ཟླ་འདིའི་ཚེས་ ༢༥ ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འཇར་མན་ཁུལ་གྱི་བོད་མི་ཚོར་གསུང་བཤད་གནང་སྟེ། དབུ་མའི་ལམ་ལ་རྒྱལ་སྤྱིའི་ཐོག་རྒྱབ་སྐྱོར་ཤུགས་ཆེན་པོ་འཐོབ་བཞིན་ཡོད་པ་ལྟར། འཐབ་རྩོད་ཀྱི་ལྟེ་གནས་བོད་མིའི་སྒྲིག་འཛུགས་ལ་ཚང་མས་བརྩི་བཀུར་ཞུ་དགོས་པ་དང་། རང་བཙན་བརྩད་དེ་རྒྱལ་སྤྱིའི་ཁྲིམས་དང་རྒྱ་གར་ནག་བར་གྱི་ཆིངས་ཡིག་(Panchsheel)སོགས་ལ་འགལ་ན་བོད་མིའི་སྒྲིག་འཛུགས་ལ་གནོན་ཤུགས་དང་དཀའ་ངལ་འཕྲད་སྲིད་སྐོར་སོགས་གསུངས་འདུག
སྲིད་སྐྱོང་མཆོག་གིས་མི་མང་ལ་འཚམས་འདྲི་དང་འབྲེལ་ནས་གསུངས་དོན། སྤྱིར་བཏང་གཉིས་སྨན་དབུ་མའི་ལམ་གྱི་སྲིད་བྱུས་ལ་བརྟེན་ནས་དེང་སྐབས་ང་ཚོའི་འཐབ་རྩོད་ལ་རྒྱལ་སྤྱིའི་ནང་གཞི་རྒྱ་ཆེན་པོའི་རྒྱབ་སྐྱོར་འཐོབ་བཞིན་ཡོད། དེར་བརྟེན་བོད་མི་ཚོའི་ངོས་ནས་འཐབ་རྩོད་ཀྱི་བསྟི་གནས་སུ་གྱུར་བའི་བོད་མིའི་སྒྲིག་འཛུགས་ལ་ཆེ་མཐོང་དང་ངོས་འཛིན་གནང་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན། དེང་སྐབས་ང་ཚོའི་བདེན་པའི་འཐབ་རྩོད་ལ་རྒྱལ་སྤྱིའི་རྒྱལ་ཁབ་ཁག་གིས་རྒྱབ་སྐྱོར་དང་བོད་མིའི་སྤྱི་ཚོགས་དང་། བོད་མིའི་སྒྲིག་འཛུགས་ལ་ཆེ་མཐོང་དང་རྒྱབ་སྐྱོར་བྱེད་མུས་དེ་ནི་གཉིས་སྨན་དབུ་མའི་ལམ་གྱི་སྲིད་བྱུས་ལ་བརྟེན་ནས་བྱུང་བ་ཞིག་ཆགས་ཡོད།
སྲིད་བྱུས་འདི་རྒྱལ་སྤྱིའི་ཁྲིམས་དང་། ལྷག་པར་རྒྱ་དཀར་ནག་གཉིས་དབར་བཞག་པའི་(Panchsheel)ཆིངས་ཡིག་གི་འབྲུ་དོན་དང་འགལ་ཟླ་ཆགས་ཀྱི་མེད།(Panchsheel)ཆིངས་ཡིག་གི་ནང་དོན་ཚན་ལྔ་ཡོད་པའི་ནང་། རྒྱལ་ཁབ་ཕན་ཚུན་གྱི་བདག་དབང་དང་ཁ་བྲལ་གྱི་ལས་འགུལ་སྤེལ་རྒྱུ་མིན་པ་དང་། རྒྱལ་ཁབ་གཉིས་འཆམ་མཐུན་གྱི་སྒོ་ནས་གནས་རྒྱུ། རྒྱལ་ཁབ་གཉིས་ཕན་ཚུན་ཐེ་བྱུས་བྱེད་རྒྱུ་མིན་པ། ཕན་ཚུན་དམག་འཐབ་བྱེད་རྒྱུ་མིན་པ་ཞེས་སོགས་ཡོད། རྒྱ་ནག་གཞུང་གིས་ཆིངས་ཡིག་འདི་བོད་ལ་དམིགས་ཏེ་བཞག་པ་ཞིག་ཡིན། རྒྱ་གར་ལུང་པ་འདིར་བོད་མིའི་སྒྲིག་འཛུགས་ཀྱི་རང་བཙན་རྩོད་པ་དང་རྒྱ་ནག་གི་བདག་དབང་ལ་ཐེ་བྱུས་བྱས་ན། (Panchsheel)ཆིངས་ཡིག་དང་འགལ་ཟླ་ཕྱིན་ཚེ་བོད་མིའི་སྒྲིག་འཛུགས་ཐོག་གནོན་ཤུགས་རང་བཞིན་གྱིས་ཡོང་གི་རེད། དེ་བཞིན་མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་ཀྱི་དོན་ཚན་གཉིས་པའི་ནང་གསེས་བཞི་པའི་ནང་། རྒྱལ་ཁབ་ཀྱི་བདག་དབང་དང་ཁ་བྲལ་གྱི་ལས་འགུལ་སྤེལ་གྱི་མིན་ཞེས་ཧ་ཅང་གསལ་པོ་བཤད་ཡོད། དེར་བརྟེན་བོད་མིའི་སྒྲིག་འཛུགས་ངོས་ནས་ཁ་བྲལ་གཏོང་རྒྱུའི་སྲིད་བྱུས་བཟུང་ཚེ་རྒྱ་གར་གྱིས་རྒྱ་ནག་དང་མཉམ་(Panchsheel)ཆིངས་ཡིག་དང་མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་བཞག་པ་དེར་འགལ་ཟླ་འགྲོ་གི་ཡོད། དེ་ལྟར་བྱས་ཚེ་རྒྱ་ནག་གཞུང་གི་གནོན་ཤུགས་སྤྲད་དེ་བོད་མིའི་སྒྲིག་འཛུགས་ལ་ དཀའ་ངལ་འཕྲད་ཀྱི་རེད་དམ་མ་རེད། དེར་བརྟེན། བོད་མིའི་སྒྲིག་འཛུགས་གནས་རྒྱུ་ཧ་ཅང་གལ་ཆེན་པོ་རེད།
རྒྱལ་རབས་ལོ་རྒྱུས་ནང་རྩ་དོན་རྩོད་མཁན་སྐྱབས་བཅོལ་སྒྲིག་འཛུགས་ང་ཚོ་དང་པོ་མིན་ལ་མཐའ་མ་ཡང་མིན། འོན་ཀྱང་རྩ་དོན་རྩོད་རྒྱུའི་སྒྲིག་འཛུགས་ག་ཚོད་གནས་ཐུབ་ན་རྩ་དོན་རྩོད་རྒྱུར་རེ་བ་དང་གཞི་ཡོད། རྩ་དོན་རྩོད་རྒྱུའི་བསྟི་གནས་མེད་པའི་ཉིན་མོར་རང་བཞིན་གྱིས་འབོ་ལུག་པ་དང་ཐོར་བཤིག་འགྲོ་གི་རེད། མི་གཅིག་དང་ཚོགས་པས་ལས་ཀ་བྱེད་ཐུབ་ཀྱི་མ་རེད། མི་རབས་ནས་མི་རབས་དཀའ་ལས་བརྒྱབ་སྟེ། ང་ཚོའི་བླ་ན་མེད་པའི་དབུ་ཁྲིད་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་མིའི་སྒྲིག་འཛུགས་བཙུགས་པ་འདི་བསྟི་གནས་ཆགས་ཡོད། བོད་མིའི་སྒྲིག་འཛུགས་འདི་ཡོད་པར་བརྟེན་བོད་མིའི་རྩ་དོན་རྩོད་ནས་འགྲོ་བཞིན་ཡོད།
