ངྷ་སར་མང་གཙོའི་དུས་དྲན་ཐེངས་ང་གསུམ་པ་སྲུང་གཙི་གནང་།

དེ་རིང་ངྷ་སར་བོད་གཞུང་མང་གཉིས་ཀྱིས་བོད་ལྗོངས་དམངས་གཙོའི་དུས་དྲན་ཐེངས་ ༥༣ པ་སྲུང་གཙི་གནང་བའི་ཐོག སློབ་ཕྲུག་ ༡༠ ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་དང་། བུད་མེད་འབུམ་རམས་པ་གཉིས་ལ་སྲིད་སྐྱོང་གཟེངས་བསྟོད་ཕྱག་འཁྱེར་ཐོག་མ་དེ་གནང་སོང་།

དེ་རིང་ཞོགས་པ་ཆུ་ཚོད་ ༩ སྟེང་བཞུགས་སྒར་ཐེག་ཆེན་གཙུག་ལག་ཁང་དུ། བཙན་བྱོལ་དུ་བོད་མིའི་མང་གཙོའི་དུས་དྲན་ཐེངས་ ༥༣ པ་སྲུང་གཙི་གནང་ཡོད་པ་དང་། དབུ་འཛུགས་མཛད་སྒོའི་སྟེང་། དབུས་བོད་མིའི་སྒྲིག་འཛུགས་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་དང་སྲིད་སྐྱོང་བློ་བཟང་སེང་གེ་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན། བཀའ་བློན་རྣམ་པ་དང་སྤྱི་འཐུས་རྒྱུན་ལས་རྣམ་པ། གཞུང་ཞབས་ལས་བྱེད་ཆེ་ཕྲ། གཞུང་འབྲེལ་མིན་པའི་ཚོགས་པ་ཁག་གི་མཛད་གཙོ་རྣམ་པ། ངྷ་སའི་ཉེ་འཁོར་གྱི་སློབ་གྲྭ་དང་དགོན་སྡེ་ཁག་གི་སྐུ་ཚབ། གཞན། ངྷ་སའི་སེར་སྐྱ་མ་མིང་ ༢༣༠༠ ལྷག་ལྷན་འཛོམས་ཐོག སྲིད་སྐྱོང་མཆོག་གིས་བོད་རྒྱལ་ཁབ་ཆེན་མོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་པ་དང་སྦྲགས། བོད་ཀྱི་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་མང་གཙོའི་གསར་གཞས་བཏང་སོང་།

དེའི་རྗེས་སྲིད་སྐྱོང་མཆོག་གིས་རྣམ་རྒྱལ་གྲྭ་ཚང་ཤེས་ཡོན་ལྷན་ཚོགས་ཀྱིས་འདོན་སྤེལ་གནང་པའི་དཔེ་དེབ་གསུམ་དང་། ཐེ་ཝན་ཡུས་ཡིང་(Yu Ying) མཐོ་སློབ་ཀྱི་དགེ་རྒན་ཆེན་མོ་སཱུ་ཇའེ་ཧུང་(Su Jiahong) གིས་བརྩམས་པའི་བཙན་བྱོལ་བོད་མིའི་དམངས་གཙོའི་སྐོར་གྱི་དེབ་ཕྲེང་གཉིས་པ་༼བཙན་བྱོལ་ནང་གི་མང་གཙོའི་འགྱུར་འགྲོས།༽ཞེས་པ། ཨ་རིར་གནས་སྡོད་སྡོམ་པ་ཚང་ཚེ་རིང་དབང་མོས་བརྩམས་པའི་༼བོད་ནང་གི་ཁྱིམ་ཁང་།༽ཞེས་པ་བཅས་དབུ་འབྱེད་དང་། སྤྱི་འཐུས་ཚོགས་གཙོ་མཆོག་གིས་རྒྱལ་སྤྱིའི་བོད་དོན་ལས་འགུལ་ཁང་གིས་རྩོམ་སྒྲིག་དང་ཐེ་ཝན་དོན་གཅོད་ཁང་གིས་རྒྱ་ཡིག་ཏུ་བསྒྱུར་པའི་༼བོད་ཀྱི་རིག་གཞུང་རྩ་མེད་བཏང་པའི་ལོ་ ༦༠ ༽ཅེས་པ་དང་། གངས་ལྗོངས་དཔར་སྐྲུན་ཁང་གིས་དཔར་སྐྲུན་བྱས་པའི་༼རང་ལུས་མེར་བསྲེགས་ཀྱི་ལོ་རྒྱུས། ༽ཞེས་པ། བེ་རིག་བསོད་ནམས་དབང་ཕྱུག་གིས་བརྩམས་པའི་༼དབུ་མའི་ལྟ་སྒོམ་དང་ཚན་རིག་གི་རྣམ་བཤད་༽ཅེས་དབུ་འབྱེད། ཁྲིམས་ཞིབ་པ་ཆེ་བས་ལྡི་ལི་སྐུ་ཚབ་དོན་གཅོད་ཁང་གིས་བསྡུ་སྒྲིག་གནང་བའི་འཛམ་གླིང་མི་སྣས་༧གོང་ས་མཆོག་གི་དགུང་གྲངས་ ༧༥ འཁྲུངས་སྐར་པ་ཕུལ་བའི་ཤིས་ཚིག་༼བྱམས་བརྩེའི་རྒྱ་མཚོ།༽ཞེས་པ་བཅས་དབུ་འབྱེད་གནང་སོང་།

