རྒྱའི་རྒྱལ་དར་འཕྱར་བ་དང་དེའི་ཉེན་ཚབས།

བོད་ཀྱི་ཆབ་སྲིད་སྐྱར་ཞིབ་ཀྱི་རྩོམ་སྒྲིག་པས་སྤེལ།

གནས་ཚུལ་བྱུང་རིམ།

ཕྱི་ལོ་ ༢༠༡༣ ལོའི་ཕྱི་ཟླ་གཉིས་པའི་ཚེས་ ༡༧ ཉིན་གླིང་ཚ་ཚེ་བརྟན་རྡོ་རྗེས་བཞུགས་སྒར་ངྷ་རམ་ས་ལར་གསར་འགོད་ལྷན་ཚོགས་ཤིག་སྐོང་ཚོགས་ཀྱིས། འདི་ལོའི་གསུམ་བཅུའི་དུས་དྲན་ཉིན་ཁོང་ནས་ཞི་བའི་གོམ་བགྲོད་ཐེངས་གཉིས་པ་དེ་མགོ་འཛུགས་བྱ་རྒྱུ་ཡིན་པ་དང་། སྐབས་དེར་སླར་ཡང་རྒྱ་ནག་དམར་པོའི་རྒྱལ་དར་འཕྱར་རྒྱུའི་གསལ་བསྒྲགས་བྱས། ཁོང་གིས་ངས་མགོ་བཙུགས་པའི་ལས་དོན་དེ་ངས་མཇུག་སྐྱོང་གི་རེད། ངས་རྒྱ་དར་ཁྱེར་བ་དེ་ལོ་རྒྱུས་ཐོག་བོད་རྒྱ་ཁོངས་ཡིན་ཞེས་ཁྱེར་མེད། དབུ་མའི་ལམ་དང་མ་འགལ་བའི་ཐོག་ནས་མ་འོངས་པའི་ཁྱིམ་གཞི། ཀྲུང་གོའི་ཁྱིམ་གཞི་གསར་པའི་མངའ་སྡེ། ཆེས་མཐོའི་རང་སྲིད་རང་སྐྱོང་ལ་དེ་རིང་ནས་ང་ལ་འདོད་པ་ཡོད་ཅེས་བརྡ་ལན་སྤྲོད་ཡིན། དེ་ཚོ་མ་འཐད་པ་དང་མ་དགའ་མཁན་ཚོར་ཁོང་རང་ཚོར་དགོས་པ་རྒྱུ་མཚན་དང་། དམིགས་ཡུལ་ལྟ་གྲུབ་ཡོད་རྒྱུ་རེད་ཅེས་སྐབས་དེར་གསར་འགོད་པས་རྒྱ་དར་འཕྱར་བར་མང་ཚོགས་ཁྲོད་དུ་ངོ་རྒོལ་གནང་མཁན་མང་པོ་ཡོད་པའི་ཐད་དགོངས་ཚུལ་བཀའ་དྲི་ཞུས་སྐབས་འདི་ལྟར་ལན་འདེབས་བྱས་འདུག   http://www.tibetexpress.net/bo/home/2010-02-04-05-35-27/10135-2013-02-18-04-24-46

གླིང་ཚ་ཚེ་བརྟན་རྡོ་རྗེ་དང་ཁོང་གི་ཨ་མ་ལྡོམ་པ་སྐྱིད་དེ་བཞིན་སྲིང་མོ་ལྷ་མོ་སྐྱིད་བཅས་ནས། ཕྱི་ལོ་ ༢༠༡༢ ལོའི་གསུམ་བཅུའི་དུས་དྲན་ཉིན་དྷ་ས་ནས་ལྷ་ས་བར་གྱི་ཞི་བའི་གོམ་བགྲོད་ཞིག་མགོ་འཛུགས་བྱས་ཡོད་པ་དང་། སྐབས་དེར་བཞུགས་སྒར་ནས་ཁོང་རྣམས་བོད་ཀྱི་རྒྱལ་དར་ཞིག་འཕྱར་བཞིན་གོམ་བགྲོད་ལ་ཐོན་སྐབས། མང་ཚོགས་ཁྲོད་ནས་ཞལ་འདེབས་དང་གདུང་སེམས་མཉམ་སྐྱེད་ཀྱི་རྣམ་འགྱུར་ཤུགས་ཆེན་བསྟན་ཡོད་པ་རེད། ཡིན་ན་ཡང་རྒྱ་གར་གྱི་རྒྱལ་ས་ལྡི་ལིར་མ་འབྱོར་གོང་། ཁོང་ཚོས་བོད་ཀྱི་རྒྱལ་དར་མཉམ་དུ་རྒྱ་ནག་དང་བལ་ཡུལ་རྒྱ་གར་བཅས་ཀྱི་རྒྱལ་དར་ཡང་མཉམ་དུ་འཕྱར་བ་རེད། གནད་དོན་འདིས་རྐྱེན་པས་བོད་ཀྱི་གཞོན་ནུ་ལྷན་ཚོགས་ཀྱིས་གཙོས་པའི་ཚོགས་པ་སྒྲིག་འཛུགས་མང་པོ་ཞིག་གིས་གླིང་ཚ་ཚང་གི་བྱ་སྤྱོད་ལ་ངོ་རྒོལ་གྱི་རྣམ་འགྱུར་བསྟན་ཡོད་པ་དང་། བོད་ཀྱི་གཞོན་ནུ་ལྷན་ཚོགས་ནས་དེར་ངོ་རྒོལ་ཆེད་གསར་འགོད་བསྒྲགས་གཏམ་ཞིག་ཀྱང་སྤེལ་ཡོད།

