ཟླ་འགའི་གོང་ནས་ཨུ་རུ་སུའི་ཁྱིམ་མཚེས་རྒྱལ་ཁབ་ཡུའུ་ཁུ་རཱེན་ནང་མང་ཚོགས་ཀྱིས་གཞུང་ལ་ངོ་རྒོལ་ཤུགས་ཆེན་བྱས་ཏེ། ད་ལྟའི་ཨུ་རུ་སུའི་ཤུགས་རྐྱེན་འོག་གི་སྲིད་གཞུང་བརྗེ་བོ་རྒྱག་དགོས་པ་དང་། ཡུ་རོབ་མཐུན་ཚོགས་དང་མཉམ་འབྲེལ་གྱིས་དཔལ་འབྱོར་ཚོང་འབྲེལ་བྱེད་དགོས་པ་སོགས་ཀྱི་དགོས་འདུན་བཏོན་ཡོད་པ་དང་། ཟླ་འདིའི་ཚེས་ ༢༡ ཉིན་རྒྱལ་ས་ཁཱད་ཧྥིའི་ནང་མི་མང་སྟོང་ཕྲག་མང་པོས་གཞུང་ལ་ངོ་རྒོལ་བྱས་མཐར། སྲིད་གཞུང་གིས་ཉེན་རྟོག་པ་དང་དམག་མི་འབོར་ཆེན་བཏང་སྟེ་དྲག་གནོན་བྱས་ཏེ་མི་ ༨༨ དམར་གསོད་དང་། གཞན་མང་པོ་འཛིན་བཟུང་བྱས་ཡོད་འདུག
ཛ་དྲག་གི་གནས་ཚུལ་དེ་བྱུང་མ་ཐག་ཚེས་ ༢༢ ཉིན་ཡུའུ་ཁུ་རཱེན་གྲོས་ཚོགས་ཀྱིས་དམིགས་བསལ་ཚོགས་འདུ་བསྐོངས་ཏེ། ད་ལྟའི་གཞུང་འཛིན་ཚོགས་པ་རྩིས་མེད་དང་སྲིད་འཛིན་ཡཱ་ཎོ་ཁོ་བེ་ཆི་ (Viktor Yanukovych)སྲིད་འཛིན་ལས་ཕྱིར་འཕུད། དེ་སྔོན་གཞུང་དངུལ་ལྐོག་ཟ་དང་དབང་ཆ་སྒེར་སྤྱོད་བྱས་པའི་མིང་ཐོག་ནས་བཙོན་འཇུག་བྱས་ཡོད་པའི་ལྕམ་ཊི་མོ་ཤན་ཁོ་ (Yulia Tymoshenkko) ལགས་ཀློད་གྲོལ། བར་བརྒལ་སྲིད་གཞུང་གསར་འཛུགས་ཀྱིས་ད་ལྟའི་གྲོས་ཚོགས་ཚོགས་གཙོ་སྐུ་ཞབས་ཊོར་ཆི་ཎོ་བེ་ (Oleksandr Turchynov)ལགས་བར་བརྒལ་གཞུང་གི་སྲིད་བློན་དུ་བསྐོ་བཞག་བཅས་བྱས་ཡོད་པ་མ་ཟད། ད་ལོའི་ཕྱི་ཟླ་ ༤ ཚེས་ ༢༥ ཉིན་རྒྱལ་ཡོངས་འོས་བསྡུ་བྱས་ཏེ་སྲིད་འཛིན་གསར་པ་བསྐོ་བཞག་བྱ་རྒྱུའི་ཐག་གཅོད་སོགས་བྱས་ཡོད་འདུག
གསར་དུ་བསྐོ་བཞག་བྱས་པའི་བར་བརྒལ་གཞུང་གི་སྲིད་འཛིན་ཊོར་ཆི་ཎོ་བེ་མཆོག་གིས་ཚེས་ ༢༣ ཉིན་རྒྱལ་ཡོངས་བརྙན་འཕྲིན་དང་རླུང་འཕྲིན་ཁག་བརྒྱུད་དེ་མི་མང་ལ་གཏམ་བཤད་སྤེལ་བའི་ནང་། རྒྱལ་ཁབ་ཀྱི་ཞི་བདེ་བརྟན་བརླིང་གཙོར་བཟུང་ཐོག་མི་མང་གི་མངོན་འདོད་ལྟར། ཡུ་རོབ་མཐུན་ཚོགས་དང་མཉམ་དུ་དཔལ་འབྱོར་རོགས་སྐྱོར་གྲོས་མོལ་བྱེད་པར་མོས་མཐུན་དང་། ནུབ་ཕྱོགས་རྒྱལ་ཁབ་དང་རྒྱལ་སྤྱིའི་ཚོགས་སྡེ་ཁག་གིས་ཡུའུ་ཁུ་རཱེན་དཔལ་འབྱོར་ཉམས་རྒུད་བསྐྱར་གསོ་ལ་རོགས་རམ་གནང་དགོས་པའི་འབོད་སྐུལ་ཞུས་འདུག