རྣམ་པ་ཚོ་དེ་རིང་འདིར་བློ་བཟང་སེང་གེར་ཤོད་རྒྱུ་གང་ཡོད་མེད་ལྟ་རུ་བསླེབས་མེད། བློ་བཟང་སེང་གེ་མི་དཀྱུས་མ་ཞིག་རེད། དེ་རིང་འདིར་འགན་འཁྱེར་ཡོད། སང་ཉིན་མི་དཀྱུས་མ་བྱས་ནས་འགྲོ་རྒྱུ་རེད་མ་གཏོགས་འདིར་གཏན་འཇགས་བྱས་ནས་སྡོད་རྒྱུ་མེད། འོན་ཀྱང་སྲིད་སྐྱོང་འདི་གཏན་འཇགས་གནས་དགོས་ཀྱི་ཡོད། དེ་གནས་པར་མི་མང་གིས་རྒྱབ་སྐྱོར་དགོས་ཀྱི་ཡོད། ཕྱི་ལོ་ ༢༠༢༠ རྗེས་ང་ཚོར་འགན་ཆེ་རུ་འགྲོ་གི་ཡོད་པ་བཞིན་ང་ཚོའི་ངོས་ནས་འབད་བརྩོན་དེ་ལས་ལྷག་པ་གནང་དགོས་རྒྱུ་ཧ་ཅང་གལ་ཆེན་པོ་རེད། ང་ཚོས་ལྷོད་གཡེང་བྱས་ནས་སྡོད་རྒྱུ་མེད། མི་ཐོག་རྒན་པ་ཚོས་ད་བར་སྐུ་ལས་བསྐྱོན་ཏེ་བོད་མིའི་སྒྲིག་འཛུགས་དང་། སྤྱི་མཐུན་ཚོགས་པ། བོད་དོན་རྒྱབ་སྐྱོར་ཚོགས་པ། དགོན་སྡེ་ཁག བོད་པའི་ཆོས་དང་རིག་གཞུང་མི་ཉམས་རྒྱུན་འཛིན་ཐོག་གནས་ཡོད་པ་དེ་མུ་མཐུད་ནས་གནས་དགོས་རྒྱུ་ཧ་ཅང་གལ་ཆེན་པོ་རེད། དེའི་འགན་ཆ་ཚང་ང་ཚོར་ཡོད་པ་དེ་ཐུགས་ལ་བཞག་དགོས། ཅེས་སོགས་ཀྱི་གསུང་བཤད་གནང་འདུག
རྒྱ་དཀར་ནག་ཆིངས་ཡིག་དང་འགལ་ཆོག་པ་དང་བོད་པ་འགལ་མི་ཆོག་པ་ཞིག་བཟོས་འདུག་གམ་་་་་བློ་སེང་འདིས་ད་ཅི་ཡང་ཡོང་གི་མི་འདུག་་་་སྐྱབས་མགོན་རིན་པོ་ཆེའི་སྐུ་སྲུང་ལ་བཞག་ན་ཏག་ཏག་རེད་་་་ནམ་རྒྱུན་སྐུ་རྗེས་དེད་ནས་འགྲོ་གི་འདུག་་་་་
དངོས་གནས་རྩ་དོན་ཟེར་བ་ཞིག་མི་འདུག ད་དུང་རྒྱ་དཀར་ནག་དང་རྒྱལ་སྤྱིའི་ཆིངས་ཡིག་དང་ཁྲིམས་དོན་འདྲ་ཞིག་བཤད་ཁུལ་གྱིས་རང་མིའི་མགོ་རང་གིས་གནོན་ཐབས་བྱེད་ཀྱིན་པ་འདི་རེད།
དང་པོ། རྒྱ་དཀར་ནག་གི་ཆིངས་ཡིག་Panchsheel གི་འབྲི་དོན་ལྟར་ལག་བསྟར་མ་བྱས་པ་དང་། རྡོག་རོལ་གཏོང་མཁན་རྒྱ་དཀར་ནག་གཉིས་ཡིན་པ་ལས་བོད་པ་ཚོ་མ་རེད།
གཉིས། མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་ཀྱི་དོན་ཚན་གཉིས་པའི་ནང་གསེས་བཞི་པའི་ནང་། རྒྱལ་ཁབ་ཀྱི་བདག་དབང་དང་ཁ་བྲལ་གྱི་ལས་འགུལ་སྤེལ་གྱི་མིན་ཞེས་ཧ་ཅང་གསལ་པོ་བཤད་ཡོད་ཟེར། གཅིག་ནས་བོད་འདི་རྒྱ་ཁོངས་དང་རྒྱ་རིགས་མིན་པས་རྒྱལ་ཁབ་ཀྱི་བདག་དབང་དང་ཁ་བྲལ་ཟེར་བ་ཞིག་མེད། བློ་སེང་གི་ཚིག་དེ་རྒྱ་ནག་གཞུང་གི་དྲིལ་བསྒྲགས་བཙན་ཚིག་ཅིག་རེད། གཉིས་ནས་ ༡༩༩༡ ལོར་ཨུ་རུ་སུ་ཆེན་མོ་རྒྱལ་ཁབ་བཅུ་ལྷག་ཏུ་ཁ་བྲལ་ཕྱིན་པ་མ་མང་པོ་ཞིག་རྒྱལ་ཚོགས་སུ་ཞུགས་ཡོད། དེ་བཞིན་དབྱིན་ཇིའི་དབང་སྒྱུར་འོག་ཏུ་ཡོད་པའི་ལུང་མབ་པོ་ཞིག་རང་བཙན་ཐོབ་པར་རྒྱལ་ཚོགས་ཀྱི་རྒྱབ་སྐྱར་དང་ཚོགས་ཞུགས་བྱས་ཡོད། གསུམ་ནས་ཉེ་དུས་ཀྱི་དཀྱིལ་ཤར་ཡུལ་གྱི་ཟིང་འཁྲུག་ལ་བལྟས་དང་། རྒྱལ་ཚོགས་ཀྱིས་ནུས་ཐོན་མིན་ལ་མ་གཞིགས་པར་གཙོ་བོ་མི་མང་གི་མངོན་འདོད་ལ་རྒྱབ་སྐྱོར་བྱེད་ཀྱི་ཡོད་པ་ལས་བདག་དབང་དང་ཁ་བྲལ་མ་རེད།
གསུམ། བདེན་པའི་འཐབ་རྩོད་ཅེས་བརྗོད་འདུག དེ་སྔ་བདེན་པའི་འཐབ་རྩོད་ནི་བོད་རང་ཉིད་ལ་ཡོད་པའི་ས་ཁོངས་དང་གཞུང་འབངས། རྒྱལ་ཁབ་སོགས་ཡོད་པའི་དངོས་བདེན་འཐོབ་པར་འཐབ་རྩོད་བྱེད་ཀྱི་ཡོད་པ་ཞིག་གོ བློ་སེང་གི་བདེན་པའི་འཐབ་རྩོད་ནི་དབུ་མ་བའི་སྲིད་ཇུས་ཏེ་བོད་རྒྱ་འོག་ཏུ་འཇུག་པའི་འཐབ་རྩོད་དང་། རང་མགོ་རང་གིས་གནོན་པའི་དངོས་བདེན་གྱི་འཐབ་རྩོད་ཅིག་ལ་གོ་དགོས་པ་འདྲ།
བཞི། བཙན་བྱོལ་སྒྲིག་འཛུགས་འདི་བོད་པའི་འཐབ་རྩོད་ཆེད་དུ་བཙུགས་པ་ཞིག་ལས། སྒྲིག་འཛུགས་འདི་བོད་པའི་འཐབ་རྩོད་ཀྱི་གནོད་གཞིར་འགྱུར་གྱི་ཡོད་ན། དེར་གནོན་ཤུགས་ཙམ་མ་ཟད་སྒོ་རྒྱག་དགོས་ཀྱང་རྒྱག་དགོས་རེད།
རྒྱ་དཀར་ནག་གི་ཆིངས་ཡིག་ནི་ཕྱི་ལོ ༡༩༥༤ལོའི་རེད་ལ། དེ་ལ་འགལ་གྱི་ཡོད་ན། དུས་རབས་ཕྱེད་ཀའི་རིང་འགལ་ཡོང་པ་མ་རེད་པས། ཆིངས་ཡིག་ག་དུས་བཞག་མིན་མི་གླེང་པར་ནང་དོན་གླེང་ཡོང་དོན་ཅི།
སྲིད་སྐྱོང་བློ་བཟང་སེང་གེ་མཆོག་སྔོན་མ་དབུ་མའི་ལམ་རྫུན་མ་ཞིག་ཡིན་ཡང་ད་ལྟ་གངས་ཅན་སྐྱིད་གཞུང་གི་གནོན་ཤུགས་འོག་དབུ་མའི་ལམ་གྱི་འཐབ་རྩོད་པ་ངོ་མ་ཆགས་བཞིན་ཡོད་པ་འདྲ།
བོད་རང་བཙན་བརྩད་ན་རྒྱལ་སྤྱིའི་ཐོག་གི་རྒྱབ་སྐྱོར་བརླགས་འགྲོ་བ་དང་། དེ་ཁྲིམས་འགལ་ཆགས་ཀྱི་ཡོད་པ་ཞིག་ལ་ངོས་འཛིན་བྱེད་ཀྱི་མེད།
གང་ཡིན་ཟེར་ན་བོད་རང་བཙན་རྩོད་པ་དེ་བོད་མི་མང་གི་ཐོབ་ཐང་རེད་ལ་མི་མང་གི་མངོན་འདོད་ཅིག་ཀྱང་ཆགས་ཡོད། མིའི་མངོན་འདོད་ཁྲིམས་འགལ་རེད་ཟེར་བ་ཞིག་སུས་ཀྱང་བཤད་ཤེས་གི་མ་རེད།