འཕྲུལ་ཆས་ཀྱིས་བདེ་སྐྱིད་ལྡན་པའི་འཛམ་གླིང་བསྐྲུན་མི་ཐུབ།

༸གོང་ས་མཆོག་ཉི་ཧོང་དུ་ཆིབས་བསྒྱུར་སྐབས་གསར་འགོད་པས་དྲི་བའི་ལན་དུ་ཁོང་ཉིད་ས་ཆ་གང་དུ་ཕེབས་ཀྱང་། འགྲོ་བ་མིའི་བཟང་སྤྱོད་དང་ཆོས་ལུགས་འཆམ་མཐུན་གོང་མཐོིར་གཏོང་རྒྱུ་ལས་ཆབ་སྲིད་དང་འབྲེལ་བའི་ལས་དོན་གང་ཡང་སྤེལ་གྱི་མེད་ཅེས་གསུངས་འདུག   

ཟླ་འདིའི་ཚེས་ ༡༥ ཉིན་ནས་བཟུང་༧གོང་ས་མཆོག་ཉི་ཧོང་ནང་ཆིབས་བསྒྱུར་བསྐྱངས་ཡོད་པ་དང་། ཉིན་དེར་ཉི་ཧོང་ནཱ་རི་ཏ་རྒྱལ་སྤྱིའི་གནམ་ཐང་དུ་ཞབས་སོར་བཀོད་སྐབས། གསར་འགོད་པ་ཁག་ཅིག་གིས་ཐེངས་འདིར་ཉི་ཧོང་ནང་མཛད་འཕྲིན་གང་འདྲ་ཡོད་མེད་བཅར་འདྲི་ཞུས་པའི་ལན་དུ། ༧གོང་ས་མཆོག་གིས་ཁོང་ཉིད་ས་ཕྱོགས་གང་དུ་ཕེབས་ཀྱང་འགྲོ་བ་མི་དུང་ཕྱུར་བདུན་ཅུའི་ཆ་ཤས་ཤིག་ཡིན་པའི་ཆ་ནས་འགྲོ་བ་མིའི་བཟང་སྤྱོད་ཀྱི་རིན་ཐང་གོང་མཐོར་གཏོང་ཐབས་དང་། ཆོས་པ་ཞིག་ཡིན་པའི་ཆ་ནས་འཛམ་གླིང་གི་ཆོས་ལུགས་འཆམ་མཐུན་གོང་མཐོར་གཏོང་ཐབས་གཉིས་ཀྱི་ལས་འགན་ཐོག་ཤུགས་རྒྱག་གི་ཡོད་པ་དང་། ཐེངས་འདིའི་ཆིབས་བསྒྱུར་ཡང་གནད་དོན་དེ་གཉིས་ལས་ཆབ་སྲིད་དང་འབྲེལ་བ་མེད་པ། ཁོང་གཉིས་ལོ་ ༢ གོང་ནས་བོད་མིའི་ཆབ་སྲིད་ཀྱི་འགན་དབང་ནས་བགྲེས་ཡོལ་ཆ་ཚང་ཞུས་ཟིན་སྟབས། ཆབ་སྲིད་དང་འབྲེལ་བའི་ལས་དོན་གང་ཡང་སྤེལ་གྱི་མེད་ཅེས་གསུངས་ཡོད་འདུག