http://tibetanyouthcongress.org/tyc-archives/2012/05/04/tyc-strongly-condemns-tibetans-carrying-chinese-national-flag/

ཉེ་འཆར་ཕྱི་ཟླ་གསུམ་པའི་ཚེས་ ༥ ཉིན་བཞུགས་སྒར་ངྷ་རམ་ས་ལར་རྟེན་གཞི་བྱས་པའི་བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས། དེ་བཞིན་བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་རྒྱ་གར་བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ་བཅས་གཞུང་འབྲེལ་མིན་པའི་ཚོགས་པ་ལྔས་མཉམ་འབྲེལ་གྱི་གསར་འགོད་ལྷན་ཚོགས་ཤིག་སྐོང་ཚོགས་ཀྱིས། བོད་ནང་སྲོག་འབེན་ལ་བཙུགས་ནས་རྒྱ་དར་མར་འཕབ་བཞིན་པའི་སྐབས་སུ། བཙན་བྱོལ་ནང་རང་རིགས་སྤྱི་སྒེར་སུ་རུང་གིས་རྒྱ་གཞུང་གི་དར་དམར་མགོ་ལ་འཕྱར་ནས་བོད་དོན་སྒྲུབ་རྒྱུའི་སྐད་ཆ་དང་བྱ་སྤྱོད་དེའི་རིགས་ལ་རྒྱབ་སྐྱོར་དང་ངོས་ལེན་མེད་པ་གསལ་སྟོན་བྱ་རྒྱུ་ཡིན་ཞེས་འགྲེལ་བརྗོད་གནང་ཡོད་པ་རེད།  http://www.tibetexpress.net/bo/home/2010-02-04-05-35-27/10205-2013-03-05-11-12-24

སྔ་ལོའི་ཕྱི་ཟླ་ལྔ་པའི་ཚེས་ ༡༤ ཉིན་བོད་མིའི་སྒྲིག་འཛུགས་ནས་རྒྱ་དར་འཕྱར་མཁན་དང་མེར་བསྲེགས་བཏང་མཁན་གཉིས་ཀར་རྒྱབ་སྐྱོར་མེད་ཅེས་གཞུང་གི་བཞེངས་ཕྱོགས་གསལ་སྟོན་གནང་ཡོད་པ་རེད།

http://tibet.net/2012/05/14/kashag-does-not-endorse-tibetans-burning-or-carrying-chinese-flag/

ཕྱི་ཟླ་གཉིས་པའི་ཚེས་ ༡༧ ཉིན་གྱི་གསར་འགོད་ལྷན་ཚོགས་སྐབས་གཞན་ཡང་གླིང་ཚ་ཚེ་བརྟན་རྡོ་རྗེས་ཁོང་ལ་རྒྱ་དར་ཁྱེར་རྒྱུར་སུ་ཞིག་གིས་བརྒྱུད་བསྐུལ་མེད་ལ། ང་རང་སྒེར་གྱི་ཐག་གཅོད་ཅིག་ཡིན། མི་སུ་ལ་ནག་ཉེས་མི་འཛུགས་རྒྱུ་གལ་ཆེན་པོ་རེད་ལ། མ་འོངས་པར་བོད་མི་ས་ཡ་དྲུག་གཉིད་སད་ཡོང་གི་རེད་ལ། ད་ལྟ་གཉིད་སད་ཀྱི་ཡོད་པ་རེད་ཅེས་བརྗོད་ཡོད།

