ལོ་ན་ ༩༡ ཅན་ཞིག་ལ་ལོ་ ༩༠ ཡི་ཁྲིམས་ཆད།

གཟའ་ཟླ་བའི་ཉིན་བྷང་ལ་ཌེ་ཤཱི་ཁྲིམས་ཁང་གིས་རང་ལོ་ ༩༡ སོན་པ་ཨ་ཛམ་ལ། ༡༩༧༡ དམར་གསོད་ཆེན་མོའི་ཇུས་འགོད་པ་ཡིན་པའི་ཉེས་མིང་འོག་ལོ་ ༩༠ ཡི་ཁྲིམས་ཐག་བཅད་འདུག

ཁ་སང་ཕྱི་ཚེས་ ༡༥ ཉིན་བྷང་ལ་ཌེ་ཤཱིའི་དམིགས་བསལ་དམག་དོན་ཁྲིམས་ཁང་རྒྱལ་སྤྱིའི་ཉེས་དོན་ཁྲིམས་ཁང་(International Crimes Tribunal) ཞེས་པས། དེ་སྔ་བྷང་ལ་ཌེ་ཤཱི་ཡི་ཁ་ཆེ་ཆབ་སྲིད་ཚོགས་པ་ཆེ་ཤོས་ཇཱ་མཱ་ཊི་(Jaamat-e-Islami) ཡི་མགོ་གཙོ་ཟུར་པ་རང་ལོ་ ༩༡ ཡིན་པ་ཨ་ཛམ་(Ghulam Azam) ལ།  ༡༩༧༡ ལོའི་བྷང་ལ་ཌེ་ཤཱི་དམག་འཁྲུག་སྐབས་ཀྱི་དམར་གསོད་དོན་རྐྱེན་སློང་མཁན་གྱི་ཉེས་ཅན་པ་གཏེ་བོ་ཡིན་པའི་ཉེས་མིང་འོག་ལོ་ ༩༠ ཡི་བཙོན་འཇུག་ཁྲིམས་ཐག་བཅད་ཡོད་པ་དང་། ཁྲིམས་ཆད་དེ་རྐྱེན་པས་ད་ཆར་བྷང་ལ་ཌེ་ཤཱིའི་ནང་ངོ་རྒོལ་ཟིང་འཁྲུག་གང་སར་འབྱུང་བཞིན་ཡོད།

ཨ་ཛམ་ལ་ཁྲིམས་གཏུག་བྱེད་མཁན་གྱིས་ཁོ་བོ་ ༡༩༧༡ ལོའི་བྷང་ལ་ཌེ་ཤཱི་དང་པ་ཀི་སི་ཐན་(པ་ཀི་སི་ཐན་ཤར་མ་དང་ནུབ་མ་)བར་གྱི་དམག་འཁྲུག་སྐབས་དངོས་སུ་མདུན་དུ་ཐོན་མེད་ཀྱང་། མི་མང་སྡེབ་གསོད་བྱེད་མཁན་གྱི་ལྐོག་ཇུས་འཐེན་མཁན་གཏེ་བོ་དེ་ཡིན་པ་དང་། དམག་འཁྲུག་སྐབས་མི་ས་ཡ་ ༣ དམར་གསོད་བཏང་པའི་ལྐོག་ཇུས་འཐེན་མཁན་དང་སྐུལ་སློང་བྱེད་མཁན། འཆར་འགོད་གཞི་བཟོ་མཁན། དམར་གསོད་གཏོང་འཇུག་མཁན་བཅས་དོན་ཚན་ལྔའི་ཉེས་མིང་དང་། སྐབས་དེར་པ་ཀི་སི་ཐན་དང་མཉམ་འབྲེལ་བྱེད་མཁན་ཞིག་ཡིན་པའི་ཁྲིམས་གཏུག་བྱས་ཡོད།

ཉིན་དེར་བགྲེས་སོང་ཁོང་རྐུབ་སྟེགས་འཁོར་ལོ་ཅན་ཞིག་ཏུ་བསྡད་དེ་ཁྲིམས་རར་ཡོང་ཡོད་པ་དང་། ཁྲིམས་ཁང་གི་ཐག་གཅོད་དེར་ཉན་རྗེས་ཁྲིམས་ཆད་ངོས་ལེན་བྱས་མེད་པ་དང་། དེ་མ་ཐག་ཇཱ་མ་ཆབ་སྲིད་ཚོགས་པས་ཀྱང་མི་མང་སྐུལ་སློང་བྱས་ཏེ། མི་མང་སྟོང་ཕྲག་ལྷག་ཁྲིམས་ཁང་གི་ཕྱི་ལོགས་སུ་འཛོམས་ཏེ་ངོ་རྒོལ་བྱས་ཡོད་པ་མ་ཟད། བྷང་ལ་ཌེ་ཤཱིའི་གྲོང་ཁྱེར་དང་ས་གནས་གང་སར་ངོ་རྒོལ་ཟིང་ཆ་བསླངས་ཡོད་འདུག

