ར་ཤེལ་ནང་གི་དྲུག་བཞི།

ཉེ་ཆར་རྒྱ་ནག་པེ་ཅིན་གྱི་པར་རིས་སྒྱུ་རྩལ་པ་ཞོ་ཡོན་ (Xu Yong) གྱིས་ལོ་ངོ་ ༢༥ ལྷག་རང་གཅེས་ཉར་བྱས་པའི་བརྩམས་ཆོས་སམ་འདས་དོན་ ༡༩༨༩ ལོའི་གནམ་སྡེ་སྒོ་མོ་ཆེའི་ཐང་ཆེན་གྱི་མཐོ་རིམ་སློབ་མའི་དམངས་གཙོའི་ལས་འགུལ་སྐབས་ཀྱི་པར་ ༦༤ ཙམ་ཧོང་ཀོང་མི་རབས་གསར་པའི་དཔེ་སྐྲུན་ཁང་གིས་དཔར་སྐྲུན་བྱས་ཏེ། “ར་ཤེལ” 《底片》ཞེས་པའི་པར་དེབ་ཀྱི་ངོ་བོར་འགྲེམས་སྤེལ་བྱས་ཡོད་འདུག

པར་དེ་དག་རྒྱ་ནག་ནང་འགྲེམ་སྤེལ་བཀག་འགོག་བྱས་ཡོད་པ་མ་ཟད། ཧོང་ཀོང་གི་དཔེ་ཁང་ཁ་ཤས་ལ་ཡང་འགྲེམ་སྤེལ་བྱེད་མ་བཅུག་པའི་དཀའ་ངལ་འཕྲད་ཡོད་འདུག་པ་དང་། ཉིན་ཤས་སྔོན་པར་དེབ་ཁ་ཤས་སྦྲགས་ཁང་བརྒྱུད་ཞོ་ཡོན་གྱི་ཁྱིམ་དུ་བསྐུར་ཡོང་བར་མཐའ་མཚམས་རྒྱ་ནག་ཞིབ་བཤེར་ལས་ཚན་པས་གཞུང་བཞེས་བཏང་ཡོད་འདུག

ཟླ་འདིའི་ཚེས་ ༢༥ ཉིན་ནེའུ་ཡོག་དུས་བབ་དྲ་ཚིགས་སྟེང་། ཞོ་ཡོན་གྱི་དེབ་གསར་བ་ “ར་ཤེལ་”ཞེས་པ་འདིའི་ནང་དུ།  རྒྱ་ནག་གི་མི་རབས་གསར་པའི་དཔུང་ཁག་ཅིག་གིས་ ༡༩༨༩ ལོར་རྒྱ་ནག་དམར་པོའི་སྲིད་དབང་གཅིག་སྡུད་སྲིད་གཞུང་ལ་ངོ་རྒོད་དང་། མ་འོངས་པར་ཕུགས་བསམ་གྱིས་ཁེངས་ཏེ་དམངས་གཙོའི་ང་རོ་སྒྲོག་པའི་ལོ་རྒྱུས་ཤུལ་བཞག་གི་པར་རྐྱང་རེད།

རྒྱ་གཞུང་གི་དབང་ཆ་མཁྲེགས་འཛིན་པ་ཚོར་མཚོན་ན། པར་འདི་དག་ནི་ཁོ་ཚོར་ཁོང་ཁྲོ་སློང་གཞི་ཞིག་ཏུ་འགྱུར་སྲིད་ཀྱང་། ཞོ་ཡོན་གྱིས་ལོ་ ༢༥ ལྷག་ལ་ཉར་ཚགས་བྱས་པའི་པར་འདི་དག་ཆབ་སྲིད་དང་འབྲེལ་བ་མེད་པའི་ངོས་འཛིན་བྱེད་ཀྱིན་ཡོད་པ་མ་ཟད། ཁོས་བཤད་རྒྱུར་ “འདི་ནི་སྒྱུ་རྩལ་གྱི་པར་དེབ་ཅིག་ཡིན་པ་དང་ཁོས་སྔོན་ཆད་པར་དེབ་ཉི་ཤུ་ལྷག་པར་སྐྲུན་ཟིན་ཡོད་སྟབས། དེ་དག་གི་གོ་དོན་དང་རྒྱབ་ལྗོངས་ལ་གླེང་སློང་བྱེད་འདོད་མི་འདུག” ཅེས་བརྗོད་འདུག

ཟླ་འདིའི་ཚེས་ ༢༦ ཉིན། ཨེ་ཤེ་ཡའི་རྒྱ་ཡིག་སྡེ་ཚན་གྱི་གསར་འགོད་པས་ཧོང་ཀོང་གི་དུས་རབས་གསར་པའི་དཔེ་སྐྲུན་ཁང་གི་ལས་མི་པའོ་ཕོ་ (Bao Pu) ལ་ཁ་པར་བརྒྱུད་པར་དེབ་དེའི་སྐོར་ལ་བཅའ་འདྲི་ཞིག་བྱས་སྐབས། ཁོང་གིས་ “དཔེ་དེབ་དེ་ང་ཚོའི་ལས་ཁུངས་ཀྱིས་དཔར་སྐྲུན་བྱས་ཡོད་པ་ཙམ་ལས་དེའི་རྗེས་ཀྱི་གནས་ཚུལ་གང་ཡང་ངས་མི་ཤེས། འོན་ཀྱང་། ད་ལྟ་ང་པེ་ཅིན་དུ་ཡོད་སྟབས། དེའི་སྐོར་གྱི་གནས་ཚུལ་ཕྱིར་ཧོང་ཀོང་ལ་འབྱོར་ནས་བཤད་དགོས་”ཤེས་བརྗོད་ཡོད་འདུག