ཚེས་ ༡༦ ཉིན་ཆི་བྷ་འཕྲུལ་རིག་སློབ་གཉེར་ཁང་(Chiba Institute of Technology)དུ་ཆིབས་སྒྱུར་བསྐྱངས་ཏེ། ཉི་ཧོང་གི་གསར་འགོད་མཐུན་ཚོགས་ཀྱི་ཚོགས་གཙོ་ལྕམ་ཡོ་ཤི་ཀོ་ས་ཀུ་རའི་ (Ms. Yoshiko Sakurai)ལགས་ཀྱི་གཙོ་སྐྱོང་འོག དགེ་ལས་སློབ་ཕྲུག་དང་ཉམས་ཞིབ་པ་སོགས་མི་ ༦༠༠ ཙམ་ལ། ནང་ཆོས་ཉམས་ལེན་གནང་མཁན་གྱིས་ཚན་རིག་ཐོག་འཛིན་པའི་ལྟ་ཚུལ་ཞེས་པའི་བརྗོད་གཞིའི་ཐོག འདས་པའི་དུས་རབས་ཉི་ཤུ་པ་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད་སྟབས། འགྲོ་བ་མིའི་རིགས་ཀྱི་རྒྱུད་ཀྱི་རྣམ་དཔྱོད་དང་ནུས་པས་མ་འོངས་དུས་རབས་དེ་འཚེ་བ་མེད་པ་དང་ཞི་བདེའི་དུས་རབས་ཤིག་བསྐྲུན་ཐུབ་བྱ་རྒྱུར་གཞོན་སྐྱེས་ཚོར་འགན་ཡོད་པ་དང་། སྤྱིར་འཕྲུལ་ཆས་ཀྱིས་མི་ཚེ་ལས་སླ་པོ་བཟོས་ཡོད་ཀྱང་། དོན་དངོས་སུ་དེང་སྐབས་ཚང་མས་ལག་འཁྱེར་ཁ་པར་དང་བརྙན་འཕྲིན་སོགས་ཀྱི་ཐོག་དུས་ཚོད་ཤུགས་ཆེན་འཕྲོ་བརླག་གཏོང་གི་ཡོད་པ། འཕྲུལ་ཆས་ཀྱིས་ཕྱིའི་ལུས་པོར་བདེ་བ་བསྐྲུན་རྒྱུར་ཕན་ཐོགས་ཆེན་པོ་བྱུང་ཡོད་ནའང་ནང་སེམས་ལ་བདེ་སྐྱིད་སྤྲོད་མི་ཐུབ་མ་ཟད། འཕྲུལ་ཆས་ཀྱིས་བདེ་སྐྱིད་ལྡན་པའི་འཛམ་གླིང་ཡང་བསྐྲུན་མི་ཐུབ་ཅེས་སོགས་གསུངས་འདུག

དེའི་རྗེས་ཨ་རིའི་པི་པི་ཨེན་རོལ་དབྱངས་ཚོགས་པའི་གཞས་པ་སྐུ་ཞབས་ཕེ་ཁྲིེར་ཡཱ་རོའུ་ (Peter Yarou) ལགས་ཀྱིས། ༸གོང་ས་མཆོག་གི་གསུང་ལས་གཞས་ཚིག་བཟོས་པའི་སེམས་ཤུཊ་ནམ་ཡང་མ་ཆགས་ (Never Give Up) ཞེས་པའི་གླུ་གཞས་གཟིགས་འབུལ་ཞུས་ཤིང་། ཉིན་རྒྱབ་མིའི་ཚབ་ཏུ་ལས་རིགས་སྣ་ཚོགས་བྱེད་རྒྱུར་བཀོལ་སྤྱོད་ཆོག་པའི་འཕྲུལ་ཆས་ (Robot) ཁག་ཅིག་ལ་གཟིགས་ཞིབ་གནང་ཡོད་འདུག  

ཚེས་ ༡༧ ཉིན་ཉི་ཧོང་སྐུ་ཚབ་དོན་གཅོད་ཁང་གི་གོ་སྒྲིག་འོག རྒྱལ་ས་ཊོག་ཀྱོའོ་ཨོ་ཀོའུ་རཱ་མགྲོན་ཁང་ (Hotel Okura)དུ། ཉི་ཧོང་གི་བརྙན་འཕྲིན་ལས་རིམ་གཙོ་སྐྱོང་བ་དང་གསར་འགོད་པ་སྐུ་ཞབས་ཨི་ཀི་གྷ་མེ་ཨ་ཀེ་ར་ (Prof. Ikegami Akira) ལགས་ཀྱིས་གཙོ་སྐྱོང་འོག ༼ འཇིག་རྟེན་དང་ཚེ་སྲོག ཤེས་ཡོན་ (The Universe, Life and Education)༽ ཞེས་པའི་བརྗོད་གཞིའི་ཐོག་ཚན་རིག་པ་ཁག་ཅིག་དང་བགྲོ་གླེང་གནང་ཡོད་ཅིང་། དེར་ཀོ་ཡྰ་སན་དགོན་པའི་ (Koyasan Monastery)མཁན་རིན་པོ་ཆེ་དང་། ཉི་ཧོང་གི་ཚན་རིག་དང་འཕྲུལ་རིགས། ཆོས་ལུགས་སློབ་གཉེར་ཁང་། གནམ་རིག་ཞིབ་འཇུག་ཁང་སོགས་ཀྱི་ཚན་རིག་པ་དང་ངེས་སྟོན་པ་སོགས་འཛོམས་ཡོད་འདུག སྐབས་དེར་༸གོང་ས་མཆོག་གིས་འདས་པའི་ལོ་སུམ་ཅུ་ལྷག་རིང་ཚན་རིག་པ་དང་ལྷན་དུ་བགྲོ་གླེང་དབུ་འཛུཊ་ཀྱིས། བོད་ཀྱི་ནང་པ་སངས་རྒྱས་པའི་ཆོས་དང་དེང་གི་ཚན་རིག་པའི་བར་ཕན་ཚུན་རོགས་བྱེད་ཐུབ་པ་ཞིག་ཆགས་ཡོད་པ་དང་། ནང་པ་སངས་རྒྱས་པའི་ཆོས་ཀྱི་ལྟ་གྲུབ་སྐོར་ངོ་སྤྲོད་བཅས་གནང་ཡོད་འདུག

