མི་ས་ཡ་ ༡༡ ཨ་རིའི་མི་སེར་ཆཊ་རྒྱུའི་རེ་བ།

ཁ་སང་ཨ་རིའི་གྲོས་ཚོགས་གོང་མས་ཨ་རིའི་གནས་སྤོར་རྩ་ཁྲིམས་བསྐྱར་བཅོས་ཀྱི་གྲོས་གཞི་ལ་མང་མོས་རྒྱབ་སྐྱོར་ཐོབ་ཏེ་ཁྲིམས་མཐུན་མིན་པའི་གནས་སྤོར་པ་མི་གྲངས་ས་ཡ་ ༡༡ ཨ་རིའི་མི་སེར་ཆགས་ཐུབ་པའི་རེ་བ་བསླེབས་ཡོད་འདུག

ཁ་སང་ཕྱི་ཚེས་ ༢༧ ཉིན་ཨ་རིའི་གྲོས་ཚོགས་གོང་མའི་ནང་། ཨ་རིའི་ནང་རྒྱལ་ཁབ་གཞན་ནས་ཡོང་བའི་མི་སེར་གནས་སྤོར་རྩ་ཁྲིམས་བསྐྱར་བཅོས་ཀྱི་གྲོས་གཞི་ཞིག་ལ་བགྲོ་གླེང་གནང་མཐར། གྲོས་ཚོགས་གོང་མིར་འཐུས་མི་ ༡༠༠ ཡོད་པ་ལས་འཐུས་མི་ ༣༢ ཡིས་དགག་པ་དང་། འཐུས་མི་ ༦༨ ཡིས་རྒྱབ་སྐྱོར་ཐོབ་ཡོད་སྟབས། གྲོས་གཞི་དེར་ཨ་རིའི་གྲོས་ཚོགས་གོང་མའི་ནང་མང་མོས་ཐག་གཅོད་གཏན་འབེབས་བྱུང་ཡོད་འདུག

ད་ཆར་ཨ་རིའི་ནང་ཁྲིམས་མཐུན་ཡིག་ཆ་མེད་པར་གནས་སྡོད་བྱེད་མཁན་མི་གྲངས་ས་ཡ་ ༡༡ ལྷག་ཡོད་ཅིང་། ཐེངས་འདིའི་གྲོས་ཚོགས་གོང་མའི་ནང་གི་གཏན་འབེབས་དེ་བརྒྱུད་ནས་མ་འོངས་པར་མི་དེ་དག་ཨ་རིའི་ནང་ཁྲིམས་མཐུན་གནས་སྡོད་ཆོག་པའི་ཡིག་ཆ་རེག་རྒྱུ་ཡིན་པ་མ་ཟད་མི་སེར་ཡང་ཆགས་རྒྱུ་ཡིན་འདུག

༢༠༡༢ ལོའི་ ༡༢ ཀྱི་སྔོན་ལ་ཨ་རིའི་ནང་བསླེབས་པ་ཡིན་ན། གནས་སྤོར་བསྐྱར་བཅོས་གྲོས་གཞི་ལྟར་ཁྲིམས་མཐུན་ཆགས་རྒྱུ་ཡིན་པ་དང་། དེ་མིན་གཞན་དག་ལ་གཞུང་གིས་དམ་དྲག་ཆེ་རུ་གཏོང་རྒྱུ་ཡིན་འདུག ཨ་རིའི་ནང་ཁྲིམས་འགལ་གནས་སྡོད་བྱེད་མཁན་རྒྱལ་ཁབ་གཙོ་བོ་དག་ནི། ཨ་རིའི་ཁྱིམ་མཚེས་རྒྱལ་ཁབ་མེག་སི་ཁོ་གཙོས་ལྷོ་ཨ་མེ་རི་ཁའི་རྒྱལ་ཁབ་ཁག་ཡིན་པ་དང་། ཨེ་ཤ་ཡའི་རྒྱལ་ཁབ་ཧྥི་ལི་ཕིན་དང་རྒྱ་གར། རྒྱ་ནག་བཅས་ཡིན་འདུག

