤྱིར་ལོ་རྒྱུས་དང་རིག་གནས་ཉམས་ཞིབ་བྱེད་བཞིན་ཡོད་པ་རེད་དེ། ཡོན་ཏན་པ་ཞིག་གིས་རྒྱ་ནག་གི་ཆབ་སྲིད་གནོན་ཤུགས་ལ་མ་འཛེམས་པར་བོད་ཀྱི་ལོ་རྒྱུས་དྲང་མོར་བཤད་བཞག་མཁན་ཧ་ལམ་ཡོད་པ་མ་རེད། སེམས་ཤུགས་ཡོད་ཀྱང་འཐབ་རྩོད་ནང་ནུས་བ་འཐོན་ཐུབ་ཀྱིན་ཡོད་པ་མ་རེད། བཙན་བྱོལ་ལ་མཚོན་ན་ཡོན་ཏན་པ་ཚད་ལྡན་ཧ་ཅང་ཉུང་ཉུང་རེད། ཡོན་ཏན་པར་འབོད་པ་རྣམས་ནི་ཤེས་ཚད་ཕར་གཡུགས་ཏེ་སེམས་ཤུགས་ཀྱིས་བསླེབས་མཁན་རྐྱང་རེད། སྤྱིར་སེམས་ཤུགས་ཀྱང་གལ་ཆེན་པོ་རེད། ཡིན་ནའང་། སྤྱི་ཚོགས་ལ་ཤེས་ཡོན་ཀྱིས་ཁ་ལོ་བསྒྱུར་མ་ཐུབ་པར་སེམས་ཤུགས་ཀྱིས་སྒྱུར་ཐབས་ཡོད་པ་མ་རེད། ཤེས་ཡོན་གྱིས་སྤྱི་ཚོགས་ཁ་ལོ་བསྒྱུར་བྱེད་ཀྱི་ནུས་པ་ང་ཚོར་མེད་སྟབས། གཞི་རྩ་དེ་ན་འགག་བསྡད་ཡོད་པ་རེད།
དྲི་བ། མི་རིགས་ཤིག་གི་འཐབ་རྩོད་ཁྲོད་ཤེས་ཡོན་གྱི་འཐབ་རྩོད་དེ་གལ་ཆེན་ཇི་ལྟར་ཆགས་ཡོད་དམ།
ལན། སྔོན་མ་ཡུ་རོབ་གླིང་དུ་རིག་རྩལ་བསྐྱར་དར་དང་། བློ་འབྱེད་ལས་འགུལ་སྤེལ་མཁན་རྣམས་ཀྱང་རྩོམ་རིག་པ་དང་སྒྱུ་རྩལ་བ་རྐྱང་རེད། དེ་ཚོས་སྤྱི་ཚོགས་ཀྱི་ཁ་ཁྲིད་དེ་སྤྱི་ཚོགས་ལ་བསྒྱུར་བཅོས་བཏང་རྗེས། སྤྱི་ཚོགས་ཁྲོད་སྒྱུ་རྩལ་པར་ཆེས་མཐོ་བའི་སྡིངས་ཆ་ཞིག་རག་པ་རེད། སྒྱུ་རྩལ་པ་དེ་དག་ཀྱང་ཆེད་ལས་སྦྱངས་ཏེ་ཆེད་ལས་ཤེས་ཡོན་གྱིས་མི་གཤིས་གྲུབ་སྡོད་མཁན་རྐྱང་རྐྱང་རེད། མི་གཞན་གྱིས་བསྒྱུར་ཆོག་ཆོག་ཅིག་མ་ཡིན་པར་ལངས་ཕྱོགས་བརྟན་པོ་ཡོད་པ་རེད། ཡིན་ནའང་། འུ་ཚོར་དེ་འདྲ་ཡོད་པ་མ་རེད། མ་གཞི་ཤེས་ཚད་མེད་ན་བསམ་བློ་ཡོད་པ་མ་རེད། བསམ་བློ་མེད་ན་མི་གཤིས་གྲུབ་ཐུབ་ཀྱི་མ་རེད། མི་གཤིས་མེད་ན་གཞན་གྱིས་བསྒྱུར་ཆོག་ཆོག་ཅིག་ཡིན། ལྷག་པར་དུ་ཤེས་ལྡན་པ་རྣམས་ཁེ་ཕན་གྱི་རྗེས་སུ་རྒྱུག་འགྲོ་གི་རེད། དེ་འདྲའི་ཤེས་ཡོན་པའི་སྡེ་དེས་མི་རིགས་དཀའ་ངལ་ལ་འཕྲད་དུས་གདོང་ལེན་གྱི་ནུས་པ་ཡོད་པ་མ་རེད། གདོང་ལེན་གྱི་ནུས་པ་ཡོད་པ་ཞིག་ཆགས་དགོས་ན་ཡིན་གཅིག་མིན་གཅིག་ཆེད་ལས་སྦྱོང་དགོས་པ་རེད། དཔེར་ན། ཆོས་ལུགས་ཀྱི་ངོས་ནས་བཤད་ན། ལམ་རིམ་སྦྱངས་ནས་ལམ་རིམ་གྱི་ཚིག་དོན་ཤེས་རྗེས། ཆོས་རྒྱུད་ལ་མ་སྐྱེས་པ་ལྟ་བུ་རེད། ཆོས་རྒྱུད་ལ་མ་སྐྱེས་ན་ལས་ཀ་འདྲ་མིན་སྒྲུབ་སྲིད་པ་རེད། དེར་བརྟེན། ཡོན་ཏན་པར་རིག་གནས་ཀྱི་མི་གཤིས་མེད་དུས་འཐབ་རྩོད་ཀྱི་ནུས་པ་ཅི་ཡང་ཡོད་པ་མ་རེད།
དྲི་བ། བོད་མིའི་ཆབ་སྲིད་འཐབ་རྩོད་ཀྱི་གྲུབ་འབྲས་ཐོག་གཟིགས་ཚུལ་ག་རེ་ཡོད་དམ།
