ས་གནས་མི་མང་བརྒྱ་ཆ་ ༩༩ མཐུན་ལམ་རྡོག་རྩ་གཅིག་སྒྲིལ་ཡིན།

ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་ཏུ་ལས་འགུལ་སྤེལ་ཕྱོགས་ཐོག་རྙོག་གླེང་ཞིག་བྱུང་བ་དེའི་ཐད་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ས་གནས་གཞོན་ནུའི་ཚོགས་གཙོས་ལས་མཚམས་འཇོག་དགོས་པའི་བཀོད་ཁྱབ་བཏང་བ་དེར་ས་གནས་གཞོན་ནུའི་རྒྱུན་ལས་ཚོས་ངོས་ལེན་གནང་མི་འདུག

ཟླ་སྔོན་མའི་ཚེས་ ༣༠ ཉིན། དྷ་རམ་ས་ལའི་དབུས་བོད་ཀྱི་གཞོན་ནུ་ལྷན་ཚོགས་ཀྱིས། ནེའུ་ཡོག་དང་ནེའུ་ཇིར་སི་ས་གནས་གཞོན་ནུ་ལྷན་ཚོགས་ལ་ཡི་གེ་ཞིག་བཏང་སྟེ། འདི་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་ཏུ་རྙོག་གླེང་ཞིག་བྱུང་བ་དེར་དབུས་ནས་ཞིབ་འཇུག་བྱས་པར། ས་གནས་འབྲེལ་ཡོད་ཚོས་ལས་དོན་བྱེད་ཕྱོགས་ལ་འགན་འཁུར་གནང་མ་ཐུབ་པ་དང་། དེ་མིན་གྱི་སྐྱོན་གནས་གཞན་ཡང་ཡོད་པ་བཅས་ལ་བརྟེན་ཏེ། ནེའུ་ཡོག་དང་ནེའུ་ཇིར་སི་ས་གནས་གཞོན་ནུའི་ཚོགས་གཙོ་ངག་དབང་དཔལ་ལྡན་ལགས་ཀྱིས་ཚོགས་གཙོའི་ལས་གནས་ནས་དགོངས་པ་ཞུ་དགོས་པ་མ་ཟད། གཞོན་ནུའི་ཚོགས་མིའི་ཁོངས་ནས་ཀྱང་ཕྱིར་འཐོན་དགོས་སྐོར་བརྗོད་ཡོད་སྟབས། ཟླ་ ༣ ཚེས་ ༣༡ ཉིན་ནེའུ་ཡོག་དང་ནེའུ་ཇིར་སི་ས་གནས་གཞོན་ལྷན་རྒྱུན་ལས་ཀྱིས་དབུས་ལ་ཡི་གེ་ཞིག་བཏང་སྟེ། ད་ལོའི་གསུམ་བཅུའི་དུས་དྲན་ཉིན་གྱི་རྙོག་གླེང་དེ་ནི་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་མི་ཡིན་ཟེར་མཁན་རེ་ཟུང་གིས་ཆེད་དུ་བཟོས་པ་ཞིག་ཡིན་པ་ལས། ས་གནས་མང་ཚོགས་བརྒྱ་ཆ་ ༩༩ རྡོག་རྩ་གཅིག་བསྒྲིལ་གྱིས་༧གོང་ས་མཆོག་དང་བོད་མིའི་སྒྲིག་འཛུགས་ལ་དབུ་འོག་དཔུང་འདེགས་བྱེད་མཁན་ཡིན་པ་དང་། ཟླ་སྔོན་མའི་ཚེས་ ༢༠ ཉིན་རྙོག་གླེང་དེའི་ཐད་ཛ་དྲག་གི་ཚོགས་འདུ་ཞིག་ཚོགས་སྐབས། མང་མོས་ཐོག་ད་ལྟའི་ཚོགས་གཙོས་དགོངས་པ་ཞུ་མི་དགོས་པའི་ཐག་གཅོད་བྱུང་ཡོད་པ། དེ་བཞིན། རྒྱུ་མཚན་ཁ་གསལ་མེད་པར་ས་གནས་ཚོགས་གཙོས་ལས་མཚམས་འཇོག་དགོས་པའི་བཀའ་ཁྱབ་བཏང་བ་ནི་གཞོན་ནུའི་སྒྲིག་གཞིར་འགལ་ཡོད་པ་མ་ཟད། གཞོན་ནུའི་འགན་འཛིན་ལྷན་ཚོགས་ཐོག་བོད་ཀྱི་གཞོན་ནུ་ལྷན་ཚོགས་དང་བོད་རྒྱལ་ཡོངས་རང་བཙན་ལྷན་ཚོགས་བར་འབྲེལ་བ་མི་འཇོག་རྒྱུའི་གྲོས་ཆོད་བཞག་ཡོད་ཀྱང་། ས་གནས་ཀྱི་མི་རེ་ཟུང་གིས་འབྲེལ་བ་བྱེད་ཀྱིན་ཡོད་པ་མ་ཟད། འབྲེལ་བ་བྱེད་མཁན་དེར་ཚོགས་གཙོའི་འགན་དབང་སྤྲད་པ་ནི་གྲོས་ཆོད་རྡོག་རོལ་བཏང་བ་ཞིག་ཡིན་པ། གཞན། མ་འོངས་པར་གནད་དོན་འདི་དང་འབྲེལ་ནས་གནས་ཚུལ་ག་རེ་ལྷག་ཀྱང་དབུས་གཞོན་ནུའི་རྒྱུན་ལས་ཁང་གིས་འགན་འཁུར་དགོས་སྐོར་སོགས་འཁོད་འདུག

