བཙན་བྱོལ་སྤྱི་ཚོགས་ནང་དགེ་རྒན་གྱི་དཔུང་སྡེ་སྲ་བརྟན་མེད་པ་དེ་ནི་དཀའ་ངལ་ཆེན་པོ་ཞིག་ཆགས་ཡོད་སྟབས། སློབ་གསོའི་ལས་གནས་དངོས་ནས་ལོ་ ༡༤ ལྷག་ལ་དགེ་རྒན་གྱི་ཕྱག་ལས་གཉེར་མྱོང་མཁན། སུ་ཇཱ་སློབ་གྲྭའི་དགེ་རྒན་ངག་དབང་ཚེ་བརྟན་ལགས་སུ་སློབ་གསོ་དང་འབྲེལ་བའི་གནད་དོན་ཁག་ཅིག་ཐད་བཅར་འདྲི་ཞུས་ཡོད།
དྲི་བ། ཐོག་མར་ཁྱེད་རང་གི་སློབ་སྦྱོང་དང་དགེ་རྒན་གྱི་ཕྱག་ལས་གནང་པའི་བརྒྱུད་རིམ་དང་འབྲེལ་ཏེ་རང་ཉིད་ངོ་སྤྲོད་རགས་བསྡུས་ཤིག་གནང་རོགས།
ལན། ངའི་མིང་ལ་ངག་དབང་ཚེ་བརྟན་ཟེར། ༡༩༨༣ ལོར་བོད་ནས་ཚུར་བཙན་བྱོལ་དུ་བསླེབས་པ་ཡིན་ལ། ངའི་ཕ་ཡུལ་གཉའ་ལམ་ནས་ཡིན། འདི་གར་འབྱོར་རྗེས་དྷ་སྟེང་བོད་ཁྱིམ་སློབ་གྲྭའི་ནང་ལོ་ ༡༠ རིང་ལ་སློབ་སྦྱོང་བྱས་པ་དང་། དེ་ནས་ཅན་དྷི་གྷར་དུ་མཐོ་རིམ་སློབ་གྲྭ་འགྲིམས་ཏེ་སློབ་མཐར་ཕྱིན་རྗེས། བོད་ཁྱིམ་སུ་ཇ་སློབ་གྲྭར་དགེ་རྒན་གྱི་ལས་ཀ་གཉེར་ཏེ་ད་ལྟ་ ༡༤ ལྷག་ཕྱིན་ཡོད།
དྲི་བ། ཁྱེད་ལ་དགེ་རྒན་གྱི་ཕྱག་ལས་འདི་གནང་འདོད་ཀྱི་ཐོག་མའི་བསམ་འདུན་ཇི་ལྟར་འཁོར་བ་ཡིན་ནམ།
ལན། ཆུང་དུས་ང་རང་བོད་ནང་སྡོད་པའི་སྐབས་སུ། བོད་ནང་དུ་ང་ཚོ་གྲོང་གསེབ་ཁུལ་དུ་ཡིན་ནའང་། དགེ་རྒན་ལབ་དུས་མཐོང་ཆེན་པོ་ཞིག་ཡོད་པ་རེད། དེར་བརྟེན་སོ་སོའི་ཕ་མའི་ངོས་ནས་ཀྱང་དགེ་རྒན་ཞིག་བྱེད་ཐུབ་པ་ཡིན་ན་ཧ་ཅང་ཡག་པོ་མཐོང་གི་ཡོད། འདིར་བཙན་བྱོལ་ནང་དུ་བསླེབས་པའི་རྗེས་སུའང་ང་རང་གི་ངོས་ནས་དགེ་རྒན་དེ་གལ་ཆེན་པོ་ཞིག་ལ་མཐོང་སོང་། དེ་བཞིན། སློབ་གྲྭའི་ནང་ནམ་རྒྱུན་སློབ་གྲོགས་ཕན་ཚུན་བར་ལབ་གླེང་བྱེད་པའི་སྐབས་སུ། ངའི་སྐད་ཆ་བཤད་སྟངས་དང་རྣམ་འགྱུར་སྟོན་སྟངས་སོགས་ཀྱི་ཐད་ནས། ཁོང་ཚོས་སྐབས་རེར་ཁྱེད་རང་རྗེས་མ་དགེ་རྒན་བྱས་ན་ཡག་པོ་ཡོང་ས་རེད་ཅེས་ལབ་ཡོང་གི་ཡོད་དུས། སོ་སོའི་ངོས་ནས་ཀྱང་རང་བཞིན་གྱིས་དགེ་རྒན་ཞིག་བྱེད་རྒྱུའི་སྤྲོ་སྣང་འོང་གི་ཡོད། རྒྱུ་རྐྱེན་དེ་དག་ལ་བརྟེན་རང་ཉིད་དགེ་རྒན་ཞིག་བྱ་རྒྱུའི་ཀུན་སློང་དང་དམིགས་ཡུལ་བྱུང་བ་ཡིན་ལ། དེ་ལྟར་རིམ་པས་སོ་སོ་འདི་ལྟར་དགེ་རྒན་ཞིག་ཆགས་སོང་བ་རེད།
དྲི་བ། ཁྱེད་རང་སྒེར་ངོས་ནས་སྤྱི་ཚོགས་ཁྲོད་དགེ་རྒན་ནི་གལ་ཆེ་ལོས་ག་འདྲ་ཞིག་ལ་ངོས་འཛིན་གནང་གི་ཡོད་དམ།
ལན། སྔོན་མ་ནས་སོ་སོའི་ངོས་ནས་དགེ་རྒན་ཞེས་པ་འདི་གལ་ཆེན་པོར་ཚོར་གྱིན་ཡོད་ལ། དངོས་སུ་དགེ་རྒན་གྱི་ཕྱག་ལས་འདི་གཉེར་བ་ནས་བཟུང་སྔར་ལས་ལྷག་པར་དགེ་རྒན་ནི་སྤྱི་ཚོགས་ནང་ཧ་ཅང་གལ་ཆེན་པོ་ཡིན་པ་མཐོང་སོང་། དམིགས་བསལ་ང་ཚོ་བཙན་བྱོལ་བ་ཞིག་ཆགས་ཡོད་སྟབས། སོ་སོའི་མི་རིགས་ཀྱི་འདས་པའི་ལོ་རྒྱུས་དང་ད་ལྟའི་གནས་སྟངས་གང་ལ་བལྟས་པ་ཡིན་ནའང་། ང་ཚོའི་ལུང་པ་ཕུངས་བྱེད་ཀྱི་རྒྱུ་རྐྱེན་གཙོ་བོ་ནི་དེང་དུས་ཤེས་ཡོན་གཙོས་སློབ་གསོའི་གནས་སྟངས་མ་འགྲིག་པའི་ཐོག་ནས་ཕུངས་བསྡད་ཡོད་པ་ཞིག་ངས་མཐོང་གི་འདུག དེར་བརྟེན། སློབ་ཕྲུག་དང་མ་འོངས་པའི་མི་རབས་དེ་ཚོ་ཡག་པོ་ཞིག་དང་སོ་སོའི་སྤྱི་ཚོགས་ཡག་པོ་ཡོང་དགོས་ཀྱི་ཡོད་ན། དགེ་རྒན་གྱི་དཔུང་སྡེ་ཧ་ཅང་ཡག་པོ་དགོས་པ་དེ་གནད་འགག་ཆེན་པོ་མཐོང་གི་འདུག གལ་སྲིད་དགེ་རྒན་ཡག་པོ་ཞིག་མེད་པ་ཡིན་ན། སྤྱི་ཚོགས་སྲ་བརྟན་དང་ཡར་རྒྱས་ཡོང་ཐུབ་རྒྱུ་དཀལ་ལས་ཁག་པོ་རེད།
