ད་ཆར་ཨ་རིའི་ནང་རྒྱ་ནག་གི་སློབ་གྲྭ་བ་ཁྲི་ ༢༣།༥ ཡོད་པ་དང་། དེས་ཨ་རིར་རྒྱལ་ཁབ་གཞན་ནས་ཡོང་བའི་སློབ་མའི་གྲངས་འབོར་གྱི་བརྒྱ་ཆ་ ༢༡ ཟིན་གྱི་ཡོད་འདུག
ཉེ་ལམ་ཨ་རིའི་གཞུང་གིས་སྙན་ཐོ་ཞིག་བཏོན་ཏེ། འདས་པའི་ལོ་གཅིག་རིང་འཛམ་གླིང་ཡུལ་གྲུ་གང་ས་ནས་ཨ་རིར་སློབ་སྦྱོང་བྱེད་དུ་ཡོང་མཁན་གྱི་སློབ་གྲྭ་བའི་གྲངས་འབོར་འཛམ་གླིང་གི་ཟིན་ཐོ་ལས་བརྒལ་ཏེ་ཁྲི་ ༨༢ ཙམ་བྱུང་ཡོད་པ་དང་། དེའི་ཁྲོད་རྒྱ་ནག་སྐམ་ས་ནས་ཡོང་བའི་སློབ་མའི་གྲངས་འབོར་ཁྲི་ ༢༣།༥ ཆགས་ཏེ་ཨང་དང་པོ་ཆགས་ཡོད་ཚུལ་དང་། རྒྱལ་ཁབ་གཞན་དུ་སློབ་སྦྱོང་བྱེད་ཀྱིན་པའི་ཨ་རིའི་སློབ་གྲྭ་བའི་གྲངས་འབོར་ཡང་ཟིན་ཐོ་གསར་བ་ཞིག་ཏུ་བསླེབ་ཡོད་ཚུལ་བཀོད་འདུག
ཟླ་འདིའི་ཚེས་ ༡༡ ཉིན་ཨ་རིའི་རྒྱལ་སྤྱིའི་སློབ་གསོ་མཐུན་ཚོགས་ (IIE) དང་། ཨ་རིའི་རྒྱལ་ཚོགས་ཤེས་ཡོན་སྒྱུ་རྩལ་ལས་དོན་ལྷན་ཚོགས་གཉིས་ཀྱིས་མཉམ་འབྲེལ་ཐོག་སྤེལ་བའི་ཞིབ་འཇུག་སྙན་ཐོའི་ནང་། ༢༠༡༢ ནས་ ༢༠༡༣ ལོའི་སློབ་སྐབས་རིང་ཨ་རིའི་སློབ་ཆེན་ཁག་ཏུ་ཕྱིའི་རྒྱལ་ཁབ་ཁག་ནས་ཡོང་བའི་སློབ་མ་གྲངས་ ༨༡༩།༦༤༤ ཡོད་པ་དང་། དེ་སྔར་ལོའི་སློབ་སྐབས་ལས་བརྒྱ་ཆའི་ ༧ འཕར་ཡོད་ཚུལ་བཀོད་ཡོད་པ་མ་ཟད། སློབ་གྲྭ་བ་དེ་དག་རྒྱ་ནག་དང་རྒྱ་གར། ཀོ་རི་ཡ། སོ་ངྷི་ཨ་རབ་བཅས་ནས་ཡིན་པ་དང་། རྒྱ་ནག་སྐམ་ས་ནས་ཡོང་བའི་སློབ་མའི་གྲངས་འབོར་ཁྲི་ ༢༣།༥ ཆགས་ཏེ། བརྒྱ་ཆའི་ ༢༡ ཟིན་ཡོད་ཚུལ་དང་། ཕྱི་རྒྱལ་ནས་ཡོང་བའི་སློབ་སྦྱོང་བྱེད་མཁན་གྱི་སློབ་གྲྭ་བས་ལོ་རེར་ཨ་རིའི་དཔལ་འབྱོར་ཐོག་སྒོར་དུང་ཕྱུར་ ༢༤༠ ཡོང་འབབ་ཡོད་ཚུལ་བཀོད་འདུག
