མིག་མི་འཛུམ།
ད་རེའི་མདོ་སྨད་ཀྱི་སྤྱི་འཐུས་ཤིག་བར་མའི་འོས་བསྡུ་བྱ་དགོས་པ་ནི་གཡོལ་དུ་མེད་པ་ཆགས་ཡོད། སྔ་མའི་འོས་བསྡུའི་སྒུག་ཐོ་གཞིར་བཟུང་གིས་རྩེ་གཏོགས་མ་བརྒྱབ་པར་བར་མའི་འོས་བསྡུར་བརྒྱ་ཆ་ལོན་མིན་ལ་མ་ལྟོས་པར་རྩེ་གཏོགས་རྒྱག་རྒྱུ་ཡང་ཁྲིམས་དང་སྒྲིག་གཞི་ཞིག་ཡིན་དུ་ཆུགས། ཉེ་སྔོན་འོས་བསྡུའི་འགན་འཛིན་གྱིས་སྒྲོལ་དཀར་ལྷ་མོས་དགོངས་ཞུ་གནང་བའི་ཚབ་ཏུ་མགྱོགས་པོར་བར་མའི་འོས་བསྡུ་བྱ་རྒྱུ་ཡིན་སྐོར་བསྒྲགས་མ་ཐག མདོ་སྨད་ནང་ཁུལ་ལ་ཚ་ཚ་འུར་འུར་གྱི་ཤགས་འགྱེད་དྲག་པོ་ཞིག་བྱུང་ཡོད། དེ་ནི་ཐེངས་འདིར་མངོན་སུམ་འཛེམ་མེད་ཀྱིས་སྤྱི་འཐུས་ཀྱི་འོས་མིར་ལང་བའི་བཀྲ་ཤིས་དོན་གྲུབ་དང་ཤར་ཕྱོགས་ཁུག་རྟ། ཚངས་དབྱངས་རྒྱ་མཚོ། སྤྲོ་ཚིགས་ཆོས་གྲགས་སོགས་ཡིན་ཡང་། དངོས་སུ་ལང་མེད་པའི་ཨ་ཚོགས་ཀླུ་མཁར་བྱམས་ཀྱང་ཁོང་ཚོ་བཞིན་གླེང་གཞི་ཆེན་པོར་གྱུར་ཡོད།
སྤྱིར་བཏང་གིས་མི་སུམ་ཅུར་བསམ་པ་སུམ་ཅུ་ཟེར་བའི་དཔེ་ལྟར། རང་རང་གི་འདོད་པ་དང་རེ་བ། ཡིད་ཆེས་བཅས་ཡོད་པའི་འོས་མི་དག་འདོན་པ་ནི་ཡང་དག་པའི་དམངས་གཙོའི་འགྲོ་སྟངས་ཤིག་ལོས་ཡིན་ཡང་། ཁ་སང་དེ་རིང་གི་འོས་མི་འདི་དག་གི་རྒྱབ་སྐྱོར་བ་དང་རྒྱབ་སྐྱོར་གྱི་རྣམ་པ་མཚོན་པའི་གསལ་བསྒྲགས་ཡིག་ཆ་དག་ཀློག་སྐབས། ངའི་མཐོང་སྣང་ལ་རྒྱབ་སྐྱོར་ཞུ་མཁན་དང་འོས་མི་འདོན་མཁན་རང་ཉིད་རང་གིས་བཏོན་པའི་འོས་གཞི་དེར་ཡིད་ཆེས་བློ་འགེལ་དང་རྒྱུས་མངའ་གཏིང་ཟབ་ཡོད་མིན་ལ་དོགས་པ་བྱུང་། དེའི་རྒྱུ་མཚན་ནི། ཁ་བརྡ་དྲ་ཚིགས་སོགས་སུ་གཤིབ་བསྡུར་དང་དཔྱད་གཞིའི་རྣམ་པར་སྒྲོག་གིན་པའི་ཡིག་ཆ་དེ་ཚོ་ཡིན།