སྲོལ་ངན་པ།

གླིང་ཚ་ཚེ་བརྟན་རྡོ་རྗེས་གསར་འགོད་ལྷན་ཚོགས་འདི་ཚོགས་པའི་ཉིན་གཅིག་གི་རྗེས། དབུ་མའི་ལམ་མི་མང་ལས་འགུལ་ཁང་གི་རྒྱུན་ལས་བློ་བཟང་ཆོས་འབྱོར་རམ་ཤར་ཕྱོགས་ཁུག་རྟས་ཁ་བརྡ་དྲ་རྒྱའི་སྟེང་ངས་དར་དམར་འཕྱར་བར་རྒྱབ་སྐྱོར་བྱ་དགོས་པའི་རྒྱུ་མཚན་ཆེན་པོ་བཅུ་གཉིས་ཞེས་པའི་རྩོམ་ཞིག་སྤེལ་ཡོད་པ་རེད།  http://www.khabdha.org/?p=42065

འདིའི་ནང་ཁོ་པས་རྒྱུ་མཚན་ཆེན་མོ་བཅུ་གཉིས་ཁྲོད།  ༡༽གཉིས་སྨན་ནི་དབུ་མའི་ལམ་གྱི་སྙིང་དོན་ཡིན་ལ། དབུ་མའི་ལམ་གྱི་སྲིད་བྱུས་ཀྱི་སྙིང་དོན་རྒྱ་ནག་གི་རྩ་ཁྲིམས་འོག་བོད་ལ་རང་སྐྱོང་འཐོབ་རྒྱུ་དེ་ཡིན་པས། དར་དམར་འཕྱར་བ་ཡིན་ན་གཉིས་སྨན་དང་རང་སྐྱོང་ཐོབ་རྒྱུ་གཉིས་ཀར་འགལ་བ་གང་ཡང་མེད།

༢༽བོད་མིའི་འཐབ་རྩོད་ནི་རྒྱ་ནག་རྒྱལ་ཁབ་དང་མི་མང་གི་ཁ་གཏད་མིན་པ་སྲིད་སྐྱོང་མཆོག་ནས་ལན་མང་གསུངས་པ་ལྟར། སྲིད་བྱུས་བསྒྱུར་བཅོས་ལ་འཐབ་རྩོད་བྱེད་སྐབས་རྒྱ་ནག་རྒྱལ་ཁབ་ཀྱི་ཆེ་མཐོང་མི་བརླག་པ་དང་དམངས་སེམས་ལ་ཞེ་འཁོན་མི་བསྐྲུན་པའི་ཐབས་ཚུལ་ཡང་དག་གཅིག་དར་དམར་འཕྱར་ནས་དགོས་འདུན་འདོན་པ་འདི་རེད། ༡༠༽ ༸རྒྱལ་བ་བཅུ་བཞི་པ་ཆེན་པོ་དང་དབུ་མའི་ལམ་གྱི་རྗེས་འཇུག་པ་ཚོས་བོད་རིགས་ཡོངས་རྫོགས་རང་སྐྱོང་འཛིན་སྐྱོང་གཅིག་ཏུ་བསྒྲིལ་རྒྱུ་རྩ་དོན་དུ་བརྩི་བ་ལྟར། རང་བཙན་འཐབ་རྩོད་པའི་ཕྱོགས་ན་རང་བཙན་གྱི་སྒྲོམ་གཞིས་མཚོན་སྦྱོར་དངོས་རྗེས་གསུམ་གང་འདྲ་ཞིག་ཐོབ་རྒྱུར་ཁ་གསལ་མེད་སྟབས། དར་དམར་འཕྱར་ཏེ་རང་སྐྱོང་འཐབ་རྩོད་བྱེད་པ་འདིས་རང་བཙན་ཆུང་ཆུང་ཞིག་བྱུང་ནའང་འགྲིག་པའི་འདོད་ཚུལ་རྣམས་གཏན་འགོག་བྱ་ཐུབ་ཅེས་ཀྱང་ཁོད་འདུག

འདི་ལོའི་གསུམ་བཅུའི་དུས་དྲན་ཉིན་གླིང་ཚ་ཚེ་བརྟན་རྡོ་རྗེས་ཞི་བའི་གོམ་བགྲོད་ཐེངས་གཉིས་པ་དེ་མགོ་འཛུགས་བྱས་སྐབས་རྒྱ་དར་འཕྱར་མེད། ཁོང་ལ་རྒྱུ་མཚན་སྐད་ཆ་དྲིས་སྐབས་བོད་མི་དམངས་ཀྱི་མཐུན་སྒྲིལ་དང་སེམས་ཁམས་ལ་མི་ཕོག་པའི་ཆེད་དར་དམར་འཕྱར་རྒྱུ་དེ་ཕྱིར་ཐེན་བྱས་པ་ཡིན་ཞེས་བརྗོད་ཡོད་པ་རེད།

