དམག་འཐབ་གནམ་གྲུ་གཏོར་འདུག

ཁ་སང་ཏུར་ཀིའི་བར་སྣང་མཁའ་དམག་གིས་སེ་རི་ཡའི་དམག་འཐབ་གནམ་གྲུ་ཞིག་ལ་མེ་ཤུགས་འཕུར་མདས་བརྒྱབ་ཏེ་གཏོར་ཡོད་འདུག

ཁ་སང་ཕྱི་ཚེས་ ༢༣ ཉིན་གྱི་ས་གནས་ཆུ་ཚོད་ ༡།༤༠ ཡས་མས་སུ་སེ་རི་ཡའི་དམག་འཐབ་གནམ་གྲུ་ (MIG- 23s) རྟགས་ཅན་ཞིག ཏུར་ཀིའི་ (Turkey) ཤར་ཕྱོགས་ས་མཚམས་ཀད་སྰ་པུ་ (Kasab) ཡི་བར་སྣང་དབྱེ་མཚམས་ནས་ཚུར་སྤྱི་ལེ་གཉིས་ཙམ་བརྒལ་ཏེ་འཕུར་སྐྱོད་བྱེད་སྐབས།  ཏུར་ཀིའི་བར་སྣང་སྲུང་སྐྱོབ་མཁའ་དམག་གིས་ཐེངས་བཞིར་ཉེན་བརྡ་བཏང་ཡང་ཕྱིར་ལོག་མ་བྱས་སྟབས། དམག་འཐབ་གནམ་གྲུ་རྟགས་ (F-16s) ཅན་གྱིས་མེ་ཤུགས་འཕུར་མདའ་གཡུག་ནས་གཏོར་སྐྱོན་བཏང་ཡོད་འདུག

གནད་དོན་དེར་སེ་རི་ཡ་གཞུང་གིས། གནམ་གྲུ་དེས་སེ་རི་ཡའི་ས་མཚམས་སུ་ཡོད་པའི་གྱེན་ལོག་བྱེད་མཁན་ཚོར་རྗེས་འདེད་བྱེད་བཞིན་ཡོད་པ་ལས། ཏུར་ཀིའི་བར་སྣང་དབྱེ་མཚམས་བརྒལ་བ་ཁས་ལེན་བྱས་མེད་པ་མ་ཟད། བྱེད་སྟངས་དེ་ནི་མ་རབས་ཐ་ཤལ་གྱི་འཇབ་རྒོལ་ཞིག་རེད་ཅེས་སྐྱོན་བརྗོད་བྱས་འདུག ཡིན་ནའང་། ཏུར་ཀིའི་སྲིད་བློན་ཨར་ཌོབ་གྷན་ (Tayyip Erdogan) གྱིས་ཐེངས་འདིའི་ཏུར་ཀིའི་གནམ་དམག་གི་བྱེད་སྟངས་ལ་བསྔགས་བརྗོད་གནང་བ་དང་འབྲེལ། ཁོང་གིས “ ང་ཚོའི་བར་སྣང་དབྱེ་མཚམས་ཀྱི་བདག་དབང་ལ་སེ་རི་ཡའི་དམག་འཐབ་གནམ་གྲུས་རྩིས་མེད་རྡོག་རོལ་བཏང་བར་རྒོལ་ལན་བསློགས་ཏེ་གཏོར་བཅོམ་བཏང་བ་ཞིག་ཡིན། ” ཞེས་ཏུར་ཀིའི་རྒྱལ་ཡོངས་གྲོས་ཚོགས་ཀྱི་འོས་བསྡུའི་ལས་འགུལ་སྐབས་མི་མང་ལ་བརྗོད་ཡོད་འདུག

དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་སེ་རི་ཡའི་འགྲོ་བ་མིའི་ཐོབ་ཐང་རྟོག་ཞིབ་ཁང་གིས། དམག་འཐབ་གནམ་གྲུ་དེས་བྱང་ཕྱོགས་ཞིང་ཆེན་ལྰ་ཊ་ཀེད་ (Latakia) ཀྱི་ས་ཁུལ་ཀད་སྰ་པུར་ནང་གི་གྱེན་ལོག་པ་ཚོར་འབོམ་གཡུག་ནས་འཇབ་རྒོལ་བྱས་རྗེས། གནམ་གྲུར་མེ་ཤོར་ཏེ་སེ་རི་ཡའི་ས་ཁོངས་སུ་བརྡབ་སྐྱོན་བྱུང་བ་རེད་ཅེས་བརྗོད་འདུག

