ཁ་སང་ཨ་རིའི་རྒྱལ་དོན་ལས་ཁུངས་ཀྱིས་གསལ་བསྒྲགས་སྤེལ་ཏེ་བཟའ་ཉི་མའི་ཉིན་རྒྱལ་ཁབ་ཁག་ཅིག་ནང་གི་ཨ་རིའི་གཞུང་ཚབ་དང་གཞུང་ཚབ་ཡན་ལག་ཁག་ཅིག་གནས་སྐབས་རིང་སྒོ་རྒྱག་རྒྱུ་ཡིན་ཟེར།
ཁ་སང་ཕྱི་ཚེས་ ༡ ཉིན་ཨ་རིའི་རྒྱལ་དོན་ལས་ཁུངས་ཀྱིས་གསལ་བསྒྲགས་ཤིག་སྤེལ་བའི་ནང་། ཟླ་འདིའི་ཕྱི་ཚེས་ ༤ ཉིན་འཛམ་གླིང་རྒྱལ་ཁབ་ཁག་ཅིག་ནང་གི་ཨ་རིའི་གཞུང་ཚབ་ཁང་དང་གཞུང་ཚབ་ཡན་ལག་ཁག་ཅིག་གི་བདེ་འཇགས་ཆེད་གནས་སྐབས་རིང་སྒོ་རྒྱག་རྒྱུ་ཡིན་ཞེས་བཀོད་འདུག
ཨ་རིའི་རྒྱལ་དོན་ལས་ཁུངས་གྱི་མགྲིན་ཚབ་ལྕམ་མཱ་ཁུ་ར་ཡ་ཧར་ཧྥུ་ ( Marie Harf )ལགས་ཀྱིས་གསར་འགོད་པར “ ང་ཚོས་ཕྱི་རྒྱལ་ཁག་ཏུ་ཡོད་པའི་ཨ་རིའི་གཞུང་ཚབ་ཁང་དང་གཞུང་ཚབ་ཡན་ལག་ཁང་ཁག་ཅིག་གནས་སྐབས་རིང་སྒོ་རྒྱག་དགོས་པའི་ལམ་སྟོན་བྱས་པ་དེ་ནི། ཨ་རིའི་རྒྱལ་དོན་ལས་ཁུངས་ལ་སྙན་གསེང་ཞུས་བའི་ཐོག་ནས་བདེ་འཇགས་ཉེན་སྲུང་བྱས་པ་ཞིག་ཡིན” ཞེས་བརྗོད་འདུག སྐབས་དེར་གསར་འགོད་པ་ཚོས་རྒྱལ་ཁབ་གང་དག་ནང་གི་གཞུང་ཚབ་སྒོ་རྒྱག་རྒྱུ་ཡིན་མིན་དང་། བསྐྱར་དུ་ག་དུས་སྒོ་ཕྱེ་ཐུབ་མིན་དྲིས་པར། “ ས་གནས་ཁག་སོ་སོའི་གནས་སྟངས་ལ་གཞིགས་ཏེ་མ་འོངས་པར་བསྐྱར་དུ་སྒོ་ཕྱེ་རྒྱུ་རེད”ཅེས་གཞུང་ཚབ་གང་དག་སྒོ་རྒྱག་མིན་གྱི་དྲི་བར་ལན་འདེབས་བྱས་མི་འདུག
ཨ་རིའི་ཕྱི་འབྲེལ་དུས་དེབ་ཐོག་གནས་ཚུལ་བཀོད་པར། ཟླ་འདིའི་ཕྱི་ཚེས་ ༤ ཉིན། ཇོར་ཌན་(Jordan)དང་ཨི་ཇིབ་(Egypt)། ཁུ་ཝེ་(Kuwait)། ལེ་བྷེ་ཡ་(Libya)། ཨི་སི་རེལ་(Israel)། ཨི་རག་(Iraq)། ཊོབ་ཧ་(Doha)། སོལ་ངྷི་ཨ་རབ་(Saudi Arabia)། ཡེ་མན་(Yemen)། བྷང་ག་ལ་(Bangladesh)་བཅས་ཀྱི་རྒྱལ་ཁབ་ནང་ཡོད་པའི་ཨ་རིའི་གཞུང་ཚབ་ཁང་དང་གཞུང་ཚབ་ཡན་ལག་ཁག་གིས་སྒོ་རྒྱག་རྒྱུ་ཡིན་སྐོར་བཀོད་འདུག