ཡིན་ན་ཡང་བློ་བཟང་ཆོས་འབྱོར་གྱིས་ཁེར་ཀྱང་ངོས་ནས་གསུམ་བཅུའི་དུས་དྲན་ཉིན་རྒྱ་གར་རྒྱལ་ས་ལྡི་ལིར་རྒྱ་མིའི་རྒྱལ་དར་འཕྱར་བའི་གནས་ཚུལ་ཞིག་དུས་བབས་དྲ་ཐོག་ཏུ་སྤེལ་སོང་། འདིའི་ནང་ཁོ་པས་ལྡི་ལིའི་ཇན་ཏར་མན་ཏར་དང་རྒྱ་གར་གྱི་རྒྱལ་སྒོ་གཉིས་ཀར་རྒྱ་དར་འཕྱར་ཡོད་འདུག   https://tibettimes.net/news.php?showfooter=1&id=7429

རྒྱ་དར་འཕྱར་རྒྱུ་དང་དབུ་མའི་ལམ་བར་གྱི་འབྲེལ་བ།

གླིང་ཚ་ཚང་གིས་ཕྱི་ལོ་ ༢༠༡༢ ལོར་དམར་དར་མ་འཕྱར་གོང་། བོད་དོན་ཆེད་ཞི་བའི་གོམ་བགྲོད་ནང་རྒྱའི་དར་དམར་འཕྱར་རྒྱུ་ནི་སྔོན་དཔག་མི་ཐུབ་པ་ཞིག་དང་བསམ་ཡུལ་ལས་འདས་པ་ཞིག་ཀྱང་རེད། དེ་ལས་ལྷག་པར་བོད་མི་གཞན་ཞིག་གིས་བྱ་སྤྱོད་དེ་སྲུང་ཆེད་དབུ་མའི་ལམ་གྱི་སྲིད་ཇུས་བེད་སྤྱོད་བྱས་པ་དེར་ངེས་པར་དུ་དོགས་དྲི་བྱ་དགོས་པ་ཞིག་རེད།

འགྲོ་བ་མི་སྤྱི་དང་བྱེ་བྲག་བོད་མི་སུ་འདྲ་ཞིག་ཡིན་རུང་སོ་སོའི་འདོད་མོས་བཞིན་རྒྱའི་རྒྱལ་དར་གྱིས་གཙོས་པའི་དར་ཆ་གང་འཕྱར་མིན་གྱི་རང་དབང་ཡོད་པ་ནི་བརྗོད་མི་དགོས་པ་ཞིག་རེད། འདི་ནི་འགྲོ་བ་མིའི་སྨྲ་བརྗོད་རང་དབང་གི་ཆ་ཤས་ཤིག་ཀྱང་རེད། དཔེར་ན་ཉེ་འཆར་གསར་དུ་འདེམས་ཐོན་བྱུང་བའི་ཨ་རིའི་ཕྱི་སྲིད་བློན་ཆེན་ཇོན་ཀེ་རི་མཆོག་ནས་ཀྱང་རང་དབང་གི་ཁོངས་སུ་ཞབས་ཆུང་བྱེད་རྒྱུའི་རང་དབང་ཡང་ཚུད་ཡོད་རེད་ཅེས་གསུངས་ཡོད་པ་རེད།

ང་ཚོས་གླིང་ཚ་ཚང་གི་ཞི་བའི་གོམ་བགྲོད་དེ་ཀུན་སློང་བཟང་པོའི་ངང་སྤེལ་བའི་ཡིད་ཆེས་བརྟན་པོ་ཡོད་ལ། ང་ཚོའི་ངོས་ནས་ཁོང་ནང་མི་ཡོངས་ཀྱིས་བོད་དོན་ཆེད་བློས་གཏོང་གང་བྱས་ཡོད་པར་ཡང་ངེས་པར་དུ་ངོས་འཛིན་བྱེད་དགོས་ཀྱི་རེད། ཡིན་ན་ཡང་ང་ཚོའི་སེམས་འཚབ་གཙོ་བོ་ནི་བྱ་སྤྱོད་འདིས་རྐྱེན་པས་སྤྱི་ཚོགས་ཁྲོད་ཤུགས་རྐྱེན་ངན་པ་གང་ཡོང་སྲིད་མིན་གྱི་གནད་དོན་འདི་རེད།

ཕྱི་ལོ་ ༢༠༡༠ ལོར་བོད་གཞུང་ཕྱི་དྲིལ་ལས་ཁུངས་ཀྱིས་དབུ་མའི་ལམ་དང་འབྲེལ་ཡོད་ཡིག་ཆ་ཞེས་པ་ཞིག་དཔར་སྐྲུན་གནང་འདུག  http://tibet.net/wp-content/uploads/2012/06/MIDWAY-ENGLISH.pdf

