སྨན་པའི་ལྷན་ཚོཊ་ལ་དེབ་སྐྱེལ་མེད་པའི་སྨན་པ་ཚོར་རྒྱབ་གཉེར་མ་གནང་རོགས།

སྨན་པའི་ལྷན་ཚོགས་ཀྱིས་ཚོགས་འདུ་བསྡུས་ཏེ་སྨན་པ་དཀའ་བཅུ་པ་ཚད་ལྡན་མ་ཐོན་བར་སྨན་པར་ངོས་ལེན་དེབ་སྐྱེལ་མི་བྱེད་པ་དང་། བོད་ཀྱི་གསོ་རིག་ལག་ལེན་བསྟར་མཁན་སུ་ཡིན་ཡང་སྨན་པའི་ལྷན་ཚོགས་ཀྱི་ངོས་ལེན་མེད་ན། ས་གནས་བདེ་དོན་དང་གཞིས་མགོ ཕྱི་རྒྱལ་སྐུ་ཚབ་དོན་གཅོད་སོགས་ཀྱིས་རྒྱབ་གཉེར་མཐུན་སྦྱོར་མི་གནང་རྒྱུར་སྙན་ཞུ་རྒྱག་རྒྱུའི་གྲོས་ཆོད་བཞག་ཡོད་འདུག

ཟླ་འདིའི་ཕྱི་ཚེས་ ༡༨ ཉིན་དྷ་ས་བོད་ཀྱི་གསོལ་མགྲོན་ཁང་དུ། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་འདུ་ཐེངས་ ༢༢ པ་ཚོགས་གནང་ཡོད་པ་དང་། ཚོགས་འདུའི་ཐོག་བོད་མི་མང་སྤྱི་འཐུས་གངས་ལྷ་མོ་ལགས་དང་བོད་ཀྱི་སྨན་རྩིས་ཁང་གི་སྤྱི་ཁྱབ་འགན་འཛིན་བཀྲ་ཤིས་ཚེ་རིང་ལགས། བླ་སྨན་པ་ཚེ་དབང་རྟ་མགྲིན་ལགས། དེ་བཞིན། སྨན་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་ངག་དབང་བཟོད་པ་ལགས་ཀྱི་གཙོས་སྨན་པའི་ལྷན་ཚོགས་ཀྱི་ཚོགས་མི་བཅས་མི་ ༡༢ ཙམ་ལྷན་འཛོམས་ཐོག གསོ་བ་རིག་པའི་སྨན་རམས་པའི་སློབ་གཉེར་རྩ་འཛིན་སྒྲིག་གཞི་དང་། སློབ་ཚན་བཀོད་སྒྲིག་ཅེས་པའི་བརྗོད་གཞིའི་འོག ཉིན་གཉིས་རིང་གྲོས་བསྡུར་གནང་ཡོད་པ་དང་། ཁ་སང་ཕྱི་དྲོར་སྨན་པའི་ལྷན་ཚོགས་ཀྱི་ལས་ཁུངས་ནང་། བོད་མིའི་སྒྲིག་འཛུགས་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་། བླ་སྨན་པ་ཚེ་དབང་རྟ་མགྲིན་རྣམ་གཉིས་ཀྱི་གཙོས་སྨན་པའི་ལྷན་ཚོགས་ཀྱི་ཚོགས་གཙོ ་དང་རྒྱུན་ལས་རྣམ་པ་བཅས་འཛོམས་ཏེ་ཚོགས་འདུ་མཇུག་བསྡོམས་གནང་སོང་།