དྲི་བ། བཙན་བྱོལ་སྤྱི་ཚོགས་ཀྱི་བཤད་རྒྱུན་ཞིག་ལ། མཐོ་སློབ་ཐོན་རྗེས་ཡར་མར་ནས་ལས་ཀ་ཡག་པོ་མ་རག་པ་ཡིན་ན། གཞི་ནས་དགེ་རྒན་བྱེད་དུ་འོང་གི་ཡོད་པ་རེད་ཟེར། དགེ་རྒན་གྱི་ལས་གནས་ལ་མཐོང་མེད་པའི་རྒྱུ་རྐྱེན་གཙོ་བོ་གང་ལ་ཐུག་ཡོད་པ་རེད།
ལན། དེ་ནི་ཕྱོགས་མང་པོ་ཞིག་ལ་རག་ལས་ཀྱི་ཡོད་པ་རེད་བསམ་གྱི་འདུག མཐོ་རིམ་སློབ་གྲྭ་ཐོན་ཚར་བའི་རྗེས་ལ། མང་པོ་ཞིག་དགེ་རྒན་བྱེད་དུ་ཡོང་གི་ཡོད་པ་མ་རེད། ལས་ཀ་མང་པོ་བཙལ་ཏེ་མཐའ་མ་ལས་ཀ་མ་རག་པ་ཡིན་ན། གཞི་ནས་དགེ་རྒན་བྱེད་དུ་ཡོང་བཞིན་ཡོད་པ་དེ་ནི། ང་ཚོ་བཙན་བྱོལ་སྤྱི་ཚོགས་ནང་དངོས་ཡོད་གནས་ཚུལ་ལྟ་བུ་ཞིག་ཆགས་ཡོད་པ་རེད། གཅིག་ནས་དེང་སྐབས་སྤྱི་ཚོགས་ནང་མིའི་རིན་ཐང་ནི་ཕལ་ཆེར་རྒྱུ་ཡོད་མེད་སྒང་ལ་ཆགས་བསྡད་པའི་བཟོ་ཞིག་ཡོད་པ་རེད། དེ་འདྲ་ཡིན་དུས། ང་ཚོའི་སྤྱི་ཚོགས་ནང་གཞུང་དང་སྤྱི་སྒེར་ཚོགས་པ་གང་གི་ངོས་ནས་ཀྱང་དགེ་རྒན་གྱི་ལས་ཀ་དེར་དཔལ་འབྱོར་གྱི་རྒྱབ་སྐྱོར་ཤུགས་ཆེན་པོ་བྱེད་ཐུབ་ཀྱི་མེད་སྟབས། མི་སྒེར་སོ་སོར་དགེ་རྒན་བྱེད་འདོད་ཀྱི་འདུན་པ་ཡོད་ནའང་། དགེ་རྒན་ལ་གསོལ་ཕོག་ཡག་པོ་མེད་པ་དང་། ང་ཚོའི་སྤྱི་ཚོགས་ནང་དགེ་རྒན་གྱི་ལས་ཀར་བརྩི་མཐོང་ཆེན་པོ་མེད་པ་སོགས་ལ་བརྟེན་ནས། སློབ་མཐར་ཕྱིན་རྗེས་ཐོག་མར་དགེ་རྒན་གྱི་ལས་ཀ་དེ་བདམས་ཁག་པོ་ཆགས་ཏེ། ཡར་མར་ནས་ལས་ཀ་བཙལ་ཏེ་དངུལ་ཡག་པོ་རག་ས་ཞིག་ཡོད་པ་ཡིན་ན། སོ་སོའི་འཇོན་ན་མ་འཇོན་ན་ལས་ཀ་དེར་འཛུལ་ཐབས་བྱེད་པ་དང་། གལ་སྲིད་དངུལ་ཡག་པོ་རག་ས་ཞིག་མ་རྙེད་པ་ཡིན་ན། མཐའ་མ་དེ་ལ་དགེ་རྒན་བྱེད་དུ་ཡོང་གི་ཡོད་པ་རེད། མདོ་རྩ་རྡོག་རྡོག་དེ་ནི་དགེ་རྒན་གྱི་ལས་གནས་འདིར་དཔལ་འབྱོར་གྱི་རྒྱབ་བརྟེན་སྲ་ཐག་ཐག་ཅིག་མེད་པའི་རྐྱེན་གྱིས། དགེ་རྒན་བྱེད་དུ་ཡོང་མཁན་ཉུང་ཉུང་ཆགས་ཀྱི་ཡོད་པ་རེད་བསམ་གྱི་འདུག
དྲི་བ། འདས་པའི་ལོ་བཅུ་གྲངས་ལྷག་དགེ་རྒན་གྱི་ཕྱག་ལས་གཉེར་བའི་བརྒྱུད་རིམ་ཁྲོད་དཀའ་ངལ་གང་དག་འཕྲད་སོང་། རང་ཉིད་ཀྱིས་ལས་གནས་འདི་བདམས་པར་འགྱོད་སེམས་སྐྱེས་མྱོང་ཡོད་དམ།