ཚེས་ ༢༡ ཉིན་ནས་བཟུང་སེ་རི་ཡའི་བྷ་ཞྰ་སྲིད་གཞུང་ལ་ངོ་རྒོལ་བྱེད་མཁན་གྱེན་ལོག་དམག་མི་ཚོ་ཀད་སྰ་པུ་ (Kasab) གྲོང་ཁྱེར་ནང་ཡོང་སྟེ་བཙན་བཟུང་བྱེད་སྐབས། སེ་རི་ཡའི་དམག་དཔུང་དང་མེ་མདའ་རྒྱག་རེ་བྱས་ཏེ། ད་ལྟའི་བར་ཕྱོགས་གཉིས་ཀྱི་དམག་མི་ ༨༠ ལྷག་བསད་ཡོད་པ་དང་། དེའི་ཁྲོད་སྲིད་འཛིན་བྷ་ཤྰ་ཡི་སྤུན་མཆེད་ཧེ་ལྰ་ (Hilal al-Assad) ཡང་ཚུད་ཡོད་འདུག

སེ་རི་ཡའི་སྲིད་གཞུང་ལ་ཨི་རན་དང་ཨེ་རག་གི་ཤེ་ཨེ་ཊི་ (Shi’ite)། ལེ་བྷེ་ནོན་གྱི་ཧེ་ཛེ་བྷོ་ལྰ་ (Hezbollah) བཅས་ཀྱི་དམག་དཔུང་གིས་རྒྱབ་སྐྱོར་བྱས་ཏེ་གྱེན་ལོག་དམག་དཔུང་སེ་རི་ཡའི་རྒྱལ་ས་དང་གྲོང་ཁྱེར་ཧོམ་སིའི་ (Homs) དཀྱིལ་དུ་བཅུག་ཡོད་སྟབས། སེ་རི་ཡའི་བྱང་ཤར་གྱི་ས་ཁུལ་ཁག་ཏུ་གྱེན་ལོག་པ་ཉུང་ཤོས་མ་གཏོགས་ལྷག་ཡོད་མི་འདུག

གནད་དོན་དབྱེ་ཞིབ་པ་ཚོས། བྷ་ཤྰ་སྲིད་གཞུང་གིས་སེ་རི་ཡ་མང་ཚོགས་ཀྱི་གསར་བརྗེ་འོས་ལངས་ལ་དྲག་ཤུགས་བེད་སྤྱོད་བཏང་བའི་ཐད། ཏུར་ཀི་གཞུང་གིས་སྲུང་སྐྱོབ་དང་མཚོན་ཆ་སོགས་ཀྱི་རྒྱབ་སྐྱོར་བྱས་སྟབས། དེ་སྔོན་རྒྱལ་ཁབ་གཉིས་བར་ཕྱི་སྲིད་འབྲེལ་ལམ་དམ་ཟབ་ཡོད་པ་ཇེ་སྡུག་ཏུ་སོང་ཡོད་པའི་ཚོད་དཔག་བྱེད་བཞིན་ཡོད་འདུག

མཉམ་འབྲེལ་རྒྱལ་ཚོགས་ཀྱི་སེ་རི་ཡའི་སྐོར་ལ་སྙན་ཐོ་ཞིག་བཏོན་པའི་ནང་། སེ་རི་ཡའི་ནང་ཟིང་འཁྲུག་བྱུང་ནས་ད་བར་ཁྱོན་མི་འབུམ་གཅིག་ལྷག་བསད་ཡོད་པ་དང་། ས་ཡ་ ༦།༥ ལྷག་གནས་སྦོར། ས་ཡ་ ༢།༥ ཙམ་ཁྱིམ་མཚེས་རྒྱལ་ཁབ་ལེ་བྷེན་ནོན་དང་ཇོར་ཌན། ཏུར་ཀི་བཅས་ཀྱི་ནང་སྐྱབས་བཅོལ་དུ་ཕྱིན་ཡོད་སྐོར་བཀོད་འདུག

གསར་འགོད་པ། ལྷ་སྐྱབས་རྒྱལ།