རྨི་ལམ་ནང་གི་གསེར་འཚོལ་བ།

ཉིན་འདི་གར་རྒྱ་གར་གྱི་གསར་ལམ་ཁག་ནང་། ཧིན་རྡུའི་ཆོས་དཔོན་ཞཱའོ་བྷན་སར་ཀཱར་(Shobhan Sarkar )མཆོག་དང་ཁོང་གི་རེ་སྐུལ་ལྟར་རྒྱ་གར་གནའ་རྫས་རྟོག་ཞིབ་སྡེ་ཚན་གྱིས་ཨུ་ཊར་མངའ་སྡེ་( Uttar Pradesh) ནང་གི་ཨུ་ནཱའོ་(Unnao) ས་གནས་སུ་ཡོད་པའི་མཁར་རྙིང་ཞིག་གི་ཤུལ་སྔོག་འདོན་བྱས་ཏེ་གསེར་འཚོལ་གྱིན་ཡོད་པའི་གནས་ཚུལ་འཐོན་བཞིན་འདུག  

དེ་ནི། ཟླ་ཁ་ཤས་སྔོན་ཧིན་རྡུའི་ཆོས་དཔོན་ཞཱའོ་བྷན་སར་ཀཱར་མཆོག་གིས་རྒྱ་གར་གྱི་སྲིད་བློན་དང་ཨུ་ཊར་མངའ་སྡེའི་བློན་ཆེན་སོགས་ལ་སྙན་ཞུ་ཞིག་ཕུལ་ཏེ། ཁོ་རང་དུས་རབས་ ༡༩ པའི་ནང་གི་ཧིན་རྡུའི་རྒྱལ་བོ་གྲགས་ཆེན་རའོ་རམ་བྷའུ་སི་སིན་(Rao Ram Bux Singh) མཆོག་ལ་རྨི་ལམ་ནས་མཇལ་འཕྲད་བྱུང་སྟེ། སྔོན་ཆད་རྒྱལ་བོ་ཁོང་གིས་བཞེངས་སྐྲུན་མཛད་པའི་ཨུ་ནཱའོ་ས་གནས་ནང་མཁར་རྙིང་ཞིག་ཡོད་པ་དེའི་འོག་ཏུ་གསེར་ཊོན་ ༡༠༠༠ ཙམ་སྦས་སྐུང་བྱས་ཡོད་པ་དེ། ཆོས་དཔོན་ཁོང་ལ་བདག་ཉེར་བྱེད་དགོས་པའི་བཀའ་ལུང་ཕེབས་ཡོད་པ་དང་། ད་ལྟ་རྒྱ་གར་ལ་དཔལ་འབྱོར་གྱི་དཀའ་ངལ་འཕྲད་བཞིན་པའི་སྐབས་འདིར་རྒྱ་གར་དངུལ་ཁང་སོགས་འབྲེལ་ཡོད་སྡེ་ཚན་ཁག་གིས་གསེར་དེ་དག་སྔོག་འདོན་བྱས་ཏེ། མང་ཚོགས་ལ་རོགས་རམ་དང་རྒྱལ་ཁབ་ཀྱི་དཀའ་ངལ་སེལ་ཐབས་བྱེད་དགོས་པའི་རེ་སྐུལ་ཞུས་ཡོད་འདུག

རྗེས་སུ་སླར་ཡང་རིག་གཞུང་བློན་ཆེན་སོགས་ལ་རེ་སྐུལ་ཞུས་ཏེ། ཁོང་གི་སྐད་ཆ་དེ་དག་ལ་ཡིད་ཆེས་བྱེད་ཆོག་ཚུལ་དང་། གསེར་དེ་དག་ངེས་པར་དུ་སྔོག་འདོན་བྱེད་དགོས་སྐོར་ནན་གྱིས་བརྗོད་ཡོད་སྟབས། ཟླ་འདིའི་ཚེས་ ༡༨ ནས་ ༢༡ ཉིན་བར་རྒྱ་གར་གཏེར་འདོན་སྡེ་ཚན་དང་གནའ་རྫས་རྟོག་ཞིབ་སྡེ་ཚན་སོགས་ཀྱིས་ཚོད་ལྟ་བྱས་ཏེ། མཁར་རྫོང་དེའི་ས་རྨི་ཊར་ ༡།༥ ཙམ་བརྐོས་པའི་འོག་ཏུ། དུས་རབས་ ༡༧ ནས་༡༩ བར་གྱི་སྣོད་ཆས་རྫ་མ་དང་དཀར་ཡོལ། ལག་གདུབ། ས་རིས་རྩེད་ཆས་སོགས་དངོས་པོ་མང་པོ་ཞིག་རྙེད་སོན་བྱུང་ཡོད་འདུག

