མིག་མི་འཛུམ།
ཁ་སང་དེ་རིང་རང་ལུས་མེར་བསྲེགས་ཀྱི་གཏམ་གྱི་ཡོ་ལང་དེ་འཇམ་ནས་ཏོག་ཙམ་ཕྱིན་སོང་། དཔའ་བོ་དཔའ་མོ་དགུ་ཅུ་གོ་གྲངས་ཤིག་དེ་ལྟར་བཞུད་སོང་རྗེས། ད་འུ་ཅག་གི་བཀའ་ཤག་སྲིད་གཞུང་ལ་འཆར་གཞི་ཅི་ཞིག་ཡོད་དམ། འདས་པོ་དེ་དག་གི་རེ་བ་དང་དམིགས་ཡུལ་གྱི་ཕྱོགས་ནས་འུ་ཅག་གིས་ལས་ཀ་ཅི་ཞིག་གི་མགོ་རྩོམ་གྱི་ཡོད། རེ་རེ་བཞིན་མེར་བསྲེགས་པའི་མཇུག་ཏུ་བསྔོ་བ་སྨོན་ལམ་རེ་བཏོན་ཞིང་། ཡུལ་ལུང་དང་ཕ་མའི་མིང་ཐོ་རེ་བཀོད་རྗེས་འགྲིག་སོང་བ་རེད་དམ། དགྲ་ཕྱོགས་ནས་རེ་རེ་བཞིན་གྱི་ནང་མི་དང་སྤུན་མཆེད། གྲོགས་པོ་དང་མི་མང་བཙིར་ནས་འོང་གི་འདུག ཤི་སྡུག་གི་རྗེས་ལ་མནར་སྡུག་གཏོང་གི་འདུག གནད་དོན་ཡོད་ཚད་གར་སོང་ཆ་མེད་ཀྱི་ལམ་དུ་བརྫངས་འོང་གི་འདུག ཁ་ཉིན་གྱི་ཉི་མ་རེ་རེའི་མེར་བསྲེགས་ཀྱི་གསར་འགྱུར་དེ་ད་ནི་འཛིན་བཟུང་དང་གར་སོང་ཆ་མེད་ཅེས་པར་བསྒྱུར་འདུག
ད་ནི་བོད་ཁམས་ཧྲིལ་བོར་གནས་ཚུལ་ཛ་ཇེ་དྲག་ཏུ་འགྲོ་ཡི་ཡོད་པའི་སྐབས་འདིར་བོད་རྒྱ་ཞི་མོལ་གྱི་ཚོགས་ཆུང་ཞིག་མྱུར་ཏུ་འཛུགས་རྒྱུའི་གྲ་སྒྲིག་བྱེད་ཀྱིན་པ་ནི་དགའ་འོས་ཀྱང་། དོན་དངོས་ཀྱི་གྲོས་མོལ་ཞིག་བྱ་རྒྱུའི་ལམ་ཁ་དེ་ཡོད་དམ། མགོ་སྐོར་མགོ་གཡོག་གིས་དུས་ཚོད་ཆུད་ཟོས་སུ་མི་འགྲོ་བའི་གདེང་ཚོད་ཅི་ཞིག་ཡོད་དམ། ད་ནི་སྔོན་མ་ལྟར་གྲུབ་འབྲས་གང་ཡང་མེད་པའི་རེ་བ་ཤི་བོ་ཞིག་ལ་འཐམ་སྡོད་པའི་དུས་མ་ཡིན་པ་དེ་བཤད་ཅི་ལ་དགོས་ཨང་། གཞིས་ལུས་རྒྱ་ཆེའི་མི་མང་གིས་ཡོད་ཚད་ནས་ཡོད་ཚད་བློས་བཏང་སྟེ་བཙན་བྱོལ་གཞུང་ལ་རྒྱབ་སྐྱོར་བྱེད་པའམ་རེ་བ་རྒྱག་གི་ཡོད་ཙ་ན། འདི་ཕྱོགས་ནས་ཀྱང་མི་འཇོན་ཚེ་དེ་ལུགས་ཁ་གསལ་ནས་སྡུག་བསྔལ་ལ་མི་སྦྱོར་རྒྱུ་ཧ་ཅང་གལ་ཆེ་སྟེ། སྔོན་མ་བཞིན་ལྟ་སྐོར་ཙམ་བྱས་པས་རྣམ་འགྱུར་ཡག་རབས་དང་རེ་བ་ཆེ་རབས་ཟེར་གྱིན་མི་མང་རྨོངས་པར་བཅུག་ན་ལྡོག་ཕྱོགས་ཀྱི་ནུས་པ་ཐོན་ངེས་པ་ཤེས་གསལ་ལྟར་ཡིན།