སྙན་ཐོ་དེའི་ནང་རྒྱ་ནག་གི་དཔལ་འབྱོར་འཕེལ་རྒྱས་སུ་ཕྱིན་པ་ལ་བརྟེན་ནས། འདས་པའི་ལོ་ ༩ རིང་རྒྱ་ནག་ནས་ཨ་རིར་སློབ་སྦྱོང་བྱེད་དུ་ཡོང་མཁན་གྱི་སློབ་གྲྭ་བའི་གྲངས་འབོར་འཕར་སྣོན་བྱུང་སྟེ། ཞིབ་འཇུག་སློབ་མའི་གྲངས་འབོར་རྒྱ་ནག་གི་ཕྱི་རྒྱལ་དུ་སློབ་སྦྱོང་བྱེད་བཞིན་པའི་སློབ་མའི་གྲངས་འབོར་གྱི་བརྒྱ་ཆ ༤༤ ཟིན་ཏེ་ཨང་དང་པོ་དང་། རྒྱ་གར་གྱི་སློབ་མ་ཁྲི་ ༩ ཡོད་པའི་ཨང་གཉིས་པ། ཀོ་རི་ཡ་ཁྲི་༧། དེ་བཞིན་ཁུ་ཝེ་ཐི་དང་སོ་ངྷི་ཨ་རབ། བྷར་ཛིལ་བཅས་རྒྱལ་ཁབ་ཁག་གིས་ཨ་རིར་སློབ་སྦྱོང་བྱེད་མཁན་གྱི་སློབ་གྲྭ་བའི་གྲངས་འབོར་ཡང་འཕར་གྱིན་ཡོད་པ་དང་། ཉི་ཧོང་གི་སློབ་མའི་གྲངས་འབོར་བརྒྱ་ཆ་ ༢ ཉུང་དུ་ཕྱིན་སྟེ། ད་ཆར་གྲངས་ ༡༩།༥༦༨ ཡོད་ཚུལ་བཀོད་འདུག
འདིའི་ཐད་རྒྱལ་སྤྱིའི་ཤེས་ཡོན་མཐུན་ཚོགས་ཀྱི་ལག་བསྟར་གཙོ་འཛིན་ཨོ་ལན་གྷོ་ཌེ་མན་ (Allan Goodman）ལགས་ཀྱིས་ཨེ་ཕེ་གསར་ཁང་ལ། རྒྱ་ནག་སྐམ་སའི་སློབ་མ་མང་པོ་ཨ་རིའི་ནང་སློབ་སྦྱོང་དུ་ཡོང་བའི་རྒྱུ་རྐྱེན་གཙོ་བོ། རྒྱ་ནག་གི་སློབ་གྲྭ་བ་དང་ཁྱིམ་བདག་ཚོས་སྤུས་ཚད་ལྡན་པའི་སློབ་གསོར་དོན་གཉེར་བྱེད་ཀྱི་ཡོད་པ་དང་། ཁོང་ཚོས་ཨ་རི་འཛམ་གླིང་རྒྱལ་ཁབ་ཁག་ལས་སློབ་སྦྱོང་བྱེད་ཡུལ་གྱི་བདམས་གསེས་དང་པོར་འཇོག་བཞིན་པའི་དབང་གིས་ཡིན་ཚུལ་བརྗོད་འདུག
འཇར་མན་དུ་ཡོད་པའི་རྒྱ་ནག་གི་གནད་དོན་དབྱེ་ཞིབ་པ་ལོ་རེན་གྱིས། ཉེ་བའི་ལོ་ཤས་རིང་རྒྱལ་ཁབ་གཞན་དུ་རྒྱ་ནག་གི་སློབ་གྲྭ་བའི་གྲངས་འབོར་འཕར་བཞིན་པའི་རྒྱུ་རྐྱེན་གཙོ་བོ། རྒྱ་ནག་སྐམ་སའི་ཤེས་ཡོན་སློབ་གསོའི་སྤུས་ཚད་ལ་མི་མང་གི་འདོད་བློ་ཚིམ་གྱི་མེད་པ་མ་ཟད། མང་པོ་ཞིག་གིས་དེ་ཕྱི་རྒྱལ་དུ་གནས་སྤོར་བྱེད་སའི་ལམ་ཁ་ཞིག་ཏུ་བེད་སྤྱོད་བྱེད་ཀྱི་ཡོད་སྐོར་དང་། རྒྱུ་རྐྱེན་མང་པོ་ཞིག་ཡོད་པའི་ཁྲོད་ནས། དང་པོ། མི་ཚང་མས་རྒྱ་ནག་གི་སློབ་གསོའི་སྤུས་ཚད་ལ་ཡིད་ཆེས་བརླག་ཡོད་པ་དང་། གཉིས་