ལན། དགེ་རྒན་གྱི་ཕྱག་ལས་འདི་གཉེར་དེ་ལོ་ ༡༤ ལྷག་ཕྱིན་པའི་དུས་ཡུན་ནང་། རང་ཉིད་ཀྱིས་ལས་གནས་འདི་བདམས་པར་བློ་ཕམ་རྩ་བ་ཉིད་ནས་བྱུང་མྱོང་མེད། ད་ལྟའི་ཆར་ཡིན་ནའང་ངས་དགེ་རྒན་ལས་རོགས་ཚོར་འདི་ལྟར་བཤད་ཀྱིན་ཡོད། འཛམ་གླིང་ནང་མི་ཧ་ཅང་མང་པོ་ཞིག་དགེ་རྒན་བྱ་རྒྱུའི་འདོད་པ་ཡོད་ནའང་། ཁོ་ཚོའི་ནུས་པ་དང་ལས་ཀྱི་དབང་གིས་ཆགས་མ་ཐུབ་པར་སྡོད་མཁན་བགྲང་ལས་འདས་པ་ཡོད་པ་རེད། ང་ཚོར་མཚོན་ན་དགེ་རྒན་འཇོན་གྱི་ཡོད་ན་མེད་ན། ལས་གནས་འདིའི་སྟེང་སྐྱིད་སྡུག་ག་འདྲ་ཞིག་བྱུང་བ་ཡིན་ནའང་། མི་ཚེ་འདིའི་ནང་དགེ་རྒན་ཆགས་པ་དེ་ནི། མ་འོངས་པར་སོ་སོའི་མི་ཚེ་ལ་ཕྱིར་བལྟ་བྱེད་སྐབས། སྔོན་མ་རང་ཉིད་ཀྱིས་བྱས་པའི་ལས་ཀ་དེ་འགྲིག་བསྡད་འདུག་བསམ་པ་ཞིག་ཡོང་གི་རེད་ཟེར་གྱིན་ཡོད། གཞན་དཀའ་ངལ་གྱི་ཕྱོགས་ནས་བཤད་ན། སྤྱིར་ལས་ཀ་ག་རེ་བྱས་པ་ཡིན་ནའང་དཀའ་ངལ་ནི་འཕྲད་ངེས་པ་རེད། ང་ལ་མཚོན་ན་སུ་ཇཱ་སློབ་གྲྭར་དགེ་རྒན་བྱེད་ཀྱིན་ཡོད་པ་རེད། སྤྱིར་བཏང་ང་རང་སློབ་ཕྲུག་མཉམ་དུ་དཀའ་ངལ་ཞེ་དྲགས་འཕྲད་མྱོང་མེད། སུ་ཇཱ་སློབ་གྲྭའི་ནང་སློབ་ཕྲུག་ཚོ་ཏོག་ཙམ་ལོ་ཆེ་པོ་ཡོད་སྟབས་བསམ་བློ་གཏོང་སྟངས་ཡང་ཏོག་ཙམ་རྒྱ་ཆེན་པོ་ཡོད་པ་རེད། སྐབས་རེར་སོ་སོའི་ཤེས་ཡོན་གྱིས་མ་འདང་བའི་ཐོག་ནས་དཀའ་ངལ་དེ་འདྲ་ཡོང་གི་ཡོད་པ་རེད། སྐབས་རེར་ང་ཚོའི་དགེ་རྒན་ནང་ཁུལ་ཡིན་ན་རེད། དགེ་རྒན་དང་འཛིན་སྐྱོང་བར་ལ་ཡིན་ན་རེད། གོ་བརྡ་ཡག་པོ་མ་འཕྲོད་པའི་ཐོག་ནས་དཀའ་ངལ་རེ་ཟུང་ཡོང་བསྡད་ཀྱི་ཡོད་རེད།
དྲི་བ། བཙན་བྱོལ་ནང་དགེ་རྒན་གྱི་སྤུས་ཚད་ཀྱིས་འདང་གི་མེད་པ་དང་། དགེ་རྒན་མང་པོ་ཞིག་ལས་གནས་ནས་ཐོན་བཞིན་པའི་དཀའ་ངལ་འདི་སེལ་ཕྱོགས་ཐད་ཐབས་ལམ་ག་རེ་མཐོང་གི་འདུག
ལན། སྒང་དང་འོག་སུ་ལ་དྲིས་པ་ཡིན་ནའང་དཀའ་ངལ་དེ་ཚང་མས་ཤེས་ཀྱི་ཡོད་པ་རེད། དཀའ་ངལ་དེའི་ཐབས་ལམ་ག་རེ་ཡིན་པ་དེའང་ང་ཚོས་ཧ་གོ་ཚར་ཡོད་པ་རེད། དཀའ་ངལ་དེའི་མདོ་རྩ་རྡོག་རྡོག་དེ་ནི་བརྒྱ་ཆ་མང་ཆེ་བ་ཞིག་ལ་དཔལ་འབྱོར་གྱི་དཀའ་ངལ་འཕྲད་ཀྱི་ཡོད་པ་རེད། དགེ་རྒན་མང་པོ་ཞིག་ལ་སོ་སོར་འཇོན་ཐང་དང་ལྷག་བསམ་ཡོད་པ་ཡིན་ནའང་། རྒྱབ་ལོགས་ནས་སོ་སོའི་སྤུན་མཆེད་སོགས་དཔལ་འབྱོར་གྱི་རོགས་པ་བྱེད་མཁན་མེད་པ་དང་། དེ་བཞིན། དགེ་རྒན་སོ་སོར་ཁྱིམ་ཚང་དང་བུ་ཕྲུག་ཡོད་པ་རེད། བུ་ཕྲུག་དེ་ཚོ་མ་འོངས་པར་མཐོ་རིམ་སློབ་གྲྭ་འགྲོ་དགོས་ཀྱི་ཡོད་སྟབས། དེང་སྐབས་མཐོ་སློབ་ཀྱི་ཟས་སོང་དང་ཤེས་ཡོན་འགྲོ་གྲོན་རིན་གོང་མཐོན་པ་རེད། དེ་ལྟར་རྗེས་ཕྱོགས་ཀྱི་སོ་སོའི་ནང་མི་དང་བུ་ཕྲུག་གི་མདུན་ལམ་ལ་དཀའ་ངལ་འཕྲད་ཡོང་དུས། དགེ་རྒན་མང་པོ་ཞིག་ལས་གནས་ནས་ཕྱིར་ཐོན་འགྲོ་བཞིན་ཡོད་པ་རེད། ལྟེ་བ་དེ་དཔལ་འབྱོར་རང་གི་དཀའ་ངལ་ལ་ཐུག་བསྡད་འདུག ང་ཚོའི་སྤྱི་ཚོགས་ཁྲོད་ལྷག་བསམ་དང་སེམས་ཤུགས་གལ་ཆེན་པོ་ཡིན་པ་གླེང་གི་ཡོད་པ་རེད། ཡིན་ནའང་། དངོས་སུ་དཔལ་འབྱོར་གྱི་དཀའ་ངལ་དེ་ཐོག་ལ་བསླེབས་ཡོང་དུས། ལྷག་བསམ་དང་སེམས་ཤུགས་དེའང་མང་པོ་ཞིག་གིས་འཁུར་ཐབས་ཡོད་པ་མ་རེད། ང་ཚོ་གཅིག་པུ་ཙམ་མ་ཡིན་པར་སྤྱིར་འཛམ་གླིང་གི་སྤྱི་ཚོགས་ཧྲིལ་པོའི་གནས་སྟངས་དེ་འདྲ་རེད། དེར་བརྟེན། སློབ་གསོ་ནི་དངོས་ནས་གལ་ཆེན་པོར་མཐོང་གི་ཡོད་ན། སྤྱི་སྒེར་ཚོགས་པ་ཚང་མས་དཔལ་འབྱོར་གྱི་སྒང་ནས་དགེ་རྒན་ཚོར་རྒྱབ་རོགས་དང་། སྤྱི་ཚོགས་ཀྱི་གོང་འོག་རིམ་པ་ཚང་མས་དགེ་རྒན་གྱི་ལས་གནས་འདིར་བརྩི་མཐོང་ཆེན་པོ་གནང་ཐུབ་པ་ཡིན་ན། དགེ་རྒན་བྱེད་མཁན་མང་པོ་ཡོང་གི་རེད་ལ། སྔར་ཡོད་ཀྱི་དགེ་རྒན་རྣམས་སྲ་བརྟན་དང་སྤུས་དག་ཡོང་རྒྱུར་ཕན་ཐོགས་ཡོང་གི་རེད་འདོད།