ངས་རང་རེའི་གཞུང་ལ་རེ་བ་མེད་པའི་སྐད་ཆ་འཆད་ཀྱི་མེད། ཡིད་ཆེས་ཆེ་དྲགས་པས་འཁང་ར་ཙམ་ཤོར་བ་ཡིན། དཔེ་ཞིག་བཞག་ན། བཙན་བྱོལ་སྤྱི་ཚོགས་ཁྲོད་རང་དོན་ཡལ་བར་དོར་ནས་བོད་སྤྱི་བའི་ལས་དོན་ཁོ་ནར་མི་ཚེ་གཏོང་མཁན་གྱི་དཔོན་རིགས་ཅི་ཙམ་ཡོད། གཞིས་ལུས་རྒྱ་ཆེའི་མི་མང་གིས་རང་སྲོག་བཏང་ནས་ང་ཚོ་ལ་བཤད་བདེ་གནང་བདེ་བཟོ་ཡི་ཡོད་ཀྱང་། ང་ཚོའི་དབུ་ཁྲིད་ཚོས་ཨང་དང་བོར་རང་དོན་བཟོས་ནས་རང་ཉིད་སྐྱིད་ས་བདེ་ས་ཞིག་ལ་ འཚང་རྗེས་གཞི་ནས་ལས་མགོ་རྩོམ་གྱི་ཡོད་པའི་སྣང་བ་ཤར་མྱོང་། དེའི་སྟབས་ཀྱིས་མཚམས་ལན་རེར་བོད་དོན་ཟེར་བ་དེ་རྩེད་ཆས་ཙམ་གྱི་ཚད་དུ་འཛིན་གྱི་མེད་འགྲོ་ཡང་དྲན་མྱོང་། རྒྱུ་མཚན་ནི་རྒྱ་རི་བློ་གྲོས་རྒྱལ་མཚན་གྱིས་ད་བར་དུ་གྲོས་མོལ་རིམ་པ་བརྒྱད་དགུ་ཙམ་གྱི་རིང་རེ་བ་ཆེ་རབས་དང་རྣམ་འགྱུར་ཡག་རབས་བཤད་ནས། ད་ལོར་རེ་བ་རྦད་དེ་བྲལ་རབས་བཤད་ནས་དགོངས་པ་ཞུས་སོང་། འདིའི་ཐད་ནས་ད་བར་དུ་མགོ་སྐོར་བཏང་སོང་བའི་རྣམ་པ་ཞིག་རང་བཞིན་གྱིས་སེམས་ལ་མི་དྲན་ནམ། ( འདིའི་ཐད་ནས་ད་ལོར་ཨ་རིའི་གྲོས་ཚོགས་འཐུས་མི་ཞིག་གིས་བློ་བཟང་སེང་གེ་ལ་ཡི་གེ་ཞིག་བཏང་བ་དེར་ལྟ་རོགས།)
རང་གི་ཁེ་ཕན་གཙོ་བོར་གཉེར་བའི་འུ་ཅག་གི་དབུ་ཁྲིད་དག་གིས་ད་ནི་ཁ་གསང་བའི་དུས་ལ་བབ་ཡོད། དེ་མིན་བདག་གི་བློས་ཐུབ་ཀྱི་གྲོགས་པོ་ཞིག་བོད་དུ་སོང་ནས་ཟླ་བ་འགར་བསྡད་རྗེས་ཕྱིར་ལོག་ཡོད། ཁོས་བཤད་ན། དེང་སང་གཞིས་ལུས་མི་མང་གི་སྙིང་སྟོབས་དེ་ཧ་ལས་ཤིང་ཧོན་འཐོར་དགོས