ད་ལྟ་ཅ་དངོས་དེ་དག་སྐོར་གྱི་སྙན་ཐོ་ཞིག་རྒྱ་གར་དབུས་གཞུང་ལ་ཕུལ་ཡོད་པ་དང་། རྒྱ་གར་གཞུང་གིས་གནའ་རྫས་དེ་དག་ལ་ཞིབ་འཇུག་བྱས་རྗེས་མུ་མཐུད་འཚོལ་ཞིབ་བྱེད་དགོས་མིན་ཐག་གཅོད་བྱ་རྒྱུ་ཡིན་ཞིང་། ད་ལྟ་ས་གནས་རྫོང་དཔོན་གྱི་བཀའ་ཁྱབ་འོག་མཁར་རྙིང་དེ་དང་མཐའ་འཁོར་གྱི་ཧིན་རྡུའི་ལྷ་ཁང་ཁག་ཉེན་རྟོག་པ་མང་པོས་སྲུང་སྐྱོབ་བྱས་ཡོད་ཀྱང་། མང་ཚོགས་ཚོས་ས་གནས་དེ་དང་ཐག་མི་རིང་བའི་སར་ཡོད་པའི་ཁང་རྙིང་དང་ལྷ་ཁང་རེ་ཟུང་སྔོག་ཡོད་འདུག

ཧིན་རྡུའི་ཆོས་དཔོན་ཞཱའོ་བྷན་སར་ཀཱར་མཆོག་གིས་གསར་འགོད་པར། ཁོ་རང་གི་རྨི་ལམ་དོན་དངོས་ཡིན་པ་ལས་རྒྱ་གར་གཞུང་དང་མང་ཚོགས་ལ་མགོ་སྐོར་བཏང་བ་གཏན་ནས་མིན་པ་དང་། གལ་སྲིད་ཁོ་རང་གིས་གང་བཤད་དེ་དག་བདེན་པ་མིན་ཚེས་ཁྲིམས་ལུགས་ལྟར་ཉེས་ཆད་ཅི་ཞིག་བཅད་ཀྱང་དང་ལེན་བྱ་རྒྱུ་ཡིན་སྐོར་བརྗོད་འདུག

ཧིན་རྡུའི་རྒྱལ་བོ་རའོ་རམ་བྷའུ་སི་སིན་མཆོག་ནི། དུས་རབས་ ༡༩ པའི་ཧིན་རྡུའི་རྒྱལ་པོ་ཞིག་ཡིན་ཞིང་། ༡༨༥༧ ཟླ་ ༦ ཚེས་ ༡༤ ཉིན་ཁོང་གིས་དབྱིན་ཇི་གཞུང་གི་ནོར་མཛོད་ནས་གསེར་དངུལ་འཕྲོག་བཅོམ་བྱས་ཡོད་པ་དང་། ༡༨༥༧ ལོར་གསར་བརྗེ་ཆེན་པོ་བྱུང་སྐབས་ཁོང་གིས་དབྱིན་ཇི་བཙན་རྒྱལ་རིང་ལུགས་གཞུང་ལ་ངོ་རྒོལ་བྱས་རྗེས། དབྱིན་གཞུང་གིས་འཛིན་བཟུང་དང་འཕྲོག་བཅོམ་བྱས་པའི་གསེར་དངུལ་གང་ཡོད་འདྲི་རྩད་བྱས་ཀྱང་མ་བཤད་སྟབས་སྲོག་ཁྲིམས་བཅད་ཡོད་འདུག

གསར་འགོད་པ། ལྷ་སྐྱབས་རྒྱལ།