རྒྱལ་དོན་དྲུང་ཆེས་བོད་དོན་གླེང་འདུག

ཁ་སང་ཨ་རིའི་རྒྱལ་དོན་དྲུང་ཆེ་ཇོན་ཀེ་རའེ་ལཊ་རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུག་འཕྲད་བྱས་ཏེ། བྱང་ཀོ་རི་ཡ་རྡུལ་ཕྲན་མཚོན་ཆའི་གྲོས་མོལ་ལ་མཉམ་ཞུགས་གནང་བར་གནོན་ཤུཊ་སྤྲོད་དགོས་པའི་འབོད་སྐུལ་གནང་འདུག

ཟླ་འདིའི་ཚེས་ ༡༣ ནས་ཉིན་དྲུག་རིང་ཨ་རིའི་རྒྱལ་དོན་དྲུང་ཆེ་ཇོན་ཀེ་རའེ་ལགས་ལྷོ་ཀོ་རི་ཡ་དང་རྒྱ་ནག ཨིན་ཌོ་ནི་ཤི་ཡ་བཅས་རྒྱལ་ཁབ་གསུམ་ནང་སྐོར་སྐྱོད་བྱེད་མགོ་ཚུགས་ཡོད་པ་དང་། ཚེས་ ༡༤ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་དང་། སྲིད་འཛིན་གཞོན་པ། སྲིད་བློན་ལི་ཁེ་ཆང་། ཕྱི་སྲིད་བློན་ཆེན་ཝང་ཡེ། རྒྱལ་སྲིད་སྤྱི་ཁྱབ་ཁང་གི་སློབ་སྟོན་པ་བཅས་མཐོ་རིམ་མི་སྣ་ཚོར་ཐུག་འཕྲད་བྱས་ཏེ། འཛམ་གླིང་གི་ཚ་དྲོད་འཕེལ་བཞིན་པ་འགོག་ཐབས་དང་སི་རི་ཡའི་ནང་འཁྲུག ཨི་རན་དང་བྱང་ཀོ་རི་ཡའི་རྡུལ་ཕྲན་མཚོན་ཆའི་ལས་གཞི་ཁག་དམ་དྲག་བྱེད་ཕྱོགས། རྒྱ་ནག་དང་ཉི་ཧོང་། ཧྥི་ལིན་ཕིན་བཅས་ཀྱི་ལྷོ་ཤར་རྒྱ་ནག་རྒྱ་མཚོའི་མངའ་ཁུལ་བདག་དབང་འགལ་ཟླ་ཞི་འཇགས། ཉེ་ཆར་རྒྱ་ནག་གིས་གསར་བཟོ་བྱས་པའི་མཁའ་དབྱིངས་དབྱེ་མཚམས་ས་ཐིག བོད་དང་ཤིན་ཅང་གཙོས་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་བཅས་ཀྱི་ཐོག་གོ་བསྡུར་གནང་འདུག

འདིའི་ཐད་གནད་དོན་དབྱེ་ཞིབ་པ་ཚོས། ཨ་རིའི་རྒྱལ་དོན་དྲུང་ཆེས་རྒྱ་གཞུང་ལ་བྱང་ཀོ་རི་ཡའི་རྡུལ་མཚོན་གནད་དོན་ཐད་གྲོས་མོལ་བྱེད་ཐུབ་མིན་དང་། རྒྱ་ནག་དང་ཁྱིམ་མཚེས་རྒྱལ་ཁབ་དབར་གྱི་ཞི་བདེ་རྒྱ་མཚོའི་མངའ་ཁུལ་བདག་དབང་རྩོད་ལེན་གྱི་འགལ་ཟླ་ཞི་འཇགས་གཏོང་རྒྱུ་དཀའ་ལས་ཁག་པོ་ཆགས་ཡོད་པ་དང་། ཉེ་ཆར་བྱང་ཀོ་རི་ཡས་རྒྱ་ནག་དང་འབྲེལ་བ་ཡོད་པའི་ཇོན་སུན་ཐག (Jang Song-thaek) དང་མི་སྣ་ཁག་ཅིག་ལ་སྲོག་ཁྲིམས་བཅད་ཡོད་སྟབས། རྒྱ་ནག་གིས་སྔར་བཞིན་བྱང་ཀོ་རི་ཡར་གནོན་ཤུགས་སྤྲོད་རྒྱུ་ཁག་པོ་ཆགས་ཡོད་པ་མ་ཟད། ཉེ་ལམ་ཞི་བདེ་རྒྱ་མཚོའི་མངའ་ཁུལ་མཚོ་གླིང་དང་མཁའ་དབྱིངས་དབྱེ་མཚམས་ས་ཐིག་བཟོས་པ་དག་ལ། ཨ་རི་མཐུན་གྲོགས་རྒྱལ་ཁབ་ཉི་ཧོང་དང་ཧྥི་ལིན་ཕིན་གྱི་རྒྱབ་རྩར་ལངས་ཏེ་རྒྱ་ནག་ལ་སྐྱོན་བརྗོད་བྱས་ཡོད་པ་བཅས་ཀྱིས་ཨ་རིའི་རྒྱལ་དོན་དྲུང་ཆེའི་འབོད་སྐུལ་ལ་རྒྱ་གཞུང་གིས་ཉན་འཇོག་བྱ་རྒྱུ་ཁག་པོ་ཡིན་སྐོར་བརྗོད་འདུག