དྲི་བ། སྤྱི་ཚོགས་ཁྲོད་སློབ་གསོའི་ལས་དོན་ལ་བརྩི་མཐོང་ཡོང་ཆེད། གཞུང་དང་ཕ་མ། དགེ་རྒན་སོགས་ཀྱི་ངོས་ནས་ལེགས་བཅོས་བྱ་དགོས་པའི་གནད་དོན་གང་དག་མཐོང་གི་འདུག
ལན། སྤྱི་ཡོངས་ཀྱི་ཐོག་ནས་ཕ་མའི་ངོས་ནས་བྱེད་དགོས་པ་མང་པོ་ཡོད་ལ། ཕ་མ་ཚང་མའི་བསམ་འདུན་ཡང་སོ་སོའི་བུ་ཕྲུག་ལ་ཤེས་ཡོན་ཡག་པོ་འཐོབ་རྒྱུ་དེ་རེད། ཡིན་ནའང་། བསམ་འདུན་དེ་འགྲུབ་བྱེད་ཀྱི་ཐབས་ལམ་དངོས་སུ་སྒྲུབ་མཁན་ཕ་མ་ཧ་ཅང་ཉུང་ཉུང་ལས་མེད། ཕ་མ་མང་པོ་ཞིག་གིས་བུ་ཕྲུག་ལ་ཤེས་ཡོན་ཡག་པོ་ཡོང་བའི་རེ་བ་ཆེན་པོ་རྒྱག་གི་ཡོད་པ་མ་གཏོགས། བུ་ཕྲུག་སྐྱོང་སྟངས་ཀྱི་སྒང་ནས་བྱིས་པར་ཤེས་ཡོན་འབྱོར་ཐབས་ཀྱི་སྐྱོང་སྟངས་རེད་མི་འདུག བྱིས་པར་དངུལ་དང་རྩེད་ཆས། ཞོར་ཟས་གང་ཡག་སྤྲོད་ཕྱོགས་ཀྱི་ཐོག་ནས་ནང་མི་ཕན་ཚུན་བར་འགྲན་བསྡུར་བྱས་ཡོང་དུས། བྱིས་པར་ཤེས་ཡོན་ཡག་པོ་ཡོང་རྒྱུ་དེ་དཀའ་ལས་ཁག་པོ་རེད། ཕ་མ་ཚོས་ངོས་ནས་སོ་སོའི་བུ་ཕྲུག་ཚོར་ཤེས་ཡོན་ཡོད་མཁན་ལ་གུས་ཞབས་དང་བརྩི་མཐོང་གནང་དགོས་པའི་འདུ་ཤེས་སྐྱེད་སྲིང་དང་། ཤེས་ཡོན་ཅན་ལ་སྤྱི་ཚོགས་ནང་མཐོང་ག་འདྲ་ཡོད་མེད་ཀྱི་མིག་དཔེ་སྟོན་དགོས་ལ། ཁ་ནས་བཤད་པ་ཙམ་མ་ཡིན་པར་ཕ་མ་སོ་སོའི་ངོས་ཐད་ནས་ཀྱང་ཤེས་ཡོན་ཅན་ལ་བརྩི་མཐོང་བྱེད་དགོས་པ་རེད། འཛིན་སྐྱོང་གི་ངོས་ནས་ཀྱང་ཁ་ཡོད་ལག་ཡོད་ཀྱི་ཐོག་ནས་ཤེས་ཡོན་དེ་དངོས་ནས་གལ་ཆེན་པོར་བརྩིས་ཏེ། ནམ་རྒྱུན་བཀའ་སློབ་དང་སློབ་གསོ་རྒྱག་པ་གཅིག་པུ་མ་ཡིན་པར། སོ་སོའི་ལབ་པ་ནང་བཞིན་དངོས་ཡོད་ལག་ལེན་གྱི་ཐོག་ནས་སློབ་ཕྲུག་གི་མདུན་ལམ་དང་སློབ་གསོའི་ལས་དོན་གཙིགས་འཛིན་བྱེད་དགོས་པ་རེད། དགེ་རྒན་ཚོར་ཆ་བཞག་པ་ཡིན་ནའང་། སློབ་ཕྲུག་གི་ངོས་ནས་དགེ་རྒན་ལ་བརྩི་མཐོང་དགོས་པ་དེ། དགེ་རྒན་སོ་སོ་རང་ངོས་ནས་བཟོ་དགོས་པ་དེ་འདྲ་ཡོད་པ་རེད། ང་དགེ་རྒན་ཡིན། ང་ལ་གུས་ཞབས་དགོས་ཀྱི་ཡོད་ཟེར་ནས་ཡིན་ཤག་མི་བྱེད་པར། གུས་ཞབས་དེ་རང་བཞིན་གྱིས་བསླེབས་དགོས་པ་ཞིག་ཡིན་དུས། དགེ་རྒན་གྱི་ངོས་ནས་སློབ་ཕྲུག་ལ་དངོས་གནས་བརྩེ་བ་དང་སློབ་སྦྱོང་སྤྲོད་ཐུབ་དགོས་པ་སོགས། ཕྱོགས་ཡོངས་ནས་ལེགས་བཅོས་བསྐྱར་གསོ་དགོས་པའི་རིགས་མང་པོ་ཞིག་ཡོད་པ་རེད་བསམ་གྱི་འདུག
དྲི་བ། དགེ་རྒན་ཞིག་ལ་མཚོན་ན་སློབ་མར་རྒྱུས་ལོན་ཡག་པོ་གནང་དགོས་པ་དེ་ཐོག་མའི་སློབ་ཁྲིད་ཀྱི་ཆ་རྐྱེན་གལ་ཆེ་ཤོས་ཤིག་ཆགས་ཡོད་པ་རེད། ཁྱེད་རང་ཉིད་ཀྱི་ཉམས་མྱོང་ལྟར་ན་དགེ་རྒན་གྱིས་སློབ་མར་རྒྱུས་ལོན་ཇི་ལྟར་གནང་དགོས་པར་མཐོང་གི་འདུག