ལན། འདིར་གཞུང་གི་ཆབ་སྲིད་པ་དག་གིས་འཐབ་རྩོད་རྒྱག་སྟངས་ནི། བོད་ནང་དང་མི་མང་གི་ངོ་རྒོལ་བྱུང་སྐབས། ནང་ཁུལ་ཚོགས་འདུ་རེ་ཚོགས་ཏེ་གྲོས་ཆོད་འཇོག་རྒྱུ་དེ་རེད། གྲོས་ཆོད་དེ་དག་རྒྱལ་སྤྱིའི་སྒང་ངོས་ལེན་དང་ནུས་པ་ཆེན་པོ་འཐོན་གྱི་མེད་སྟབས། རྒྱ་ནག་གིས་ལྷག་པར་དུ་ཡ་མེད་གཏོང་བཞིན་ཡོད་པ་རེད། འུ་ཚོར་དེ་ངོས་ལེན་བྱེད་སྤྱད་ཀྱི་ནུས་པས་འདང་གི་ཡོད་པ་མ་རེད། ནུས་པ་ཡོད་ན་ངོས་ལེན་རང་བཞིན་གྱིས་བྱེད་ཀྱི་རེད། ཆབ་སྲིད་པ་ཚོས་དེར་འདང་རྒྱག་གི་མེད་པར། སྙན་ཞུ་ཞིག་ཡར་ཕུལ་རྗེས་མཉམ་འབྲེལ་རྒྱལ་ཚོགས་ཀྱི་གྲོས་ཆོད་ནང་མ་ཚུད་ན། མཉམ་འབྲེལ་རྒྱལ་ཚོགས་མ་འགྲིག་ཚུལ་བཤད་ནས་ཁ་རྡུང་ཙམ་བཏང་ནས་བསྡད་ཡོད་པ་རེད། དོན་གྱིས་འུ་ཚོས་སོ་སོར་སེམས་གསོ་ཙམ་བྱས་ཏེ་བསྡད་ཡོད་པ་རེད། ལོ་ངོ་ལྔ་བཅུའི་རིང་བརྒྱ་ཆ་བརྒྱ་ནུས་པ་ཐོན་ཡོད་པ་མ་རེད་ཅེས་བཤད་རྒྱུ་ཡོད་པ་མ་རེད། ཡིན་ནའང་། ང་ཚོར་དགོས་པའི་ནུས་པ་དེ་ཐོན་ཐུབ་ཡོད་པ་མ་རེད། ང་ཚོས་ནམ་རྒྱུན་གླེང་གིན་པའི་རང་བཙན་དང་རང་སྐྱོང་། ཆོས་ལུགས་དང་རིག་གཞུང་སྲུང་སྐྱོབ་སོགས་གང་ལའང་ནུས་པ་ཐོན་ཡོད་པ་མ་རེད། ད་ལྟའི་བར་བོད་རྒྱ་འབྲེལ་མོལ་མང་པོ་བྱས་པ་རེད་དེ། སྐད་ཆ་འདི་བཤད་དེ་གནད་དོན་འདི་སེལ་བ་ཡིན་ཞེས་པའི་གྲུབ་འབྲས་གང་ཡང་བྱུང་ཡོད་པ་མ་རེད། ད་དུང་སྔོན་འགྲོའི་བརྒྱུད་རིམ་ཁྲོད་འཁོར་སྐྱོད་བྱས་བསྡད་ཡོད་པ་རེད། ང་ཚོས་བསམ་བློ་གཏོང་དགོས་ས་ནི་བརྒྱུད་རིམ་ངེས་ཅན་ཞིག་བརྒྱུད་རྒྱུ་དེ་མ་རེད། བརྒྱུད་རིམ་ངེས་ཅན་དེ་བརྒྱུད་རྗེས་གྲུབ་འབྲས་ག་རེ་ཐོབ་མིན། འབྲས་བུ་དེ་ལེན་པར་སོ་སོར་ནུས་པ་ག་རེ་སྐྱེད་བསྲིང་བྱ་དགོས་མིན་དེ་རེད། བརྒྱུད་རིམ་ཁོ་ནར་བསམ་བློ་བཏང་བསྡད་ན་བརྒྱུད་རིམ་ལ་མཐའ་ཡོད་པ་མ་རེད།
དྲི་བ། བཙན་བྱོལ་སློབ་གྲྭ་ཁག་ནང་སོ་སོའི་སྐད་ཡིག་རིག་གནས་རྒྱུན་འཛིན་བྱེད་ཐུབ་ཀྱི་མེད་པ་དེ་གཙོ་བོ་གང་ལ་ཐུག་ཡོད།
ལན། བོད་ནང་སོ་སོའི་བོད་སྐད་གཙང་མ་བཤད་དགོས། རིག་གནས་གཙང་མ་ཉར་དགོས། གནའ་དེང་གི་རིག་གནས་ཆ་ཚང་བོད་རང་གི་སྐད་ཡིག་ཐོག་ནས་བཤད་རྒྱུ་ཡིན་ཞེས་སྐད་རྒྱག་གི་ཡོད་པ་རེད། ང་ཚོའི་བཙན་བྱོལ་སྤྱི་ཚོགས་ནང་ཁོང་ཚོའི་རེ་བ་དེ་སྐོང་ཐུབ་རྒྱུ་ཕར་ཞོག རེ་བ་དེ་དང་ལེ་བར་བརྒྱ་ཕྲག་གི་བར་ཐག་ཆོད་བསྡད་ཡོད་པ་རེད། ད་དུང་རྨང་གཞི་ཡག་པོ་ཞིག་ཀྱང་འཇོག་མ་ཐུབ་པར་ལྷག་བསྡད་ཡོད། རྨང་གཞི་དེ་བརྟན་པོ་ཇི་ལྟར་འཇོག་དགོས་པའི་ཐད་སུས་ཀྱང་ལན་འདེབས་གནང་ཐུབ་ཀྱི་མེད་པའི་ཐོག