དུས་རབས་གསར་བའི་དཔེ་སྐྲུན་ཁང་གསར་འཛུགས་གནང་མཁན་གྲས་ཅཱང་ཡོའུ་ལིས་ (Jiang Yuelei)ལ་བཅའ་འདྲི་བྱས་སྐབས་ཁོང་གིས་ “ཞི་ཡོན་གྱིས་པར་འདི་དག་དཔར་སྐྲུན་བྱས་ན་ཁོ་རང་ལ་ཉེན་ཁ་ཡོད་པ་གསལ་བོར་ཤེས་ཀྱི་ཡོད་ཀྱང་། ཁོང་གིས་ཉེན་ཁར་མ་འཛེམས་པར་དཔར་སྐྲུན་བྱ་རྒྱུའི་ཐག་གཅོད་བྱས་པ་རེད།”ཅེས་བརྗོད་འདུག

ཞོ་ཡོན་ལ་ཁྱོན་སྡོམ་སྐབས་དེའི་དཔར་ག་ཚོད་ཡོད་མེད་གསར་འགོད་པར་བརྗོད་མེད་ཀྱང་། ད་རེབ་ཀྱི་པར་དེབ་དེའི་ནང་པར་གྲངས་ ༦༤ བཀོད་ཡོད་འདུག རྒྱ་ནག་མི་མང་ལ་མཚོན་ན་གྲངས་ཀ་ ༦༤ འདི་ནི་བརྒྱུད་ལམ་ཁག་ནས་ཆེས་མཐོང་དཀོན་པ་དང་། སྲིད་གཞུང་གིས་དུས་རྒྱུན་དོགས་ཟོན་དམ་དྲག་བྱེད་ཡུལ་གྱི་ཨང་གྲངས་ཤིག་ཆགས་ཡོད། དེ་ནི་པེ་ཅིན་གནམ་སྡེ་སྒོ་མོ་ཆེའི་ནང་ཆེན་དུ་ཟླ་ ༦ ཚེས་ ༤ ཉིན་རང་དབང་དང་དམངས་གཙོ་ལ་དགའ་བའི་སློབ་ཕྲུག་ཁྲི་ཕྲག་མང་པོས་དམར་པོའི་སྲིད་གཞུང་ལ་ངོ་རྒོལ་ལས་འགུལ་སྤེལ་སྐབས། གཞུང་གིས་ཁྲབ་ལྡན་འཁོར་ལོ་བཏང་སྟེ་དྲག་གནོན་བྱས་པའི་ཉིན་མོ་དེ་མཚོན།

པར་དེབ་འདི་རྒྱ་ནག་ནང་ལོགས་སུ་འགྲེལ་སྤེལ་བཀག་འགོག་བྱས་ཡོད་པ་མ་ཟད། པར་གྱི་བདག་པོ་ཞོ་ཡོན་རང་ལའང་རག་མི་འདུག གཟའ་འཁོར་སྔོན་མའི་ནང་། “ར་ཤེལ་”དཔེ་དེབ་ཤོག་སྒམ་གཅིག་ལཱེན་པོང་སྦྲགས་ཁང་བརྒྱུད་ཞོ་ཡོན་གྱི་ཁྱིམ་དུ་བསྐུར་ཡོད་ཀྱང་རྒྱ་ནག་གཞུང་གིས་གཞུང་བཞེས་བཏང་ཡོད་འདུག ཞོ་ཡོན་གྱིས་རང་ཉིད་ལ་ཆག་སྒོ་ཡོང་རྒྱུ་ཡིན་པ་ངོས་ལེན་བྱས་ཀྱང་། ཁོས་ད་དུང་ “ར་ཤེལ་འདི་དག་རྙིང་ནས་སེར་པོར་ཆགས་འདུག་སྟབས། ངས་འདི་དག་ད་དུང་དཔར་སྐྲུནམ་བྱས་པར་ག་དུས་བར་བསྒུག་དགོས་སམ།” ཞེས་བརྗོད་འདུག

པར་དེ་དག་ X འོད་ཤོག་དང་ངོ་རྒོལ་བྱེད་མཁན་དག་ཀྱང་གསལ་ལ་མི་གསལ་བའི་རགས་དབྱིབས་ཤིག་ལས་མཐོང་མི་ཐུབ་པས། ར་ཤེལ་དེ་དག་ལ་ཕར་བལྟས་ཚོད་ཀྱིས་རྫུན་མ་ཞིག་ཏུ་སྣང་ཡང་། ཁྱོད་ཀྱིས་ཀུ་ཤུ་རྟགས་ཅན་གྱི་ཁ་པར་ (iPone)དང་། ལག་དེབ་ (iPad) སོགས་བརྒྱུད་ན་ལས་སླ་བོར་མཐོང་ཐུབ། ཐོག་མར་ཁ་པར་དེ་དག་གི་ “རྒྱུན་སྤྱོད་འཇུག་སྒོ་”(Accessibility)ནང་དུ་ཕྱིན་ཏེ་ “ རམ་འདེགས་ཁྱད་ཆོས་”(Common Features) འདེམས་རྗེས་“ཚོན་མདོག་ལྡོག་འགྱུར”(Inverted Colors) ལ་འགྲོ་དགོས་པ་དང་། དེའི་རྗེས་པར་ཆས་ཀྱི་ཤེལ་ངོས་ནས་ཁྱོད་ཀྱིས་ཞོ་ཡོན་གྱི་ར་ཤེལ་པར་དེ་དག་བཀྲུས་རྗེས་ཀྱི་པར་ངོ་མ་ཞིག་ཏུ་མཐོང་ཐུབ་སྐོར་སོགས་འཁོད་འདུག