ལན། གལ་ཆེ་ཤོས་འཛིན་གྲྭ་ནང་ལོགས་གཅིག་པུ་མིན་པར། ག་ས་གང་དུ་སློབ་ཕྲུག་ལ་འབྲེལ་བ་བྱ་རྒྱུ་གལ་ཆེན་པོ་རེད། དེ་བཞིན། སོ་སོའི་སློབ་ཕྲུག་ཚོར་འབྲེལ་བ་ཡོད་མཁན་གྱི་སློབ་ཕྲུག་གཞན་པ་དང་། སློབ་མའི་ཕ་མ་སོགས་འབྲེལ་ཡོད་ཀྱི་མི་མང་པོར་འབྲེལ་བ་བྱེད་དགོས་ཀྱི་འདུག སློབ་ཕྲུག་གཅིག་གི་རྒྱུས་ཆ་ཚང་ལོན་རྒྱུར་འཛིན་གྲྭའི་ནང་ཁོ་ནར་བསྡད་ན་ཁག་པོ་རེད། སློབ་ཕྲུག་ཚོའི་ངོས་ནས་འཛིན་གྲྭ་ནང་ལ་སྒྲིག་འཛུགས་འཁུར་ཏེ་བསྡད་དགོས་ཡོད་བསམ་པའི་ཐོག་ནས་ཁ་གྲགས་ཡོང་གི་མ་རེད། སྐབས་རེར་ཟ་རྒྱུ་དང་འཐུང་རྒྱུ་ཏོག་ཙམ་ཉོས་ཏེ་སློབ་ཕྲུག་ཚོ་ཕྱི་ལོགས་སུ་ཁྲིད་པ་ཡིན་ན་ཁོ་ཚོས་ཁ་སངས་ཡོང་གི་རེད། དེ་ལ་བརྟེན་ནས་སློབ་ཕྲུག་ཚོར་དཀའ་ངལ་ག་རེ་ཡོད་མེད་ཀྱང་རྒྱུས་ལོན་ཐུབ་ཀྱི་རེད། དེ་བཞིན་སློབ་ཕྲུག་ཚོར་རྒྱུས་ལོན་ཡོང་བའི་ཆེད་དུ། སློབ་ཕྲུག་ཚོའི་མདུན་ནས་བསམ་བློ་རྒྱ་ཆེན་པོ་བཏང་སྟེ། སློབ་ཕྲུག་ཚོས་ལན་རེར་དྲི་བ་ཐེབས་ཆག་དེ་འདྲ་བཏང་བ་ཡིན་ནའང་། ཁོ་ཚོའི་སྐད་ཆ་ལ་མང་པོ་ཉན་རྒྱུ་དེ་གལ་ཆེན་པོ་རེད། ཁོ་ཚོའི་དཀའ་ངལ་ལ་ཡག་པོ་ཉན་པ་ཡིན་ན། ཁོ་ཚོའི་སེམས་ནང་དུའང་ངའི་དཀའ་ངལ་བཤད་ས་དེ་དགེ་རྒན་ཡིན་བསམ་པ་ཡོང་གི་རེད། གལ་ཆེ་ཤོས་དེ་དགེ་རྒན་གྱི་སྤྱོད་པ་དང་རྣམ་འགྱུར་གུ་ཡངས་པོ་དགོས་ཀྱི་འདུག
དྲི་བ། བཙན་བྱོལ་སྤྱི་ཚོགས་ནང་གཞོན་སྐྱེས་ཡིག་རྨོངས་པ་ཧ་ཅང་ཉུང་ཉུང་རེད། ཡིན་ནའང་བཙན་བྱོལ་བོད་མིའི་ཁྲོད་དཔེ་ཀློག་གི་གོམས་གཤིས་ཆེན་པོ་མི་འདུག དེའི་ཐད་ཁྱེད་ཉིད་ལ་དགོངས་ཚུལ་ག་རེ་ཡོད།
ལན། སློབ་གྲྭ་ཐོན་ཏེ་སྤྱི་ཚོགས་ནང་བསླེབས་རྗེས་དཔེ་དེབ་ཉོ་བ་དང་ཀློག་པའི་གོམས་གཤིས་མེད་པ་དེ་ནི། གཅིག་ནས་སློབ་གྲྭའི་ནང་དཔེ་དེབ་ཀློག་རྒྱུའི་རྨང་གཞི་སྲ་བརྟན་ཞིག་གཏོང་ཐུབ་མེད་པའི་རྟགས་རེད། གལ་སྲིད་སློབ་གྲྭའི་ནང་དཔེ་ཀློག་གི་གོམས་གཤིས་ཤུགས་ཆེན་པོ་ཡོད་པ་ཡིན་ན། སྤྱི་ཚོགས་ཁྲོད་བསླེབས་པའི་རྗེས་སུའང་མུ་མཐུད་དུ་དཔེ་ཆ་ཀློག་གི་རེད། སློབ་གྲྭའི་ནང་དཔེ་ཀློག་གི་ཁོར་ཡུག་ཡག་པོ་ཞིག་མེད་པ་ཡིན་ན། སློབ་གྲྭ་ཐོན་ཏེ་སྤྱི་ཚོགས་ནང་ལས་ཀ་བྱེད་དུ་འགྲོ་སྐབས། གཅིག་ནས་སློབ་གྲྭའི་ནང་དཔེ་ཀློག་གི་གོམས་གཤིས་མེད་པ་དང་། གཉིས་ནས་ལས་ཀ་དང་དངུལ་ཁོ་ནའི་ཐོག་ལ་མགོ་འཐོམ་སྟེ་དེབ་ཀློག་རྒྱུ་སྣང་མེད་དུ་གཡུགས་འགྲོ་གི་ཡོད་པ་རེད། དེར་བརྟེན། དང་ཐོག་སློབ་གྲྭ་རང་གི་ནང་ལོགས་ནས་སློབ་ཕྲུག་ལ་དེབ་ཀློག་རྒྱུ་གལ་ཆེན་པོ་ག་འདྲ་ཡོད་མེད་དང་། དེབ་ཀློག་ན་སོ་སོར་ཕན་ཐོགས་ག་རེ་ཡོད་མེད་ཤེས་རྟོགས་བྱེད་འཇུག་རྒྱུ་དང་། མཚམས་རེར་ཆེད་དུ་དེབ་ཀློག་གི་དུས་ཚོད་བཟོས་ཏེ་དེབ་ཀློག་འཇུག་པ། དགེ་རྒན་གྱི་ངོས་ནས་སློབ་ཕྲུག་ཆུང་ཆུང་ཚོར་དེབ་ཀློག་པ་དང་། སློབ་ཕྲུག་རྒན་པ་ཚོར་དེབ་ངོ་སྤྲོད་བྱེད་པ་སོགས་སློབ་གྲྭའི་ནང་དེབ་ཀློག་གོམས་གཤིས་འཇགས་ཐབས་ཀྱི་འཆར་གཞི་མང་པོ་གཏོང་དགོས་ཀྱི་འདུག ང་རང་ངོས་ནས་ང་ཚོའི་སྤྱི་ཚོགས་ཁྲོད་དཔེ་ཀློག་གི་ཁོར་ཡུག་དང་གོམས་གཤིས་འཇགས་དགོས་རྒྱུ་དེ་ཧ་ཅང་གལ་ཆེན་པོར་མཐོང་ཡོད།
