རྒྱ་ནག་གི་སློབ་ཆེན་ཁག་གི་ཚོགས་འདུའི་ཐོག་དབུས་ཤེས་རིག་ལྷན་ཁང་གི་མགོ་ཁྲིད་ཡན་ཀེ་རིན་གྱིས། རྒྱའི་སློབ་ཆེན་སློབ་དེབ་ནང་ནུབ་ཕྱོགས་ཀྱི་རིན་ཐང་ལྟ་བ་གཏན་ནས་བཅུག་རྒྱུ་མེད་ལུཊ་བརྗོད་པར་སྐྱོན་བརྗོད་ཤུགས་ཆེན་བྱེད་བཞིན་འདུག
ཟླ་འདིའི་ཕྱི་ཚེས་ ༢༩ ཉིན་པེ་ཅིན་གྲོང་ཁྱེར་དུ་རྒྱ་ནག་ཤེས་རིག་ལྷན་ཁང་གི་གོ་སྒྲིག་འོག ༼སློབ་ཆེན་གྱི་དྲིལ་སྒྲོག་བྱ་བར་ཤུགས་སྣོན་དང་ལེགས་བཅོས་ཐད་ཀྱི་བསམ་འཆར༽ཞེས་པའི་སློབ་ཆེན་ཁག་གི་གནད་ཡོད་མི་སྣའི་བཞུགས་མོལ་ཚོགས་འདུ་ཞིག་བསྡུས་ཡོད་པ་དང་། ཚོགས་ཐོག་ཏུ་དབུས་ཤེས་རིག་ལྷན་ཁང་གི་མགོ་ཁྲིད་ཡན་ཀེ་རིན་གྱིས། རྒྱ་ནག་གི་སློབ་ཆེན་སློབ་དེབ་ནང་ནུབ་ཕྱོགས་ཀྱི་རིན་ཐང་ལྟ་བ་བརྒྱུད་སྤེལ་བྱས་པའི་བསླབ་གཞི་གཏན་ནས་བཅུག་རྒྱུ་མེད་སྐོར་གཏམ་བཤད་བྱས་ཡོད་སྟབས། ཚོགས་ཞུགས་པས་གཙོས་ཤེས་ཡོན་པ་མང་པོས། སྐད་ཆ་དེ་ནི་མིའི་རིགས་ཀྱི་འཕེལ་རྒྱས་ལ་འགོག་རྒོལ་བྱས་པ་ཞིག་ཡིན་པའི་སྐྱོན་བརྗོད་བྱེད་ཀྱིན་ཡོད་པ་མ་ཟད། ཤེས་རིག་ལྷན་ཁང་གི་མགོ་ཁྲིད་ཅིག་གིས་སྐད་ཆ་དེ་ལྟར་བཤད་པ་ནི་ངོ་གནོང་དགོས་པ་ཞིག་ཡིན་ལུགས་བརྗོད་འདུག
པེ་ཅིན་སློབ་ཆེན་ཁྲིམས་ལུགས་རིག་པའི་སློབ་གླིང་གི་དགེ་རྒན་ཆེན་མོ་ཧོ་ཝེ་ཧྥང་གིས་བྷི་བྷི་སིའི་གསར་འགོད་པར། ཡན་ཀེ་རིན་གྱིས་བཤད་པ་ལྟར་བྱས་ན། པེ་ཅིན་སློབ་ཆེན་གྱི་ཁྲིམས་ལུགས་རིག་པའི་སློབ་གླིང་སྒོ་བརྒྱབ་བཞག་ན་འགྲིག་འདུག གང་ཡིན་ཟེར་ན། རྒྱ་ནག་གི་བཅའ་ཁྲིམས་གྱི་ཁོངས་ཚང་མ་ནུབ་ཕྱོགས་པའི་ལུགས་སུ་མཐུན་ཆེ་རུ་འགྲོ་བཞིན་ཡོད་པ་རེད། གལ་སྲིད་རྒྱ་ནག་གི་སློབ་ཆེན་ནང་ནུབ་ཕྱོགས་པའི་རིན་ཐང་ལྟ་བ་བཤད་མ་ཆོག་ན། རྒྱལ་ཡོངས་ཀྱི་ཁྲིམས་ལུགས་རིག་པའི་སློབ་གླིང་ཚང་མ་དགོས་ཀྱི་མི་འདུག ཅེས་བརྗོད་ཡོད་པ་རེད།