གནད་དོན་བྱུང་སྐབས་དེའི་འགན་གཞུང་གིས་དགེ་རྒན་གྱི་མགོ་ལ་གཡུགས། དགེ་རྒན་གྱིས་སློབ་མའི་མགོར་གཡུགས། ཡང་བསྐྱར་གཞུང་གིས་ཕ་མའི་མགོ་ལ་གཡུགས། ཕ་མས་གཞུང་གི་མགོ་ལ་གཡུགས་ཏེ། སོ་སོའི་ནག་ཉེས་འདག་ཐབས་ཀྱིས་ཡར་གཡུགས་མར་གཡུགས་བྱས་སྡོད་པ་རེད། སྤྱིར་གནད་དོན་བྱུང་སྐབས་དགེ་རྒན། སློབ་ཕྲུག ཕ་མ། འཛིན་སྐྱོང་གང་ཡིན་ཡང་མཐའ་གཅིག་ཏུ་ནག་པོ་དང་། མཐའ་གཅིག་ཏུ་དཀར་པོ་རྐྱང་ཞིག་ཡོད་པ་མ་རེད། གནད་དོན་ནི་རྒྱུ་རྐྱེན་མང་པོ་ཞིག་འདས་པ་ལས་བྱུང་བ་རེད། ཚང་མས་ངོས་ན་སྐྱོན་ཡོད་པ་རེད། དེར་བརྟེན། སོ་སོའི་ངོས་ན་གནད་དོན་ཅི་ཞིག་ལྷག་ཡོད་མེད་ལ་འདང་བརྒྱབ་སྟེ། གནད་དོན་ཇི་ལྟར་ཐག་གཅོད་བྱ་རྒྱུར་བསམ་བློ་གཏོང་གི་ཡོད་པ་མ་རེད། བོད་ནང་འདས་གྲོངས་སུ་ཕྱིན་པ་དག་གི་ཞལ་ཆེམས་དང་གསོན་པོའི་རེ་བ་ཟེར་ན་རེད། འུ་ཚོས་ནམ་རྒྱུན་༸གོང་ས་མཆོག་གི་དགོངས་གཞི་སྒྲུབ་ཀྱི་ཡིན་བརྗོད་ཀྱི་ཡོད་པ་རེད། དངོས་གནས་དགོངས་གཞི་བསྒྲུབ་རྒྱུ་ཡིན་ན། བོད་ཡིག་གི་མཐོ་སློབ་ཁག་ཀྱང་ཆེད་ལས་ངོ་བོའི་ཐོག་འགྲོ་ཐུབ་པ་བྱེད་དགོས། འདས་པའི་ལོ་ ༢༠ དང་ ༣༠ ནང་གནད་དོན་འཚོལ་མ་ཤེས་ནའང་། ལོ་ ༥༠ ནང་གནད་དོན་གང་ན་ཡོད་པ་དེ་བཙལ་ནས་རྙེད་དགོས་པ་རེད། རྒྱུ་རྐྱེན་གཙོ་བོ་ཆེད་ལས་མེད་པའི་གནད་དོན་ལ་ཐུག་བསྡད་ཡོད་པ་རེད། ཆེད་ལས་མེད་ན་མིའི་གོ་རྟོགས་ཀྱང་འཛིན་རིམ་བཅུ་གཉིས་ཀྱི་རྨང་གཞིའི་གོ་རྟོགས་ཙམ་མ་གཏོགས་ཡོད་པ་མ་རེད།
དྲི་བ། ཆེད་ལས་དང་རིགས་གཅིག་རྐང་འཛིན་སྐྱེད་སྲིང་མ་ཐུབ་པའི་གནད་དོན་གང་ལ་ཐུག་ཡོད།
ལན། འུ་ཚོས་གསོན་ཤུགས་གསར་བ་སྣོན་རྒྱུ་ཡིན་ཟེར་གྱི་ཡོད་པ་རེད་དེ། ངས་བལྟས་ན་གསོན་ཤུགས་རྙིང་པ་རྣམས་ཀྱང་ཚར་གྱིན་འདུག ཆེད་ལས་ཀྱི་ཐོག་ནས་གཅིག་ཀྱང་སྦྱོང་ཐུབ་ཀྱི་ཡོད་པ་མ་རེད། ༸གོང་ས་མཆོག་གིས་ཀྱང་ནམ་རྒྱུན་འུ་ཚོར་ཆེད་ལས་དགོས་པ་རེད། རིགས་གཅིག་རྐང་འཛིན་དགོས་པ་རེད་གསུང་གནང་གི་ཡོད་པ་རེད། རིགས་གཅིག་རྐང་འཛིན་དང་ཆེད་ལས་མི་སྣར་སྒུག་བསྡད་ན་༸གོང་ས་མཆོག་གི་བྱིན་རླབས་ལ་བརྟེན་ནས་ཡོང་ཐུབ་པ་ཞིག་མ་རེད། དེ་ལ་ཕྱོགས་སོ་སོ་ནས་ཤུགས་རྒྱག་དགོས་པ་རེད། འཛིན་གྲྭ་བཅུ་གཉིས་ཀྱི་བར་དུ་རྨང་གཞི་བརྟན་པོ་ཞིག་འཇོག་ཐུབ་དགོས་པ་རེད། བོད་ཡིག་ལ་མཚོན་ནའང་། ང་ཚོས་རྨང་རྟེན་ད་དུང་འཇོག་ཐུབ་ཀྱི་ཡོད་པ་མ་རེད། སཱ་ར་དང་ནོར་གླིང་། ཝ་ར་ནཱ་སི་སོགས་མཐོ་སློབ་ཁག་ཀྱང་། ཡང་བསྐྱར་རྨང་གཞི་འཇོག་ས་ཞིག་ཏུ་གྱུར་བསྡད་ཡོད་པ་རེད། དེ་ལྟར་གྱུར་ཚེ་མཐོ་སློབ་བཙུགས་པའི་དགོས་པ་མ་འགྲུབ་པ་རེད། མཐོ་སློབ་ནི་ཆེད་ལས་ཀྱི་ངོས་ནས་སྦྱོང་དགོས་པ་རེད། དཔེར་ན་ལོ་རྒྱུས་ལྟ་བུ་ཞིག་ལ་ཆ་མཚོན་ན། རྒྱལ་ཁབ་དང་སྲིད་གཞུང་གང་ཞིག་ཡིན་ཡང་། ཐོག་དང་པོ་ལོ་རྒྱུས་ཀྱིས་གྲུབ་པ་ཡིན་སྟབས། ལོ་རྒྱུས་ཀྱི་བདེན་དོན་དེ་ཐམས་ཅད་ཀྱི་མགོ་ན་ཡོད་པ་རེད། འུ་ཚོར་ལོ་རྒྱུས་ཀྱི་རྨང་གཞི་ཞན་པ་དང་། ལོ་རྒྱུས་ཀྱི་ནུས་པ་དང་ལྟ་གྲུབ། ལོ་རྒྱུས་ལ་ལྟ་སྟངས་རྣལ་མ་མེད་པ། ལོ་རྒྱུས་ཀྱི་ནུས་པ་མ་ཤེས་པར་བརྟེན། ལོ་རྒྱུས་ཟེར་བ་དེ་ཤེས་ཡོན་ཙམ་གྱི་ཚུལ་དུ་སྦྱོང་བཞིན་པ་མ་གཏོགས། ལོ་རྒྱུས་རིག་གནས་ཀྱིས་མི་གཤིས་སྐྱེད་སྲིང་བྱེད་ཐུབ་ཀྱི་ཡོད་པ་མ་རེད། སྤྱིར་ལོ་རྒྱུས་ཆེད་ལས་སྦྱངས་ཏེ་ལྟ་གྲུབ་ཡོད་བསྡད་མཁན་ཞིག་ཡིན་ན། ལོ་རྒྱུས་ཀྱི་བདེན་དོན་ཆེད་སོ་སོའི་ཚེ་སྲོག་ཀྱང་གཏོང་ཐུབ་པའི་སྤོབས་པ་ཡོད་པ་རེད། ང་ཚོར་དེ་འདྲའི་སྤོབས་པ་མེད་སྟབས་མི་གཞན་ཞིག་གིས་ཁ་ལོ་བསྒྱུར་ཆོག་ཆོག་ཅིག་ཡོད་པ་རེད། བོད་ནང་ལ་མཚོན་ན་བོད་རང་གི་སྐད་ཡིག་ཐོག ལོ་རྒྱུས་དང་རྩོམ་རིག། ཡིག་སྒྱུར། སྐད་བརྡ་རིག་པ་སོགས་ཆེད་ལས་འགའ་ཤས་ཤིག་ཡོད་པ་རེད། འདི་རུ་བོད་ཡིག་ཐོག་ཆེད་ལས་སྦྱོང་སའི་མཐོ་སློབ་གཅིག་ཀྱང་ཡོད་པ་མ་རེད། མཐོ་སློབ་ཚོའི་ནང་དུ་ལོ་རྒྱུས། བརྡ་སྤྲོད། རྩོམ་རིགས་ཚང་མ་ཆ་སྙོམས་ཀྱིས་འཁྲིད་ཀྱི་ཡོད་སྟབས། དགེ་རྒན་དང་སློབ་མ་གཉིས་ལ་དཀའ་ངལ་འཕྲད་ཀྱི་ཡོད། དོན་གྱིས་འཛིན་གྲྭ་བཅུ་གཅིག་བཅུ་གཉིས་དང་ཧ་ལམ་གཅིག་པ་ཆགས་བསྡད་ཡོད་པ་རེད།
དྲི་བ། ཉེ་བའི་ལོ་འགའི་ནང་བོད་ནས་བཙན་བྱོལ་དུ་ཡོང་མཁན་ཇེ་ཉུང་དུ་ཕྱིན་འདུག དེའི་རྒྱུ་རྐྱེན་གཙོ་བོ་གང་ལ་ངོས་འཛིན་གནང་གི་ཡོད།
ལན། བོད་ནང་ནས་ཕྱི་ལོགས་སུ་ཡོང་མཁན་ཇེ་ཉུང་དུ་འགྲོ་བཞིན་པར་རྒྱུ་རྐྱེན་དུ་མ་ཞིག་ཡོད་པ་རེད། རྒྱ་གཞུང་གི་ངོས་ནས་ཀྱང་བཀག་སྡོམ་ཤུགས་ཆེ་རུ་བཏང་ཡོད་པ་རེད། གཙོ་བོ་ཕྱོགས་གཅིག་ནས་བོད་ནང་མི་ཇེ་ཉུང་དུ་འགྲོ་བཞིན་ཡོད་པ་རེད། དཔེར་ན། ང་ཚོའི་ན་ཚོད་གྲས་ལ་མིང་སྲིང་བརྒྱད་དགུ་བཅུ་གྲངས་ཡོད་མཁན་མང་པོ་ཡོད། ཁྱིམ་ཚང་གཅིག་ལ་མཚོན་ནའང་། གྲྭ་བ་བྱེད་མཁན་དང་། སློབ་གྲྭར་བསྐྱོད་མཁན། ཁྱིམ་ལས་གཉེར་མཁན་སོགས་མིས་མ་འདང་བའི་དཀའ་ངལ་མེད་སྟབས། ཁ་ཤས་བོད་ནང་དུ་བསྡད། ཁ་ཤས་བཙན་བྱོལ་དུ་ཡོང་ན་འགྲིག་གི་ཡོད་པ་རེད། ད་སྐབས་ཁྱིམ་ཚང་གཅིག་ལ་བྱིས་པ་གཉིས་རེ་མ་གཏོགས་ཡོད་པ་མ་རེད། དེ་ཕྱོགས་གཅིག་ནས་རྒྱ་གཞུང་གི་འཆར་ལྡན་བུ་སྐྱེས་ཟེར་བའི་གནོན་ཤུགས་དང་། གཉིས་ནས་ང་ཚོ་རང་ངོས་ཀྱི་གནད་དོན་ཞིག་ཀྱང་ཆགས་ཀྱི་ཡོད། བྱིས་པ་ཉུང་ན་ཁ་རྒྱབ་མ་སོས་པའི་དཀའ་ངལ་ཇེ་ཉུང་དུ་འགྲོ་སྟབས་ཕྲུ་གུ་སྐྱེ་རུ་འཇུག་གི་ཡོད་པ་མ་རེད། དེ་བཞིན། ད་ལྟའི་དུས་རབས་གསར་བའི་ནང་མིའི་རིན་ཐང་གི་ལྟ་སྟངས་ཀྱང་འགྱུར་འགྲོ་བཞིན་ཡོད་པ་རེད། མི་དང་མིའི་འཚོ་བ་ལེགས་པོ་བསྐྱལ་རྒྱུ་གཉིས་ལས་གང་ལ་རིན་ཐང་ཡོད་མེད་ངོས་འཛིན་སྟངས་ཐད། སྔོན་ཆད་འཚོ་བ་ཡག་པོ་སྐྱེལ་མ་ཐུབ་ཀྱང་མི་ལུས་རིན་པོ་ཆེར་ངོས་འཛིན་གྱི་ཐོག་ནས་ཕྲུ་གུ་མང་པོ་སྐྱེ་རུ་བཅུག་ཡོད། དེང་སང་མིའི་འཚོ་བ་ཡག་པོ་སྐྱེལ་མ་ཐུབ་ན། མི་ལ་རིན་ཐང་གང་ཡང་ཡོད་པ་མ་རེད། དེར་བརྟེན། ཕ་མ་ཚོ་རང་ངོས་ནས་ཀྱང་བྱིས་པ་མང་པོ་སྐྱེ་འཇུག་གི་མེད།
ཕྱོགས་གཞན་ཞིག་ནས། སྔོན་ཆད་བོད་ནང་གི་བོད་མི་ཚོར་བཙན་བྱོལ་སྤྱི་ཚོགས་ལ་རྒྱུས་ལོན་ཞེ་དྲག་ཡོད་པ་མ་རེད། དེང་སང་དྲ་རྒྱ་དར་བ་ནས་བཟུང་སྤྱི་ཚོགས་རྒྱུས་ལོན་སྔར་ལས་ཇེ་མགྱོགས་སུ་ཕྱིན་ཏེ། གསལ་བོ་དང་མགྱོགས་པོ་ཁ་རུ་ཁ་ཐུག་ཤེས་རྟོགས་ཐུབ་ཀྱི་ཡོད། སྤྱིར་འདིར་ཡོང་མཁན་ཕལ་ཆེ་བས་ ༸གོང་ས་མཆོག་ལ་མཇལ་རྒྱུ་དང་། སློབ་སྦྱོང་ཞིག་རག་རྒྱུ། སོ་སོའི་གཞུང་འདིར་ཡོད་སྟབས་དེར་ལས་ཀ་ཞིག་བསྒྲུབ་རྒྱུ་བཅས་དམིགས་ཡུལ་གཙོ་བོ་གསུམ་གྱི་ཐོག་ནས་ཡོང་གི་ཡོད། འདིར་བསླེབས་ཏེ་༸གོང་ས་མཆོག་ལ་མཇལ་རྗེས་རེ་བ་དང་པོ་དེ་འགྲུབ་ཚར་བ་རེད། རེ་བ་གཉིས་པ་དེ་ཁུར་ནས་ཡོང་མཁན་རིགས་གཉིས་ཡོད་པ་ལས། གྲྭ་སར་འགྲོ་མཁན་ཁག་ཅིག་ཡོད་པ་དེ་ཚོ་གྲྭ་སར་ཕྱིན་འགྲོ་གི་རེད། འདས་པའི་ལོ་ལྔ་བཅུའི་ནང་ལ་བོད་ནང་ཙམ་མ་ཡིན་པར་འཛམ་བུ་གླིང་ལ་སྤོབས་པ་བྱས་ཆོག་པའི་བཙན་བྱོལ་བོད་མིའི་བྱས་རྗེས་གཅིག་ཡོད་པ་ནི། གྲྭ་ས་ཁག་གི་བསླབ་པ་སློབ་གཉེར་རེད། དངོས་གནས་འཛམ་བུ་གླིང་དུ་ནང་ཆོས་ཀྱི་ཕྱོགས་ནས་གཞན་ལ་མེད་ཅེས་བརྗོད་ཆོག་ཆོག་ཡོད་པ་རེད། དེར་བརྟེན། སྔོན་ཆད་བོད་ནང་ནས་གྲྭ་ས་ཁག་ཏུ་དཔེ་ཆ་ལྟ་རུ་ཡོང་མཁན་མང་པོ་ཡོད་པ་རེད། ད་ལྟ་བོད་ནང་མི་གྲངས་ཇེ་ཉུང་དུ་ཕྱིན་པ་དང་། ལྷག་པར་དུ་གྲྭ་བ་ཇེ་ཉུང་དུ་འགྲོ་བཞིན་ཡོད་སྟབས། གདན་ས་ཁག་ཏུ་བོད་ནས་ཡོང་མཁན་གྲྭ་རྒྱུན་ཉུང་དུ་འགྲོ་བཞིན་ཡོད། དེ་བཞིན་སློབ་སྦྱོང་ཆེད་ཡོང་མཁན་རྣམས་ཀྱང་། འདིར་བོད་ཡིག་གི་ཕྱོགས་ནས་བོད་ནང་ལས་སྐྱོ་བ་ཡོད་པ་དང་། དབྱིན་ཡིག་གི་ཐོག་ནས་ཀྱང་སློབ་སྦྱོང་མཐའ་འཁྱོངས་པ་ཞིག་རག་ཐུབ་ཀྱི་མེད་སྟབས། རིམ་པས་སློབ་གྲྭར་ཡོང་མཁན་ཀྱང་ཇེ་ཉུང་དུ་འགྲོ་བཞིན་ཡོད་པ་རེད། ང་ཚོས་སོ་སོར་ཡག་བཤད་བརྒྱབ་ནས་དཀའ་ངལ་སེལ་ཐུབ་ཡོད་པ་མ་རེད། འདི་དངོས་ཡོད་གནས་སྟངས་རང་ཆགས་ཡོད་པ་རེད།