དྲི་བ། བྱིས་པར་ཆུང་དུས་ནས་དཔེ་ཀློག་གི་གོམས་གཤིས་འཇགས་རྒྱུ་དེ་གལ་ཆེན་པོ་རེད། ཕ་མའི་ངོས་ནས་སོ་སོའི་ཁྱིམ་དུ་བྱིས་པར་དཔེ་ཀློག་གི་ཁོར་ཡུག་ཇི་ལྟར་བསྐྲུན་དགོས་པར་མཐོང་གི་འདུག་གམ།
ལན། ཕ་མ་ཚོའི་ངོས་ནས་ཡིན་ནའང་། སོ་སོའི་ཁྱིམ་ཚང་ནང་ལོགས་ལ་དེབ་འཇོག་སའི་དཔེ་སྒྲོམ་བཟོས་ཏེ་དེབ་སྒྲིག་བཤམས་བྱེད་པ་དང་། བུ་ཕྲུག་ལ་དེབ་ཀློག་དགོས་པའི་སྐོར་ཁ་ནས་བཤད་པ་ཙམ་མ་ཡིན་པར། ཕ་མ་རང་ངོས་ནས་ནམ་རྒྱུན་སོ་སོས་ཀྱང་བུ་ཕྲུག་དང་མཉམ་དུ་དགོང་མོ་དཔེ་ཀློག་བྱེད་པ་སོགས། ཁྱིམ་ཚང་ནང་དུའང་དཔེ་ཀློག་གི་ཁོར་ཡུག་བསྐྲུན་རྒྱུ་གལ་ཆེན་པོ་རེད། དེང་སང་གི་ཕ་མ་གཞོན་སྐྱེས་མང་པོ་ཞིག་གིས་ཁྱིམ་ཚང་ནང་བུ་ཕྲུག་ལ་སྟོད་ལོག་དང་ཞོར་ཟས་སྣ་ཚོགས། རྩེད་ཆས་འདྲ་མིན་སོགས་ཀྱིས་བཀང་ཡོད་རེད་མ་གཏོགས། ཁྱིམ་ཚང་ནང་དུ་དེབ་གཅིག་ཀྱང་མཐོང་རྒྱུ་ཡོད་པ་མ་རེད། གལ་སྲིད་ཕ་མས་ཡི་གེ་ཤེས་ཀྱི་མེད་ནའང་། ཕྱི་ལོག་ཏུ་ཁྲོམ་ལ་འགྲོ་སྐབས་བྱིས་པ་ཁྲིད་དེ་དེབ་ཁང་ནང་སྐོར་བ་རྒྱག་པ་དང་། བྱིས་པའི་དེབ་ཉོ་འདོད་ཡོད་ན་དེ་ལ་འགྲོ་སོང་གཏོང་དགོས་པ་གལ་ཆེན་པོ་རེད། ག་དུས་ཡིན་ནའང་སྟོད་ལོག་བཙོང་ས་ཟ་མ་བཟའ་ས་ཁོ་ནར་མི་འཁྲིད་པ་དང་། དེ་བཞིན། ཕ་མས་ཐག་རིང་པོ་ནས་ཁ་པར་སོགས་ཀྱི་བརྒྱུད་ལམ་ནས་སོ་སོའི་བུ་ཕྲུག་ལ་འབྲེལ་བ་བྱེད་སྐབས་ཀྱང་། དང་ཐོག་བྱིས་པར་སློབ་སྦྱོང་དང་འཕྲོད་བསྟེན་གྱི་གནས་སྟངས་དང་། དེབ་ག་རེ་ཀློག་གི་ཡོད་མེད། སློབ་སྦྱོང་གི་ཡོ་ཆས་ཐོག་དཀའ་ངལ་ཡོད་མེད་སོགས་འདྲི་རྒྱུ་དེ་གལ་ཆེན་པོ་རེད། སྤྱིར་ཕ་མས་བུ་ཕྲུག་ལ་འབྲེལ་བ་མང་ཙམ་བྱེད་དགོས་པ་རེད། ཡིན་ནའང་། འབྲེལ་བ་བྱེད་པའི་སྐབས་ལ་ཁ་སང་སྐུར་པའི་དངུལ་དང་རྔན་པ་རྫོགས་ཡོད་མེད། སྟོད་ལོག་ཡག་པོ་ཅི་ཞིག་ཉོ་དགོས་མིན་སྐོར་གྱི་སྐད་ཙམ་མ་ཡིན་པར་སློབ་སྦྱོང་གི་སྐོར་ནས་སྐད་ཆ་མང་ཙམ་དྲིས་པ་ཡིན་ན། རིམ་གྱིས་བྱིས་པའི་ངོས་ནས་ཀྱང་ངའི་ཕ་མས་ནམ་རྒྱུན་གལ་ཆེ་ཤོས་སློབ་སྦྱོང་དང་སྤྱོད་ལམ་དྲིས་ཡོང་གི་འདུག་བསམ་ཏེ། ཁོང་ཚོ་རང་ངོས་ནས་ཀྱང་སློབ་སྦྱོང་དང་སྤྱོད་ལམ། དེབ་ཀློག་རྒྱུ་སོགས་གལ་ཆེན་པོར་མཐོང་ཡོང་གི་རེད། དེ་ལས་ལྡོག་སྟེ་བྱིས་པའི་རྣ་སྒོར་ནམ་རྒྱུན་དངུལ་དང་ཁ་ལག སྟོད་ལོག་སོགས་ཀྱི་སྐོར་རྐྱང་གླེང་བསྡད་པ་ཡིན་ན། ཁོ་ཚོའི་སེམས་ནང་དུའང་སློབ་སྦྱོང་བྱེད་པ་དང་དེབ་ཀློག་རྒྱུ་གལ་ཆེན་པོ་མིན་པའི་འདུ་ཤེས་བསླེབས་ཡོང་གི་རེད།
