བོད་རིགས་མཐོ་རིམ་སློབ་མའི་ཚོགས་ཆེན་སྐབས་དགུ་པ་ཚོགས་གཏན་ཁེལ་ཡོད།

བོད་རིགས་མཐོ་རིམ་སློབ་མའི་ཚོགས་ཆེན་སྐབས་དགུ་པ་དེ་ཉིད་རྒྱ་གར་ལྷོ་ཕྱོགས་སྦེང་ལོར་དུ་ཡོད་པའི་༧ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་སྤྱི་ལོ་ ༢༠༡༥ ཟླ་བ་ ༢ པའི་ཚེས་ ༩ ནས་ ༡༤ བར་ཉིན་དྲུག་གི་རིང་ཚོགས་གཏན་ཁེལ་ཡོད།

བོད་རིགས་མཐོ་རིམ་སློབ་མའི་ཚོགས་ཆེན་སྐབས་དགུ་པ་དེ་ཉིད་༧ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་མ་ཐུན་མོང་ནས་གོ་སྒྲིག་ཞུས་ཤིང་། ཚོགས་ཆེན་འདིར་ས་གནས་ཁག་མི་འདྲ་བ་༢༡ ནས་མཐོ་རིམ་སློབ་གཉེར་བ་༨༢ ཚོགས་ཞུགས་གནང་འཆར་ཡོད་ལ། ཚོགས་བཅར་བའི་ཁོངས་ནས་༤༨ བུ་ཡིན་ཞིང་། ༢༢ བུ་མོ་དང་། ༡༢ དགེ་འདུན་པ་ཡིན་འདུག ཐེངས་འདིའི་ཚོགས་ཆེན་གྱི་བགྲོ་གཞི་གཙོ་བོ་ནི་བཙན་བྱོལ་བོད་མིའི་མཐོ་རིམ་སློབ་མའི་ཤེས་ཡོན་གནས་བབས་དང་གྲུབ་འབྲས་གླེང་བ་ཡིན་འདུག

ཚོགས་ཆེན་གྱི་ཉིན་དྲུག་གི་ནང་ནས་དུས་ཚོད་ཕལ་མོ་ཆེ་བཙན་བྱོལ་བོད་མིའི་མཐོ་རིམ་སློབ་མའི་ཤེས་ཡོན་སློབ་གསོའི་གནས་བབས་དང་གྲུབ་འབྲས་ཞེས་པའི་བགྲོ་གཞི་ཐོག་འབུལ་རྒྱུ་ཡིན་འདུག བགྲོ་གཞི་དེ་བརྗོད་གཞི་ཆུང་གྲས་བཅུ་བཞི་ལས་གྲུབ་ཅིང་། སྔ་སོར་ནས་དེ་དག་ལ་ཉམས་ཞིབ་ཀྱི་ཆེད་རྩོམ་གྲ་སྒྲིག་བྱེད་མཁན་ས་གནས་ཆེད་བགོས་བྱས་ཡོད། ས་གནས་རང་རང་གི་ཚོགས་བཅར་བས་རང་བབས་ཀྱི་བརྗོད་གཞི་ཐོག་སྔ་སོར་ནས་ཉམས་ཞིབ་ཀྱི་ཆེད་རྩོམ་གྲ་སྒྲིག་བྱས་ཏེ། ཚོགས་ཆེན་སྐབས་ཆེད་རྩོམ་འགྲེལ་བརྗོད་དང་གླེང་སློང་བྱ་རྒྱུ་ཡིན། དེ་བཞིན་ཆེད་རྩོམ་དང་བགྲོ་གླེང་དག་ཀྱང་ཚོགས་ཆེན་ཆེད་དེབ་ནང་བསྡུས་སྒྲིག་བྱས་ཏེ་འགྲེམ་སྤེལ་བྱ་འཆར་ཡོད་འདུག

དེ་མིན་ཚོགས་ཆེན་འདིར་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ནས་དབུ་མའི་ལམ་གྱི་དགོངས་དོན་དངོས་དང་དེའི་གྲུབ་འབྲས་ལས་ཐོན་པའི་མ་འོངས་ཁ་ཕྱོགས་ཞེས་པའི་ཐོག་གཏམ་བཤད་དང་ཚོགས་བཅར་བ་མཉམ་དུ་དྲི་བ་དྲིས་ལན་བྱ་རྒྱུ་དང་། དེ་བཞིན་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་འཕྲིན་ལས་དབང་སྟོབས་ནས་བོད་ནང་གི་འབྲོག་པའི་གནས་སྟངས་ཞེས་པའི་ཐོག་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ནས་བོད་དང་རྒྱ་ནག རྒྱལ་སྤྱིའི་འགྲོ་བ་མིའི་ཐོབ་ཐང་གི་ལམ་ལུགས་ཞེས་པའི་ཐོག་གཏམ་བཤད་དང་དྲིས་ལན་གནང་རྒྱུ་ཡིན་འདུག

གཞན་ཡང་ཚོགས་ཆེན་གྱི་ཉིན་དྲུག་པའི་ཐོག་དབུས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་དང་། བོད་ཕྲུག་ཁྱིམ་སྡེའི་དབུ་འཛིན་རྒན་ཚེ་དབང་ཡེ་ཤེས་དབུས་ཞུགས་ཐོག བོད་རིགས་མཐོ་རིམ་སློབ་མས་བཙན་བྱོལ་སྒྲིག་འཛུགས་དང་བོད་ཕྲུག་ཁྱིན་སྡེ་ལ་དབུལ་རྒྱུའི་བསམ་འཆར་དང་རེ་འབུལ་རྣམས་སྙན་འབུལ་ཞུ་འཆར་ཡོད་འདུག

བཅས་བོད་རིགས་མཐོ་རིམ་སློབ་མའི་ཚོགས་ཆེན་སྐབས་དགུ་པའི་གོ་སྒྲིག་ཐུན་ཚོགས་ནས་སྤྱི་ལོ་ ༢༠༡༥ ཟླ་ ༢ པའི་ཚེས་ ༣ ཉིན་ཕུལ།1