བོད་སློབ་འཛིན་ཚོཊ་རྩིས་ལེན་ཁྲོད་ཀྱི་དཀའ་རྙོག

དེ་རིང་སྤྱི་འཐུས་གྲོས་ཚོགས་ནང་བོད་སློབ་འཛིན་ཚོགས་སྐོར་ལ་དྲི་བ་དྲིས་ལན་གནང་དོན་ལྟར་ན། ད་སྔ་སྔོན་འགྲོའི་སློབ་གྲྭ་ ༣༣ དང་གཞི་རིམ་འོག་མའི་སློབ་གྲྭ་ ༤ རྩིས་ལེན་ཟིན་ཡོད་འདུག

དེ་རིང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ཉིན་ ༣ པའི་སྔ་དྲོར། འདས་པའི་ལོ་གཅིག་ཙམ་གོང་ནས་རྒྱ་གར་གཞུང་གི་འཛིན་སྐྱོང་འོག་ཡོད་པའི་བོད་པའི་སློབ་གྲྭ་ཁག་བོད་མིའི་སྒྲིག་འཛུགས་ཀྱིས་རྩིས་ལེན་བྱེད་རྒྱུ་ཡིན་པའི་ཐག་གཅོད་བྱུང་སྟེ། ལས་རིམ་དེ་ད་ལྟ་འགྲོ་བཞིན་ཡོད་པའི་ཐོག་དྲི་བ་དྲིས་ལེན་གནང་སོང་།

སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས་བོད་སློབ་འཛིན་ཚོགས་དང་འབྲེལ་བའི་སྐར་རྟགས་ཅན་གྱི་དྲི་བ་དོན་ཚན་གསུམ་ཕུལ་ཡོད་པའི་དང་པོར། འདི་ལོའི་ཕྱི་ཟླ་ ༣ པའི་ནང་ཚུན་དུ་བོད་སློབ་འཛིན་ཚོགས་ཀྱི་སློབ་གྲྭ་ཡོངས་རྫོགས་རྩིས་སྤྲོད་ཡོང་རེ་ཡོད་པ་གསུངས་བ་དོན་འཁྱོལ་ཡོང་ཡོད་མེད་དང་། གཉིས་པ། དོན་འཁྱོལ་ཡོང་མེད་ན་ད་ལྟའི་གནས་བབ་ཇི་འདྲ་ཆགས་ཡོད་པ་དང་ལོ་ངོ་ཅི་ཙམ་མགོར་དགོས་མིན། གསུམ་པ། བོད་སློབ་འཛིན་ཚོགས་ཀྱི་སློབ་གྲྭ་ཁག་གི་ཤེས་ཡོན་ཐོག་འཐུས་ཤོར་འགྲོ་བཞིན་ཡོད་སྟབས། དེར་གཟིགས་ཞིབ་གནང་གི་ཡོད་མེད་བཅས་དྲིས་པའི་ལན་དུ། ཤེས་རིག་བཀའ་བློན་མཆོག་གིས། ༢༠༡༣ ཟླ་ ༡ ཚེས་ ༡༨ ཉིན་རྒྱ་གར་དབུས་གཞུང་གིས་བོད་སློབ་འཛིན་ཚོགས་རྩིས་སྤྲོད་ཐག་གཅོད་གནང་བའི་ནང་མ་འོངས་པའི་ལོ་ ༣ ནང་རྩིས་སྤྲོད་བྱེད་རྒྱུ་ཡིན་སྐོར་གསུངས་པ་དེ་གྲོས་ཚོགས་ལ་སྙན་སེང་ཞུས་པ་ལས་ད་ལོའི་ཕྱི་ཟླ་གསུམ་པ་ཚུན་ལ་རྩིས་ལེན་ཐུབ་པ་ཞུས་མེད་པ་དང་། དྲི་བ་གཉིས་པར་ད་ལྟའི་ཆར་སྔོན་འགྲོའི་སློབ་གྲྭ་ཁག་ ༣༣ དང་། གཞི་རིམ་འོག་མའི་སློབ་གྲྭ་ ༤ རྩིས་ལེན་ཟིན་ཡོད་པ་དང་། འདི་ལོར་འབྲིང་རིམ་སློབ་གྲྭ་ཁག་རྩིས་སྤྲོད་ཡོང་བའི་ཞུ་སྐུལ་བྱེད་མུས་ཡིན་སྐོར། དྲི་བ་གསུམ་པའི་ལན་དུ། སློབ་གྲྭ་ཁག་གི་རྩིས་སྤྲོད་བརྒྱུད་རིམ་ནང་ཤེས་ཡོན་ཐོག་འཐུས་ཤོར་ཕྲན་བུ་ཡོང་གཞིའི་ཐོག་བོད་སློབ་འཛིན་ཚོགས་ལ་གཟིགས་རྟོགས་དགོས་པའི་འབོད་སྐུལ་ཞུས་དང་ཞུ་བཞིན་ཡོད། ཅེས་སོགས་ལན་བསྐྱོན་སོང་།

སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་ཀྱིས་སླར་ཡང་། བོད་སློབ་འཛིན་ཚོགས་འོག་གི་སློབ་གྲྭ་ཁག་ཅིག་ནང་སློབ་གྲྭ་རྩིས་སྤྲོད་རྩིས་ལེན་གྱི་དབང་གིས་ཉིན་རེའི་སློབ་ཚན་ཡང་འགྲོ་ཐུབ་ཀྱི་ཡོད་མེད་ཡོང་གི་ཡོད་པ་དེ་འཐུས་ཤོར་ཕྲན་བུ་ཞིག་ཏུ་བརྩི་བཞིན་ཡོད་མེད་བཀའ་འདྲི་ཞུས་པར་ཤེས་རིག་བཀའ་བློན་མཆོག་གིས། ད་སྔ་སྔོན་འགྲོའི་སློབ་གྲྭ་ཁག་ ༣༣ དང་གཞི་རིམ་འོག་མའི་སློབ་གྲྭ་ ༤ བཅས་རྩིས་ལེན་སྐབས། དགེ་རྒན་ཚོར་ཟབ་སྦྱོང་སྤྲོད་སྟངས་སོགས་གང་ཅིའི་ཐོག་ནས་འཐུས་ཤོར་ཕྲན་བུ་ལས་ཕྱིན་མེད་ཀྱང་། བོད་སློབ་འཛིན་ཚོགས་ཀྱི་སློབ་གྲྭ་སྤྱི་ཡོངས་རྩིས་བླངས་པ་ཡིན་ན། དེ་སྔོན་ནས་འཐུས་ཤོར་འགྲོ་ཡི་རེད་ཅེས་ཐག་ཆོད་པོའི་ཐོག་ནས་ཞུས་ཡོད་པ་ལྟར། དགེ་རྒན་མང་པོ་ཞིག་འཕོ་འགྱུར་བྱུང་བ་ཡིན་ན་རང་བཞིན་གྱིས་འཐུས་ཤོར་འགྲོ་རྒྱུ་ཡིན་པ་དེ་གསལ་བོ་རེད། ཡིན་ནའང་། དེ་སྔོན་བཀའ་ཤག་རིམ་པའི་ངོས་ནས་བོད་སློབ་འཛིན་ཚོགས་ཀྱི་སློབ་གྲྭ་ཚང་མ་ཚུར་རྩིས་ལེན་ཐུབ་པ་ཡིན་ན། གནས་སྐབས་རིང་འཐུས་ཤོར་འགྲོ་སྲིད་ཀྱང་། ཕུགས་ལ་སློབ་གྲྭ་དང་སློབ་ཕྲུག་ལ་ཕན་ཐོགས་ཆེན་པོ་ཞིག་ཡོད་པའི་ངོས་འཛིན་ཐོག འཐུས་ཤོར་འགྲོ་བཞིན་དུ་རྩིས་ལེན་བྱེད་ཀྱིན་ཡོད་སྐོར་ལན་འདེབས་གནང་སོང་།