ཨ་རིའི་རྒྱལ་དོན་དྲུང་ཆེ་ཇོན་ཀེ་རའེ་ལགས་ཀྱིས། ངས་རྒྱ་ནག་གི་སྲིད་འཛིན་ཞི་ཅིན་ཕིན་དང་མཐོ་རིམ་དཔོན་རིགས་ཚོར། སའི་གོ་ལའི་ཚ་དྲོད་དང་སི་རི་ཡའི་དམག་འཁྲུག བྱང་ཀོ་རི་ཡའི་རྡུལ་ཕྲན་མཚོན་ཆའི་གྲོས་མོལ། རྒྱ་ནག་དང་ཁྱིམ་མཚེས་རྒྱལ་ཁབ་བར་གྱི་ཞི་བདེའི་རྒྱ་མཚོའི་མངའ་ཁུལ་གྱི་བདག་དབང་རྩོད་ལེན། བོད་དང་ཤིན་ཅང་གཙོས་རྒྱ་ནག་གི་འགྲོ་བ་མིའི་ཐོབ་ཐང་དང་། ཉེ་ལམ་རྒྱ་ནག་གིས་གསར་བཟོ་བྱས་པའི་ཞི་བདེའི་རྒྱ་མཚོའི་མཁའ་དབྱིངས་དབྱེ་མཚམས་ས་ཐིག་སོགས་ཀྱི་སྐོར་ལ་གོ་བསྡུར་བྱས་ཏེ། མ་འོངས་པར་རྒྱ་གཞུང་གིས་མངོན་ལྐོག་མེད་པར་ཕྱི་གསལ་ནང་གསལ་བྱས་ནས་རྒྱལ་སྤྱིའི་ཁྲིམས་ལུགས་ལ་བརྩི་སྲུང་གིས་མཁའ་དབྱིངས་ས་ཐིག་གསར་བཟོ་དང་། རྒྱ་ནག་གིས་བྱང་ཀོ་རི་ཡ་རྡུལ་ཕྲན་མཚོན་ཆ་སྔོན་འགོག་གི་གྲོས་མོལ་ནང་ཞུགས་རྒྱུར་གནོན་ཤུགས་སྤྲོད་ཐབས་སོགས་ལ་གོ་བསྡུར་བྱས་ཡོད་སྐོར་བརྗོད་འདུག

རྒྱ་ནག་གི་ཕྱི་སྲིད་བློན་ཆེན་ཝང་ཡེས། “ ང་ཚོས་ལྷོ་ཤར་རྒྱ་ནག་རྒྱ་མཚོའི་གནད་དོན་ཐད་ལ་ལངས་ཕྱོགས་བརྟན་པོ་འཛིན་བཞིན་ཡོད་སྟབས། མི་སུས་ཀྱང་ང་ཚོའི་རྒྱལ་ཁབ་ཀྱི་བདག་དབང་དང་མངའ་ཁུལ་སྲུང་སྐྱོབ་བྱེད་བཞིན་པར་བཅོས་བསྒྱུར་དང་གཡོ་འགུལ་གཏོང་ཐབས་མེད། ” ཅེས་བརྗོད་འདུག

རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས། ཨ་རིས་རང་གི་མཐུན་གྲོགས་རྒྱལ་ཁབ་ཉི་ཧོང་ལ་གནོན་ཤུགས་སྤྲད་དེ། རྒྱ་ནག་གཙོས་ཨེ་ཤ་ཡའི་རྒྱལ་ཁབ་ཁག་ཏུ་འཁྲུག་རྩོད་སློང་གཞིའི་བྱ་སྤྱོད་སྤེལ་བཞིན་པ་དག་འཕྲལ་དུ་མཚམས་འཇོག་མ་བྱས་ཚེ། ཁྱིམ་མཚེས་རྒྱལ་ཁབ་བར་དམག་འཁྲུག་འབྱུང་ཉེན་ཡོད་པ་དང་། རྒྱ་ནག་དང་ཁྱིམ་མཚེས་རྒྱལ་ཁབ་བར་འཕྲད་བཞིན་པའི་འགལ་ཟླ་དེ་དག་ཞི་བའི་ངང་ཐག་གཅོད་ཡོང་རྒྱུར་གནོན་ཤུགས་སྤྲོད་ཀྱི་ཡོད་ཀྱང་། རྒྱ་ནག་གིས་རྒྱལ་ཁབ་ཀྱི་མངའ་དབང་སྲུང་སྐྱོབ་ཐུབ་ཕྱིར་བྱ་ཐབས་ཅི་ཞིག་སྤྱོད་དགོས་ཀྱང་བློ་དོགས་མེད་པར་སྲུང་སྐྱོབ་རྩོད་ལེན་བྱ་འཆར་ཡོད་སྐོར་དང་། ཨ་རིས་ཨེ་ཤ་ཡ་བརྟན་བརླིང་སྲུང་སྐྱོབ་བྱེད་དགོས་ན་རྒྱ་ནག་ལ་སྐྱོན་བརྗོད་བྱེད་རྒྱུའི་ཚབ་ཏུ་ཉི་ཧོང་གི་ཚབས་ཆེན་བྱ་སྤྱོད་དག་སྔོན་འགོག་གིས་ཞི་བདེ་ལྷིང་འཇགས་ཀྱི་ཨེ་ཤ་ཡ་ཞིག་བསྐྲུན་དགོས་སྐོར་བརྗོད་འདུག

མིང་བརྗོད་འདོད་མེད་པའི་ཨ་རིའི་སྲི་ཞུ་ལས་བྱེད་ཅིག་གིས། རྒྱ་ནག་གཞུང་གིས་ཉེ་ལམ་ཞི་བདེ་རྒྱ་མཚོའི་མངའ་ཁུལ་མཚོ་གླིང་ཐོག་མཁའ་དབྱིངས་དབྱེ་མཚམས་ས་ཐིག་བཟོས་པ་དེ། རྒྱལ་སྤྱིའི་ཁྲིམས་ལུགས་དང་མཉམ་འབྲེལ་རྒྱལ་ཚོགས་ཀྱི་མཚོ་ཐོག་གྲོས་མཐུན་གང་དང་མཐུན་མིན་ཁ་གསལ་འགྲེལ་བརྗོད་བྱ་དགོས་སྐོར་བརྗོད་འདུག

རྒྱ་ནག་མི་རིགས་སློབ་གྲྭ་ཆེན་མོའི་ཨ་རིའི་གནད་དོན་ཆེད་མཁས་པ་ཧྲི་ཡུན་ཧོང་ (Shi Yinhong) གིས། ཨ་རིའི་རྒྱལ་དོན་དྲུང་ཆེས་རྒྱ་ནག་གིས་ལྷོ་རྒྱ་ནག་རྒྱ་མཚོའི་ཐོག་མཁའ་དབྱིངས་དབྱེ་མཚམས་ས་ཐིག་ཕྱིར་བསྒྲགས་བྱས་པའི་ཐད་གླེང་སློང་བྱས་ཡོད་ཀྱང་། རྒྱ་ནག་གིས་དེར་ནམ་ཡང་ཁས་ལེན་བྱ་མི་སྲིད་ཚུལ་བརྗོད་འདུག

ཨ་རིའི་རྒྱལ་དོན་དྲུང་ཆེ་རྒྱ་ནག་ལ་མ་ཕེབས་གོང་ལྷོ་ཀོ་རི་ཡའི་སྲིད་འཛིན་ལྕམ་པག་གྷེན་ཧེ་ (Park Geun-hye) ལགས་དང་མཐོ་རིམ་མི་སྣར་མཇལ་འཕྲད་གནང་སྟེ། ལྷོ་བྱང་ཀོ་རི་ཡའི་ནང་མི་ཐུག་འཕྲད་གནང་ཕྱོགས་དང་། ཉི་ཧོང་དང་ལྷོ་ཀོ་རི་ཡ་གཙོས་པའི་ཁྱིམ་མཚེས་རྒྱལ་ཁབ་ཁག་གི་རྩོད་རྙོག་ཞི་འཇགས་ཡོང་ཐབས། བྱང་ཀོ་རི་ཡ་རྡུལ་མཚོན་གྲོས་མོལ་ནང་མཉམ་ཞུགས་བྱ་རྒྱུ་བཅས་ཀྱི་ཐོག་གོ་བསྡུར་གནང་ཡོད་འདུག