འདིའི་ནང་དབུ་མའི་ལམ་གྱི་རེ་བར་སྲིད་ཇུས་འདིའི་འོག་བོད་ལ་ཚད་མཐོའི་རང་སྐྱོང་གནས་བབས་རྩོད་ཀྱི་ཡོད་པ་དང་། འདིའི་ཁོངས་བོད་མི་ཚོར་སོ་སོའི་དགོས་མཁོ་དང་འདོད་མོས་བཞིན་ས་གནས་གཞུང་དང་སྒྲིག་འཛུགས་སོགས་འཛུགས་རྒྱུ་ཡོད་པ་ཞིག་རེད་ཅེས་བཀོད་འདུག འོན་ཀྱང་རྒྱ་ནག་དམར་ཤོག་ཚོགས་པས་འདས་པའི་ལོ་ངོ་ ༢༥ ཙམ་གྱི་ནང་དབུ་མའི་ལམ་གྱི་སྲིད་ཇུས་ལ་ངོས་ལེན་རྩ་བ་ནས་བྱས་མེད་པ་མ་ཟད། ད་དུང་བོད་ནང་གི་གནས་སྟངས་ལ་བཟང་པོའི་འགྱུར་བ་གང་ཡང་བཏང་མེད།

དེ་བཞིན་བཙན་བྱོལ་བོད་གཞུང་གི་ངོས་ནས་ཀྱང་རྒྱ་གཞུང་གིས་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆར་འགྲེལ་ལོག་རྒྱག་གི་ཡོད་པ་ཡོངས་བསྒྲགས་བྱས་ཡོད་པ་དང་ཆབས་ཅིག་དབུ་མའི་ལམ་གྱི་སྲིད་ཇུས་ལ་དོགས་པ་ཡོད་མཁན་གྱི་བོད་མི་ཚོའི་ངོས་ནས་ཀྱང་བོད་དོན་དཀའ་རྙོག་སེལ་ཆེད་ཐབས་ལམ་གཞན་འཚོལ་ཞིབ་དགོས་པའི་བསམ་འཆར་སྟོན་མཁན་ཇེ་མང་དུ་འགྲོ་བཞིན་ཡོད་སྐོར་ཡང་ཡིག་ཆ་དེའི་ནང་གསལ་སྟོན་གནང་འདུག

གང་ལྟར་དབུ་མའི་ལམ་གྱི་སྲིད་ཇུས་ནང་བོད་འདི་རྒྱ་ནག་གི་ཆ་ཤས་དང་བོད་མི་རྣམས་རྒྱའི་མི་སེར་ཆགས་རྒྱུ་ཡིན་པ་དེ་གསལ་ཡོད་པ་རེད། དེར་རྟེན་གླིང་ཚ་ཚེ་བརྟན་རྡོ་རྗེས་རྒྱ་དར་འཕྱར་ནས་བོད་དོན་གོམ་བགྲོད་བྱས་པ་འདིས་རྒྱུན་ལྡན་དབུ་མའི་ལམ་དྲིལ་བསྒྲགས་གནང་མཁན་ཚོས་ཡོངས་བསྒྲགས་མ་གནང་བའི་གནད་དོན་གཙོ་བོ་ཞིག་གསལ་སྟོན་བྱས་ཡོད་པ་རེད།

སྲིད་ཇུས་ལ་འགྱུར་བ་ཡོང་སྲིད་པ་རེད་ལ། འཛིན་སྐྱོང་ལའང་འགྱུར་བ་ཡོང་གི་ཡོད་པ་རེད། ཡིན་ནའང་བོད་མིའི་འཐབ་རྩོད་ཀྱི་དམིགས་ཡུལ་འདི་འགྱུར་ཐབས་མེད་པ་ཞིག་རེད་ལ། བོད་ཀྱི་རང་དབང་འཐབ་རྩོད་བྱ་རྒྱུ་དང་འདིའི་ལངས་ཕྱོགས་གདམ་ཁ་བྱ་རྒྱུ་དེའང་བོད་མིའི་རང་དབང་རེད། དམིགས་ཡུལ་དེ་མ་སྒྲུབ་བར་དུ་འཐབ་རྩོད་རྒྱུན་འཁྱོངས་དགོས་ཀྱི་རེད།

ད་བར་བཙན་བྱོལ་བོད་གཞུང་ནས་ལྷག་བསམ་རྣམ་དག་གིས་དབུ་མའི་ལམ་གྱི་སྲིད་ཇུས་ལ་ཤར་སྐྱོད་གནང་ཡང་བཟང་ཕྱོགས་ཀྱི་གྲུབ་འབྲས་ཅི་ཡང་ཐོན་མེད། དེ་ལས་ལྡོག་སྟེ་ ༢༠༠༨ ལོ་ནས་བཟུང་བོད་ནང་གི་གནས་སྟངས་ཇེ་སྡུག་ཏུ་སོང་ཡོད། ད་བར་བོད་མི་བརྒྱ་ལྷག་གིས་རང་ལུས་མེར་བསྲེགས་བཏང་བ་དང་རྒྱའི་དམག་དཔུང་ག་ཚོད་བོད་ནང་སྤུངས་འཇོག་བྱས་པ་ནས་དངོས་ཡོད་གནས་སྟངས་གསལ་སྟོན་ཐུབ་ཀྱི་རེད།