གནས་ཚུལ་འདིའི་སྐོར་ལ་ཨ་རིའི་རྒྱལ་དོན་ལས་ཁུངས་ཀྱི་ལས་བྱེད་ཅིག་གིས་ཨན་བྷི་སི་ (NBC) གསར་ཁང་ལ་བརྗོད་པ་ལྟར་ན། ཁ་ཆེའི་རྒྱལ་ཁབ་ཁག་ནང་གི་ཨ་རིའི་གཞུང་ཚབ་ཁང་སོ་སོས་ནམ་རྒྱུན་གཟའ་ཉི་མ་འཆར་ཅན་ལྟར་ལས་ཀ་བྱེད་ཀྱིན་ཡོད་ཀྱང་། འཇིགས་སྐུལ་པས་གཞུང་ཚབ་ཁང་ཁག་ཅིག་ལ་འཇབ་རྒོལ་བྱེད་སྲིད་པའི་གནས་ཚུལ་ཤེས་རྟོགས་བྱུང་བར་བརྟེན། དཀྱིལ་ཤར་ཡུལ་གྲུ་ཁག་གི་ཨ་རིའི་གཞུང་ཚབ་ཁང་དང་གཞུང་ཚབ་ཡན་ལག་ཁག་ཅིག་གནས་སྐབས་རིང་སྒོ་རྒྱག་དགོས་བྱུང་བ་ཞིག་ཡིན་ཚུལ་བརྗོད་འདུག
ཐེངས་འདིར་ཨ་རིའི་གཞུང་གིས་གནས་ཚུལ་དེའི་རྒྱབ་སྐྱོང་དང་རྒྱུ་རྐྱེན་སྐོར་གསལ་བཤད་གང་ཡང་བྱས་མེད་ཀྱང་། ནེའུ་ཡོག་བྷི་ཨད་སི་ (CBS) གསར་ཁང་གིས་བརྗོད་ན། ཨ་རིའི་གསང་བའི་ལས་ཁུངས་ཀྱིས་ཨལ་ཁཱ་ཌ་(al-Qaeda) འཇིགས་སྐུལ་ཚོགས་པས་དཀྱིལ་ཤར་ཡུལ་གྲུའི་ཁ་ཆེའི་རྒྱལ་ཁབ་ཁག་དང་། དེ་མིན་གྱི་ཁ་ཆེའི་ལུང་པ་ཁག་གི་ཨ་རིའི་གཞུང་ཚབ་དང་གཞུང་ཚབ་ཡན་ལག་ཁག་ཅིག་ལ་འཇབ་རྒོལ་བྱེད་འཆར་ཡོད་པའི་གནས་ཚུལ་ཤེས་རྟོགས་བྱུང་སྟབས་ཨ་རིའི་གཞུང་གིས་ཐག་གཅོད་དེ་བྱས་པ་ཡིན་སྐོར་བརྗོད་འདུག
གནད་དོན་ཆེད་མཁས་ཚོས་ཟླ་འདིའི་ཕྱི་ཚེས་ ༤ ཉིན་ཏེ་རེས་གཟའ་ཉི་མའི་ཉིན་ནི། ཨ་རིའི་སྲིད་འཛིན་ཨོ་བྷ་མ་དགུང་ལོ་ ༥༢ ལ་ཕེབས་པའི་སྐྱེས་སྐར་དང་། ཨི་རན་གྱི་སྲིད་འཛིན་གསར་བ་ཧཱ་སན་རོབ་ཧཱ་ནེ་ ( Hassan Rowhani) ལགས་ཀྱིས་སྲིད་འཛིན་དམ་འབུལ་གྱི་མཛད་སྒོ་བཅས་དུས་མཉམ་དུ་ཁེལ་ཡོད་སྟབས། འཇིགས་སྐུལ་པས་གོ་སྐབས་འདི་བརྒྱུད་དེ་ཨ་རིའི་གཞུང་ཚབ་ཁང་ཁག་ཏུ་འཇབ་རྒོལ་བྱེད་སྲིད་པར་ཚོད་དཔག་བྱས་འདུག
ན་ནིང་ཕྱི་ཟླ་ ༩ ཚེས་ ༡༡ ཉིན་ལེ་བྷེ་ཡ་རྒྱལ་ཁབ་ཀྱི་གྲོང་ཁྱེར་བྷན་ངྒ་ཛི་ (Benghazi) ནང་ཡོད་པའི་ཨ་རིའི་གཞུང་ཚབ་ཡན་ལག་ཁང་དུ། ཁ་ཆེ་འཇིགས་སྐུལ་པས་འཇབ་རྒོལ་བྱས་ཏེ། གཞུང་ཚབ་ཆེན་མོ་གཙོས་པའི་ཨ་རིའི་མི་སེར་གསུམ་དམར་གསོད་བཏང་པ་དེར། ཨ་རིའི་གྲོས་ཚོགས་ཀྱིས་ཨོ་བྷ་མའི་གཞུང་ལ་སྐྱོན་བརྗོད་ཤུགས་ཆེན་བྱས་ཡོད་པ་རེད།
གསར་འགོད་པ། ལྷ་སྐྱབས་རྒྱལ།
