ཀྲུའུ་རོང་ཅི་ཡི་གཏོང་ཕོད་ལ་བསྔཊ་བརྗོད།

རྒྱ་ནག་གི་སྲིད་བློན་ཟུར་པ་ཀྲུའུ་རོང་ཅི་ཡིས་ཞིང་གྲོང་གི་དཀའ་ངལ་ཅན་གྱི་བྱིས་པ་ཚོའི་ཤེས་ཡོན་ཡར་རྒྱས་ཆེད་ཁྱོན་རྒྱ་སྒོར་དུང་ཕྱུར་ ༤༦ ལྷག་གིས་རོགས་རམ་བྱས་ཡོད་འདུག
དེ་རིང་ནེའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཉེ་སྔོན་པེ་ཅིན་དགེ་འོས་སློབ་ཆེན་གྱི་མང་ཕན་ཞིབ་འཇུག་ཁང་གིས། འདས་ལོར་རྒྱལ་ཡོངས་ནང་སྤྱི་ཚོགས་ཕན་བདེའི་ཆེད་ཞལ་འདེབས་ཕོན་ཆེན་གནང་མཁན་གྱི་མི་སྣ་ ༡༠༠ ཡི་མིང་གཞུང་ཕྱིར་བསྒྲགས་བྱས་ཡོད་པ་དང་། དེའི་ནང་ཞལ་འདེབས་གནང་མཁན་མང་ཆེ་བ་ཁེ་ལས་གཉེར་མཁན་གྱི་ཕྱུག་པོ་ཡིན་ཡང་། ཕྱི་ལོ་ ༢༠༡༣ དང་ ༢༠༡༤ བསྟུན་མར་ལོ་གཉིས་རིང་རྒྱ་ནག་གི་སྲིད་བློན་ཟུར་པ་ཀྲུའུ་རོང་ཅི་མིང་གཞུང་དེའི་ནང་གི་ཨང་རིམ་མཐོ་གྲས་སུ་བསླེབས་ཡོད་པ་མ་ཟད། ཁོང་གིས་སྔ་རྗེས་སུ་ཁྱོན་རྒྱ་སྒོར་དུང་ཕྱུར་ ༤༦ ལྷག་ཞལ་འདེབས་སུ་སྤྲད་དེ། དཀའ་ངལ་ཡོད་པའི་ཞིང་གྲོང་གི་བྱིས་པ་ཚོའི་ཤེས་ཡོན་སློབ་སྦྱོང་ཐད་རོགས་རམ་གནང་ཡོད་སྐོར་བརྗོད་འདུག 

གོང་གི་གནས་ཚུལ་ཐད་རྒྱ་ནག་རོ་ཕར་ཊི་ཕྱུག་བདག་ཚོགས་པའི་གཙོ་གཉེར་བ་(Rupert Hoogewerf)ཡིས། ཆབ་སྲིད་མི་སྣ་ཞིག་ཞལ་འདེབས་ཕོན་ཆེན་སྤྲོད་མཁན་གྱི་མིང་གཞུང་ནང་བསླེབས་པ་མཐོང་བ་ཐོག་མ་དེ་ཡིན་སྐོར་བརྗོད་ནས་མཐོང་ཆེན་བྱས་ཡོད་དང་། གནས་ཚུལ་དེ་བརྒྱུད་ལམ་དུ་ཁྱབ་རྗེས། མི་མང་པོས་ཀྲུའུ་རོང་ཅི་ནི་རྒན་ཡོལ་དུ་ཕྱིན་པའི་རྒྱ་ནག་གི་ཆབ་སྲིད་མགོ་ཁྲིད་ཚོའི་ཁྲོད་ནས་ཆེས་གཏོང་ཕོད་ཅན་དང་། ཆེས་ཕན་སེམས་ཅན་གྱི་མི་སྣ་ཞིག་ཡིན་པའི་བསྔགས་བརྗོད་བྱེད་ཀྱི་ཡོད་པ་མ་ཟད། རྒྱ་ནག་གུང་ཁྲན་ཏང་གི་ལོ་རྒྱུས་ནང་མང་ལ་ཕན་སེམས་ཆེ་ཞིང་སྐྱོན་གྱིས་མ་གོས་པའི་སྲིད་བློན་ཀྲུའུ་ཨེན་ལི་དང་ཀྲུའུ་རོང་ཅི་ལྟ་བུ་ཞིག་བྱུང་མྱོང་མེད་སྐོར་སོགས་རྗོད་ཀྱི་འདུག