དྲི་བ། སློབ་གསོ་ཕྱོགས་ཡོངས་ནས་ཡར་རྒྱས་ཚགས་ཚུད་ཡོང་བ་ལ། སློབ་གསོའི་ལས་གནས་དངོས་ན་ཡོད་པའི་དགེ་རྒན་ཚོར་བསམ་ཚུལ་གང་ཡོད་པ་རྣམས། སྒང་ན་སྡོད་མཁན་གྱི་གཞུང་གི་མགོ་ཁྲིད་ཚོས་མཁྱེན་རྟོགས་ཡོང་རྒྱུ་དེ་གལ་ཆེན་པོར་མཐོང་གི་འདུག་གམ།
ལན། དེ་ངས་གལ་ཆེན་པོ་མཐོང་གི་འདུག སྒང་གི་བསམ་ཚུལ་དེ་འོག་ལ་གསལ་པོ་བྱས་ནས་བསླེབས་ཐུབ་རྒྱུ་གལ་ཆེན་པོ་ཡིན་པ་མ་ཟད། དེའང་དུས་ཚོད་ལ་ཏག་ཏག་བསླེབས་པ་ཞིག་དགོས་ཀྱི་འདུག སྒང་གི་བསམ་ཚུལ་ཁ་ཤས་འོག་ལ་བསླེབས་སྐབས་དུས་ཚོད་རྗེས་ལུས་ཞེ་དྲགས་ཐེབས་ཏེ་འཐུས་ཤོར་ཡོང་གི་ཡོད་པ་རེད། དེ་བཞིན། འོག་གི་བསམ་ཚུལ་ཡག་སྡུག་གང་ཡོད་པ་ཆ་ཚང་དུས་ཐོག་ཏུ། སྒང་གི་མི་མཐོ་ཤོས་དེའི་རྣ་ཅོག་བར་དུ་བསླེབས་ཐུབ་པ་དགོས་ཀྱི་དེའང་གལ་ཆེན་པོ་མཐོང་གི་འདུག ང་ཚོའི་སྤྱི་ཚོགས་ནང་བསམ་ཚུལ་ཁ་ཤས་ལོ་གཅིག་གཉིས་ཀྱི་རྗེས་སུ་མ་གཏོགས་བསླེབས་ཐུབ་ཀྱི་ཡོད་པ་མ་རེད། བསམ་ཚུལ་ཁ་ཤས་ཐེངས་མང་པོར་ཡར་བསླེབས་ཡོང་གི་ཡོད་པ་རེད། བསམ་ཚུལ་གཅིག་ཐེངས་མང་པོ་བསླེབས་པའི་སྐབས། ཡིན་གཅིག་མིན་གཅིག་བསམ་ཚུལ་དེ་ཤུགས་ཆེན་པོ་ཞིག་ཡིན་པར་ངོས་འཛིན་གྱི་ཐོག་ནས་ལག་བསྟར་བྱེད་དགོས་པ་དང་། དེ་བཞིན། ཡར་བསླེབས་བསྡད་པའི་བསམ་ཚུལ་རྣམས་ལ་མར་ལན་གནང་རྒྱུ་དེ་གལ་ཆེན་པོ་ཆགས་ཀྱི་འདུག སྐབས་རེ་བསམ་ཚུལ་ཡར་བསླེབས་ཚར་རྗེས་ཕྱིར་ལན་ཡོད་པ་མ་རེད། ལན་མེད་དུས་སྐབས་ལ་འོག་ནས་ག་རེ་ཡིན་ན་བསམ་ཏེ་ལྷག་བསྡད་ཀྱི་རེད། ༸རྒྱལ་བ་རིན་པོ་ཆེའི་དགོངས་པ་ནང་བཞིན་ང་ཚོ་བཙན་བྱོལ་ནང་གི་ཚོགས་པ་སྤྱི་སྒེར་དང་། སྒང་འོག་བར་གསུམ་ཚང་མའི་ལས་ཀ་རྣམས་མང་གཙོ་ཡང་དག་པ་དང་ཕྱི་གསལ་ནང་གསལ་ཆགས་ཐུབ་པ་ཡིན་ན། སྤྱི་ཚོགས་ཡར་རྒྱས་ཡག་པོ་འགྲོ་གི་རེད། དེ་དང་མཉམ་དུ་ང་ཚོས་སློབ་ཕྲུག་ཚོ་གལ་ཆེན་པོར་བརྩི་གི་ཡོད་པ་ལྟར། ཚང་མས་སློབ་ཕྲུག་ཚོའི་དོན་དག་ལ་སྐད་ཆ་ལབ་ཡོང་གི་ཡོད་སྟབས། སྐབས་རེ་རྩད་ཤོར་བ་དེ་འདྲ་ཡོང་གི་རེད། ཡིན་ནའང་ང་ཚོ་གཅིག་གིས་གཅིག་ལ་སྒེར་ངོས་ཀྱི་ཕོག་ཐུག་འགྲོ་དགོས་པ་གང་ཡང་ཡོད་པ་མ་རེད། དགེ་རྒན་གྱི་བསམ་ཚུལ་སྒང་ལ་བསླེབས་ཐུབ་པ་དགོས་རྒྱུ་དེ་ཧ་ཅང་གལ་ཆེན་པོར་མཐོང་གི་འདུག དེར་བརྟེན། གཞུང་དང་སྒྲིག་འཛུགས་ཀྱི་ངོས་ནས་ཀྱང་དགེ་རྒན་ལ་སྐད་ཆ་བཤད་སའི་སྡིངས་ཆ་བསྐྲུན་ཏེ། དགེ་རྒན་ཆ་ཚང་འཛོམས་མ་ཐུབ་པ་ཡིན་ནའང་། དགེ་རྒན་གྱི་སྐུ་ཚབ་བདམས་ཏེ་ལོ་གཅིག་རེའི་ནང་དགེ་རྒན་གྱི་ཚོགས་ཆེན་དེ་འདྲ་འཚོགས་དགོས་རྒྱུ་གལ་ཆེན་པོ་རེད། དེ་འདྲ་བྱུང་བ་ཡིན་ན་དགེ་རྒན་ཚང་མའི་དཀའ་ངལ་ཚོགས་ཆེན་དེ་ཐོག་བཤད་བསླེབས་ཡོང་གི་རེད། དེ་ལ་དཔག་པའི་ཤེས་ཪིག་གི་ངོས་ནས་ཀྱང་ཞིབ་འཇུག་དང་ཤེས་ཡོན་གྱི་ཐོག་ལ་གོམས་པ་གསར་པ་ཞིག་རྒྱག་ཐུབ་ཀྱི་རེད། ངས་ནམ་རྒྱུན་བཤད་ཀྱིན་ཡོད། ང་རང་གིས་ཆབ་སྲིད་དང་དཔལ་འབྱོར་སོགས་གཞན་གང་ཡང་ཞེ་དྲགས་མགོ་ཚོས་ཀྱི་མེད། ཡིན་ནའང་། བཀའ་བློན་ཁྲི་པས་ཤེས་ཡོན་གྱི་ཐོག་ལ་གོམ་པ་ཤུགས་ཆེན་པོ་ཞིག་རྒྱག་མ་ཐུབ་པ་ཡིན་ན། རང་ཉིད་དགེ་རྒན་ཞིག་ཡིན་པའི་ཐོག་ནས་ཕྱག་ལས་གནང་སྟངས་མ་འགྲིག་པ་ཞིག་ཏུ་མཐོང་ངེས་རེད་ལ། སོ་སོས་མི་ཚེ་ཧྲིལ་པོ་ཤེས་ཡོན་སློབ་གསོའི་སྒང་ལ་བསྐྱལ་བསྡད་ཡོད་སྟབས། དེའི་ཐད་ལ་རང་བཞིན་གྱིས་སེམས་ཚོར་ཤུགས་ཆེ་བ་ཡོད་པ་རེད།
