སུད་སིའི་བོད་པའི་བུ་ཕྲུག་ཚོ།

ཉེ་ཆར་སུད་སིའི་ནང་གི་བོད་པའི་སློབ་གྲྭ་ཁག་གི་བོད་ཕྲུག་ཚོར་རྒྱལ་ཡོངས་རང་བཞིན་གྱི་བོད་སྐད་ཡིག་དང་རིག་གཞུང་གི་འགྲན་བསྡུར་ཞིག་ཚོགས་ཡོད་འདུག

ཟླ་འདིའི་ཚེས་ ༢༨ ཉིན། སུད་སིའི་ས་གནས་ཨོལ་ཊན་(Olten)དུ། སུད་སི་དང་ལེཀ་ཊེན་སི་ཊཡན་བོད་རིགས་མི་མང་གི་བོད་སློབ་ཁག་ལྔས་གོ་སྒྲིག་འོག སུད་སིའི་བོད་པའི་སློབ་གྲྭ་ཁག་གི་སློབ་ཕྲུག་ཚོར། ‘སུད་སི་རྒྱལ་ཡོངས་བོད་སློབ་ཁག་གི་བོད་སྐད་ཡིག་འགྲན་བསྡུར་སྐབས་དང་པོ’ ཞེས་པ་ཚོགས་ཡོད་ཅིང་། ཐེངས་འདིའི་འགྲན་བསྡུར་ནང་། གཏམ་བཤད་དང་། སྙན་ཚིག་སྐྱོར་བ། ཡི་གེ་དག་ཆ། གླུ་གཞས་འཁྲབ་སྟོན་སོགས་སྡེ་ཚན་ ༤ ཡོད་ཅིང་། སྡེ་ཚན་རེ་རེའི་ཨང་ཐོབ་རྩེ་ཕུད་གསུམ་རེར་ཆེ་བསྟོད་བྱ་དགའ་སྤྲད་ཡོད་འདུག

སྐད་ཡིག་འགྲན་བསྡུར་མཛད་སྒོའི་ཐོག་སུད་སི་དང་ལིག་ཏེན་སི་ཊཡན་བོད་རིགས་མི་མང་གི་ཚོགས་གཙོ་དང་། སུད་སི་སྐུ་ཚབ་དོན་གཅོད། ས་གནས་འཐུས་མི་རྣམས་པ། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ། དེ་བཞིན་ས་གནས་བོད་རིགས་ ༢༠༠ ལྷག་འདུ་འཛོམས་གནང་ཡོད་ཅིང་། འགྲན་བསྡུར་གྱི་གཟུ་དཔང་བ་དག་ནི་རི་ཁོན་མཁན་རིན་པོ་ཆེའི་སྐུ་ཚབ་སློབ་དཔོན་ལགས་དང་། ཡུ་རོབ་སྤྱི་ཟུར་གསང་གླིང་ཚེ་རིང་རྡོ་རྗེ་ལགས། ཝ་ན་མཐོ་སློབ་གྱི་སློབ་ཟུར་སྐལ་བཟང་ལགས་བཅས་གསུམ་ཡིན་འདུག