ཨ་ཛམ་གྱི་ཁྲིམས་རྩོད་པས། ཞུ་གཏུག་པའི་ཉེས་འཛུགས་ནི་དམག་འཁྲུག་སྐབས་ཀྱི་ཚགས་ཤོག་སྟེང་། ཨ་ཛམ་གྱི་གཏམ་བཤད་བཀོད་པ་ཞིག་ལ་བརྟེན་ཉེས་འཛུགས་བྱེད་ཀྱི་ཡོད་པ་ཙམ་ལས་ཉེས་འཛུགས་དེ་དག་ལ་བདེན་དཔང་གང་ཡང་མེད་སྐོར་དང་། ཁྲིམས་ཁང་གི་ཐག་གཅོད་དེ་དྲང་བདེན་མིན་པའི་ཞུ་གཏུག་བྱ་རྒྱུ་ཡིན་ཞེས་བརྗོད་འདུག

རྒྱལ་སྤྱིའི་ཉེས་དོན་ཁྲིམས་ཁང་ཟེར་པ་འདི་ ༢༠༡༠ ལོར་བྷང་ལ་ཌེ་ཤཱི་གཞུང་གི་སྣེ་ཁྲིད་འོག ༡༩༧༡ ལོའི་དམག་འཁྲུག་ཁྲོད་པ་ཀི་སི་ཐན་དང་མཉམ་ལས་བྱེད་མཁན་ཚོའི་ཉེས་དོན་ལ་ཞིབ་བཤེར་བྱེད་ཆེད་བཙུགས་པ་ཞིག་ཡིན་པ་དང་། ཇཱ་མ་ཊི་ཆབ་སྲིད་ཚོགས་པས་དེ་ནི་རྒྱལ་སྤྱིའི་ཉེས་དོན་ཁྲིམས་ཁང་གཞན་ལྟར་མཉམ་འབྲེལ་རྒྱལ་ཚོགས་ཀྱིས་ངོས་ལེན་བྱས་མེད་སྐོར་བརྗོད་འདུག་ལ། ཨ་རིའི་ནེའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་(Human Rights Watch) གིས་ཀྱང་ཁྲིམས་ཁང་དེའི་ཐག་གཅོད་འགྲོ་སྟངས་རྒྱལ་སྤྱིའི་ཚད་གཞིར་བསླེབས་མེད་ཚུལ་བརྗོད་འདུག

བྷང་ལ་ཌེ་ཤཱི་གཞུང་གིས་ ༡༩༧༡ ལོའི་དམག་འཁྲུག་ཁྲོད་མི་ས་ཡ་ ༣ ལྷག་དམར་གསོད་བཏང་ཡོད་ཚུལ་བརྗོད་ཀྱང་། རང་དབང་གི་ཉམས་ཞིབ་པ་ཚོས་མི་འབུམ་ ༥ ཡས་མས་ཡིན་སྐོར་བཤད་ཡོད། རྩོམ་པ་པོ་དང་དཔྱད་བརྗོད་པ་མང་པོས་དམག་འཁྲུག་དེའི་སྐབས། ཨ་ཛམ་གྱིས་བྷང་ལ་ཌེ་ཤཱི་དང་པ་ཀི་སི་ཐན་གཉིས་སོ་སོར་རང་བཙན་བྱ་རྒྱུ་དེ་ནི་ཁ་ཆེ་སྤྱི་ཚོགས་ཁ་བྲལ་དུ་འགྲོ་རྒྱུ་ཡིན་པའི་ལྟ་ཚུལ་འོག བྷང་ལ་ཌེ་ཤཱི་པ་ཀི་སི་ཐན་ནས་རང་བཙན་བྱ་རྒྱུར་ངོ་རྒོལ་བྱེད་མཁན་ཞིག་ཡིན་སྐོར་རྗོད་བཞིན་ཡོད།

ཨ་ཛམ་གྱིས་ ༡༩༦༩ ནས་ ༢༠༠༠ ལོའི་བར་ཇཱ་མ་ཊི་ཆབ་སྲིད་ཚོགས་པའི་སྣེ་ཁྲིད་ཡོད་པ་དང་། ད་ཆར་ཁོང་ནི་བསམ་བློའི་དབུ་ཁྲིད་ཅིག་ཏུ་ངོས་འཛིན་བྱེད་ཀྱི་ཡོད།