བོད་མེ་ལ་སྲེག་དོན་ཅི་ཞེས་པའི་རྒྱབ་ཤ་དཀར་པོའི་དཔེ་དེབ་དབུ་འབྱེད།

དེ་རིང་བཀའ་ཤག་ཚོཊ་ཁང་དུ་བོད་མིའི་སྒྲིག་འཛུཊ་སྲིད་སྐྱོང་བློ་བཟང་སེང་གེ་མཆོག་གིས། བོད་ཀྱི་སྲིད་བྱུས་ཉམས་ཞིབ་ཁང་གིས་ཕྱོཊ་སྒྲིག་ཞུས་པའི་བོད་མིའི་རང་སྲེག་སྐོར་གྱི་དབྱིན་དེབ་ཅིག་དབུ་འབྱེད་དང་སྦྲགས་གཏམ་བཤད་གནང་སོང་།

དེ་རིང་ཕྱི་ཚེས་ ༢༨ ཉིན་གྱི་སྔ་དྲོའི་ཆུ་ཚོད་ ༡༡ སྟེང་གངས་སྐྱིད་བཀའ་ཤག་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས། བོད་ཀྱི་སྲིད་བྱུས་ཉམས་ཞིབ་ཁང་གིས་གསར་དུ་ཕྱོགས་སྒྲིག་དཔར་སྐྲུན་ཞུས་པའི་དབྱིན་ཡིག་དཔེ་དེབ་རྒྱབ་ཤ་དཀར་པོ་ (why Tibet is burning?) ༼བོད་མེ་ལ་སྲེག་དོན་ཅི༽ཞེས་པ་དབུ་འབྱེད་ཀྱི་གསར་འགོད་ལྷན་ཚོགས་བསྐྱངས་སོང་།

བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་དཔེ་དེབ་ངོ་སྤྲོད་གནང་པ་ལྟར་ན། དེབ་དེའི་ནང་དོན་གཙོ་བོ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་བཤད་དང་། ལྷག་པར་དུ་ ༢༠༠༩ ལོ་ནས་ད་བར་བོད་ནང་བོད་མི་ ༡༠༠ ཙམ་གྱིས་རང་ལུས་མེར་བསྲེགས་གནང་སྟེ་རྒྱ་གཞུང་ལ་ངོ་རྒོལ་བྱས་པ། བོད་མིའི་སྒྲིག་འཛུགས་ཀྱིས་ཉེན་ཚབས་ཆེ་བའི་ལས་འགུལ་མི་སྤེལ་རྒྱུར་འབོད་སྐུལ་རིམ་པར་ཞུས་ཀྱང་། རྒྱ་གཞུང་གིས་བོད་ཐོག་འཛིན་པའི་མཁྲེཊ་འཛིན་སྲིད་བྱུས་དེས་བོད་ནང་རང་ལུས་མེར་བསྲེགས་སྔར་ལས་ཤུགས་ཆེ་རུ་བཏང་བ། བོད་ནང་གི་རང་ལུས་མེར་བསྲེགས་གཏོང་མཁན་ཚོའི་འབོད་སྒྲ་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པ་སོགས་ཡིན་ཞིང་། འདས་པའི་ལོ་ ༦༠ རིང་རྒྱ་གཞུང་གིས་བོད་ནང་ཆབ་སྲིད་བཙན་གནོན་དང་རིག་གཞུང་རྩ་གཏོར། སྤྱི་ཚོགས་དབྱེ་འབྱེད། དཔལ་འབྱོར་བཤུ་གཞོག ཁོར་ཡུག་གཏོར་བཤིག་སོགས་བྱས་པར་བརྟེན་ཏེ་བོད་མི་ཚོས་ཨུ་ཐུག་ཐབས་ཟད་ཀྱི་ལས་འགུལ་སྤེལ་གྱི་ཡོད་པ་སོགས་བཀོད་ཡོད་འདུག  

སྲིད་སྐྱོང་བློ་བཟང་སེང་གེ་མཆོག་གིས་དཔེ་དེབ་དེ་དབུ་འབྱེད་དང་འབྲེལ། དབྱིན་ཡིག་གི་དཔེ་དེབ་དེ་སྲིད་བྱུས་ཉམས་ཞིབ་ཁང་གིས་དཔར་སྐྲུན་ཞུ་དགོས་དོན་སྐོར་ལ། འདས་པའི་ལོ་ངོ་གཉིས་ཙམ་ནས་བོད་ནང་རང་ལུས་མེར་བསྲེགས་གཏོང་མཁན་ཇེ་མང་དུ་འགྲོ་བཞིན་ཡོད་སྟབས། རྒྱ་གཞུང་གིས་རྣམ་པ་ཅི་རིགས་ཀྱི་སྒོ་ནས་བོད་ནང་རང་ལུས་མེར་བསྲེགས་གཏོང་བ་དེ་དག ཕྱི་ལོགས་སུ་སྡོད་པའི་བོད་མི་ཚོ་དང་བཙན་བྱོལ་སྒྲིག་འཛུགས་ཀྱིས་བརྒྱུད་སྐུལ་བྱས་པར་སྐྱོན་འཛུགས་བྱེད་ཀྱི་ཡོད། རྒྱ་གཞུང་གིས་འཁྱོག་བཤད་ཇི་ལྟར་བྱས་ཀྱང་རྒྱལ་སྤྱིའི་སྟེང་བོད་པ་ཚོར་བདེན་པ་ཡོད་པ་ཧ་ཅང་གསལ་པོ་ཆགས་ཏེ། ད་བར་རྒྱལ་ཁབ་ཁག་གི་གྲོས་ཚོགས་ནང་བོད་དོན་རྒྱབ་སྐྱོར་གྱི་གྲོས་ཆོད་མང་པོ་བཞག་ཡོད་པ་མ་ཟད། མཉམ་འབྲེལ་རྒྱལ་ཚོགས་གཙོས་རྒྱལ་ཁབ་ཁག་གི་ཕྱི་སྲིད་ལས་ཁུངས་དང་གྲོས་ཚོགས་འཐུས་མི་མང་དག་ཅིག་གིས་བོད་ནང་བོད་མིས་རང་ལུས་མེར་བསྲེགས་བསྟུད་མར་གཏོང་བཞིན་པའི་རྒྱུ་རྐྱེན་གཙོ་བོ། རྒྱ་གཞུང་གིས་བོད་ཐོག་འཛིན་པའི་དྲག་གནོན་སྲིད་བྱུས་ལས་བྱུང་བར་གཅིག་གྱུར་ངོས་འཛིན་བྱེད་ཀྱི་ཡོད་སྐོར་གསུངས་བྱུང་།