དྲི་བ། བཙན་བྱོལ་ནང་གི་བོད་མི་མང་པོ་ཞིག་ཕྱིར་བོད་ནང་དང་ཕྱི་རྒྱལ་ལུང་པ་ཁག་ཏུ་སྐྱོད་ཀྱིན་པའི་ཐད་གཟིགས་ཚུལ་གང་འདྲ་ཡོད།
ལན། འདི་ནས་མར་འགྲོ་མཁན་ཇེ་མང་དུ་འགྲོ་བཞིན་པའི་རྒྱུ་མཚན་ནི། ཚང་མས་རྒྱ་གར་དམངས་གཙོ་མ་རེད། རྒྱ་གར་ནང་རང་དབང་མི་འདུག རྒྱ་གར་ལས་རྒྱ་ནག་འོག་ཕྱིན་ན་ཡག་པོ་འདུག་ཟེར་ནས་འགྲོ་མཁན་ཧ་ལམ་ཡོད་པ་མ་རེད། ཚང་མ་དཀའ་ངལ་ཞིག་འཕྲད་ནས་དེར་གདོང་ལེན་བྱེད་མ་ཐུབ་པར་ཕྱིར་ལོག་འགྲོ་ཡི་ཡོད་པ་རེད། མི་ག་འདྲ་ཞིག་ཡིན་ཡང་། ཐོག་དང་པོ་འཚོ་གནས་ཀྱི་གནད་དོན་ཐག་གཅོད་བྱེད་དགོས་པ་རེད། སློབ་སྦྱོང་དང་སེམས་ཤུགས་ཀྱི་སྐད་ཆ་དེ་རིམ་པ་གཉིས་པ་དང་གསུམ་པ་རེད། འཛམ་བུ་གླིང་སྤྱིའི་འཁོར་འགྲོས་དེ་འདྲ་ཆགས་བསྡད་ཡོད་པ་རེད། སྤྱིར་མང་ཚོགས་ཀྱི་ངོས་ནས་བཤད་ན། དེ་རིང་ཁང་གླ་སྤྲོད་མ་ཐུབ། སང་ཉིན་གློག་རིན་སྤྲོད་མ་ཐུབ། གནངས་ཉིན་ཟ་རྒྱུར་དཀའ་ངལ་འཕྲད། གཞུང་ངོས་ནས་མཐུན་རྐྱེན་སྦྱོར་མ་ཐུབ། དེ་ལྟར་དཀའ་ངལ་གཅིག་ཐོག་གཉིས་བརྩེགས་སུ་ཡོང་བ་དང་། དཀའ་ངལ་དེ་དག་ཀྱང་ཉིན་གཅིག་དང་ཟླ་གཅིག་ཙམ་མིན་པར། ལོ་ནས་ལོ་བསྟུད་དེ་ཡོང་ན་དེ་ལ་སུས་ཀྱང་གདོང་ལེན་བྱ་ཐུབ་པ་ཁག་པོ་ཆགས་ཀྱི་ཡོད་པ་རེད། འདི་མི་ཚེའི་འཚོ་གནས་ལ་ཐུག་ཡོང་གི་ཡོད་པ་རེད། གནས་སྟངས་དེ་འདྲ་ཞིག་གི་འོག་ནས་སློབ་སྦྱོང་ཡིད་ལ་དྲན་མཁན་དཀོན་པོ་རེད། ཆབ་སྲིད་ཀྱི་སེམས་ཤུགས་སྐྱེ་ཐུབ་ཀྱི་མ་རེད། གོང་ན་སྡོད་མཁན་གྱི་ཆབ་སྲིད་པ་དང་ལས་ཁུངས་ཀྱི་མི་ཚང་མས་ནམ་རྒྱུན་སེམས་ཤུགས་ཀྱི་སྐད་ཆ་རྐྱང་འཆད་ཀྱི་རེད། གཅིག་ནས་སྲིད་གཞུང་གི་འགན་ཞིག་བླངས་ནས་བཤད་ཀྱི་ཡོད་པ་རེད། གཉིས་ནས། དེ་དག་བཤད་རྒྱུའི་ལས་ཀ་མ་གཏོགས་གཞན་ཡོད་པ་མ་རེད། ཁོ་ཚོར་དཀའ་ངལ་མེད་པར་གནས་སྟངས་ཆ་ཚང་འགྲིག་བསྡད་ཡོད་པ་རེད། ནམ་རྒྱུན་མང་ཚོགས་ལ་སེམས་ཤུགས་མི་འདུག སྐད་རྒྱག་གི་ཡོང་མཁན་མི་འདུག་ཟེར་བ་ཙམ་ལས། མང་ཚོགས་ཅིའི་ཕྱིར་སེམས་ཤུགས་ཆག་སོང་བ་དང་སྐད་རྒྱག་ཏུ་མ་ཡོང་བ། ཁོ་ཚོར་དཀའ་ངལ་ག་རེ་འཕྲད་ཀྱི་ཡོད་མེད་ལ་བསམ་བློ་བཏང་སྟེ། དེ་སེལ་ཐུབ་ཀྱི་ཐབས་ཤེས་གནང་ཐུབ་ཀྱི་ཡོད་པ་མ་རེད། གནད་དོན་གཙོ་བོ་དེར་ཐུག་འདུག