སྐབས་དེར་སྨན་པའི་ལྷན་ཚོགས་ཀྱི་ཚོགས་གཙོ་ལགས་ཀྱིས་ཚོགས་འདུའི་དགོས་དམིགས་དང་གྲུབ་འབྲས་སྐོར་ལ་བརྗོད་དོན། དེ་སྔོན་སྨན་པའི་ལྷན་ཚོགས་ཀྱིས་སྨན་རམས་པའི་རྩ་འཛིན་སྒྲིག་གཞི་གཏན་འཁེལ་བ་ཞིག་བྱུང་མེད་སྟབས། སྨན་པའི་ལྷན་ཚོགས་དང་སློབ་གྲྭ་ཁག་གི་ངོས་ལེན་ཡོད་པའི་རྩ་འཛིན་སྒྲིག་གཞི་མ་བཟོས་བར་སྨན་རྩིས་ཁང་གི་ད་ཡོད་སྨན་རམས་པའི་རྩ་འཛིན་སྒྲིག་གཞིར་ངོས་ལེན་ཡོད་ཅེས་སྨན་པའི་ལྷན་ཚོགས་ནས་ཡིག་ཐོག་ཕྱག་བྲིས་གནང་ཡོད་ཀྱང་། འདི་ལོའི་ཕྱི་ཟླ་ ༤ པའི་ནང་དུས་ཡུན་རྫོགས་ཟིན་སྟབས། ང་ཚོས་མུ་མཐུད་ཕྱི་འགྱངས་བྱས་བསྡད་པ་ཡིན་ན། ད་རེབ་སྔར་ཡོད་ཀྱི་རྩ་འཛིན་སྒྲོམ་གཞིའི་ཐོག སྨན་པའི་ལྷན་ཚོགས་ཀྱི་ཚོགས་མི་དང་ལྷན་དུ་སློབ་གྲྭ་ཁག་གི་སློབ་སྤྱི་དང་། འབྲེལ་ཡོད་སྐུ་ཚབ་རེ་ཕེབས་ནས་བསྐྱར་ཞིབ་ཀྱིས་སྣོན་འཕྲི་གང་དགོས་གནང་བ་རེད། ཡིན་ནའང་སློབ་གྲྭ་གཉིས་ཤིག་ཐག་རིང་པོ་དང་ལས་དོན་གྱི་རྐྱེན་གྱིས་ཚོགས་འདུར་ཕེབས་ཐུབ་མེད་སྟབས། ང་ཚོས་གྲོས་གཞི་ཁག་ཆ་ཚང་ཞིག་བཏང་སྟེ་ཁོང་ཚོར་དེའི་ཐོག་དགོངས་ཚུལ་ག་རེ་ཡོད་མེད་བལྟ་དགོས་པ་རེད། གལ་སྲིད་ཁོ་ཚོ་མོས་མཐུན་བྱུང་བ་ཡིན་ན། ད་རེབ་ཀྱི་ཚོགས་འདུའི་ཐོག་སྨན་རམས་པའི་རྩ་འཛིན་སྒྲིག་གཞི་ཆ་ཚང་གཏན་འབེབས་ཟིན་ལ་ཉེ་བ་ཞིག་ཆགས་ཡོད། ཅེས་བརྗོད་སོང་།

ཡང་ཁོང་གིས་ཚོགས་འདུའི་ཐོག་གྲོས་ཆོད་གལ་ཆེན་གང་ཡོད་སྐོར་ལ། སྨན་པའི་ལྷན་ཚོགས་ཀྱི་ངོས་ནས་མ་འོངས་པར་སྨན་པ་དཀའ་བཅུ་པ་ཚད་ལྡན་ཞིག་མ་ཐོན་བར་དུ་སྨན་པ་ངོས་ལེན་གྱི་དེབ་སྐྱེལ་བྱ་རྒྱུ་མིན་པ་ཐག་གཅོད་བྱུང་ཡོད་པ་མ་ཟད། སྨན་པའི་ལྷན་ཚོགས་འོག་དེབ་སྐྱེལ་མ་བྱས་པའི་སྨན་སྦྱོར་རིགས་དང་སྨན་པ་ཚོར་སྟངས་འཛིན་བྱེད་ཕྱོགས་ཐོག་གྲོས་བསྡུར་མང་པོ་བྱུང་བ་ལྟར། བོད་ཀྱི་གསོ་རིག་ལག་ལེན་བསྟར་མཁན་སུ་ཞིག་ཡིན་ནའང་སྨན་པའི་ལྷན་ཚོགས་ཀྱི་ངོས་ལེན་མེད་ན། དབུས་བོད་མིའི་སྒྲིག་འཛུགས་ནས་ངོས་ལེན་མི་བྱེད་པའི་བཅའ་ཁྲིམས་གཞི་རྩར་བཟུང་སྟེ། འཕྲོད་བསྟེན་ལས་ཁུངས་ནས་རྒྱབ་གཉེར་ཞུས་པ་བརྒྱུད་མ་འོངས་པར་ས་གནས་བདེ་དོན་དང་གཞིས་མགོ དེ་བཞིན་ཕྱི་རྒྱལ་གྱི་སྐུ་ཚབ་དོན་གཅོད་ཁག་བཅས་ལ། སྨན་པའི་ལྷན་ཚོགས་འོག་དེབ་སྐྱེལ་མ་བྱས་པ་ཚོར་རྒྱབ་གཉེར་དང་མཐུན་སྦྱོར་མི་གནང་བའི་སྙན་ཞུ་འབུལ་རྒྱུར་གྲོས་ཆོད་བཞག་ཡོད་སྐོར་དང་། གྲོས་ཆོད་གལ་ཆེ་ཤོས་ནི་སྨན་པའི་ལྷན་ཚོགས་ཀྱི་ཁྲིམས་ཡིག་གཏན་འབེབས་བྱས་ཏེ་ལོ་མང་ཕྱིན་སྟབས། ལག་ལེན་ཁྲོད་དཀའ་ངལ་འཕྲད་པ་སོགས་འགྱུར་བ་གཏོང་དགོས་པ་མང་པོ་ཡོད་ཀྱང་། སྤྱི་འཐུས་ལྷན་ཚོགས་ནས་ཁྲིམས་ཡིག་ལ་འགྱུར་བ་མ་བཏང་བར་དུ་སྨན་པའི་ལྷན་ཚོགས་ཀྱིས་འགྱུར་བ་གཏོང་ཐུབ་ཀྱི་མེད་སྟབས། ཚོགས་འདུའི་ཐོག་ཁྲིམས་ཡིག་ལ་འགྱུར་བ་གཏོང་དགོས་པ་མང་པོ་ཞིག་གྲ་སྒྲིག་བྱས་ཡོད་པ་ལྟར། འདི་ལོའི་ཕྱི་ཟླ་ ༩ པའི་གྲོས་ཚོགས་ཚོགས་སྐབས་འབུལ་འཆར་ཡོད་ལ། ཕུལ་བ་ལྟར་ལམ་ལྷོང་ཡོང་བའི་རེ་བ་ཡོད་སྐོར་སོགས་བརྗོད་སོང་།

མཇུག་ཏུ་འཕྲོད་བསྟེན་དྲུང་ཆེ་ལགས་ཀྱིས་ལྷན་ཚོགས་ཀྱི་ཁྲིམས་དང་སྒྲིག་གཞི་གཏན་འབེབས་བྱས་པ་རྣམས་ལག་བསྟར་ཡོང་རྒྱུ་གལ་ཆེན་ཡིན་སྐོར་ལ། བོད་ཀྱི་སྨན་པའི་ལྷན་ཚོགས་འདི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན་ཡང་། གཞུང་འབྲེལ་མ་ཡིན་པའི་ཚོགས་པ་གཞན་དང་མི་འདྲ་བ་དངོས་ཡོད་གནས་ཚུལ་རེད། གཞུང་འབྲེལ་མ་ཡིན་པའི་ཚོགས་པ་གཞན་ཚོས་སོ་སོའི་ཁྲིམས་དང་སྒྲིག་གཞི་ཚོགས་པ་སོ་སོས་གཏན་འབེབས་བྱེད་ཀྱི་ཡོད་པ་རེད། ཡིན་ནའང་། སྨན་པའི་ལྷན་ཚོགས་ཀྱི་ཁྲིམས་གྲོས་ཚོགས་ནས་གཏན་ལ་ཕབ་ཀྱི་ཡོད་པ་དེ་འདྲའི་གཟི་བརྗིད་ཅིག་ཡོད་སྟབས། ཕྱག་ལས་གནང་མཁན་ཚོས་དེ་རང་རྩ་བར་བཟུང་ནས་ཕྱག་ལས་ཡག་པོ་ད་ལྟ་བར་དུ་གནང་ཡོད་ལ། མ་འོངས་པར་སྔར་ལས་ཚགས་ཚུད་པོ་ཡོང་བར་འབད་བརྩོན་གནང་དགོས་པ་རེད། གོང་ནས་ཚོགས་གཙོས་གསུངས་པ་ལྟར་གནས་ཚུལ་ཆ་ཚང་བ་ཞིག་ང་ཚོར་འབྱོར་ཡོང་གི་འདུག་ལ། དེ་ཚོར་བལྟས་ན་ཞེ་དྲག་ཡག་པོ་འདུག ཚང་མ་གོང་རིམ་ལའང་སྙན་གསེང་ཞུ་བཞིན་ཡོད། གནང་ཕྱོགས་དེ་ཚོར་བལྟས་ན་རིམ་གྱིས་གྲུབ་འབྲས་འཐོན་ཐུབ་པ་ཞིག་དང་། ཐ་ན་གྲུབ་འབྲས་མ་འཐོན་པ་ཡིན་ནའང་དེ་ལ་ཧང་སང་དགོས་པ་གང་ཡང་ཡོད་པ་མ་རེད་བསམ་གྱི་འདུག ང་རང་ཚོའི་ངོས་ནས་སྤུས་ཚད་ལྡན་པ་ཞིག་ཡོད་ན། མིས་རང་བཞིན་གྱིས་ཚུར་ཆེ་མཐོང་དང་བརྩི་དགོས་པའི་གནས་ལུགས་ཤིག་ཆགས་ཡོད་སྟབས། དེ་དགོངས་པའི་གཞི་རྩར་བཞག་ནས་ཕྱག་ལས་ལ་མུ་མཐུད་འབད་བརྩོན་གནང་དགོས་པ་དེ་ གནད་འགག་རེད། ཁྲིམས་དང་སྒྲིག་གཞི་ཧ་ཅང་གལ་ཆེན་པོ་རེད། ཡིན་ནའང་། ཁྲིམས་དང་སྒྲིག་གཞི་བཟོས་ཏེ་ལག་བསྟར་མ་གནང་ན། ཡིག་ཐོག་ཏུ་ལྷག་སྟེ་དགེ་མཚན་གང་ཡང་མེད་སྟབས། ཁྲིམས་དང་སྒྲིག་གཞི་བཟོས་པ་ཙམ་མ་ཡིན་པར་ལག་ལེན་བསྟར་ཐུབ་རྒྱུ་ཞེ་དྲག་གལ་ཆེན་པོ་རེད། ལག་ལེན་བསྟར་བའི་སྐབས་སུ་སྐུ་ངལ་རབ་དང་རིམ་པ་མང་པོ་ཞིག་ལ་འཕྲད་སྲིད་ཀྱང་། དེ་ཚོར་གདོང་ལེན་བྱེད་དགོས་པ་རེད། འདི་སྤྱི་པའི་ལས་དོན་ཞིག་རེད་མ་གཏོགས་སྒེར་སོ་སོར་འབྲེལ་བ་ཡོད་པ་མ་རེད། སྤྱི་པའི་ལས་དོན་ཐོག་ཛ་དྲག་གི་གནད་དོན་གང་འདྲ་ཞིག་ཆགས་པ་ཡིན་ནའང་གདོང་ལེན་གནང་ནས་ཕེབས་དགོས་པ་ཞེ་དྲག་གནད་འགག་རེད་བསམ་གྱི་འདུག ཅེས་གསུངས་སོང་།

གསར་འགོད་པ། པདྨ་མཚོ།