ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཕྱི་ལོ་ ༢༠༡༥ ལོ་ནི་རྒྱ་ནག་ཁྱོན་ཡོངས་ནས་བཅོས་བསྒྱུར་བྱེད་པའི་ལོ་གལ་ཆེན་ཞིག་ཡིན་ལུགས་བསྒྲགས་འདུག
ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་གྱི་གཙོ་སྐྱོང་འོག རྒྱ་ནག་དམར་ཤོག་ཚོགས་པའི་བཅོས་བསྒྱུར་སྣེ་ཁྲིད་ཚོགས་ཆུང་གི་ཚོགས་འདུ་ཐེངས་ ༨ པ་པེ་ཅིན་དུ་ཚོགས་ཡོད་པ་དང་། ཚོགས་འདུའི་ཐོག་ཕྱི་ལོ་ ༢༠༡༤ ལོའི་རྒྱ་ནག་གི་བཅོས་བསྒྱུར་བྱ་བར་སྤྱི་བསྡོམས་དང་། ༢༠༡༥ ལོའི་བྱ་བའི་གཙོ་གནད་གོ་སྒྲིག་སོགས་ཡིག་ཆ་ཁག་ ༤ གཏན་འབེབས་བྱས་ཡོད་པ་དང་། སྐབས་དེར་ཞི་ཅིན་ཕིན་གྱིས་ཕྱི་ལོ་ ༢༠༡༥ ལོ་ནི་རྒྱ་ནག་བཅོས་བསྒྱུར་བྱེད་པའི་ལོ་གལ་ཆེན་ཞིག་ཡིན་ལུགས་བསྒྲགས་ཡོད་ཀྱང་། དཔྱད་ཞིབ་པ་ཚོས་སྐད་ཆ་འདི་འདྲ་དེ་སྔོན་ཡང་ཐེངས་མང་བྱུང་ཡོད་ཀྱང་། ད་ལྟའི་རྒྱ་ནག་གི་བཅོས་བསྒྱུར་ལ་ཡར་རྒྱས་ཀྱི་མདུན་སྐྱོད་བྱུང་མེད་པ་མ་ཟད། མའོ་དུས་སྐབས་སུ་ཕྱི་ནུར་བརྒྱབ་ཡོད་སྐོར་བརྗོད་འདུག
དེ་རིང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཚོགས་འདུའི་ཐོག་སྲིད་འཛིན་ཞི་ཅིན་ཕིན་གྱིས་ཕྱི་ལོ་ ༢༠༡༤ ལོ་ནི་ཁྱོན་ཡོངས་ནས་གཏིང་ཟབ་ཀྱིས་བཅོས་བསྒྱུར་བྱེད་པ་མགོ་བཙུགས་པའི་ལོ་ཞིག་ཡིན་པ་དང་། ལོ་འདིའི་ནང་སྣེ་ཁྲིད་ཚོགས་ཆུང་ ༨༠ ལྷག་གིས་གཏན་འབེབས་བྱས་པའི་བཅོས་བསྒྱུར་ལས་འགན་གཙོ་བོ་རྣམས་ཀྱི་གཞི་རྩ་ལེགས་འགྲུབ་བྱུང་ཡོད་པ་དང་། ཕྱི་ལོ་ ༢༠༡༥ ལོ་ནི་ཁྱོན་ཡོངས་ནས་གཏིང་ཟབ་ཀྱིས་བཅོས་བསྒྱུར་བྱེད་པའི་ལོ་གལ་ཆེན་ཞིག་ཡིན་སྟབས། རིམ་པ་ཁག་གི་སྲིད་གཞུང་གིས་བཅོས་བསྒྱུར་གྱི་མགོ་རུས་མཁྲེགས་པོ་བཙལ་ཏེ། ཞིབ་ཕྲའི་བྱེད་ཐབས་སྤྱད་དེ་དཔའ་ངར་ཞིམ་མེད་དང་གནད་ཁེལ་ནུས་ལྡན་གྱིས་མུ་མཐུད་བཅོས་བསྒྱུར་ལ་གྲུབ་འབྲས་གསར་པ་ལེན་ཐབས་བྱེད་དགོས་སྐོར་བརྗོད་འདུག
གོང་གི་གནས་ཚུལ་དེའི་ཐད་པེ་ཅིན་གཙུག་ལག་སློབ་ཆེན་གྱི་དཔལ་འབྱོར་རིག་པའི་དགེ་རྒན་ཆེན་མོ་ཤཱ་ཡེ་ཡང་གིས། འདས་པའི་ལོ་གཉིས་གསུམ་གྱི་ནང་དུ་རྒྱ་ནག་གི་དཔལ་འབྱོར་དང་སྤྱི་ཚོགས་བཅོས་བསྒྱུར་ལ་འཕེལ་རྒྱས་འགྲོ་རྒྱུ་ལས་ལྡོག་སྟེ་ཕྱི་ནུར་བརྒྱབ་ཡོད་པ་རེད། ཕྱི་ལོ་ ༢༠༡༥ བཅོས་བསྒྱུར་གྱི་ལོ་གལ་ཅེན་ཞིག་ཡིན་ལུགས་བརྗོད་པ་དེ། སྔོན་ཆད་རྒྱ་གཞུང་གི་མགོ་ཁྲིད་ཚོས་ཐེངས་མང་བསྐྱར་བཟློས་བྱེད་མྱོང་བའི་སྐད་ཆ་ཞིག་རེད། དུས་རབས་ཉི་ཤུ་པའི་ལོ་རབས་ ༨༠ མགོ་སྟོད་དུ་ཏུན་ཞོ་ཕིན་གྱིས་བཅོས་བསྒྱུར་ཟེར་བ་གླེང་མགོ་བརྩམས་པ་དང་། དེས་རྒྱ་ནག་ལ་སྐུལ་འདེད་ངེས་ཅན་ཞིག་ཐེབས་ཡོད། དེ་བཞིན་ལོ་རབས་ ༩༠ རྗེས་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་བཅོས་བསྒྱུར་ཟེར་བ་དེས་ཀྱང་རྒྱ་ནག་གི་དཔལ་འབྱོར་འཕེལ་རྒྱས་སྐུལ་འདེད་གཏོང་བར་ཕན་ནུས་ཆེན་པོ་ཐོན་ཡོད་པ་རེད། ཡིན་ནའང་། ཕྱི་ལོ་ ༢༠༠༣ ལོར་ཧུའུ་ཅིན་ཐའོ་སྲིད་སྟེགས་སུ་བསླེབས་རྗེས། རྒྱ་ནག་གི་བཅོས་བསྒྱུར་ཡོངས་རྫོགས་གཞི་རྩའི་ཆ་ནས་མཚམས་ཆད་དེ། གནད་དོན་མང་པོ་ཚབས་ཆེན་གྱི་གནས་སུ་ལྷུང་མགོ་བརྩམས་པ་དང་། ལྷག་པར་དུ་ཞི་ཅིན་ཕིན་སྲིད་སྟེགས་སུ་བསླེབས་པ་ནས་སྔར་ལས་ཉམས་ཆག་ཏུ་ཕྱིན་ཏེ་མའོ་དུས་སྐབས་སུ་ཕྱི་ནུར་བརྒྱབ་ཡོད་སྐོར་བརྗོད་འདུག
གཞན་ཡང་། ཟླ་འདིའི་ཕྱི་ཚེས་ ༢༨ ནས་ ༢༩ ཉིན་རྒྱ་ནག་རྒྱལ་ཡོངས་མཐོ་རིམ་སློབ་ཆེན་སོགས་ཀྱི་ཏང་གི་འཛུགས་སྐྲུན་བྱ་བའི་ཚོགས་ཆེན་ཐེངས་ ༢༣ པ་པེ་ཅིན་དུ་ཚོགས་ཡོད་པ་དང་། ཚོགས་ཐོག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། སློབ་ཆེན་ཁག་གི་ཕྲག་ཏུ་མཱ་ཁེ་སི་རིང་ལུགས་ལ་སློབ་སྦྱོང་ཞིབ་འཇུག་དང་དྲིལ་བསྒྲགས་བྱེད་པ་དང་། རྒྱ་ནག་གི་ཐུན་མོང་མ་ཡིན་པའི་སྤྱི་ཚོགས་རིང་ལུགས་ཀྱི་ལས་དོན་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་པའི་འགན་འཁྲི་ལྕི་མོའང་ཡོད་སྟབས། ཏང་གིས་སློབ་ཆེན་ཁག་ལ་མགོ་ཁྲིད་བྱེད་པར་ཤུགས་སྣོན་རྒྱག་རྒྱུ་ནི། རྒྱ་ནག་གི་ཐུན་མོང་མ་ཡིན་པའི་སྤྱི་ཚོགས་རིང་ལུགས་ཀྱི་སློབ་ཆེན་ལེགས་པོ་བསྒྲུབ་པའི་རྩ་བའི་འགན་ལེན་ཡིན་ལ། སྤྱི་ཚོགས་རིང་ལུགས་ཀྱི་རྩ་བའི་རིན་ཐང་ལྟ་བ་ལག་བསྟར་དོན་འཁྱོལ་ཡོང་བར་རིམ་པ་ཁག་གི་ཏང་གི་རྒྱུན་ལས་ཁང་དང་བསམ་བློ་དྲིལ་བསྒྲགས་ཁང་། སློབ་གསོ་ལས་ཁུངས་སོགས་ཀྱིས་ཤུགས་སྣོན་བྱས་ཏེ། ཏང་གི་སློབ་གསོའི་ཁ་ཕྱོགས་དང་སྤྱི་ཚོགས་རིང་ལུགས་ཀྱི་སློབ་གྲྭ་འཛུགས་པའི་ལམ་ཕྱོགས་རྒྱུན་འཁྱོངས་དགོས་ལུགས་འདུག
ཆབ་སྲིད་དབྱེ་ཞིབ་པ་ཚོས་རྒྱ་གཞུང་གིས་ཐབས་བརྒྱ་ཇུས་སྟོང་གིས་སློབ་ཆེན་སློབ་མའི་རང་དབང་གི་འབོད་སྒྲ་རྩ་མེད་བཟོ་རྩིས་ཡིན་པ་དང་། ཉེ་བའི་ལོ་ཤས་ནས་སོ་སོའི་ཁེ་ཕན་རྩོད་ལེན་ཆེད་རྒྱ་ནག་གི་སློབ་ཆེན་ཁག་གི་ནང་གཡས་ཕྱོགས་དང་གཡོན་ཕྱོགས་ཀྱི་རྩོད་གླེང་ཤུགས་ཆེ་རུ་འགྲོ་བཞིན་ཡོད་སྟབས། ཞི་ཅིན་ཕིན་གྱིས་ཁོ་རང་གི་སྲིད་སྐྱོང་འདུ་ཤེས་གསལ་བོ་བཟོ་འདོད་པ་ཡིན་སྐོར་བརྗོད་ཀྱིན་འདུག
གསར་འགོད་པ། པདྨ་མཚོ།
