འཛིན་རིམ་དྲུག་པ་ཡན་ལ་སྐད་གཉིས་སློབ་ཁྲིད་གནང་སྐབས་ནང་དོན་དང་བརྒྱུད་ལམ་དོ་མཉམ་བྱེད་དགོས

ཤེས་ཡོན་སྲིད་བྱུས་ཕྱག་བསྟར་གནང་ཕྱོགས་ཀྱི་དམིགས་བསལ་ཚོགས་འདུའི་སྟེང་གྲོས་ཆོད་མང་པོ་ཞིག་བཞག་ཡོད་པའི་ཁྲོད། ལོ་རྗེས་མ་ནས་དཔེ་སྟོན་སློབ་གྲྭ་དང་སྤོན་ཊ་གཏན་སློབ་གཉིས་ནས་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་བོད་སྐད་ཐོག་བསླབ་རྒྱུ་མགོ་འཛུགས་དང་། ཅོན་ཏ་ར་དང་བདེ་སྐྱིད་གླིང་སློབ་གྲྭ་གཉིས་ནས་གྲ་སྒྲིག་གིས་ ༢༠༡༦ ལོ་ནས་ལག་བསྟར་བྱ་རྒྱུ་སོགས་འཁོད་འདུག

དེ་རིང་ཉིན་རྒྱབ་ཆུ་ཚོད་ ༢།༣༠ ཐོག་གངས་སྐྱིད་གཉའ་ཁྲི་ཚོགས་ཁང་དུ། ཤེས་རིག་ལས་ཁུངས་ཀྱི་གོ་སྒྲིག་འོག་ཤེས་ཡོན་སྲིད་བྱུས་ཕྱག་བསྟར་གནང་ཡུལ་སློབ་གྲྭ་ཁག་གི་སློབ་སྤྱི་དང་དགེ་ཆེའི་ཉིན་གཉིས་རིང་གི་དམིགས་བསལ་ཚོགས་འདུ་མཇུག་བསྒྲིལ་ཡོད་ཅིང་། མཇུག་བསྡོམས་མཛད་སྒོའི་སྟེང་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་གཙོས། སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་དང་ཤེས་རིག་ལས་ཁུངས་ཀྱི་སྤྱི་ཁྱབ་ཤེས་ཡོན་འགན་འཛིན་ཚེ་རིང་བསམ་གྲུབ་ལགས། ཤེས་ཡོན་སྲིད་བྱུས་ལག་བསྟར་གནང་ཡུལ་སམ་བྷོ་ཊ་དང་བོད་ཁྱིམ་ཁྱབ་ཁོངས་སློབ་གྲྭ་ཁག་ ༡༠ ཡི་སློབ་སྤྱི་དང་དགེ་ཆེ་ ༡༢ དང་། དེ་བཞིན། ཤེས་རིག་ལས་ཁུངས་ཀྱི་ཚན་པ་ཁག་གི་འགན་འཛིན་རྣམ་པ་བཅས་འཛོམས་འདུག

ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་ཐེངས་འདིའི་གྲོས་ཆོད་ཁག་སྒྲོགས་སྦྱང་དང་འབྲེལ་མཇུག་བསྡོམས་གསུང་བཤད་གནང་དོན། ཤེས་ཡོན་སྲིད་བྱུས་ཕྱག་བསྟར་གནང་སྟེ་ལོ་ ༡༠ ལ་ཉེ་བའི་དུས་ཡུན་རིང་། ད་རེབ་ཀྱི་ཚོགས་འདུ་འདི་ནང་བཞིན་ཚོགས་པ་ཧ་ལམ་ཐོག་མ་འདྲ་པོ་ཆགས་ཡོད་སྟབས། གལ་ཆེ་བའི་ལས་གཞི་གསར་པ་ཞིག་ལག་བསྟར་གནང་སྐབས་དཀའ་ངལ་དང་གསལ་ཁ་ཐོན་མ་འཐོན་མང་པོ་ཞིག་ཆགས་ཀྱི་ཡོད་སྟབས། ད་ཐེངས་ཚོགས་འདུ་འདིའི་ནང་གང་ལ་གང་འཚམ་གསལ་པོ་བྱུང་སོང་བསམ་ཡོད། སྲིད་བྱུས་ག་རེ་ཡིན་ཡང་དེ་ལ་བསམ་ཚུལ་འདྲ་མིན་སྣ་ཚོགས་ཤིག་ཡོང་སྲིད་པ་ཞིག་ཡིན། སྲིད་བྱུས་ཡང་དག་པ་ཞིག་ཡིན་ཡང་ལག་ལེན་བསྟར་སྐབས་ལག་ལེན་ཧྲ་ཏག་ཏག་ཅིག་བསྟར་མ་ཐུབ་པ་ཡིན་ན། ཤོག་ཐོག་ཏུ་སྲིད་བྱུས་དེ་ཡང་དག་པ་ཞིག་རེད་མ་གཏོགས་ལག་ལེན་ཐོག་ཡང་དག་པ་ཆགས་ཀྱི་ཡོད་པ་མ་རེད། ད་ཐེངས་ཤེས་ཡོན་སྲིད་བྱུས་འདི་ཤོག་ཐོག་ཏུ་ཡོད་པ་ལྟར་ང་ཚོས་ལག་ལེན་ཐོག་བསྟར་ཐུབ་པ་བཟོ་རྒྱུ་དེ་གལ་ཆེན་པོ་ཆགས་ཡོད་སྟབས་རྣམ་པ་ཚོ་ཞེ་དྲག་གལ་ཆེན་པོ་ཆགས་ཡོད། ཅེས་དང་།

སློབ་གྲྭའི་སློབ་སྤྱི་གལ་ཆེན་པོ་གང་འདྲ་ཆགས་ཀྱི་ཡོད་མེད་ཐད་ཁོང་གིས། སློབ་གྲྭའི་སློབ་སྤྱི་ཟེར་བའི་ཐ་སྙད་དེར་དེང་སང་འགྱུར་བ་ཞིག་བཏང་སྟེ། སློབ་གྲྭའི་མགོ་ཁྲིད་ཅེས་བེད་སྤྱོད་གཏོང་རྒྱུའི་ཐ་སྙད་ཅིག་ཆགས་ཀྱི་འདུག ངས་དེར་གོ་བ་ཆེན་པོ་ཞིག་འདུག་བསམ་གྱི་ཡོད། སློབ་གྲྭ་ཆེ་ཆུང་གང་འདྲ་ཞིག་ཡིན་ཡང་མགོ་ཁྲིད་མཁན་དེར་འགན་ཁུར་ཆེན་པོ་ཞིག་ཆགས་ཀྱི་ཡོད་སྟབས། སོ་སོའི་ཁོར་ཡུག་གི་སློབ་གྲྭ་དང་སློབ་མ། ཕ་མ་དང་དགེ་རྒན། འཛིན་སྐྱོང་སོགས་སུ་གཞི་རྒྱ་ཆེ་བའི་ལས་ཀ་མང་པོ་ཞིག་ཡོད་སྟབས། ང་ཚོས་སྤྱོབ་སྤྱི་ཟེར་སྐབས་གལ་ཆུང་ཆུང་ཞིག་ལ་བརྩི་རྒྱུ་རྩ་བ་ནས་མེད། རྣམ་པ་ཚོའི་འགན་ཁུར་དེ་ཞེ་དྲག་ཆེན་པོ་ཆགས་ཡོད་སྟབས། ཐོག་མར་སོ་སོའི་ནུས་པ་དང་ཤེས་ཡོན་དེ་ཧྲ་ཏག་ཏག་ཡག་པོ་ཞིག་བཟོ་རྒྱུ་དེ་གལ་ཆེན་པོ་ཆགས་ཡོད། སློབ་གྲྭའི་སློབ་མ་དང་དགེ་རྒན། ཕ་མ་བཅས་ཀྱིས་སློབ་གྲྭ་དེར་དགའ་བསྟོད་བྱེད་ཡུལ་ཞིག་བཟོ་རྒྱུ་དེ་སློབ་སྤྱིའི་སྒང་ལ་བབས་ཡོད། ཅེས་བརྗོད་སོང་།