་པ་ཞིག་འདུག་ལ། ཇ་ཁ་ཆང་ཁ་སོགས་ནས་བོད་དོན་དང་༸རྒྱལ་བ་རིན་པོ་ཆེ་གླེང་ཞིང་། ད་དུང་དེ་བས་ཀྱང་ང་ཚོས་བསམ་བློ་གཏོང་དགོས་པ་ཞིག་ལ་མེར་བསྲེགས་བཏང་བ་འདིས་བོད་དོན་ལ་ཕན་གྱི་ཡོད་མེད་སྐོར་མང་དུ་འདྲི་ཡི་འདུག་ཟེར་ལ། གཞོན་སྐྱེས་མང་བོས་བཙོན་དུ་ཚུད་ནས་སྡུག་བསྔལ་མྱོང་རྒྱུ་དང་མེར་བསྲེགས་བཏང་ནས་ཚེ་སྲོག་གཏོང་རྒྱུ་ནི་འོས་འགན་ཞིག་ཏུ་བསམ་འདུག་ཟེར། ང་ཚོའི་ངོས་ནས་ཁོང་དག་གི་སྙིང་སྟོབས་དེ་གོ་དུས་སེམས་ལ་ཚོར་བ་ཅི་ཞིག་འདུག་གམ། ཁོང་ཚོའི་རེ་བ་འཆང་སའི་ཕྱི་ལོགས་ཀྱི་བཙན་བྱོལ་བ་དག་གིས་མུ་མཐུད་དུ་སྐྱབས་བཅོལ་འཕར་མ་ཞིག་ལ་འབད་ནས་རང་གི་མ་འོངས་པའི་འཚོ་བ་གཅིག་བུར་སྙེག་གིན་པ་འདིས་ཁྱེད་ལ་བློ་བདེ་བག་ཕེབས་ཤིག་ཡོང་གི་འདུག་གམ།
ད་དུང་ཁ་སང་དེ་རིང་རྒྱ་ནག་གིས་རང་ལུས་མེར་བསྲེགས་སྐོར་གྱི་བརྙན་འཕྲིན་ཐུང་ངུ་རེ་དང་དེང་སང་བཙོན་དུ་ཚུད་པ་དག་ལ་བཅར་འདྲི། ད་དུང་བླ་མ་ཁག་ཅིག་གི་བཀའ་སློབ་བཅས་དྲ་རྒྱའི་ནང་དུ་བཀོད་ཡོད་པ་དང་། དེ་ཡི་ཞོར་དུ་ཡུལ་ངོས་ཀྱི་གནས་ཚུལ་སོགས་བླངས་འདུག དེ་དག་གིས་ཅི་ཞིག་གསལ་སྟོན་བྱེད་ཀྱི་ཡོད་དམ་ཞེ་ན། བོད་ཀྱི་ཆོས་ལུགས་དང་མི་མང་ནང་ཁ་བྲལ་གྱི་བྱ་སྤྱོད་སྤེལ་གྱི་ཡོད་པ་དེ་རེད། ད་དུང་དེ་བས་ཀྱང་ཛ་དྲག་པོ་ཞིག་ནི། བོད་ཡུལ་གྱི་ས་གནས་གང་སར་དྲག་པོའི་འཐབ་ར་བཙུགས་ཏེ་ཉེས་པ་མེད་པའི་བོད་རིགས་སུ་འདྲ་ཞིག་ཡིན་ཡང་དྲག་ཆས་ཀྱི་སོ་བར་ནས་འགྲོ་དགོས་པ་དེ་ཡིན། མདོར་བསྡུས་ན། དེང་སང་བོད་ཡུལ་སྟོད་སྨད་བར་གསུམ་བཙོན་ཁང་དུ་གྱུར་ནས་ཧ་ཅང་ཡ་ང་བ་ཞིག་ཆགས་ཡོད།