ཚེས་ ༡༨ ཉིན་༸གོང་ས་མཆོག་ཉི་ཧོང་གི་རྒྱལ་ས་ཊོག་ཀྱོའོ་མེ་གྷུ་རོ་ (Meguro) གྲོང་ཁྱེར་དུ་ཡོད་པའི་ཡཱ་ཀུ་མོ་བུ་མོའི་སློབ་གྲྭའི་ (Yakumo Girls Hig School) སློབ་སྤྱི་གཙོས་པའི་དགེ་ལས་སློབ་ཕྲུག་དང་ཕ་མ་རྣམས་ཀྱིས་ཕེབས་བསུའི་ཁྲོད་ཆིབས་སྒྱུར་གནང་སྟེ། འཚེ་བ་མེད་པའི་འཛམ་གླིང་ཞིག་བསྐྲུན་ཐབས་སུ་གཞོན་སྐྱེས་ཚོར་འགན་གང་འདྲ་ཡོད་མེད་ཀྱི་བརྗོད་གཞིའི་ཐོག ཉི་ཧོང་དང་འཇར་མན་གཉིས་ཀྱིས་འཛམ་གླིང་དམག་ཆེན་གཉིས་པའི་སྐབས་དཀའ་སྡུག་མྱངས་ཡོད་ཀྱང་། ད་ཆར་དེ་སྔ་དམག་ཆེན་སྐབས་གཏོར་བཤིག་བཏང་བའི་ཤུལ་ཙམ་མཐོང་རྒྱུ་མེད་པ་མ་ཟད། འཛམ་གླིང་ནང་ཆེས་ཡར་ཐོན་ཅན་གྱི་ཁོངས་སུ་ཚུད་ཐུབ་པ་དེ་དཀའ་ངལ་ཇི་འདྲ་ཞིག་འཕྲད་ཀྱང་མིའི་སྙིང་སྟོབས་ནམ་ཡང་མ་ཞུམ་པར་ཆོད་སེམས་བརྟན་པོས་གདོང་ལེན་བྱས་པ་ལ་བརྟེན་ནས་བྱུང་བ་ཞིག་ཡིན་སྟབས། དུས་རབས་ ༢༡ དེ་འཚེ་བ་མེད་པའི་དུས་རབས་ཤིག་ཏུ་འགྱུར་རྒྱུའི་བཟང་ཕྱོགས་ནས་རེ་བ་རྒྱག་མི་ཆོག་པ་གཏན་ནས་མིན་སྐོར་སོགས་གསུངས་ཡོད་འདུག

༸གོང་ས་མཆོག་ཕྱི་ལོ་ ༡༩༦༧ ལོར་ཉི་ཧོང་དུ་ཆིབས་བསྒྱུར་ཐོག་མ་བསྐྱངས་ཡོད་པ་དང་། ཐེངས་འདི་ནི་ཉི་ཧོང་དུ་ཆིབས་སྒྱུར་གནང་ཐེངས་ ༡༩ པ་ཆགས་ཡོད་ཅིང་། ཚན་རིག་པ་དང་བགྲོ་གླེང་གནང་བ་ཐེངས་ ༥ པ་དེ་ཆགས་ཡོད་འདུག ཟླ་འདིའི་ཚེས་ ༢༦ ཉིན་བར་མུ་མཐུད་ཚན་རིག་པ་དང་མཇལ་འཕྲད་ཀྱི་བགྲོ་གླེང་དང་ས་གནས་མང་ཚོགས་བཀའ་སློབ་སོགས་ཀྱི་མཛད་འཕྲིན་ཁག་བསྐྱངས་རྒྱུ་ཡིན་འདུག

གསར་འགོད་པ། དོན་གོ