དགེ་རྒན་བསྐོ་བཞག་བྱེད་ཕྱོགས་ཐད་ཤེས་རིག་ལས་ཁུངས་ཀྱིས་གང་བྱས་ཡོད་མེད་དང་སློབ་སྤྱི་ཚོས་གང་གནང་དགོས་མིན་ཐད་ཁོང་གིས། དགེ་རྒན་བསྐོ་ཕྱོགས་ཐད་བཀའ་མོལ་མང་པོ་བྱུང་བ་རེད། ང་ཚོས་དེ་གལ་འགངས་ཆེན་པོ་ཞིག་ལ་བརྩིས་ཏེ། དེའི་ཐོག་ཤུགས་རྒྱག་གི་ཡོད་ལ། སློབ་སྤྱི་རྣམ་པ་ཚོས་ཀྱང་དགེ་རྒན་ཚོའི་ཁྱད་ལས་ཡར་རྒྱས་གཏོང་ཆེད་དགེ་རྒན་ཚོའི་ཤེས་ཚད་ཐད་རྟོག་ཞིབ་གནང་རྒྱུ་གལ་ཆེན་པོ་ཆགས་ཡོད། སློབ་སྤྱི་ཟེར་སྐབས་ལས་ཁུངས་ནང་སྡོད་རྒྱུ་དང་རྩེད་ཐང་ཐོག་འདོན་རྒྱུ་ཙམ་མིན་པར། འཛིན་གྲྭའི་ནང་བསྐྱོད་དེ་དགེ་རྒན་སུ་དང་སུས་སློབ་ཚན་ཡག་པོ་སློབ་ཀྱི་ཡོད་མེད་ཐོག་རྟོག་ཞིབ་དང་། དེ་ཚོའི་ཐོག་གཞོགས་འདེགས་དང་ཟབ་ཁྲིད་གནང་རྒྱུ་དེ་གལ་ཆེན་པོ་ཆགས་ཡོད། ང་ཚོས་དགེ་རྒན་དེ་ཧྲ་ཏག་ཏག་ཅིག་བཟོ་ཐབས་ལ་འབད་བརྩོན་བྱེད་དགོས་པ་གལ་ཆེན་པོ་ཆགས་འདུག ཅེས་བརྗོད་བྱུང་།

ཤེས་རིག་ལས་ཁུངས་ཀྱིས་སློབ་དེབ་རྩོམ་སྒྲིག་ཐད་ཕྱག་ལས་གང་གནང་ཡོད་མེད་ཐད་ཁོང་གིས། སྔོན་མ་ཡིན་ན་གཞི་རིམ་འོག་མའི་སློབ་དེབ་ཁག་ཅིག་ཤེས་རིག་ལས་ཁུངས་དང་ཁག་ཅིག་བོད་ཁྱིམ་གྱིས་རྩོམ་སྒྲིག་གནང་གི་ཡོད་ཀྱང་། ད་ལོ་ང་ཚོར་བོད་ཁྱིམ་གྱིས་རེ་འདུན་ཞུས་པ་ལྟར་ད་ནས་བཟུང་སློབ་དེབ་ཡོངས་རྫོགས་ཤེས་རིག་ལས་ཁུངས་ཀྱིས་རྩོམ་སྒྲིག་བྱ་རྒྱུ་གཙོས་དགེ་རྒན་འོས་སྦྱོང་ཀྱང་གནང་རྒྱུ་ཐག་གཅོད་བྱུང་ཡོད། ང་ཚོས་ད་བར་ཟབ་སྦྱོང་མང་པོ་ཞིག་ཕུལ་ཟིན་ལ། སྐད་ཡིག་གཞན་ནང་ཡོད་པའི་བྱིས་སྒྲུང་རྩོམ་སྒྱུར་གནང་མཁན་མི་ ༡༥ བདམས་ཏེ་ལྡི་ལིར་ཟབ་སྦྱོང་སྤྲད་པ་སོགས་ཤེས་རིག་ལས་ཁུངས་ངོས་ནས་གང་ཡོང་ཅི་ཡོང་གིས་ཤུགས་རྒྱག་གི་ཡོད། ཤེས་ཡོན་ནི་ང་ཚོ་མི་རབས་ཤིག་གི་རྩ་བ་དང་། རྩ་དོན་རྩོད་རྒྱུའི་ལག་ཆ་ཆགས་ཡོད་སྟབས། ང་ཚོ་ཤེས་རིག་ལས་ཁུངས་ཀྱི་འགན་ཁུར་བཞེས་མཁན་སྲིད་སྐྱོང་གཙོས་ངོ་ལས་རྣམ་པས་དེའི་འགན་ཁུར་བསམ་པ་དང་ཤེས་པ་ཙམ་མ་ཟད། ཚོར་བ་དེ་ཡོད་པའི་ཐོག་ནས་འབད་བརྩོན་བྱེད་བཞིན་ཡོད། ཅེས་སོགས་བརྗོད་སོང་།