དེའི་རྗེས་སྲིད་སྐྱོང་མཆོག་གིས་འདི་ལོའི་རྒྱ་གར་རྒྱལ་ཡོངས་འཛིན་རིམ་ ༡༢ ཡིག་རྒྱུགས་ཁྲོད་བོད་པའི་གཏན་སློབ་ཁག་ནང་གི་སྒྱུ་རྩལ་དང་ཚན་རིག ཚོང་རིག་གསུམ་ལས་ཨང་རིམ་རྩེར་སོན་སློབ་མ་ ༡༠ ལ་ཤེས་རིག་ལས་ཁུངས་ཀྱིས་གནང་བཞིན་པའི་ ‘དགའ་ལྡན་ཕོ་བྲང་སློབ་ཕྲུག་གཟེངས་རྟགས’ ཞེས་པ་ཕུལ་ཡོད་པ་ལས། སྒྱུ་རྩལ་སྡེ་ཁག་ཡོངས་ཀྱི་ཨང་རིམ་དང་པོ་མ་སུ་རི་བོད་ཁྱིམ་གྱི་སློབ་མ་བསྟན་འཛིན་ཆོས་སྐྱིད་དང་། ཨང་གཉིས་པ་མ་སུ་རི་བོད་ཁྱིམ་ཀྱི་སློབ་མ་ཕུན་ཚོགས་དོན་འགྲུབ། ཨང་གསུམ་པ་མ་སུ་རི་བོད་ཁྱིམ་གྱི་སློབ་མ་མགོན་པོ་བཀྲ་ཤིས་བཅས་ཡིན་པ་དང་། ཚན་རིག་སྡེ་ཁག་ཡོངས་ཀྱི་ཨང་དང་པོ་སེ་ལ་ཀོལ་བོད་ཁྱིམ་གྱི་སློབ་མ་འཕྲིན་ལས་ཚེ་རིང་བླ་མ་དང་། ཨང་གཉིས་པ་སེ་ལ་ཀོལ་བོད་ཁྱིམ་གྱི་སློབ་མ་བསྟན་འཛིན་ཀུན་བཟང་། ཨང་གསུམ་པ་སེ་ལ་ཀོལ་བོད་ཁྱིམ་གྱི་སློབ་མ་ཚེ་རིང་སྒྲོལ་དཀར་བཅས། ཚོང་རིག་སྡེ་ཁག་ཡོངས་ཀྱི་ཨང་དང་པོ་མ་སུ་རི་བོད་ཁྱིམ་གྱི་སློབ་མ་བསྟན་འཛིན་འཕྲིོན་ལས་དང་། ཨང་གཉིས་པ་ཅན་གཉིས་ཡོད་པ་ནི་མོན་གྷོ་གཏན་སློབ་ཀྱི་སློབ་མ་བསྟན་འཛིན་དབང་ཕྱུག་དང་སྦེལ་ཀོབ་བོད་ཁྱིམ་གྱི་སློབ་མ་ཚེ་བརྟན་སྒྲོལ་མ། ཨང་གསུམ་པ་མ་སུ་རི་བོད་ཁྱིམ་གྱི་སློབ་མ་སྐལ་བཟང་བཅས་རེད། 

ཤེས་རིག་ལས་ཁུངས་ཀྱིས་འདི་ལོ་ནས་རིགས་གཅིག་རྐང་འཛིན་ནམ། འབུམ་རམས་(Ph.D)སློབ་ཐོན་པ་རྣམས་ལ། ‘སྲིད་སྐྱོང་གཟེངས་བསྟོད་ཕྱག་འཁྱེར’ ཞེས་པའི་གཟེངས་རྟགས་དང་བྱ་དགའ་ཧིན་སྒོར་ ༢༠༠༠༠ རེ་གནང་གཏན་འཁེལ་བ་ལྟར། འདི་ལོའི་སློབ་ཐོན་པ་ལྷག་པ་ཆོས་ལྡན་ལགས་ཀྱིས་མེ་སོར་མཐོ་སློབ་ཏུ་དཔལ་འབྱོར་ཐོག་རིགས་གཅིག་རྐང་འཛིན་གྱིས་འབུམ་རམས་པ་ཐོན་པ་དང་། བཟང་མོ་ལགས་ཀྱིས་ཝཱ་ཎ་མཐོ་སློབ་ནས་བན་བོན་གཞུང་གི་འཇིག་རྟེན་ཆགས་རབས་ཐོག་འབུམ་རམས་པ་ཐོན་པ་གཉིས་ལ། སྲིད་སྐྱོང་གཟེངས་བསྟོད་ཕྱག་འཁྱེར་གནང་སོང་ལ། ཁོང་གཉིས་ནི་སྲིད་སྐྱོང་གཟེངས་བསྟོད་བཞེས་མཁན་ཐོག་མ་ཆགས་ཡོད་འདུག 

དེའི་རྗེས་སྲིད་སྐྱོང་མཆོག་གིས་བཀའ་བཤག་གི་གསུང་བཤད་དང་། སྤྱི་འཐུས་ཚོགས་གཙོ་མཆོག་གིས་གྲོས་ཚོགས་ཀྱི་གསུང་བཤད་བཅས་སྒྲོགས་སྦྱང་གནང་སོང་ལ།  ལས་རིམ་དེ་དག་གྲུབ་རྗེས་བོད་ཀྱི་ཟློས་གར་ཚོགས་པ་དང་ངྷ་ཤོད་བོད་ཁྱིམ་སློབ་གྲྭ ཤེས་རབ་དགའ་ཚལ་སློབ་གླིང་བཅས་ཀྱིས་གཞིས་སྣ་འཁྲབ་སྟོན་གནང་སོང་།

གསར་འགོད་པ། བནྟེ་སྐྱབས།