ཨ་རིའི་གྲོས་ཚོགས་གོང་མའི་ནང་གི་ཐག་གཅོད་དེ་དང་འབྲེལ་ཏེ། ཨ་རི་དང་མེག་སི་ཁོ་ ( Mexico) རྒྱལ་ཁབ་གཉིས་བར་ས་མཚམས་རིང་ཚད་སྤྱི་ལེ་༡༡༢༧ ཡོད་པར་ལྕགས་རྭ་འཛུགས་རྒྱུ་དང་། ཨ་རིའི་ས་མཚམས་དང་གནམ་ཐང་བཅས་ཀྱི་བདེ་སྲུང་མི་སྣའི་གྲངས་ཚད་ལྡབ་གཉིས་ཙམ་འཕར་སྣོན་བྱ་རྒྱུ་ཡིན་སྟབས། དེ་དག་གི་ལོ་གཅིག་གི་འགྲོ་སོང་ཨ་སྒོར་ཐེར་འབུམ་ ༡༠ ལས་བརྒལ་རྒྱུ་ཡིན་པ་དང་། ཨ་རིའི་གཞུང་གིས་རྒྱལ་ཁབ་གཞན་ནས་ཡོང་མཁན་དང་ཨ་རི་རང་གི་མི་མང་སུ་ཞིག་ཡིན་རུང་ཨ་རིའི་ནང་ལས་ཀ་བྱེད་ཆོག་པའི་ཡིག་ཆ་ཡོད་མེད་ཐོག་དམ་དྲག་ཆེ་རུ་གཏོང་རྒྱུ་ཡིན་སྟབས། མ་འོངས་པར་ཨ་རིའི་ནང་ཁྲིམས་མཐུན་ཡིག་ཆ་མེད་པར་ལས་ཀ་བྱེད་མཁན་རྣམས་ལ་དཀའ་ངལ་འཕྲད་རྒྱུ་ཡིན་འདུག

ཨ་རིའི་གནས་སྤོར་རྩ་ཁྲིམས་བསྐྱར་བཅོས་ཀྱི་གྲོས་གཞིའི་ཐོག་ཕྱག་ལས་གནང་མཁན་གཙོ་བོ་གྲོས་ཚོགས་འཐུས་མི་ ༨ ཡོད་པ་དག་ནི། ཇོན་མེལ་ཁེན(John McCain) དང་ཆཱོ་མེར་ (Charles E Schumer)། ཊོར་བྷི་ (Durbin) ། གྷིར་ཧམ་ Graham)། རོབ་བྷར་ཌི་ (Robert Menendez)། མེལ་ཁུལ་བྷེ་ནེ་ཌི་ (Michael Bennet)། མཱར་ཁོ་ ( Marco Rubio)། ཧྥུ་ལད་ཁུ་ ( Jeff Flake) བཅས་ཡིན་པ་དང་། ཁོང་ཅག་གིས་ཐོག་མཐའ་བར་གསུམ་དུ་གྲོས་གཞི་དེ་ཐག་གཅོད་ཡོང་ཐབས་ལ་འབད་བརྩོན་ཤུགས་ཆེན་གནང་ཡོད་སྟབས། དེང་སང་ཨ་རིའི་ནང་ཁོང་ཚོིར་༼མི་བརྒྱད་ཤོག་ཁག༽ཅེས་འབོད་ཀྱི་ཡོད་འདུག

གྲོས་ཚོགས་གོང་མས་གྲོས་གཞི་དེར་མང་མོས་ཐག་གཅོད་བྱུང་བར། ཨ་རིའི་སྲིད་འཛིན་ཨོ་བྷ་མས་བརྗོད་དོན། “ གྲོས་ཚོགས་གོང་མས་ཐག་གཅོད་དེ་ནི་འོས་ཤིང་འཚམ་པའི་གཞི་རྩའི་བཅོས་བསྒྱུར་གལ་ཆེན་ཞིག་ཡིན། གནད་དོན་དེའི་ཐོག་གྲོས་ཚོགས་གོང་མའི་ལས་ཀ་འགྲུབ་ཚར་བ་རེད། ད་གྲོས་ཚོགས་འོག་མའི་ནང་གྲོས་ཆོད་དེར་གོང་ལྟར་རྒྱབ་སྐྱོར་ཐག་གཅོད་ཡོང་བའི་རེ་བ་ཡོད” ཅེས་ཨོ་བྷ་མ་ལྷོ་ཨ་ཧྥུ་རི་ཀའི་ནང་ཚོང་ལས་དང་ཟས་རིགས་བཅས་ཀྱི་གཞུང་འབྲེལ་གཟིགས་སྐོར་སྐབས་བརྗོད་ཡོད་འདུག  

ཨ་རིའི་གནས་སྤོར་རྩ་ཁྲིམས་བསྐྱར་བཅོས་ཀྱི་གྲོས་གཞི་ལག་སྟེར་བྱེད་དགོས་ན། ཨ་རིའི་གྲོས་ཚོགས་འོག་མ་ནས་མང་མོས་རྒྱབ་སྐྱོར་ཐོབ་ན། སྲིད་འཛིན་ཨོ་བྷ་མས་མཐའ་མའི་དག་མཆན་གྱི་མིང་རྟགས་བཀོད་དེ་རྩ་ཁྲིམས་ཆགས་རྗེས་ལག་བསྟར་བྱེད་དགོས་པ་ཞིག་ཡིན་འདུག