སྲིད་སྐྱོང་མཆོག་གིས་མུ་མཐུད་དུ་གསུངས་རྒྱུར། ཉེ་ཆར་ཡུ་རོབ་གྲོས་ཚོགས་ཚོགས་གཞོན་གྱིས་ཡུ་རོབ་རྒྱ་ནག་སྐུ་ཚབ་ཀྱིས་བོད་མིའི་རང་སྲེག་སྐོར་ལ་འཁྱོག་བཤད་བྱས་པར་མཐའ་གཅིག་ཏུ་སྐྱོན་བརྗོད་བྱས་ཡོད་ཚུལ་གསལ་དང་། ད་བར་རྒྱ་གཞུང་གིས་བརྙན་འཕྲིན་བརྒྱུད་བོད་མིའི་རང་ལུས་མེར་བསྲེགས་སྐོར་ལ་འཁྱོག་བཤད་སྣ་ཚོགས་བྱས་ཡོད་པ་མ་ཟད། ལྷག་པར་དུ་ཡུ་རོབ་རྒྱ་ནག་སྐུ་ཚབ་དང་རྒྱ་ནག་གི་རྩོམ་པ་པོ་ཞིག་གིས་རྒྱ་ནག་གི་ཚགས་ཤོག་ཅིག་ཏུ། རྒྱ་གཞུང་གིས་འཛམ་གླིང་གི་གནད་ཡོད་མི་སྣ་མང་པོ་ཞིག་གདན་ཞུ་དང་། གསར་འགོད་གསལ་བསྒྲགས་བརྒྱ་ཕྲག་ལྷག་སྤེལ་སྐོར་བཤད་དེ། བོད་མིའི་རང་ལུས་མེར་བསྲེགས་ཀྱི་འགན་དང་ནོར་འཁྲུལ་ཆ་ཚང་བོད་མིའི་སྒྲིག་འཛུགས་དང་བཙན་བྱོལ་བོད་མི་ཚོར་ཡོད་པའི་ངན་ཁག་དཀྲི་བ། ཡུ་རོབ་གྲོས་ཚོགས་ཚོགས་གཞོན་གྱིས་རྒྱ་གཞུང་ལ་རང་སྲེག་གནད་དོན་ཐད་ཁ་གསལ་བརྡ་ལན་ཞིག་སྤྲོད་ཐུབ་པ་དེ་བོད་མི་ཚོར་བདེན་པ་ཡོད་པས་ཡིན་པ་དང་། བོད་མིའི་རང་སྲེག་བདེན་པ་བདེན་ཐོག་ཏུ་འཁྱོལ་ཆེད་ཕྱི་དྲིལ་ལས་ཁུངས་ཀྱིས་བོད་ཡིག་དང་རྒྱ་ཡིག་ནང་དཔེ་དེབ་དཔར་སྐྲུན་ཞུས་ཡོད་པ་མ་ཟད། རྒྱལ་སྤྱིའི་སྟེང་བོད་ཀྱི་བདེན་པ་གསལ་པོ་ཡོང་ཐབས་དང་རྒྱ་གཞུང་གིས་དབྱིན་ཡིག་དྲིལ་བསྒྲགས་རྫུན་མའི་མཐིལ་བརྟོལ་ཆེད་ཐེངས་འདིའི་རྒྱབ་ཤ་དཀར་པོའི་དཔེ་དེབ་དཔར་འགྲེམས་བྱས་པ་ཞིག་ཡིན་སྟབས། དེབ་དེ་བརྒྱུད་ནས་མ་འོངས་པར་བོད་དོན་སྐོར་སྔར་ལས་ཤེས་རྟོགས་ཡོང་བར་མཐུན་རྐྱེན་དུ་འགྲོ་བའི་རེ་བ་ཡོད་ཚུལ་སོཊ་གསུངས་བྱུང་།

ཚོགས་འདུའི་མཇུག་ཏུ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཙོས་ཉམས་ཞིབ་པ་དང་། གསར་འགོད་པའི་བར་དཔེ་དེབ་དེའི་བརྗོད་དོན་ཐད་དྲི་བ་དྲིས་ལན་གནང་ཡོད།

གསར་འགོད་པ། དཔལ་ལྡན།