ཟླ་འདིའི་ཕྱི་ཚེས་ ༤ ཉིན་དཀར་མཛེས་རྫོང་གི་ཁྲོམ་གཞུང་དུ་པ་སངས་དབང་ཕྱུག་ཞུ་བ་ཞིག་གིས་ངོ་རྒོལ་གནང་སྟེ་ཉེན་རྟོག་པས་བཙན་ཁྲིད་བྱས་ཡོད་འདུག
ཟླ་འདིའི་ཕྱི་ཚེས་ ༤ ཉིན་གྱི་སྔ་དྲོ་བོད་ནང་གི་ཆུ་ཚོད་ ༡༠།༥༠ ཙམ་ལ་དཀར་མཛེས་རྫོང་གི་ཁྲོམ་གཞུང་དུ། བོད་མི་པ་སངས་དབང་ཕྱུག་ཞུ་བ་ཞིག་གིས་བོད་ལ་རང་དབང་དགོས། ༧རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས་སོགས་ཀྱི་སྐད་འབོད་གནང་བཞིན་ངོ་རྒོལ་ཁྲོམ་སྐོར་བྱས་ཡོད་པ་མ་ཟད། ལག་ཏུ་བཟུང་བའི་དགོས་འདུན་ཁག་ལ་ཁྲོམ་གཞུང་གི་འགྲུལ་བ་ཚོར་བལྟ་རུ་བཅུག་ནས་བརྒྱུད་བསྒྲགས་གནང་ཡོད་འདུག ངོ་རྒོལ་གནང་ནས་སྐར་མ་ ༡༠ ལྷག་ལས་མ་འགོར་བར་ཉེན་རྟོག་པ་བསླེབས་ནས་ཁོང་བཙན་ཁྲིད་བྱས་ཡོད་པ་དང་། ད་ལྟའི་ཆར་དཀར་མཛེས་རྫོང་མངག་གཏོང་ཁང་དུ་བཀག་ཉར་བྱས་ཡོད་འདུག
ངོ་རྒོལ་སྐབས་ཡུལ་དངོས་སུ་ཡོད་པའི་འགྲུལ་བ་ཚོས་བརྗོད་པ་ལྟར་ན། ཁོང་གི་ལག་ཏུ་བཟུང་བའི་རས་དར་དཀར་པོ་དེའི་ཐོག་ཏུ་དགོས་འདུན་དོན་ཚན་བཞི་བྲིས་ཡོད་པའི་ནང་། བོད་ལ་འགྲོ་བ་མིའི་ཐོབ་ཐང་དང་རང་དབང་དགོས། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ཆོས་ལུགས་དད་པ་རང་དབང་དགོས་ཞེས་བཀོད་ཡོད་པ་དང་། ཉེན་རྟོག་པས་ཁོང་འཛིན་བཟུང་བྱེད་སྐབས། ཁོང་གི་པ་ལགས་ཀྱིས་དགོས་འདུན་འབོད་ཚིག་བྲིས་པའི་རས་དར་དེ་ལེན་ཐབས་བྱས་ཡོད་ཀྱང་། ཉེན་རྟོག་པའི་འགོག་རྐྱེན་འོག་ལེན་ཐུབ་མེད་པ་རེད།
པ་སངས་དབང་ཕྱུག་ལགས་ནི་རང་ལོ་ ༣༧ ཡིན་ཞིང་། དཀར་མཛེས་རྫོང་འབུ་ཆུ་དབྱར་ཁབ་གྲོང་ཚོ་ནས་ཡིན་ལ། ཁོང་གི་ཕ་མིང་ལ་ཆོས་དབང་རྒྱ་མཚོ་དང་མའི་མིང་ལ་རིན་དགའ། ཁོང་གི་བཟའ་ཟླའི་མིང་ལ་བསོད་ནམས་ཟེར་གྱི་ཡོད་པ་དང་། ཁོང་གཉིས་ལ་བུ་མོ་གཉིས་དང་རང་ལོ་ ༥ ཅན་གྱི་བུ་གཅིག་ཡོད་འདུག པ་སངས་དབང་ཕྱུག་ལགས་ཀྱི་མིང་གཞན་ལ་སྔོ་འབྲུ་ཟེར་གྱི་ཡོད་ཅིང་། དཀར་མཛེས་ཕྱོགས་ཀྱི་ཚོང་པ་ཆེ་གྲས་ཤིག་ཡིན་པ་དང་། རྒྱུན་དུ་ཉམ་ཐག་རིགས་ལ་རོགས་རམ་དང་བོད་མིའི་བདེན་དོན་ལ་དོ་ཁུར་གནང་མཁན་ཞིག་ཡིན་འདུག
ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། ཕྱི་ལོ་ ༢༠༠༨ ལོར་དཀར་མཛེས་རྫོང་དུ་མི་མང་གིས་རྒྱ་གཞུང་ལ་ཞི་བའི་ངོ་རྒོལ་གནང་སྐབས། པ་སངས་དབང་ཕྱུག་ལགས་ཀྱི་ཕ་མ་གཅིག་པའི་སྤུན་ཆེད་བཙུན་མ་སྤོས་དབང་ལགས་ལས་འགུལ་ནང་མཉམ་ཞུགས་གནང་ཡོད་སྟབས། རྒྱ་གཞུང་གིས་ལོ་ ༢ དང་ལོ་ཕྱེད་ཀྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། སྐབས་དེར་ཁོང་མོར་རྡུང་རྡེག་དང་མནར་གཅོད་ཚད་མེད་བཏང་རྐྱེན་ནད་པར་གྱུར་ཡོད་འདུག
གསར་འགོད་པ། པདྨ་མཚོ།