ཐེངས་འདིའི་སྐད་ཡིག་འགྲན་བསྡུར་ཀྱི་སྡེ་ཚན་དང་པོའི་གཏམ་བཤད་ནང་། ཨང་དང་པོ་ས་གནས་བྷ་སལ་བོད་སློབ་གྱི་སློབ་ཕྲུག་བསྟན་འཛིན་ཆོས་རྒྱལ་དང་། ཨང་གཉིས་པ་ས་གནས་ལུ་རྫན་ཀྱི་སློབ་ཕྲུག་ཁང་སར་བསྟན་འཛིན་འཆི་མེད། ཨང་གསུམ་པ་ས་གནས་ཛུ་རིག་གི་སློབ་ཕྲུག་ཆོས་རྒྱལ་རྙུང་མར་ཚང་བཅས་ཡིན་ཞིང་། སྡེ་ཚན་གཉིས་པའི་སྙན་ཚིག་འགྲན་བསྡུར་ནང་། ཨང་དང་པོ་གཉིས་ཡོད་པ་ནི་ས་གནས་ལུ་རྫན་གྱི་སློབ་ཕྲུག་བཀྲེ་བཀྲེ་བསྟན་འཛིན་བུ་ཁྲིད་དང་ས་གནས་རི་ཁོན་གྱི་སློབ་ཕྲུག་མཁར་རུ་ཤར་བསྟན་འཛིན་སྒྲོལ་མ། ཨང་གཉིས་པ་ས་གནས་ས་གནས་སོ་ལོ་ཐོན་སློབ་ཕྲུག་ངག་དབང་ཆོས་སྐྱིད། ཨང་གསུམ་པ་ས་གནས་སོ་ལོ་ཐོན་སློབ་ཕྲུག་འཆི་མེད་སྒྲོལ་དཀར་བཅས་ཡིན་པ་དང་། སྡེ་ཚན་གསུམ་པའི་དག་ཆ་འགྲན་བསྡུར་ནང་། ཨང་དང་པོ་གཉིས་ཡོད་པ་ནི་ས་གནས་ལུ་རྫན་གྱི་སྐལ་བཟང་ཚང་བསྟན་འཛིན་ལྷ་སྒྲོན་དང་ས་གནས་ཛུ་རིག་ནས་ཡིན་པའི་སློབ་ཕྲུག་ཉི་ཟླ་སངས་རྒྱས་པ་རི། ཨང་གཉིས་པ་ས་གནས་རི་ཁོན་སློབ་ཕྲུག་ལྷབས་ཕྱུག་བསྟན་འཛིན་ཚེ་སྐྱིད། ཨང་གསུམ་པ་ས་གནས་སོ་ལོ་ཐོན་གྱི་སློབ་ཕྲུག་ཚེ་གསང་ཁ་རོལ་བསོད་ནམསབཅས་ཡིན། སྡེ་ཚན་བཞི་བའི་འཁྲབ་སྟོན་ནང་། ས་གནས་སིངྒ་ལེན་བོད་སློབ་དང་། ཨང་གཉིས་པ་ས་གནས་ལུ་རྫན་བོད་སློབ། ཨང་གསུམ་པ་འ་གནས་སོ་ལོ་ཐོན་བོད་སློབ་བཅས་རེད།

ཐེངས་འདིར་སུད་སིའི་བོད་ཕྲུག་ཚོར་བོད་སྐད་ཡིག་ཡར་རྒྱས་གཏོང་ཐབས་ཐད་ལས་འགུལ་སྤེལ་དགོས་པའི་རྒྱུ་མཚན་ནི། འདི་ལོར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་སུད་སིའི་ནང་ཆིབས་བསྒྱུར་སྐབས། ཡུ་རོབ་བོད་སློབ་ཁག་གི་འགན་འཛིན་དང་དགེ་རྒན་དགྱེས་འཛོམས་ཐོག་གྲོས་ཆོད་དོན་ཚན་ ༥ བཞག་ཡོད་པའི་དགོངས་དོན་བཞིན། ལོ་ལྟར་ཡུ་རོབ་སུད་སིའི་ནང་འཚར་ལོང་འབྱུང་བཞིན་པའི་བོད་པའི་ཕྲུ་གུ་ཚོའི་བོད་སྐད་དང་བོད་ཡིག་ཡར་རྒྱས་གཏོང་ཆེད། བོད་སྐད་འགྲན་བསྡུར་ཐེངས་རེར་འཚོགས་རྒྱུ་དང་། སུད་སི་བོད་སློབ་ཁག་གི་འགན་འཛིན་དགྱེས་འཛོམས་ཐོག་ལོ་ལྟར་ས་གནས་བོད་སློབ་ཁག་ལྔ་རེ་མཉམ་འཛོམས་ཀྱིས་གོ་སྒྲིག་ཞུ་རྒྱུ་གཏན་ཁེལ་ཡོད་པ་བཞིན། ད་ལོའི་གོ་སྒྲིག་པ་ས་གནས་སོ་ལོ་ཐོརན་དང་། ལུ་རྫན། བྷ་སལ། ཨར་རྒོའོ། ལོའོ་སན་བཅས་ཀྱི་བོད་ཡིག་སློབ་གྲྭ་ཁག་གིས་གོ་སྒྲིག་ཞུས་པ་ཞིག་ཡིན་ཞིང་། མ་འོངས་པར་ལོ་ལྟར་བོད་སློབ་ཁག་ལྔ་རེའི་ཆ་བགོས་ཀྱིས་མུ་མཐུད་གོ་སྒྲིག་ཞུ་འཆར་ཡོད་འདུག

གནས་ཚུལ་གཏོང་མཁན། ཙ་ཡུས་ཕུན་ཚོགས།