དྲི་བ། མཇུག་མཐར། ཁྱེད་རང་སློབ་གསོའི་ལས་གནས་དངོས་ན་ཡོད་པའི་དགེ་རྒན་ཞིག་ཡིན་པའི་ཆ་ནས། སློབ་ཕྲུག་ཚོར་བརྗོད་འདོད་པའི་སྐད་ཆ་ག་རེ་ཡོད་དམ།
ལན། ང་རང་ཉིད་ཀྱི་སློབ་ཕྲུག་ཚོར་ནམ་རྒྱུན་ནས་ལབ་བསྡད་ཀྱི་ཡོད། རྗེས་མ་ང་རང་ཚོའི་སྤྱི་ཚོགས་དང་རྒྱལ་ཁབ་ཀྱི་དཀའ་ངལ་ལ་དཔག་པའི་གོམ་པ་དང་པོ་དེ་ང་ཚོས་རྒྱག་དགོས་པ་རེད། དེ་ཡིན་དུས། ག་དུས་ཡིན་ནའང་མི་ཚེ་དམིགས་ཡུལ་ལྡན་པ་ཞིག་བསྐྱེལ་དགོས་པ་རེད་མ་གཏོགས། མི་ཚེ་འགྲོ་ཐབས་བྱེད་དགོས་པ་མ་རེད། སྤྱི་ཚོགས་ནང་མི་ཚེ་འགྲོ་ཐབས་བྱེད་མཁན་ཁེངས་བསྡད་ཡོད་པ་རེད། དེར་བརྟེན། མི་ཚེ་ལ་རིན་ཐང་ལྡན་པ་ཞིག་དགོས་ཀྱི་ཡོད་ན། སོ་སོས་སློབ་སྦྱོང་ག་རེ་ཐོན་ཚར་བའི་རྗེས་ལ། མི་ཚེ་ཆ་གཉིས་སུ་བགོས་ཏེ་བསམ་བློ་གཏོང་དགོས། ག་རེ་མ་བྱུང་བ་ཡིན་ནའང་། སོ་སོའི་ནང་མི་དང་རང་ཉིད་ཀྱི་དོན་ལ་མི་ཚེ་ཕྱེད་ཀ་དང་། སོ་སོའི་རྒྱལ་ཁབ་དང་སྤྱི་ཚོགས་ཀྱི་ཆེད་དུ་མི་ཚེ་ཕྱེད་ཀ་གཏོང་རྒྱུའི་བསམ་བློ་འཛིན་དགོས་པ་གལ་ཆེན་པོ་རེད། སོ་སོའི་ལུང་པ་དང་སྤྱི་ཚོགས་ལ་བསམ་བློ་བཏང་བ་ཡིན་ན་སྒེར་གྱི་མི་ཚེའང་རང་བཞིན་གྱིས་འགྲིག་ཡོང་གི་རེད། སྒེར་ཞེས་པ་དེ་མི་གཅིག་དང་སྤྱི་ཚོགས་ཞེས་པ་དེ་མི་ཕོན་ཆེན་པོ་ཡིན་དུས་སོ་སོའང་སྐྱིད་པོ་ཡོང་གི་རེད། ཤེས་ཡོན་གྱི་ཐོག་ནས་སྤྱི་ཚོགས་ལ་ཞབས་འདེགས་སྒྲུབ་མ་ཐུབ་པ་ཡིན་ནའང་། ཕྱོགས་གཞན་པ་ནས་སྤྱི་ཚོགས་ལ་ཞབས་འདེགས་སྒྲུབ་རྒྱུའི་ལམ་ཁ་མང་པོ་ཡོད་པ་རེད། མདོར་བསྡུས་ཏེ་བཤད་ན། སོ་སོ་རིམ་བཞིན་ལོ་ཡར་རྒས་ཡོང་དུས་རང་ཉིད་ཀྱི་མི་ཚེ་ལ་འགྱོད་པ་མ་སྐྱེས་པ་ཞིག་བྱེད་རྒྱུ་དེ་གནད་འགག་ཆེན་པོར་མཐོང་གི་འདུག ཆེས་མ་མཐའ་ཡང་སྤྱི་ཚོགས་ནང་ཞབས་འདེགས་སྒྲུབ་མ་ཐུབ་པ་ཡིན་ནའང་། སྤྱི་ཚོགས་ལ་གནོད་མི་སྐྱེལ་མཁན་ཞིག་གནང་རྒྱུ་དེ་གལ་ཆེན་པོ་མཐོང་གི་འདུག
གསར་འགོད་པ། ཚེ་རིང་རྒྱལ།
༼བོད་ཀྱི་དུས་བབ་སྤྱིའི་འདོན་ཐེངས་ ༥༦༧ ལས་བདམས་བཀོད་བྱས།༽
་་་་་ སོ་སོའི་ནང་མི་དང་རང་ཉིད་ཀྱི་དོན་ལ་མི་ཚེ་ཕྱེད་ཀ་དང་། སོ་སོའི་རྒྱལ་ཁབ་དང་སྤྱི་ཚོགས་ཀྱི་ཆེད་དུ་མི་ཚེ་ཕྱེད་ཀ་གཏོང་རྒྱུའི་བསམ་བློ་འཛིན་དགོས་པ་གལ་ཆེན་པོ་རེད། སོ་སོའི་ལུང་པ་དང་སྤྱི་ཚོགས་ལ་བསམ་བློ་བཏང་བ་ཡིན་ན་སྒེར་གྱི་མི་ཚེའང་རང་བཞིན་གྱིས་འགྲིག་ཡོང་གི་རེད། སྒེར་ཞེས་པ་དེ་མི་གཅིག་དང་སྤྱི་ཚོགས་ཞེས་པ་དེ་མི་ཕོན་ཆེན་པོ་ཡིན་དུས་སོ་སོའང་སྐྱིད་པོ་ཡོང་གི་རེད། ་་་་་ཟེར།
དགེ་རྒན་ཟེར་བ་དེ་འདྲ་གི་མ་རེད། དངོས་གནས་ཡག་པོ་གསུངས་འདུག བཀྲ་ཤིས་བདེ་ལེགས་ཡོད།