དཔེ་ཆུང་ས་ཞིག་ནས་བཤད་ན། ད་ལྟའི་བར་བཙན་བྱོལ་བ་རྣམས་ལ་རྒྱ་གར་ནང་གནས་སྡོད་ཆོག་པའི་སྐྱབས་བཅོལ་ལག་དེབ་ཀྱི་དཀའ་ངལ་ཡང་ཡོངས་སུ་སེལ་ཐུབ་ཡོད་པ་མ་རེད། གཞུང་གིས་སྒྲུབ་དགོས་པ་མང་པོ་ཞིག་སྒྲུབ་ཐུབ་ཀྱིན་མེད་པ་དང། མི་མང་པོར་དཀའ་ངལ་འཕྲད་ཡོང་དུས། རང་བཞིན་གྱིས་སོ་སོའི་སེམས་སུ། གཅིག་ནས་སློབ་སྦྱོང་བྱེད་མ་ཐུབ། གཉིས་ནས་འཐབ་རྩོད་ཀྱང་བྱེད་མ་ཐུབ། ང་འདིར་བསྡད་ན་ཅི་ཞིག་ལ་ཕན་ཐོགས་ཀྱི་འདུག་གམ་ཅེས་རང་ཉིད་ལ་ལྡོག་འདྲི་ཞིག་སླེབ་ཡོང་གི་ཡོད་པ་རེད། རང་དོན་དང་གཞན་དོན་གང་ཡང་མ་འགྲུབ་པར་སྡོད་པ་ལས། ཕྱིར་བོད་ནང་ལོག་ན་མ་མཐར་ཡང་སོ་སོའི་ས་ཆ་སྲུང་ཐུབ་ཀྱི་རེད། བོད་ནང་ནས་སྐྱེས་མཁན་ཞིག་ལ་མཚོན་ན་སོ་སོའི་ཕ་ས་ཕ་ཡུལ་དེ་གཙོ་བོ་རེད། ང་རང་གིས་རྒྱུ་རྐྱེན་འདི་དག་ལ་བརྟེན་ཏེ་མི་མང་པོ་ཞིག་ཕྱིར་ལོག་གི་ཡོད་པར་ངོས་འཛིན་བྱེད་ཀྱི་ཡོད།
གསར་འགོད་པ། ཚེ་རིང་རྒྱལ།
༼བོད་ཀྱི་དུས་བབ་ཚགས་ཤོག་སྤྱིའི་འདོན་ཐེངས་ ༥༦༦ ལས་བདམས་བཀོད་བྱས།༽
བསམ་གཞིགས་ཟབ་ས་ནས་བྱས་ཤིང་གནས་ལུགས་ངོ་གདོང་ན་འདུག བཀའ་དྲིན་ཆེ།
དགེ་རྒན་ཆེན་མོ་ལགས།
བཀའ་དྲིན་ཞུ། ཐེང་འགའ་ཀློག་ཟིན་་་
དངོས་ཡོད་གནས་ཚུལ་རེད།
གཡས་ཟུར་གཡོན་ཟུར་མེད་པའི་སྐད་ཆ་ལ་གུས་འདུད་ཞུ།
ངོ་བཤུས་ཞིག་བརྒྱབ་ཡོད་པའི་དགོངས་གནང་ཞུ།
རང་དབང་གི་རྩོམ་པ་པོ་ས་རཱ་མཐོ་སློབ་ཀྱི་དགེ་རྒན་སྤྲེལ་ནག་པ་བློ་གྲོས་དཔལ་བཟང་ལགས་ཀྱི་དབུ་སྐྲའི་ཚོན་མདོག་འདི་དངོས་གནས་ཡིན་ནམ་མིན། ལགས། གསར་འགོད་པ་ཚེ་རིང་རྒྱལ་ལགས།
རྒན་ལགས་ནས(མ་གཞི་ཤེས་ཚད་མེད་ན་བསམ་བློ་ཡོད་པ་མ་རེད། བསམ་བློ་མེད་ན་མི་གཤིས་གྲུབ་ཐུབ་ཀྱི་མ་རེད། མི་གཤིས་མེད་ན་གཞན་གྱིས་བསྒྱུར་ཆོག་ཆོག་ཅིག་ཡིན།)ཅེས་བཤད་སྟངས་ལ་བལྟོས་ན་སྐབས་འདིར་མི་གཤིས་ཟེར་བ་ལོ་རྒྱུས་དང་ཤེས་ཡོན་གྱིས་བསྐྲུན་པའི་མིའི་གཤིས་ཀའམ་རང་ཚུགས་གཏན་པོ་ཞིག་ལ་གོ་དགོས་པར་སེམས།འོན་ཀྱང་ལྐུག་པ་ཨུ་ཚུགས་ཀྱི་རང་ཚུགས་ནི་རྨོངས་དད་དང་གཅིག་པ་ཡིན་པས་ཤེས་ཡོན་གྱིས་བསྐྲུན་པའི་རང་ཚུགས་ཤིག་དགོས་རྒྱུ་ཧ་ཅང་གལ་ཆེན་པོ་ཡིན།འོན་ཀྱང་འདི་ནི་ངའི་བསམ་ཚུལ་ཙམ་ལས་སྐབས་འདིའི་མི་གཤིས་ཀྱི་གོ་དོན་ངོ་མ་དེ་ཡིན་མིན་མི་ཤེས།
སྔོན་མར་མི་འདི་ཐེངས་ཁ་ཤས་མཐོང་མྱོང་ཡང་།
དེང་རབས་ཀྱི་ཀུན་སྤྱོད་མ་རབས་ཚོས་ཤན་ཞུགས་པའི་ཀླད་མེད་ཅོལ་ཆུང་ཞིག་རེད་འདུག་
དྲན་ཡང་། དེ་རིང་ཁོའི་སྐད་ཆ་དེ་དག་གོ་དུས་དངོས་གནས་སེམས་འགུལ་ཐེབས་པ་ཞིག་བྱུང་། དངོས་གནས་དེང་རབས་ཀྱི་བསམ་བློ་བ་རེད་འདུག