རྒྱའི་དམར་དར་གྱི་མཚོན་དོན།

ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་ལ་བོད་མིས་རྒྱའི་དབང་འགྱུར་ལ་ངོ་རྒོལ་བྱས་སྐབས། ཨ་མདོ་འབོ་ར་ཁུལ་དུ་ཡོད་པའི་འབྲོག་པ་ཁག་ཅིག་གིས་རྟ་བཞོན་ཏེ་རྒྱའི་དམར་དར་མར་ཕབ་ནས་བོད་ཀྱི་རྒྱལ་དར་དེའི་ཚབ་ཏུ་ཡར་བསྒྲེངས་པ་འདིས། བོད་མི་དེ་དག་ལ་དམར་དར་དེས་དྲག་གནོན་དང་དབང་འགྱུར་བྱས་པ་མཚོན་དོན་ཡིན་པ་གསལ་པོ་རྟོགས་ཐུབ།

རྒྱ་གཞུང་གིས་བོད་ལ་དབང་འགྱུར་བྱས་པ་ནས་བཟུང་རྒྱའི་ལག་འོག་ཏུ་བོད་མི་སྟོང་ཕྲག་མང་པོའི་ཚེ་སྲོག་ཤོར་ཡོད་པ་མ་ཟད། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་མཆོག་གིས་དབུས་པའི་བོད་མི་སྟོང་ཕྲག་མང་པོ་བྲོས་བྱོལ་དུ་ཕེབས་དགོས་བྱུང་བ་དང་། བོད་ཀྱི་ཆོས་སྡེ་བརྒྱ་ཆ་དགུ་བཅུ་ལྷག་གཏོར་སྐྱོན་བཏང་བ། བོད་མི་སྟོང་ཕྲག་མང་པོ་ངལ་རྩོལ་རྭ་བའི་ནང་བཞུགས་དགོས་བྱུང་ཡོད། ད་དུང་བོད་ཀྱི་རང་བྱུང་གཏེར་ཁ་རྣམས་རྒྱའི་དགོས་མཁོ་བསྒྲུབ་ཆེད་ཚད་ལས་འགལ་བ་སྔོག་འདོན་བྱས་དང་བྱེད་བཞིན་ཡོད། རྒྱའི་བཙན་འཛུལ་ལ་རྟེན་བཙན་བྱོལ་བོད་མི་འབུམ་གཅིག་དང་ཕྱེད་ཀ་ཙམ་རང་ཡུལ་དུ་ཕྱིར་ལོག་ཐུབ་ཀྱི་མེད་པ་མ་ཟད། ཕྱི་ལོ་ ༢༠༠༩ ལོའི་ཕྱི་ཟླ་གཉིས་པ་ནས་བཟུང་བོད་མི་བརྒྱ་ལྷག་གིས་༸གོང་ས་མཆོག་བོད་ལ་ཕྱིར་ལོག་ཐུབ་པའི་སྨོན་ཚིག་དང་བོད་ལ་རང་དབང་དགོས་ཞེས་འབོད་སྒྲ་བསྒྲགས་ཤིང་རང་ལུས་མེར་བསྲེགས་བཏང་ཡོད་པ་རེད།

ཧི་མ་ལ་ཡའི་རི་རྒྱུད་ཀྱི་ཕྱོགས་གཉིས་སུ་གནས་པའི་བོད་མི་ཚོར་རྒྱ་ནག་གི་དམར་དར་འདིས་དབང་འགྱུར་དང་། དྲག་གནོན། ཚད་མཐོའི་གདུག་རྩུབ་ལས་གཞན་གང་ཡང་མཚོན་གྱི་མེད། ཡིན་ན་ཡང་ཕྱི་ལོ་ ༢༠༠༤ ལོའི་རྒྱ་ནག་གི་ལོ་དེབ་ནང་རྒྱ་ནག་དཔར་ཤོག་ཚོགས་པར་དམར་དར་གྱི་ཚོན་མདོག་གི་གསར་བརྗེ་དང་། སྐར་མ་ཆེན་པོ་ཞིག་ཆུང་བ་བཞིས་སྐོར་བ་དེས་རྒྱ་ནག་མི་དམངས་རྣམས་རྒྱ་ནག་དམར་ཤོག་ཚོགས་པའི་སྣེ་ཁྲིད་འོག་གཅིག་དུ་སྒྲིལ་བཞིན་ཡོད་པའི་མཚོན་དོན་ཡིན་སྐོར་ཁོད་འདུག དེར་བརྟེན། རྒྱ་ནག་དམར་ཤོག་ཚོགས་པར་དམར་དར་དེས་ཧན་མི་རིགས་ཀྱི་སྟོབས་ཤུགས་དང་རྒྱ་ནག་ཡོངས་ལ་བདག་དབང་མཚོན་གྱི་ཡོད་པ་རེད། དམར་དར་དེ་ནི་དབྱེ་འབྱེད་ཀྱི་རྣམ་པ་གསལ་ཤོས་ཤིག་རེད། འདིའི་སྟེང་གི་སྐར་མ་ཆེ་བ་འདི་ཧན་མི་རིགས་དང་ཆུང་བ་རྣམས། བོད་དང་མན་ཇུ། སོག་པོ་དང་ཡུ་གུར་བཅས་གྲངས་ཉུང་མི་རིགས་ཟེར་བས་ཧན་མི་རིགས་མཐའ་སྐོར་བཞིན་གནས་ཡོད་པ་ཞིག་སྟོན་གྱི་ཡོད་པ་རེད།