ཐུགས་རྗེ་ཆེ། ཡག་པོ་ཞེ་བོ་བཤད་བྱ། ངས་ཀྱང་དེ་ག་རང་བཤད་ན་འདོད། བོད་ནང་གི་བོད་མིའི་སེམས་ཤུགས་དང་རེ་བ་མེར་སྲེག་སོགས་གོ་ཐེངས་རེར་སྙིང་ལ་ཚ་ཤར་རེ་རྒྱག་གི་འདུག ཡིན་ན་ཡང་ད་བོད་གཞུང་གི་ཅིག་གནང་གི་རེད་བསམས་ཀྱང་མཆོད་འབུལ་བྱས་པ་ཙམ་ལས་ཅི་ཡང་གོ་རྒྱུ་མི་འདུག ང་ལའང་བོད་གཞུང་ལ་རེ་འདོད་ཆེན་པོ་ཡོད། ང་རང་ངེས་ནས་གང་ཡང་མི་འཇོན་མོད། བཙན་བྱོལ་གཞུང་གི་ནང་ཤེས་འཇོན་པ་མང་པོ་ཡོད་པས་གཞུང་ཕྱོགས་ནས་ཀྱང་གང་ཡང་བྱས་རྒྱུ་མེད་པ་ཨེ་ཡིན་ནམ། དབུ་མའི་ལམ་མ་འགྲིག་པ་མ་རེད། སྐུ་ཚབ་དེ་དག་མ་འཇོན་པ་དང་རྒྱ་གཞུང་ལ་གྲོས་མོལ་བྱེད་འདོད་མེད་པས་འབྲས་བུ་མ་ཐོན་པ་རེད། དེང་དབུ་མའི་ལམ་གྱི་མིང་འཁྱེར་ནས་ལྟོ་རྒྱབ་འཚོལ་མཁན་ཁ་ཤས་ཀྱིས་དབུ་མའི་ལམ་ཡང་འཕྲོ་བརླག་ལ་གཏོང་འདོད་ཡོད་པ་འདྲ། དེ་དག་གི་ཁ་ལ་འཁྱེར་བའི་དབུ་མའི་ལམ་དེ་གང་ཡིན་མི་ཤེས། ཆུ་ངོགས་གཏམ་རྒྱུད་ནང་ཡོད་པའི་གོང་མའི་ཕོ་ཉའི་མཉམ་དུ་ཀོ་ཆིག་གི་གཡོག་པོ་གཉིས་བཏང་ཡོད་པ་དེའི་བྱ་སྤྱོད་དེ་ག་རང་འཁྲབ་བཞིན་པ་འདྲ་བོ་མཐོང་གི་འདུག
མིག་མི་འཛུམ་པའི་རང་ལུས་མེར་བསྲེགས་ཀྱི་དོན་རྐྱེན་དང་འབྲེལ་གླེང་སློང་གང་ཡང་བྱས་སོང་བས་ཐུགས་རྗེ་ཆེ་གྲངས་མེད་ཞུ། གཞན་ཡུལ་གྱར་བོད་མི་འདི་ཚོ་ཁ་ནང་ལ་ས་བཏང་ན་ཕུ་འདེབས་མི་ཤེས་བའི་ངང་ཚུལ་སྟོན་གྱིན་འདུག གང་ལྟར་མགོ་གང་ལ་སྤས་རུང་གདོང་དེ་ཚ་ལམ་ལམ་ཡིན་པ་ཐག་གིས་ཆོད། འོན་ཀྱང་། དཀའ་ངལ་འཕྲད་མཁན་དག་གཞིས་ལུས་ཡུལ་མི་དག་ཡིན་ཙ་ན། མུ་མཐུད་ནས་ལ་འདེད་ལུང་འདེད་མི་བྱེད་ཐབས་མེད་རེད། ཁ་སང་དེ་རིང་གི་གཞིས་ལུས་མི་མང་གི་གནས་བབས་ནི་དོན་དངོས་ཐོག་གཤིན་རྗེ་འཕྲང་ལམ་དང་འདྲ་བར་ལྕགས་སྒྲོག་མཁྲེགས་པོ་དང་རྒྱུགས་པ་སྤོམ་པོ་བར་ན་ཐར་རེ་དཀའ་བས་ན། བོད་གཞུངས་འབངས་འདི་གཉིད་མི་སད་ཚེ་གཉིད་མི་སློང་ཐབས་མེད་རེད།