རང་གི་འོས་མིའི་ཁ་གཏད་དང་བསྡུར་ས་དེར་རྒྱུས་མངའ་མེད་པ་དང་། ཡང་ན་རང་གིས་རྒྱབ་སྐྱོར་ཞུ་སའི་འོས་མི་ནམ་མཁའི་དབྱིངས་སུ་སྐྱེལ་ནས་དོན་དངོས་གླེང་མཁན་མེད་པ་དེ་རེད། ཁ་གསལ་བོར་བཤད་ན། ཤར་ཕྱོགས་ཁུག་རྟ་དང་སྤྲོ་ཚིགས་ཆོས་གྲགས་གཉིས་གཤིབ་བསྡུར་བྱེད་སྟངས་དེ་ཡིན། ཕྱོགས་གཉིས་ཀས་སྨྱུ་གུའི་མདུང་མོ་གཏོད་རེས་ཙམ་ལས་རིག་པའི་གཤིབ་བསྡུར་གྱི་སྡིངས་ཆར་འཇོག་ཐུབ་མེད་པ་དེ་ཡིན། སྤྱིར་བཏང་གིས་དྲང་བདེན་དང་ལྷག་བསམ་རྣམ་དག་གི་སྔོ་ལོ་མཁའ་ལ་འཕྱར་ནའང་། འུ་ཚོའི་འོས་བསྡུའི་རྣམ་པ་དེ་ཡུལ་ལུང་དང་ཆོས་ལུགས་ཀྱི་འཐེན་འཁྱེར་བསླུ་བྲིད་འོག་ནས་ཐར་ཐབས་མེད་པ་ཚང་མར་གསལ། དེར་བརྟེན། ཐེངས་འདིའི་འོས་མི་རེ་རེའི་རྒྱབ་ལོགས་ན་ཁྭ་ཏས་རང་བསྟོད་ཀྱི་གསང་བ་བསམ་གྱིས་མི་ཁྱབ་པ་རེ་རེ་ལོས་ཡོད་འདོད།
འོས་བསྡུའི་འགྲོ་སྟངས་ལྟར་གྱི་བརྒྱ་ཆ་ལོངས་མིན་དོར་བའི་ད་རེའི་རྩེ་གཏོགས་ཅན་གྱི་བར་མའི་འོས་བསྡུ་འདི། སློབ་གྲྭའམ་རིག་ཚན་གང་རུང་གི་རྒྱུགས་གཞི་ཞིག་དང་ཤིན་ཏུ་འདྲ་སྟེ། སུས་སྐར་གྲངས་མཐོ་བོ་བླངས་ན་དེར་ཐོབ་པ་ཡིན་སྟབས་ཧ་ཅང་དགོད་བྲོ་བ་ཞིག་ཀྱང་རེད། བརྡ་འཕྲིན་དུས་རབས་འདིར་ཁྱབ་བསྒྲགས་བྱེད་རྒྱུ་ཤིན་ཏུ་སྟབས་བདེ་བ་ཇི་བཞིན། ཟིང་ཆ་སློང་རྒྱུར་ཡང་སྟབས་བདེ་བོར་གྱུར་ཡོད། དེར་བརྟེན་བགྲོ་གླེང་བ་དང་འོས་མི་འདོན་མཁན་གང་ན་སུ་ཡོད་ཚང་མས་རང་རང་གི་འོས་མིའི་ཁྱད་ཆོས་དང་ལོ་རྒྱུས་༼དྲང་ལྡོག་གཉིས་ཀྱི་སྒོ་ནས་འདོན་ཐུབ་ན་རབས་ཡིན།༽འདོན་པ་ལས། གཞན་པའི་འོས་མིར་ཆེད་དུ་དམིགས་ནས་ཁྱད་གསོད་དང་དམའ་འབེབས་རིགས་བྱ་རྒྱུར་འབད་པས་འཛེམ་དགོས་ཏེ། དཔེར་ན་ཁྱེད་ཀྱི་ཚོར་བ་དེ་ཕ་རོལ་བ་དེར་ཡང་ཡོད་པས་ཡིན།