ཕྱི་ལོ་ ༡༩༥༡ ལོར་རྒྱ་ནག་བཅིངས་དཀྲོལ་དམག་མི་ཟེར་བ་ལྷ་སར་ཐོག་མར་བསླེབས་སྐབས། ཁོང་ཚོས་བོད་པའི་དམག་མི་རྣམས་ཀྱིས་རྒྱ་ནག་གི་རྒྱལ་དར་འཕྱར་དགོས་པའི་སྐུལ་མ་བྱས་ཡོད་ཀྱང་། སྐབས་དེའི་བཀའ་བློན་ཀླུ་ཁང་བ་དང་བློ་བཟང་བཀྲ་ཤིས་མཆོག་རྣམ་པ་གཉིས་ནས་དེར་མཐའ་གཅིག་ཏུ་ངོས་ལེན་གནང་མེད། བཀའ་བློན་ཁོང་རྣམ་པ་གཉིས་ལྟར་ཨ་མདོ་འབོ་རའི་བོད་མི་ཚོས་ཀྱང་། དམར་དར་གྱི་ཚབ་ལ་བོད་ཀྱི་རྒྱལ་དར་འཕྱར་རྒྱུ་དེར་དམིགས་བསལ་གལ་གནད་དང་མཚོན་དོན་ཡོད་པ་གསལ་པོར་ཤེས་ཡོད། དེར་ལོ་རྒྱུས་ཀྱི་གལ་གནད་ཡོད་པ་རེད། རྒྱལ་ཁབ་ཀྱི་རྒྱལ་དར་གྱིས་རྒྱལ་ཁབ་དེའི་འདས་པའི་ལོ་རྒྱུས་དང་། ད་ལྟའི་གནས་བབས་དེ་བཞིན་མ་འོངས་པར་མི་དམངས་རྣམས་བློ་སྤོབས་མཐོ་པོའི་ངང་རྒྱལ་ཁབ་འདིའི་ཁྱིམ་ཚང་ལྟ་བུར་གནས་རྒྱུའི་རེ་སྨོན་ཞིག་ཀྱང་མཚོན་གྱི་ཡོད་པ་རེད།

བོད་ཀྱི་རྒྱལ་དར་འཕྱར་མཁན་གྱི་བོད་མི་ཚོར་འདིས་སོ་སོའི་རིག་གཞུང་དང་། ངོ་བོ་ལས་ལྷག་པར་རྒྱལ་ཁབ་ཀྱི་མཚོན་དོན་ཞིག་རེད། དེས་མཚོན་རྟགས་ལས་ལྷག་པར་འདས་པའི་ནང་བོད་དེ་རང་བཙན་གཙང་མའི་རྒྱལ་ཁབ་ཡིན་པ་དང་། དུས་ད་ལྟ་ཡང་བོད་རྒྱལ་ཁབ་ཀྱི་འཐབ་རྩོད་མུ་མཐུད་གནས་བཞིན་ཡོད་པ། དེ་བཞིན་མ་འོངས་པར་རྒྱའི་དབང་བསྒྱུར་དང་བཙན་འཛུལ་མཚམས་འཇོག་ཐུབ་པའི་མཚོན་དོན་ཞིག་ཀྱང་རེད།

