ཟླ་འདིའི་ཕྱི་ཚེས་ ༢༦ ཉིན་རྒྱ་ནག་ཧྲིན་ཀྲིན་ཉེན་རྟོག་ཁང་གིས་ཏུང་ཧྲིན་མངགས་གཏོང་ཁང་གི་མགོ་ཁྲིད་བང་ཡན་ཕིང་སོགས་དོགས་ཡོད་ཉེས་ཅན་ ༡༤ ལ་ཞིབ་བཤེར་བྱེད་བཞིན་འདུག
ཟླ་འདིའི་ཕྱི་ཚེས་ ༢༡ ཉིན་གྱི་མཚན་མོར་ཧྲིན་ཀྲིན་གྲོང་ཁྱེར་གྱི་ཤར་ཕྱོགས་མཚོ་ཟས་གྲོང་དུ་འབོད་པའི་ཟ་ཁང་ཆེན་མོ་ཞིག་ཏུ། ཧྲིན་ཀྲིན་ཉེན་རྟོག་ཁང་གི་མགོ་ཁྲིད་ཀྱི་གཙོས་ཉེན་རྟོག་མི་སྣ་སོགས་མི་ ༢༨ ཀྱིས་ཉ་ཁྱེའུ་ཟོས་ནས་སྤྲོ་སྐྱིད་གཏོང་སྐབས། ལྷོ་ཕྱོགས་གྲོང་ཁྱེར་ཚགས་པར་ཁང་གི་གསར་འགོད་པ་ ༣ གྱིས་ཁོ་ཚོར་ལྐོག་ནས་བརྙན་བླངས་བར་བརྟེན། ཉེན་རྟོག་པས་གསར་འགོད་པ་དེ་ཚོར་ཉེས་རྡུང་བཏང་ཡོད་པ་མ་ཟད། གསར་འགོད་པའི་དཔང་ཡིག་དང་པར་ཆས་སོགས་བཙན་འཕྲོག་བྱས་ཡོད་འདུག
ལྷོ་ཕྱོགས་གྲོང་ཁྱེར་ཚགས་པར་ཁང་གིས་གནས་ཚུལ་སྤེལ་བ་ལྟར་ན། སྐབས་དེར་གསར་འགོད་པ་དེ་ཚོས་ཏུང་ཧྲིན་མངགས་གཏོང་ཁང་ལ་ཁ་པར་བཏང་སྟེ་ཉེས་དོན་ཡར་ཞུ་བྱས་ཡོད་ཀྱང་། མངགས་གཏོང་ཁང་གི་མི་སྣས་ཧྲིན་ཀྲིན་ཉེན་རྟོག་པར་རོགས་འདེགས་བྱས་ཏེ་མྱུར་ཏུ་འབྲོ་རུ་བཅུག་པ་མ་ཟད། གསར་འགོད་པ་མངགས་གཏོང་ཁང་དུ་ཁྲིད་དེ་ཐོ་འགོད་བྱེད་དུ་བཅུག་ཡོད་པ་དང་། སྐབས་དེར་གསར་འགོད་པས་ལྟ་ཞིབ་བརྙན་ལེན་འཕྲུལ་ཆས་ཀྱིས་བླངས་པའི་བརྙན་རིས་བདེན་དཔང་དུ་འདོན་དགོས་པའི་རེ་བ་ཞུས་ཡོད་ཀྱང༌ཉེན་རྟོག་པས་བཀག་འགོག་བྱས་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་ཧྲིན་ཀྲིན་ཉེན་རྟོག་ཁང་གིས་གནས་ཚུལ་ཤེས་རྟོགས་བྱུང་སྟེ། ཏུང་ཧྲིན་མངགས་གཏོང་ཁང་གི་མགོ་ཁྲིད་བང་ཡན་ཕིང་ཟེར་བ་སོགས་འབྲེལ་ཡོད་མི་སྣ་ ༡༤ ལ་ལས་མཚམས་འཇོག་ཏུ་བཅུག་ནས་ཞིབ་བཤེར་བྱེད་བཞིན་ཡོད་པ་དང་། ཧྲིན་ཀྲིན་གྲོང་ཁྱེར་ཉེན་རྟོག་ཁང་གིས་གནས་ཚུལ་ཞིབ་བཤེར་བྱས་རྗེས་མཇུག་འབྲས་ཁྱབ་བསྒྲགས་བྱ་རྒྱུ་ཡིན་ལུགས་བརྗོད་ཡོད་ཀྱང་། ད་ལྟའི་ཆར་གཅར་རྡུང་གཏོང་མཁན་གྱི་ཉེན་རྟོག་མི་སྣའི་ཞིབ་ཕྲའི་གནས་ཚུལ་དང་། ཏུང་ཧྲིན་མངགས་གཏོང་ཁང་གི་ཉེན་རྟོག་པས་ཉེས་ཅན་བསམ་བཞིན་དུ་འབྲོ་རུ་བཅུག་ཡོད་མེད་སོགས་ཁ་གསལ་བརྗོད་མེད་པ་རེད།
གསར་འགོད་པ། པདྨ་མཚོ།