མདོར་བསྡུས་ནས་བཤད་ན། ཁྱེད་རང་གཡུལ་ས་འདི་ནས་བརྒྱལ་འདོད་ན། ཁྱེད་ཀྱིས་རང་གིས་རང་ལ་བསླུ་བྲིད་གཏོང་མི་འདོད་ན། ཁྱེད་ཀྱིས་མི་རིགས་དང་རྒྱལ་ཁབ་ཀྱི་ཁེ་ཕན་ཁོ་ན་བསམ་ན། རང་གི་འོས་ཤོག་དང་རང་གི་འདོད་ཚུལ་དེའི་རང་དབང་ལོངས་སུ་སྤྱོད་རོགས། མ་གཞི་ཐེངས་འདིར་དངོས་སུ་ལངས་པའི་འོས་གཞི་འདི་དག་གཅིག་ལས་གཅིག་བཟང་བས། ད་རེབ་ཕམ་ནའང་སྐབས་རྗེས་མའི་འོས་བསྡུ་ཆེན་མོའི་སྐབས་སྔ་མའི་འཐུས་མི་གཉའ་རེངས་དེ་དག་ལས་བརྒྱལ་བར་ངེས་པས། མུ་མཐུད་དུ་ཤུགས་སྐྱོན་རོགས།
ངའི་འོས་མི་རྒྱལ་གཅེས་པ་ཀླུ་མཁར་བྱམས་ཡིན། གཞན་ཤར་ཕྱོགས་ཁུག་རྟ་ཟེར་བ་དེ་ལ་ངོ་མ་རྒྱབ་སྐྱོར་ཞིག་མེད།
ཨ་མདོར་བུ་གཅིག སྤྱི་འཐུས་འོས་གཅིག ཀླུ་མཁར་བྱམས་ལགས། ཡིན་ནམ་ཨ་མདོ། ཡང་ན་ཡབ་གཞིས། མག་པ་གཅིག་པུ། འཇམ་དབྱངས་ནོར་བུ། ཨ་མདོར་གཡར་ཆོག
འོས་གཅིག་དང་འོས་མི་གཅིག ཨ་ཚོགས་ཀླུ་མཁར་བྱམས་ལགས་ཡིན།
ང་ལ་མདོ་སྨད་ཀྱི་སྤྱི་འཐུས་འོས་མི་བཞི་ཡོད།
བོད་རྒྱ་གཉིས་ལ་མཁས་པ་ཀླུ་མཁར་བྱམས།
ཉམས་མྱོང་དྲག་ཚིགས་ལྡན་པ་བསྟན་འཛིན་མགོན་པོ།
ཤེས་ཡོན་ལྷག་བསམ་ལྡན་པ་གསེར་རྟ་ཚུལ་ཁྲིམས་འོད་ཟེར།
ལས་ལ་བརྩོན་ཞིང་རྣམ་དཔྱོད་ལྡན་པ་དབང་མོ་སོགས་ཡིན་ནོ།།
གོང་གསལ་མི་སྣ་འདི་གསུམ་ལས་གཅིག་ཀྱང་མདོ་སྨད་སྤྱི་འཐུས་ལ་འོས་འཚམས་མ་རེད། ཤེས་ཡོན་དང་ཉམས་མྱོང་། རྒྱལ་ཞེན་དང་མི་གཤིས་སོགས་གང་ཐད་ནས་ཡག་པོ་ཡོད་པའི་ཀླུ་མཁར་བྱམས་ཡག་ཤོས་རེད། གལ་སྲིད་ཨ་ཚོགས་ཀླུ་མཁར་བྱམས་མདོ་སྨད་སྤྱི་འཐུས་ནང་བསླེབས་པ་ཡིན་ན་དངོས་གནས་དྲང་གནས་མདོ་སྨད་སྤྱི་འཐུས་ཁྱོན་ཡོངས་ཀྱི་སྤུས་ཚད་ཡར་རྒྱས་ལ་ཕྱིན་པར་ངོས་འཛིན་བྱེད་མཆོག་གི་རེད། དེ་མ་གཏོགས་ད་ལྟའི་སྤྱི་འཐུས་ལྡབ་ལྡིབ་དེ་དག་དཔེ་མི་སྲིད་པའི་ཐབས་སྐྱོ་བོ་ཞེ་དྲག་ཡོད་པ་རེད། ཁ་གསལ་བོར་ཞུས་པ་ཡིན་ན་སྐབས་བཅོ་ལྔ་པའི་མདོ་སྨད་སྤྱི་འཐུས་ཀྱི་སྤུས་ཚད་དཔེ་མི་སྲིད་པའི་སྐྱོ་བོ་རེད།