དེ་རིང་ངྷ་ས་ཁུལ་གྱི་བོད་པ་དང་རྒྱ་གར་བའི་ཚོགས་པ་དང་མི་སྒེར་མང་པོ་ཞིག་གིས་ཚོགས་འདུ་ཚོགས་ཏེ་ངྷ་སའི་ཁོར་ཡུག་གཙང་མ་ཉར་སྟངས་དང་བོད་པ་དང་རྒྱ་གར་བའི་བར་མཐུན་སྒྲིལ་འཛུགས་ཕྱོགས་བཅས་ལ་གྲོས་བསྡུར་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༢༠ སྟེང་། ངྷ་ས་མེག་གྷན་སཱོ་རེ་ཡ་གསོལ་མགྲོན་ཁང་དུ། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་གོ་སྒྲིག་དང་། ངྷ་ས་ས་གནས་མགོ་འཛིན་ལས་ཁུངས་དང་ཧིན་བོད་མཛའ་འབྲེལ་མཐུན་ཚོགས་གཉིས་ཀྱི་མཐུན་འགྱུར་འོག ངྷ་ས་ཁུལ་གྱི་རྒྱ་གར་དང་བོད་པའི་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་དང་སྐུ་ཚབ་བསྡུ་སྐོང་གིས་ ‘ཞི་མཐུན་མཉམ་གནས་དང་འཕེལ་རྒྱས’ཞེས་པའི་བརྗོད་གཞིའི་ཐོག་གྲོས་བསྡུར་དང་བགྲོ་གླེང་ཞིག་ཚོགས་སོང་།
དེའི་སྟེང་ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་དང་ཧིན་བོད་མཛའ་འབྲེལ་མཐུན་ཚོགས་ཀྱི་ཚོགས་གཙོ། བོད་པའི་གཞུང་འབྲེལ་མིན་པའི་ཚོགས་པ་དང་། རྒྱ་གར་མགྲོན་ཁང་མཐུན་ཚོགས། བོད་ཧིན་གཉིས་ཀྱི་ཚོང་ལས་མཐུན་ཚོགས་བཅས་ཀྱི་ཚོགས་གཙོ་དང་སྐུ་ཚབ། གཞན། སྤྱི་ཚོགས་ཞབས་ཞུ་བ་དང་ལས་འགུལ་པ་བཅས་ཁྱོན་མི་ ༥༠ འདུ་འཛོམས་ཀྱིས་ངྷ་སའི་ཁོར་ཡུག་གཙང་བཟོ་བྱེད་ཕྱོགས་དང་། རྒྱ་གར་དང་བོད་པའི་མང་ཚོགས་བར་མཐུན་ལམ་གནང་ཕྱོགས་བཅས་ཀྱི་སྐོར་ལ་གྲོས་བསྡུར་གནང་སོང་།
ཐོག་མར་བོད་ཀྱི་རྩོད་རྙོག་འདུམ་སྒྲིག་ཁང་གི་འགན་འཛིན་ཀརྨ་ལེགས་བཤད་ལགས་ཀྱིས་འཚམས་འདྲི་དང་འབྲེལ། ང་ཚོ་མཉམ་འཛོམས་བྱས་ཏེ་ཞི་མཐུན་མཉམ་གནས་ཀྱི་འབྲེལ་ལམ་ཇེ་ཟབ་དང་ཡར་རྒྱས་གཏོང་རྒྱུ་ལས། དེ་སྔོན་རྙོག་དྲ་ཆེན་པོ་ཡོད་པ་དེ་འདྲ་གང་ཡང་མ་རེད། ངྷ་སའི་ནང་འཚོ་སྡོད་བྱེད་བཞིན་པའི་རྒྱ་གར་མི་རིགས་དང་བོད་རིགས་གཉིས་བར་མཛའ་བརྩེ་དང་ཞི་བདེའི་མཉམ་གནས་བྱེད་པའི་མིག་དཔེ་ཞིག་འཛམ་གླིང་ལ་སྟོན་དགོས་ཀྱི་ཡོད་པ་རེད། གང་ཡིན་ཟེར་ན། ༸གོང་ས་མཆོག་གི་བྱིན་རླབས་དང་ཁོང་གི་བྱམས་བརྩེ་ཡིས་རྒྱ་གར་གྱི་སྤུན་ཟླ་ཕོ་མོ་དང་བོད་རིགས་ཚོར་ལྟ་སྐྱོང་བྱེད་ཀྱི་ཡོད། དེ་ལས་ལྷག་པ་དཀའ་རྙོག་སྐོར་ལ་གྲོས་བསྡུར་བྱེད་དགོས་དོན་ནི། དཀའ་རྙོག་ནི་ང་ཚོའི་མི་ཚེའི་ཆ་ཤས་ཤིག་ཡིན།༸གོང་ས་མཆོག་གིས་ “ ཇི་སྲིད་འགྲོ་བ་མིའི་སྤྱི་ཚོགས་གནས་པ་དེ་སྲིད་དུ་དཀའ་རྙོག་ཡོད་ངེས་ཡིན།”ཞེས་གསུངས་པ་བཞིན། དཀའ་རྙོག་ནི་འགོག་ཐབས་མེད་པའི་ཡར་རྒྱས་ཀྱི་ཆ་ཤས་ཤིག་ཡིན་ཞེས་བརྗོད་སོང་།