བོད་པ་ཚང་ལ་མི་འདི་འདྲ་བོ་ད་དུང་འགའ་ཤས་ཡོད་པའི་སྨོན་ལམ་འདེབས།
རྒན་ལགས་དང་གསར་འགོད་པ་རྣམ་པ་གཉིས་ལ་བཀའ་དྲིན་ཆེ། ངོ་མ་གནད་ལ་ཁེལ་བ་ཞིག་ཏུ་སེམས་སོ།། ཞར་ནས་ངོ་བཤུས་ཤིག་ཀྱང་ཁྱེར་སོང་བ་ཡིན་པས་དགོངས་འགལ་མེད་པ་ཞུ།
བསམ་བློ་མེད་ན་མི་གཤིས་གྲུབ་ཐུབ་ཀྱི་མ་རེད། དང། དེར་བརྟེན། ཡོན་ཏན་པར་རིག་གནས་ཀྱི་མི་གཤིས་མེད་དུས་འཐབ་རྩོད་ཀྱི་ནུས་པ་ཅི་ཡང་ཡོད་པ་མ་རེད། བཅས་ཀྱི་ནང་མི་གཤིས་ཀྱི་གོ་དོན་གང་ཡིན་པ་མཁྱེན་ལྡན་པ་སུ་རུང་ནས་གསལ་བཤད་ཡོང་བ་ཞུ།
གནས་ལུག་ཡོད་པའི་སྐད་ཆ་ཟེར་ན་འདི་འདྲ་རེད། ཧ་ཅང་བློ་ལ་འགྲོ་སོང་། ཤེས་ཡོན་པ་ཁོང་ལྟ་བུ་གང་མང་ཡོད་ན་བོད་མིའི་རྒྱན་ཆ་རེད།
བཙན་བྱོལ་བོད་མིའི་དངོས་ཡོད་གནས་སྟངས་འཚམས་པའི་བསམ་ཚུལ་དང་འདྲི་བ་ཡག་པོ་བྱུང་འདུག་བློ་སྒོ་འབྱེད་པའི་བསམ་བློ་བ་ཞིག་རེད་འདུག
སྤྲེལ་ནག་པའི་དཔྱོད་ཤེས་འདིས་བདག་གི་མགུ་ཁེངས་སོང་། དངོས་ནས་མགུ་ཁེངས་སོང་། ༼རྒྱལ་ཁབ་དང་སྲིད་གཞུང་གང་ཞིག་ཡིན་ཡང་། ཐོག་དང་པོ་ལོ་རྒྱུས་ཀྱིས་གྲུབ་པ་ཡིན་སྟབས། ལོ་རྒྱུས་ཀྱི་བདེན་དོན་དེ་ཐམས་ཅད་ཀྱི་མགོ་ན་ཡོད་པ་རེད། འུ་ཚོར་ལོ་རྒྱུས་ཀྱི་རྨང་གཞི་ཞན་པ་དང་། ལོ་རྒྱུས་ཀྱི་ནུས་པ་དང་ལྟ་གྲུབ། ལོ་རྒྱུས་ལ་ལྟ་སྟངས་རྣལ་མ་མེད་པ། ལོ་རྒྱུས་ཀྱི་ནུས་པ་མ་ཤེས་པར་བརྟེན། ལོ་རྒྱུས་ཟེར་བ་དེ་ཤེས་ཡོན་ཙམ་གྱི་ཚུལ་དུ་སྦྱོང་བཞིན་པ་མ་གཏོགས། ལོ་རྒྱུས་རིག་གནས་ཀྱིས་མི་གཤིས་སྐྱེད་སྲིང་བྱེད་ཐུབ་ཀྱི་ཡོད་པ་མ་རེད། སྤྱིར་ལོ་རྒྱུས་ཆེད་ལས་སྦྱངས་ཏེ་ལྟ་གྲུབ་ཡོད་བསྡད་མཁན་ཞིག་ཡིན་ན། ལོ་རྒྱུས་ཀྱི་བདེན་དོན་ཆེད་སོ་སོའི་ཚེ་སྲོག་ཀྱང་གཏོང་ཐུབ་པའི་སྤོབས་པ་ཡོད་པ་རེད། ང་ཚོར་དེ་འདྲའི་སྤོབས་པ་མེད་སྟབས་མི་གཞན་ཞིག་གིས་ཁ་ལོ་བསྒྱུར་ཆོག་ཆོག་ཅིག་ཡོད་པ་རེད།༽ཇུགས་རྗེ་ཆེ།
་་་་་་ འདིར་བོད་ཡིག་གི་ཕྱོགས་ནས་བོད་ནང་ལས་སྐྱོ་བ་ཡོད་པ་དང་། དབྱིན་ཡིག་གི་ཐོག་ནས་ཀྱང་སློབ་སྦྱོང་མཐའ་འཁྱོངས་པ་ཞིག་རག་ཐུབ་ཀྱི་མེད་སྟབས། རིམ་པས་སློབ་གྲྭར་ཡོང་མཁན་ཀྱང་ཇེ་ཉུང་དུ་འགྲོ་བཞིན་ཡོད་པ་རེད། ་་་་་་ཟེར།
ཇི་སྐད་དུ། མཁས་གང་ཤེས་བྱ་དེ་ཁོ་ན། ཇི་བཞིན་རྟོགས་པ་ཡིན་པར་འདོད། བྱེ་བྲག་སྦྱངས་པའི་དོན་ཤེས་པ། དེ་ཡང་དེ་ལའང་མཁས་ཞེས་བྱ། དྲང་པོར་ཞུས་ན། རྒན་ཁོང་ལྟ་བུའི་ཟབ་ཚད་དང་མཁྱེན་རྒྱ་ཅན་ཞིག་བྲོས་བྱོལ་སྤྱི་ཚོགས་ནང་དུ་ཡོད་ཚོད་མི་འདུག་པས། ཚང་མ་ལོས་ཁོང་གི་གསུང་ལ་སློབ་སྦྱོང་ཡག་པོ་ཞིག་གནང་བར་རེ་བ་ཡོད།