པ། ཕྱི་རྒྱལ་གྱི་སློབ་ཐོན་ལག་ཁྱེར་དེ་རྒྱ་ནག་གི་ལག་ཁྱེར་ལས་རྒྱུག་ཆེ་བ། གསུམ་པ། འབྱོར་ལྡན་ཅན་དང་དཔོན་ངན་ཟ་རྔམ་ཅན་དག་གིས་བྱིས་པ་ཕྱི་རྒྱལ་དུ་བཏང་སྟེ་རྒྱལ་ཁབ་དེའི་ནང་གནས་སྡོད་ཆོག་པའི་ཐོབ་ཐང་རག་ཐབས་དང་། རྗེས་སུ་རང་ཉིད་གནད་དོན་དེར་རྐྱེན་བྱས་ཏེ་གནས་སྤོར་བྱ་རྒྱུར་རེ་བ་བྱེད་ཀྱི་ཡོད་པ། གནད་དོན་དེ་དག་གི་དབང་གིས་ད་ལྟའི་ཆར་རྒྱ་ནག་གི་དཔོན་ངན་ཟ་རྔམ་ཅན་གྱི་ཕྲུ་གུ་ཚང་མ་ཕྱི་རྒྱལ་གྱི་སྙན་གྲགས་ཆེ་བའི་སློབ་ཆེན་ཁག་ཏུ་ཡོད་ཚུལ་བརྗོད་འདུག
ཨ་རིའི་ནང་ཡོད་པའི་རྒྱ་རིགས་ཤེས་ཡོན་པ་ལོའུ་ཆིན་གྱིས། རྒྱ་ནག་གི་མི་མང་པོ་ཞིག་ཕྱི་རྒྱལ་དུ་སློབ་སྦྱོང་བྱེད་དུ་འགྲོ་དགོས་པའི་རྒྱུ་རྐྱེན་དང་། རྒྱ་ནག་གི་འབྱོར་ལྡན་ཅན་མང་པོ་ཞིག་གནས་སྤོར་བྱེད་པ་གཉིས་གཅིག་མཚུངས་ཆགས་ཡོད་པ་དང་། དེ་ནི་རྒྱ་ནག་ནང་དབང་ཆ་དང་སྟོབས། དཔལ་འབྱོར་ཡོད་མཁན་ཚོས་ཕྱི་རྒྱལ་དུ་སློབ་སྦྱོང་འགྲོ་རྒྱུར་བསམ་བློ་གཏོང་གི་ཡོད་པ་མ་ཟད། གཞུང་འཛིན་མི་སྣ་མང་པོ་ཞིག་གིས་བུ་ཕྲུག་ཕྱི་རྒྱལ་དུ་བཏང་སྟེ་རྗེས་ཕྱོགས་ཀྱི་འགྲོ་ལམ་བཟོ་གྱི་ཡོད་ཚུལ་དང་། ད་དུང་འབྱོར་ལྡན་ཅན་མང་པོས་རྒྱ་ནག་ནང་བདེ་འཇགས་མིན་པ་དང་། གཞུང་ཕྱོགས་ནས་དབང་ཆ་བེད་སྤྱོད་ཀྱིས་རྒྱུ་ནོར་འཕྲོག་རྐྱང་བྱེད་ཀྱི་ཡོད་པ་སོགས་ལ་བརྟེན་ནས། རང་ཉིད་ཀྱི་བུ་ཕྲུག་ཕྱི་རྒྱལ་ཁག་ནང་སློབ་སྦྱོང་དུ་གཏོང་གི་ཡོད་ཚུལ་བརྗོད་འདུག
ཨ་རིའི་རྒྱལ་སྤྱིའི་ཤེས་ཡོན་མཐུན་ཚོགས་ཀྱི་སྙན་ཐོའི་ནང་། ཨ་རིར་ཕྱིའི་རྒྱལ་ཁབ་ཁག་གི་སློབ་གྲྭ་བའི་གྲངས་འབོར་འཕར་བཞིན་ཡོད་ནའང་། དེས་ཨ་རིའི་རྒྱལ་ཡོངས་ཀྱི་སློབ་མའི་བརྒྱ་ཆའི་ ༤ ཙམ་ལས་ཟིན་གྱི་མེད་པ་དང་། ༢༠༡༣ ལོའི་སློབ་ཡུན་རིང་ཨ་རིའི་སློབ་མ་ཁྲི་ ༢༨།༣ ཕྱིའི་རྒྱལ་ཁབ་ཁག་ནང་སློབ་སྦྱོང་དུ་ཕྱིན་སྟེ། འདས་པའི་ལོ་ ༢༠ རིང་ཕྱིའི་རྒྱལ་ཁབ་ཁག་ནང་ཕྱིན་པའི་གྲངས་འབོར་ལས་ལྡབ་ ༢ འཕར་སྣོན་བྱུང་ཡོད་པ་དང་། དེ་དག་གི་འགྲོ་ཡུལ་གཙོ་བོ། དབྱིན་ཇི་དང་ཨི་ཊ་ལི། སི་པན། ཧྥ་རན་སི། རྒྱ་ནག་བཅས་ཡིན་ཚུལ་བཀོད་འདུག
༢༠༡༠ ལོར་ཨ་རིའི་རྒྱལ་ཚོགས་ཀྱིས་མི་ཁྲི་བཅུའི་འཆར་གཞི་བསྒྲིགས་ཏེ། ལོ་ ༤ ནང་ཨ་རིའི་སློབ་གྲྭ་བ་ཁྲི་ ༡༠ རྒྱ་ནག་སྐམ་ས་ཆེན་མོར་སློབ་སྦྱོང་དུ་གཏོང་འཆར་བྱས་ཡོད་པ་དང་། ༢༠༡༡ དང་ ༢༠༡༢ ལོའི་སློབ་ཡུན་རིང་ངེས་གཏན་གྱི་བསླབ་གཞི་ཡོད་ཀྱང་། ཡིག་རྩལ་དང་སྐར་གྲངས་ལོན་མི་དགོས་པའི་རིགས་མ་ཚུད་པའི་ཨ་རིའི་མི་ཁྲི་ ༡།༥ ཡིས་རྒྱ་ནག་ནང་སློབ་སྦྱོང་བྱེད་ཀྱི་ཡོད་འདུག
ཉེ་ལམ་རྒྱ་ནག་གཞུང་གིས་བཏོན་པའི་སྙན་ཐོ་ཞིག་གི་ནང་། ཉེ་བའི་ལོ་ཤས་རིང་རྒྱ་ནག་དབུས་ཁུལ་དུ་ (SAT) ཡིག་རྒྱུགས་ཁྲོད་ཞུགས་མཁན་མང་དུ་ཕྱིན་སྟེ། ༢༠༠༧ ལོའི་ཟླ་ ༡༠ ནས་ ༢༠༠༨ ལོའི་ཟླ་ ༦ བར་སློབ་མ་ ༧༠༠༠ ཡིག་རྒྱུགས་ཁྲོད་ཞུགས་ཡོད་པ་དང་། ༢༠༠༨ ལོའི་ཟླ་ ༡༠ བ་ནས་ ༢༠༠༩ ལོའི་ཟླ་ ༦ བར་སློབ་མ་གྲངས་ཁྲི་ ༡།༥ དང་། ༢༠༡༡ ལོར་ཁྲི་ ༢ ཙམ། ༢༠༡༢ ལོར་ལོ་སྔོན་མ་ལས་བརྒྱ་ཆ་ ༣༠% འཕར་ཡོད་པ་མ་ཟད། མང་ཆེ་བ་རང་ལོ་ ༡༩ ནས་ ༢༣ བར་ཡིན་པ་དང་། ལོ་ ༡༨ མན་གྱི་སློབ་མའི་གྲངས་འབོར་ཡང་འཕར་བཞིན་ཡོད་ཚུལ་བཀོད་འདུག
ད་ལྟའི་བར་རྒྱ་ནག་གཞུང་ཕྱོགས་ནས་འགྲོ་གྲོན་གཏོང་བཞིན་པའི་སློབ་མ་མང་ཆེ་བ་ཨ་རི་དང་དབྱིན་ཇི། ཨོ་སི་ཊོ་ལི་ཡ། ཁེ་ན་ཌ་བཅས་རྒྱལ་ཁབ་བཞིའི་ནང་གཏོང་གི་ཡོད་པ་དང་། དེས་རྒྱ་ནག་གི་ཕྱི་ཕྱོགས་སུ་སློབ་སྦྱོང་བྱེད་བཞིན་པའི་སློབ་གྲྭ་བའི་སྤྱིའི་གྲངས་འབོར་གྱི་བརྒྱ་ཆ་ ༧༥ ཡན་ཟིན་གྱི་ཡོད་འདུག་ལ། རྒྱལ་ཁབ་དེ་དག་ལས་སློབ་མ་མང་ཤོས་ཨ་རི་ཆགས་ཡོད་འདུག