དེ་རྗེས་ས་གནས་མགོ་འཛིན་བསོད་ནམས་རྡོ་རྗེ་ལགས་ཀྱིས། ཁོར་ཡུག་སྲུང་སྐྱོབ་གལ་ཆེན་ཡིན་པ་དང་ཕྱི་རྒྱལ་ཡུལ་སྐོར་སྤྲོ་འཆམ་པ་ཚོར་མཚོན་ན། ཁོར་ཡུག་སྲུང་སྐྱོབ་ལ་དོ་སྣང་བྱེད་པའི་གོམས་གཤིས་ཡོད་ཀྱང་། དེང་སང་ངྷ་སར་རྒྱ་གར་གྱི་ཡུལ་སྐོར་སྤྲོ་འཆམ་པ་མང་པོ་ཡོང་གི་ཡོད་སྟབས། ཁོར་ཡུག་ལ་དོ་སྣང་མེད་པར་གད་སྙིགས་གང་སར་གཡུག་གི་ཡོད་པའི་དཀའ་ངལ་ཡོད་པ་དང་། ཕྱི་ཟླ་ ༡༡ པའི་ནང་ངྷ་སའི་གཞུང་ལམ་བསྐྱར་བཟོ་མགོ་འཛུགས་བྱ་རྒྱུ་ཡིན་ཚུལ་སོགས་བརྗོད་སོང་།
ཁོར་ཡུག་སྐོར་ལ་གྲོས་བསྡུར་བྱས་མཐར། ཟླ་འདིའི་ཚེས་ ༢༧ ཉིན་ངྷ་ས་ཁུལ་གྱི་ཚོགས་པ་ཚང་མ་མཉམ་རུབ་ཐོག་ཁོར་ཡུག་གཙང་བཟོ་བྱ་རྒྱུ་ཡིན་པ་དང་། ཉིན་དེར་མ་འོངས་པར་འཆར་ཅན་ལྟར། ཟླ་བ་རེར་ཉིན་གཅིག་གམ། ཡང་ན་ཉིན་ཕྱེད་རེར་ཁོར་ཡུག་གཙང་བཟོ་བྱེད་རྒྱུ་ཡིན་པ་གཏན་འཁེལ་བྱ་རྒྱུ་ཡིན་འདུག གཞན། རྒྱ་གར་མི་རིགས་དང་བོད་མི་སྐྱབས་བཅོལ་བའི་སྤྱི་ཚོགས་གཉིས་བར་འབྲེལ་ལམ་གོང་སྤེལ་དང་ཞན་ཆ་དོར་ཐབས་སྐོར་ལ། རྒྱ་གར་སྐད་དང་བོད་སྐད་ཕན་ཚུན་སློབ་ཁྲིད་བྱ་རྒྱུ་དང་བོད་མི་ཚོས་ཁྲིམས་འགལ་ཐོག་རྒྱ་གར་ལས་ཁུངས་ཁག་གི་འབྲེལ་ཡོད་ལས་བྱེད་ཚོར་གང་བྱུང་ལྐོག་དངུལ་མི་སྤྲོད་རྒྱུ། མི་རིགས་གཉིས་ཀའི་མཛད་སྒོ་དང་དུས་ཆེན་ཁག་ནང་མཉམ་ཞུགས་གནང་རྒྱུ་སོགས་ལ་གྲོས་བསྡུར་གནང་སོང་།
གསར་འགོད་པ། ལྷ་སྐྱབས་རྒྱལ།
ཧ་ཅང་ལེགས་སོ།
ཁོར་ཡུག་ལྟ་རྟོག་པ་འཛུགས་ཐུབ་ན། རང་མི་དང་དང་ཕྱི་མི་ཚང་མར་དོ་དམ་ནན་པོ་གཏོང་ཆོག་གི་རེད། དཔེར་ན། གད་སྙིགས་གང་བྱུང་དོར་ན་སྒོར་མོའི་ཆད་པ་གཅོད་པ་དང། ཡང་ན་གཙང་མ་བཟོ་རུ་འཇུག་པ་ལྟ་བུ།
ཁོར་ཡུག་ལས་ཁུངས་ཀྱིས་རྡ་རམ་ས་ལའི་མི་མང་གི་ལག་ནས་ལོ་རེར་ཧིན་སྒོར་ ༢༤༠ རེ་ ལེན་གི་ཡོད་རེད།
རྡ་རམ་ས་ལ་གི་ཁོར་ཡུག་གཙང་སྦྲ་བྱེད་དགོས་ན།
ཁོར་ཡུག་ལས་ཁུངས་ཀྱིས་བྱེད་དགོས་ནི་རེད།
ཡང་ཁོར་ཡུག་ལས་ཁུངས་ཀྱིས་ཆོ་མེད་པའི་་ལས་ཀ་ཞིག་བྱེད་གི་ཡོད་པ་ནི།
ཁྱིམ་ཚང་གཅིག་ལ་མི་བཅུ་ཡོད་ཀྱང་ལོ་རེར་ཧིན་སྒོར་ ༢༤༠ ལེན་གི་ཡོད་རེད།
མི་གཅིག་ཡིན་ན་ཡང་ཧིན་སྒོར་ ༢༤༠ རེ་ལེན་གི་ཡོད་རེད།
ད་འདི་ག་རེ་རེད། ཆོ་མེད་པའི་ལས་ཁུངས།