མཇུག་བསྡོམས།

བོད་མི་ཡོད་དོ་ཅོག་ལ་རང་ཉིད་ཀྱི་འདོད་མོས་བཞིན་དར་ཆ་གང་ཞིག་འཕྱར་རྒྱུའི་རང་དབང་ཡོད་པ་བཞིན་བོད་མི་སུ་འདྲ་ཞིག་ཡིན་རུང་གདམ་ཀ་འདིའི་ཐད་རང་ཉིད་ཀྱི་བསམ་ཚུལ་བརྗོད་རྒྱུའི་རང་དབང་ཡང་ཡོད། གླིང་ཚ་ཚེ་བརྟན་རྡོ་རྗེས་ཁ་གསལ་པོའི་ཐོག་ནས་འགྲེལ་བརྗོད་བྱས་པའི་ནང་ཁོང་རང་ཉིད་ནས་རྒྱའི་དར་དམར་འཕྱར་བ་དེ་དབུ་མའི་ལམ་ལ་རྒྱབ་སྐྱོར་ཞིག་རེད། ང་ཚོ་བོད་པའི་སྤྱི་འབངས་ཡིན་པའི་ཆ་ནས་རང་ཉིད་ཀྱི་བསམ་ཚུལ་གསལ་སྟོན་བྱ་རྒྱུ་གལ་ཆེན་པོ་རེད། དེར་བརྟེན་ཀློག་པ་པོ་ཚོའི་ངོས་ནས་གནད་དོན་དེར་གཟིགས་ཚུལ་གང་ཡོད་མེད་རྩོམ་དང་དཔྱད་གཏམ་སོགས་བརྒྱུད་གསལ་སྟོན་གནང་དགོས་པ་གལ་ཆེ།

ཟུར་སྣོན།

བློ་བཟང་ཆོས་འབྱོར་དབུ་མའི་ལམ་མི་མང་ལས་འགུལ་ཁང་དུ་རྒྱུན་ལས་ཡིན་བཞིན་པའི་སྐབས་སུའང་སྔ་ལོའི་ཕྱི་ཟླ་བཅུ་གཅིག་པའི་ནང་། བོད་ནང་རང་ལུས་མེར་བསྲེགས་དང་འབྲེལ་བའི་ཐད་གོ་བསྡུར་ཡིན་ཚུལ་གྱིས་བོད་མི་གཞོན་སྐྱེས་ཤེས་ཡོན་ཅན་གྱི་ཚོགས་འདུ་ཞེས་པ་ཞིག་སྐོང་ཚོགས་བྱས་ཡོད་པ་རེད། ཚོགས་འདུ་དེར་ཚོགས་བཅར་བ་བོད་མི་བཅོ་བརྒྱད་ལས་མེད་པ་དང་། དེའི་མཇུག་འབྲས་ཕྱི་ཟླ་ ༡༢ ཚེས་ ༡༠ ཉིན་རྒྱ་ནག་གི་དཔོན་པོ་གསར་པ་ཞི་ཆེན་ཕིན་གྱི་མིང་ཐོག་སྙན་ཞུ་ཞིག་སྤེལ་འདུག སྙན་ཞུ་དེ་བོད་མི་གཞོན་སྐྱེས་ཤེས་ཡོན་ཅན་གྱི་མིང་ཐོག་ནས་ཡིན་སྐོར་བརྗོད་འདུག་ཀྱང་བློ་བཟང་ཆོས་འབྱོར་རང་ཉིད་ལ་གོ་སྒྲིག་བྱེད་མཁན་གཙོ་བོ་ཞེས་ཁོང་གཅིག་པུའི་མིང་རྟགས་ལས་བཀོད་མི་འདུག

སྙན་ཞུ་དེའི་ནང་གནད་དོན་མང་པོ་རྟོགས་རྒྱུ་འདུག་ཀྱང་། རྒྱ་ནག་དམར་པོའི་གཞུང་ལ་དབུས་གཞུང་ཞེས་བཀོད་འདུག་པ་དང་། བོད་ལ་ས་གནས་ཞེས་བཀོད་འདུག ཚོགས་པ་དེར་བོད་མི་ཤེས་ཡོན་ཅན་ག་ཚོད་ཡོད་མེད་དང་། ཁོང་རྣམ་པ་ཚང་མས་སྙན་ཞུ་འདིའི་ནང་དོན་རྣམས་མཁྱེན་རྟོགས་དང་དེ་དག་རྒྱབ་སྐྱོར་ཡོད་དམ་མེད། དེ་བཞིན་ཡིག་ཆ་དེར་ས་རྟགས་ཆོས་འབྱོར་གཅིག་པུས་བཀོད་དགོས་དོན་གང་ཡིན་ནམ། རོགས་པ་གཞན་སུ་ཡང་མེད་དམ། ཡང་ན། མི་ཁ་ཤས་ཤིག་གིས་བོད་མི་གཞོན་སྐྱེས་ཤེས་ཡོན་ཅན་གྱི་མིང་འཁྱེར་ནས་རྒྱ་དམར་གྱིས་བོད་ཐོག་དབང་བསྒྱུར་བྱེད་བཞིན་པར་ངོས་ལེན་དང་དེ་ལུགས་མཐུན་ལྟ་བུ་བཟོ་ཐབས་བྱེད་བཞིན་ཡོད་དམ།