ཡང་པེ་ཅིན་གྱི་རིག་གནས་ཞིབ་འཇུག་ཁང་ཞིག་གི་འགན་འཛིན་མའོ་ཞོ་ཝེ་ཟེར་བས། རྒྱ་གཞུང་གི་ལས་བྱེད་ཚོའི་ནང་ཞལ་འདེབས་ཕོན་ཆེན་སྤྲོད་མཁན་མེད་པའི་རྒྱུ་མཚན་ནི། དངུལ་དེ་སྤྲད་རྗེས་མི་མང་གིས་དངུལ་དེའི་ཡོང་ཁུངས་ཡག་པོ་ཡོད་མེད་ལ་ལབ་གླེང་དང་བརྟག་དཔྱད་མང་པོ་བྱེད་ཀྱི་ཡོད་པས་ཡིན་ལ། གཞུང་ཞབས་ཤིག་གིས་སྒོར་མོ་དེ་འདྲ་མང་པོ་གསོག་ཐུབ་རྒྱུའང་ཁག་པོ་ཡིན་སྐོར་དང་། ཀྲུའུ་རོང་ཅི་ཡིས་དམིགས་དཔེ་ཡག་པོ་ཞིག་བཞག་ཡོད་ཀྱང་། དེ་ཡིས་རྒྱ་ནག་གི་དཔོན་རིགས་ཚོར་སྐུལ་འདེད་ཅི་ཡང་གཏོང་མི་ཐུབ་པ་མ་ཟད། ། ཀྲུའུ་ཡིས་ཁོ་བོའི་དཔེ་དེབ་དག་ལས་བྱུང་བའི་སྒོར་མོ་ཚང་མ་སྤྱི་ཚོགས་བདེ་རྩའི་ཆེད་གཏོང་རྒྱུ་ཡིན་ལུགས་བརྗོད་ཡོད་ཀྱང་། མཐར་གཏུགས་ན་དཔེ་དེབ་པར་སྐྲུན་བྱས་པ་དེའང་སོ་སོའི་མིང་གྲགས་ཀྱི་ཆེད་དུ་ཡིན་སྐོར་བརྗོད་འདུག

ནུབ་ཕྱོགས་དང་བསྡུར་བ་ཡིན་ན། རྒྱ་ནག་གི་ཆབ་སྲིད་མི་སྣའི་ནང་སྤྱི་ཚོགས་བདེ་རྩའི་ཆེད་ཞལ་འདེབས་སྤྲོད་མཁན་ཉུང་ཉུང་ཞིག་ལས་མེད་ཀྱང་། དེ་སྔོན་ཞལ་འདེབས་གྲངས་འབོར་མང་ཤོས་ཀྱི་གྲས་སུ་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་ལི་རིས་ཧན་གྱིས། ཁོ་རང་གི་ཕ་ཡུལ་ཐེན་ཅིན་གྱི་སློབ་མ་ཚོར་ཁྱོན་རྒྱ་སྒོར་ཁྲི་ ༣༥༠༠ ཙམ་གྱིས་བདེ་རྩ་ཚོགས་པ་ཞིག་བཙུགས་ཡོད་པ་དང་། འདས་ལོར་རྒྱ་ནག་གི་སྲིད་བློན་གཞོན་པ་ཟུར་པ་ཆོ་ཧྲི་ཡིས། རྒྱལ་ཁབ་ཀྱི་ཁྲིམས་འཛིན་ལམ་ལུགས་དང་བཅའ་ཁྲིམས་འདྲ་མཉམ་གོང་འཕེལ་དུ་གཏོང་ཆེད་རྒྱ་སྒོར་ཁྲི་ ༡༡༠༠ ཞལ་འདེབས་སུ་སྤྲད་ཡོད་པ་རེད། དེ་བཞིན། རྒྱ་ནག་གི་མགོ་ཁྲིད་འདས་པོ་ཏུན་ཞའོ་ཕིན་ཁྱིམ་ཚང་གིས་ཀྱང་ན་གཞོན་ཚོའི་ཚན་རྩལ་གསར་གཏོད་སྐུལ་འདེད་ཆེད་རྒྱ་སྒོར་ཁྲི་ ༡༠༠ ཞལ་འདེབས་སུ་སྤྲད་མྱོང་ཡོད་འདུག