ཐེངས་འདིའི་ཚོགས་འདུའི་སྟེང་གྲོས་གཞི་གཙོ་བོ་གཉིས་ཡོད་པ་ལས་དང་པོ། ཤེས་ཡོན་སྲིད་བྱུས་ལག་བསྟར་དང་འབྲེལ་བའི་དཀའ་ངལ་སེལ་ཐབས་དང་ལག་བསྟར་མདུན་བསྐྱོད་དང་ཚགས་ཚུད་ཡོང་ཐབས་ཇི་དགེའི་སྐོར། ཞེས་པའི་ཐད་གྲོས་ཆོད་མང་པོ་ཞིག་བཞག་ཡོད་པ་ལས་གཙོ་བོ་དག་ནི། གཞི་རིམ་འོག་མའི་དགེ་རྒན་ཚོས་སློབ་ཚན་ཆ་ཚང་སློབ་ཁྲིད་གནང་ཐུབ་པ་དགོས་རྒྱུའི་ལམ་སྲོལ་དེས་སློབ་ཕྲུག་གི་ཤེས་ཡོན་མ་རྩ་བརྟན་པོ་ཡོང་རྒྱུར་དཀའ་ངལ་ཆེན་པོ་འདུག་སྟབས། སློབ་ཚན་བྱེ་བྲག་པ་སོ་སོ་སློབ་ཁྲིད་གནང་མཁན་དགེ་རྒན་བསྐོ་གཞག་གནང་རྒྱུ་དང་། གཞི་རིམ་བར་མའི་དབྱིན་ཡིག་ཐོག་སློབ་ཁྲིད་ཚད་ལྡན་མི་ཡོང་བའི་དཀའ་ངལ་སེལ་ཐབས་སུ། འཛིན་རིམ་བཞི་པ་ཡན་ལ་དབྱིན་ཡིག་སློབ་ཁྲིད་གནང་མཁན་དབྱིན་ཡིག་ཆེད་སྦྱོང་བའི་རིགས་ (English Honors) བསྐོ་བཞག་གནང་ཐབས་དང་། དེ་བཞིན་འཛིན་རིམ་དྲུག་པ་ཡན་ལའང་ Sound-way Program ལྟ་བུའི་དབྱིན་ཡིག་སློབ་ཁྲིད་ཐབས་ལམ་གསར་པའི་རིགས་སྤྱོད་རྒྱུ། གཞི་རིམ་འོག་མར་ཚད་མ་རིག་པ་སློབ་འཁྲིད་གནང་མཁན་དམིགས་བསལ་བསྐོ་གཞག་གནང་ཐབས། སློབ་ཐོན་ལས་མེད་མི་འབྱུང་ཆེད་ལས་རིགས་འདྲ་མིན་ཐོག་གོ་རྟོགས་སྤེལ་རྒྱུ་དང་། དེའི་ཆེད་ཤེས་རིག་ལས་ཁུངས་དང་སློབ་ཁག་སོ་སོའི་འཛིན་སྐྱོང་ནས་ལོ་ལྟར་འགྲོ་གྲོན་གྱི་མཐུན་སྦྱོར་དང་ཟབ་སྦྱོང་གནང་རྒྱུ། གཞི་རིམ་བར་མའི་སློབ་གྲྭ་ཁག་ཏུའང་ཤེས་ཡོན་སྲིད་བྱུས་ལག་བསྟར་རྒྱུན་བསྲིང་སྔར་ལྷག་ཡོང་ཐབས་གནང་རྒྱུ། སློབ་ཕྲུག་ཚོའི་སྐད་ཡིག་གི་ཤེས་ཚད་གོང་སྤེལ་ཆེད་ཟུར་ལྟའི་དཔེ་དེབ་ཁག་གི་གྲངས་ཚད་དང་། པར་རིས་ཅན་གྱི་སྒྲུང་དེབ། དེ་བཞིན་ཤོག་བུའི་སྤུས་ཚད་སོགས་ཡར་རྒྱས་གཏོང་རྒྱུ། སྔོན་འགྲོ་དང་གཞི་རིམ་འོག་མའི་དགེ་རྒན་རྣམས་ཀྱི་ཤེས་ཚད་ཉུང་མཐར་ཉེ་བའི་གཙུག་ལག་རབ་འབྱམས་པ་དང་། དགེ་རྒན་འོས་སྦྱོང་ཐོན་པ་ཤ་སྟག་ཡིན་དགོས་པ། ད་སྔ་དགེ་རྒན་དུ་བསྐོས་ཟིན་རིགས་ཀྱི་ཤེས་ཚད་ལག་འཁྱེར་ཇེ་མཐོར་གཏོང་ཐུབ་བྱ་རྒྱུ་དང་། དེ་མིན་གླ་ཕོགས་རང་འཇགས་ཐོག་ལས་གནས་བརྗེ་བསྒྱུར་གནང་ཐབས་སོགས་འཁོད་འདུག