ཡང་སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས། རྩིས་སྤྲོད་བྱས་མེད་པའི་སློབ་གྲྭ་ཁག་ལ་བཏང་བའི་དགེ་རྒན་ཚོར་ཐོབ་ཐང་དང་མཐུན་རྐྱེན་ཐོག་དཀའ་ངལ་གང་འཚམ་ཡོང་གི་ཡོད་སྟབས། མ་འོངས་པའི་ལོ་ ༣ རིང་དགེ་རྒན་དེ་ཚོ་གནས་ཐུབ་དང་མི་ཐུབ་དྲིས་པའི་ལན་དུ་ཤེས་རིག་བཀའ་བློན་མཆོག་གིས། དགེ་རྒན་དེ་ཚོ་སློབ་གྲྭའི་ནང་མ་སོང་གོང་ནས་མཐུན་རྐྱེན་ག་རེ་ཡོད་པ་གསལ་བོར་བཤད་ཡོད་སྟབས། འཛུལ་ཞུགས་བྱེད་མིན་ཁོ་རང་ཚོའི་གདམ་ག་རེད། དང་པོ་ཆ་རྐྱེན་དང་ལེན་བྱས་ཏེ་སློབ་གྲྭའི་ནང་འཛུལ་རྗེས། སླར་ཡང་མཐུན་རྐྱེན་གྱིས་འགྲིག་གི་མི་འདུག་ལབ་ན་འཕྲལ་དུ་འགྲིག་འགྲོ་ཐབས་མེད་པ་དང་། ས་གནས་ཁག་གི་ལས་བྱེད་དང་དབུས་ལས་བྱེད། གཏན་འཇགས་ལས་བྱེད་བཅས་ལའང་དབྱེ་བ་མང་པོ་ཡོད་སྟབས། འཛུལ་ཞུགས་བྱེད་མཁན་ཚོའི་ངོས་ནས་ཆ་རྐྱེན་ཚང་མ་ཤེས་པའི་ཐོག་ནས་འཛུལ་ཞུགས་གནང་བ་གཞིར་བཟུང་ལག་བསྟར་བྱས་ནས་འགྲོ་དགོས་པ་ཞིག་ཆགས་ཡོད། ཅེས་སོགས་གསུངས་སོང་།

སྤྱི་འཐུས་ཟླ་བ་ཚེ་རིང་ལགས་ཀྱིས་ཤེས་རིག་བཀའ་བློན་མཆོག་ནས་སློབ་གྲྭ་རྩིས་ལེན་དེ་ཚོད་ལྟའི་སྒང་འགྲོ་བཞིན་ཡོད་ལུགས་གསུངས་བ་ལྟར། མ་འོངས་པར་ཡག་པོ་མ་ཆགས་པ་ཡིན་ན་ག་རེ་གནང་རྒྱུ་ཡིན་དྲིས་པར་ཁོང་གིས། སློབ་གྲྭ་རྩིས་ལེན་ཐད་རྒྱ་གར་གཞུང་ལ་ཁྲིམས་དང་རྩིས་ཀྱི་འགྲོ་སྟངས་མང་པོ་ཡོད་སྟབས། བོད་སློབ་འཛིན་ཚོགས་ཀྱི་སློབ་གྲྭ་ཡོངས་རྫོགས་སྡེབ་གཅིག་ལ་རྩིས་ལེན་གནང་བ་ཡིན་ན་དཀའ་རྙོག་མང་པོ་ཆགས་སྲིད་སྟབས། སློབ་གྲྭ་རྩིས་ལེན་སྟངས་དང་མ་འོངས་པར་དཀའ་ངལ་སྣ་ཚོགས་འཕྲད་སྲིད་པ་སོགས་ལ་ཚོད་ལྟ་བྱེད་ཀྱི་ཡོད་པ་ལས་རྩིས་ལེན་རྒྱུར་འགྱུར་བ་གཏན་ནས་མེད། ཡིན་ནའང་། གཞན་དབང་སྟབས་བསྟུན་ཡིན་དུས་མཐའ་མའི་ཐག་གཅོད་རྒྱ་གར་གཞུང་གིས་གནང་དགོས་པ་ཞིག་ཆགས་ཡོད་སྐོར་སོགས་ལན་འདེབས་གནང་སོང་།

གསར་འགོད་པ། པདྨ་མཚོ།