ཡུའུ་ཁུ་རཱེན་ཆབ་སྲིད་གཡོ་ཁྱོམ་དང་བསྟུན་ཏེ་དཔལ་འབྱོར་ཉམས་རྒུད་ཤུགས་ཆེན་བྱུང་སྟེ། ད་ལྟའི་ཆར་གཞུང་ལ་ཨ་སྒོར་ཐེར་འབུམ་ ༣༥ ལྷག་གི་གྱོང་ཕོག་ཡོད་སྟབས། རྒྱལ་སྤྱིའི་དངུལ་ཁང་གིས་ཨ་སྒོར་ཐེར་འབུམ་ ༡༥ ལྷག་གི་རོགས་སྐྱོར་ཁས་ལེན་བྱས་ཡོད་པ་དང་། ཡུ་རོབ་མཐུན་ཚོགས་དང་ཨ་རི།དབྱིན་ཡུལ། ཧྥ་རན་སི། འཇར་མན་སོགས་ཀྱིས་ཀྱང་རོགས་སྐྱོར་བྱ་འཆར་ཡོད་འདུག
ཨུ་རུ་སུ་གཞུང་གིས་སྲིད་འཛིན་ཡཱ་ཎོ་ཁོ་བེ་ཆི་ལ་རྒྱབ་སྐྱོར་བྱེད་ཆེད་ཡུའུ་ཁུ་རཱེན་གྱི་ཤར་ལྷོ་ཕྱོགས་གྲོང་ཁྱེར་ཁག་ནང་དམག་དཔུང་གཏོང་རྒྱུར་གྲ་སྒྲིག་བྱས་ཡོད་ཀྱང་། ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་ཨུ་རུ་སུའི་བྱེད་སྟངས་དེར་སྐྱོན་བརྗོད་ཤུགས་ཆེན་བྱས་སྟབས། ཚེས་ ༢༤ ཉིན་ཨུ་རུ་སུའི་ཕྱི་སྲིད་བློན་ཆེན་ལཱ་བེ་རོབ་བེ་ (Sergei Lavrov)ཡིས་གསར་འགོད་གསལ་བསྒྲགས་སྤེལ་ཏེ། “ཨུ་རུ་སུས་རྒྱལ་ཁབ་གཞན་པའི་ནང་སྲིད་ལ་ཐེ་གཏོགས་མི་བྱེད་པའི་ལངས་ཕྱོགས་རྒྱུན་སྐྱོང་བྱེད་རྒྱུ་ཡིན་” ཞེས་བརྗོད་ཡོད།
ཚེས་ ༢༥ ཉིན་ཨ་རིའི་རྒྱལ་དོན་དྲུང་ཆེ་ཇོན་ཁད་རེ་དང་དབྱིན་ཡུལ་གྱི་ཕྱི་སྲིད་དྲུང་ཆེ་ཧེད་གྷོ་ (William Hague ) ལགས་གཉིས་ཀྱིས་ཨ་རིའི་རྒྱལ་ས་ཝ་ཤིན་ཊོན་དུ་ཡུའུ་ཁུ་རེ་ཡཱའི་གནད་དོན་ཐོག་གྲོས་མོལ་བྱས་རྗེས། ཇོན་ཁད་རེ་ཡིས། “ ཡུའུ་ཁུ་རེ་ཡཱའི་གནད་དོན་དེ་ནུབ་ཕྱོགས་དང་ཤར་ཕྱོགས་གཉིས་བར་ཁ་གཏད་གཅོག་དགོས་པ་ཞིག་མིན་ལ། ལྷག་པར་དུ་ཨ་རི་དང་ཨུ་རུ་སུ་གཉིས་བར་གྱི་གནད་དོན་ཞིག་ཀྱང་མིན། དེ་ནི་ཡུའུ་ཁུ་རཱེན་མི་མང་གི་མ་འོངས་བའི་འདམ་ག་ཞིག་ཡིན་སྟབས། ང་ཚོས་ཨུ་རུ་སུ་དང་རྒྱལ་ཁབ་གཞན་དག་དང་མཉམ་དུ་ལས་ཀ་བྱེད་རྒྱུ་ཡིན་” ཞེས་གསར་འགོད་པར་བརྗོད་འདུག