གྲོས་གཞི་གཉིས་པ། འཛིན་རིམ་དྲུག་པ་ཡན་གྱི་སློབ་ཁྲིད་བརྒྱུད་ལམ་སྐད་གཉིས་བརྒྱུད་ནས་ཁྲིད་ཐབས་ཀྱི་ལྟ་གྲུབ་དང་ལག་བསྟར་གནང་ཕྱོགས་ཇི་དགེའི་སྐོར། ཞེས་པའི་ཐད། འཛིན་རིམ་དྲུག་པ་ཡན་གྱི་སློབ་ཁྲིད་བརྒྱུད་ལམ་སྐད་གཉིས་ཐོག་ཁྲིད་ཐབས་ཐད་ཤེས་རིག་ལས་ཁུངས་ནས་སློབ་དགེ་རྣམས་ལ་ཟབ་སྦྱོང་དང་ལམ་སྟོན་གནང་དགོས་པ་དང་། ད་ལྟའི་ཆར་སློབ་གྲྭ་ཁག་གི་སྤྱི་ཚན་དགེ་རྒན་ཚོར་བོད་ཡིག་སློབ་ཁྲིད་གནང་མུས་བཞིན། མ་འོངས་པར་མུ་མཐུད་ཡར་རྒྱས་གཏོང་སླད་ས་རཱ་མཐོ་སློབ་སོགས་སུ་ཟབ་སྦྱོང་གོ་སྒྲིག་གང་མང་གནང་རྒྱུ། ཤེས་རིག་ལས་ཁུངས་ནས་འཛིན་རིམ་དྲུག་པ་ཡན་གྱི་སློབ་ཚན་ཁག་གི་ཐ་སྙད་རྣམས་གཏན་འབེབས་ངེས་ཅན་བཟོ་ཐབས། མ་འོངས་པར་དགེ་རྒན་བསྐོ་བཞག་སྐབས་སློབ་ཚན་སོ་སོར་ཁྱད་མཁས་དང་། ལྷག་པར་བོད་ཀྱི་སྐད་ཡིག་ལ་བྱང་ཆ་ལྡན་པའི་རིགས་བསྐོ་བཞག་གནང་རྒྱུ། འཛིན་རིམ་དྲུག་པ་ཡན་ལ་སྐད་གཉིས་ཐོག་སློབ་ཁྲིད་གནང་བའི་ལྟ་གྲུབ་ལག་བསྟར་གནང་སྐབས། དགེ་རྒན་གྱིས་ནང་དོན་གཙོར་འདོན་དང་བརྒྱུད་ལམ་གཙོར་འདོན་གཉིས་དོ་མཉམ་གནང་རྒྱུ། ཕྱི་ལོ་ ༢༠༡༥ ནས་དཔེ་སྟོན་སློབ་གྲྭ་དང་སྤོན་ཊ་གཏན་སློབ་གཉིས་ནས་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་བོད་ཀྱི་སྐད་ཡིག་ཐོག་ནས་བསླབ་རྒྱུའི་མགོ་འཛུགས་བྱ་རྒྱུ་དང་། ཅོན་ཏ་ར་དང་བདེ་སྐྱིད་གླིང་སློབ་གྲྭ་གཉིས་ནས་གྲ་སྒྲིག་གིས་ ༢༠༡༦ ལོ་ནས་ལག་བསྟར་བྱ་རྒྱུ། དེའི་ཆེད་ཤེས་རིག་ལས་ཁུངས་ནས་ཁྲིད་ཐབས་སོགས་མཐུན་སྦྱོར་གང་དགོས་གནང་རྒྱུ་དང་འབྲེལ། རིམ་བཞིན་ཉམས་མྱོང་ལ་གཞིགས་ནས་འཛིན་རིམ་བདུན་པ་སོགས་ལ་ལག་བསྟར་གནང་ཐབས་འབད་བརྩོན་ཞུ་རྒྱུ་བཅས་ཀྱི་གྲོས་ཆོད་བཞག་འདུག