གནད་དོན་དཔྱད་ཞིབ་པ་ཚོས། ནུབ་ཕྱོགས་ཀྱི་བསམ་པའི་དཔལ་ཡོན་དང་རིག་པའི་གཞུང་ལུགས་ལ་འགོག་རྒོལ་བྱེད་ཀྱི་ཡོད་ན། རྒྱ་གཞུང་གིས་གཙུག་ཏུ་བཀུར་བའི་མཱ་ཁེ་སི་ནུབ་ཕྱོགས་ནས་ཡིན་ལ། དེང་དུས་ཀྱི་ཚན་རྩལ་རིག་པའི་རྨང་གཞི་མང་ཆེ་བ་ནུབ་ཕྱོགས་ནས་དར་བ་ཡིན་པས། ཡན་ཀེ་རིན་གྱི་སྐད་ཆ་དེ་རྒྱ་ནག་ཉམས་རྒུད་དུ་གཏོང་བའི་མགོ་འཐོམ་པའི་སྐད་ཆ་ཞིག་ཡིན་པ་མ་ཟད། མིའི་རིགས་ཀྱི་འཕེལ་རྒྱས་ལ་འགོག་རྒོལ་བྱས་པ་ཞིག་ཡིན་སྟབས། ཤེས་རིག་ལྷན་ཁང་གི་མགོ་ཁྲིད་ཅིག་གིས་སྐད་ཆ་དེ་ལྟར་བཤད་པ་ནི་ཧ་ཅང་ངོ་གནོང་དགོས་པ་ཞིག་ཡིན་ལུགས་རྗོད་ཀྱི་འདུག
སྤྱི་ཚོགས་གནས་འཕྲིན་ཁག་ཏུ། ཞི་ཅིན་ཕིན་གྱིས་གཙོས་རྒྱ་གཞུང་གི་མཐོ་རིམ་དཔོན་རིགས་ཚོས། རྒྱ་ནག་ལ་ནུབ་ཕྱོགས་ཀྱི་རིན་ཐང་ལྟ་བ་འཚམ་པོ་མེད་པས་སྤྱི་ཚོགས་རིང་ལུགས་ལ་སློབ་སྦྱོང་མཐར་ཕྱིན་པ་དགོས་པའི་བརྒྱུད་སྒྲོག་ཤུགས་ཆེན་བྱེད་ཀྱི་ཡོད་ཀྱང་། རང་ཉིད་ཀྱི་བུ་དང་བུ་མོ་ཕྱི་རྒྱལ་གྱི་ལྟ་གྲུབ་རིག་པའི་སློབ་གླིང་གྲགས་ཅན་ཁག་ཏུ་ཅིའི་ཕྱིར་སྐྱེལ་གྱི་ཡོད་པ་དང་། ཐ་ན་ཁྱིམ་མི་གཉེན་འབྲེལ་དང་རྒྱུ་དངོས་ཚང་མ་ཕྱི་རྒྱལ་ཁག་ཏུ་སྐྱེལ་བར་ཐབས་བརྒྱ་ཇུས་སྟོང་འཐེན་བཞིན་པའང་དཔལ་འབྱོར་གཅིག་པུའི་གནད་དོན་མིན་སྐོར་བརྗོད་འདུག
གསར་འགོད་པ། པདྨ་མཚོ།
ནུབ་ཕྱོགས་ཀྱི་མང་གཙོ་དང་འདྲ་མཉམ་ལ་འཇིགས་ནས་གཞན་གྱི་རིན་ཐང་ལ་མི་བཟོད་པ་བྡཡས་པ་ནི་ཤིནད་རུ་མི་རིགས་པ་ཅིག་མ་ཡིན་ནམ། རྒྱ་གཞུང་ཤེས་རིག་བློན་ཆེན་ལགས།