ཚེས་༢༦ཉིན། ཨུ་རུ་སུའི་སྲིད་འཛིན་པོ་ཊིན་གྱི་བཀའ་ཁྱབ་འོག ཨུ་རུ་སུའི་བདེ་སྲུང་བློན་ཆེན་ཤོད་གྷོ་ (Sergei Shoigu) ལགས་ཀྱིས། ཡུའུ་ཁུ་རཱེན་གྱི་སྲིད་དོན་དཀའ་རྙོག་གིས་ཨུ་རུ་སུའི་བདེ་འཇགས་ལ་ཉེན་ཁ་བཟོ་བཞིན་ཡོད་པའི་མིང་ཐོག་ནས། ཡུའུ་ཁུ་རེ་ཡཱའི་ལྷོ་ཕྱོགས་ཁུ་རེ་མྰེ་ (Crimea) གཙོས་ས་མཚམས་འགར་ཨུ་རུ་སུའི་དམག་དཔུང་གིས་དམག་སྦྱོང་བྱ་རྒྱུའི་གསལ་བསྒྲགས་སྤེལ་ཡོད་པ་དང་། དེ་མ་ཐག་ནུབ་ཕྱོགས་རྒྱལ་ཁབ་ཁག་གི་བདེ་སྲུང་བློན་ཆེན་ཚོས་ཀྱང་ཛ་དྲག་ཚོགས་འདུ་བསྡུས་ཡོད་པ་དང་། ནུབ་ཕྱོགས་མཉམ་འབྲེལ་དམག་དཔུང་(NATO)གི་སྤྱི་ཁྱབ་དྲུང་ཆེ་ཡིས་གསར་འགོད་པར།འཛམ་གླིང་རྒྱལ་ཁབ་ཚང་མས་ཡུའུ་ཁུ་རཱེན་གྱི་བདག་དབང་དང་རང་བཙན། རྒྱལ་ཁོངས་གཅིག་འགྱུར་ལ་གུས་བརྩི་བྱེད་པར་ཡིད་ཆེས་བྱེད་ཀྱི་ཡོད། གལ་སྲིད། རྒྱལ་ཁབ་སུས་གནད་དོན་དེར་རྡོག་རོལ་བཏང་ན་གདོང་ལེན་བྱ་རྒྱུ་ཡིན་ཞེས་ཉེན་བརྡ་བཏང་འདུག
བར་བརྒལ་གཞུང་གིས་ཚེས་ ༢༤ ཉིན། དེ་སྔའི་སྲིད་འཛིན་ཡཱ་ཎོ་ཁོ་བེ་ཆི་ཡིས་ཕྱོགས་འགལ་ཚོགས་པའི་ངོ་རྒོལ་བ་ ༨༠ ལྷག་དམར་གསོད་བཏང་ཡོད་པའི་ཉེས་མིང་འོག་འཛིན་བཟུང་བཀའ་རྒྱ་བཏང་ཡོད་ཀྱང་། ཁོ་བེ་ཆི་ཕྱིར་འཕུད་བཏང་རྗེས་ཁོ་གར་སོང་ཆ་མེད་ཆགས་ཡོད་འདུག བར་བརྒལ་གཞུང་གིས་ཁོ་རྒྱལ་ཁབ་གཞན་ནང་བྲོས་བྱོལ་དུ་ཕྱིན་མེད་པར་ཁུ་རེ་མྰེ་ (Crimea)ནང་སྦས་སྐུང་བྱས་ཡོད་ཚུལ་བརྗོད་ཀྱང་། ཨུ་རུ་སུའི་(RBK)གསར་ཤོག་གིས། ཟླ་འདིའི་ཚེས་ ༢༥ ཉིན་གྱི་དགུང་དྲོར་ཨུ་རུ་སུའི་རྒྱལ་ས་མོ་སུ་ཁོ་(Moscow)ཡི་དམིགས་བསལ་སྡོད་གནས་ཤིག་ཏུ་མི་ཞིག་གིས་མཐོང་ཡོད་སྐོར་བསྒྲགས་འདུག