དབུས་གཞོན་ནུའི་སྤྱི་ཁྱབ་རྒྱུན་ལས་ཁང་ནས་ས་གནས་ལ་བཏང་བའི་ཡི་གེ་ནང་འཁོད་དོན། འདི་ལོའི་ནེའུ་ཡོག་གསུམ་དུས་གནད་དོན་དེས་ས་གནས་མི་མང་བར་རྩོད་རྙོག་གི་གླེང་གཞི་བྱུང་བ་དང་། བོད་མིའི་སྤྱི་ཚོགས་ཁྱོན་ཡོངས་སུ་བློ་ཕམ་གྱིས་གླེང་ཤུགས་ཆེ་ཇེར་འགྲོ་བཞིན་ཡོད་པ་མ་ཟད། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཐེངས་ ༩ པའི་ཐོག་བློ་ཕམ་བྱུང་བའི་གླེང་སློང་ཡང་གནང་དགོས་བྱུང་བ་དང་། གཞིས་ལུས་སྤུན་ཟླར་ཡང་བློ་ཕམ་ཡོང་གཞི་རུ་འགྱུར་ཡོད།

རྙོག་གླེང་དེ་དང་འབྲེལ་བའི་སྐོར་དེ་ག་ས་གནས་ནས་གསལ་བཤད་དགོས་པའི་ཡི་གེ་ཞིག་འབུལ་ལམ་ཞུས་དོན་ལྟར་ཡིག་ལན་དུས་ཐོག་ཏུ་གནང་འབྱོར་བྱུང་བ་དང་། འདི་ག་སྤྱི་ཁྱབ་དབུས་རྒྱུན་ལས་ཁང་གིས་དཔྱད་ཞིབ་བྱས་པ་བརྒྱུད། འདི་ལོའི་ནེའུ་ཡོག་གི་གསུམ་དུས་སྐབས་ཀྱི་གནད་དོན་ལ་ས་གཞོན་ཚོགས་གཙོ་ནས་བོད་མིའི་ཆིག་སྒྲིལ་སོགས་བོད་ཀྱི་གཞོན་ནུ་ལྷན་ཚོགས་ཀྱི་རྩ་བའི་དམིགས་ཡུལ་དང་། ལས་དོན་བྱེད་ཕྱོགས་སོགས་ལ་འགན་འཁུར་གནང་མ་ཐུབ་པའི་དབང་གིས་འགལ་འཛོལ་སོང་ཡོད་སྟབས། འདི་ལྟ་བུའི་སྲིད་དོན་གྱི་གནད་དོན་གལ་ཆེའི་རིགས་སྒྲིག་གཞིའི་འབྲུ་དོན་ལྟར་སྤྱི་ཁྱབ་དབུས་རྒྱུན་ལས་ལ་ངེས་པར་དུ་སྙན་སེང་བཀའ་འཁྲོལ་དང་དྲི་བསྡུར་བྱ་དགོས་ཀྱང་དེ་ལྟར་གནང་མེད་པ་མ་ཟད། འདས་པའི་ལོ་ངོ་གཅིག་ལྷག་གི་རིང་ལ་ས་གཞོན་ཚོགས་གཙོས་སྤྱི་ཁྱབ་རྒྱུན་ལས་ཁང་གི་ལམ་སྟོན་ལ་གསན་འཇོག་མ་གནང་བ་སོགས་ཀྱི་གནད་དོན་ཡང་བྱུང་ཡོད་པར་བརྟེན། འབྱུང་འགྱུར་ཐལ་ཆེའི་གནད་དོན་རིགས་མི་འབྱུང་བའི་ཆེད་དུ། ནེའུ་ཡོག་དང་ནེའུ་ཇར་སི་ས་གནས་གཞོན་ལྷན་གྱི་ཚོགས་གཙོ་ངག་དབང་དཔལ་ལྡན་ཕྱི་ལོ་ ༢༠༡༥ ཟླ་ ༣ ཚེས་ ༣༠ ནས་བཟུང་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༦ བར་ས་གནས་རྒྱུན་ལས་ཀྱི་ལས་གནས་དང་ཚོགས་མིའི་འགན་དབང་མཚམས་འཇོག་དགོས་རྒྱུ་དང་། ཞིབ་ཕྲའི་ཐག་གཅོད་འགན་ལྷན་ཐེངས་ ༤༦ ཐོག་ནས་གནང་རྒྱུ། ཕྱི་ལོ་ ༢༠༡༥ ལོའི་ཟླ་ ༤ ཚེས་ ༢ གོང་ལས་གནས་དང་བཅས་པ་རྩིས་སྤྲོད་ཀྱིས་སྐབས་རྗེས་མའི་རྒྱུན་ལས་གསར་འདེམས་མ་བྱུང་བར་ས་གནས་ཚོགས་གཞོན་ནས་ཚོགས་གཙོའི་འགན་དབང་བཞེས་དགོས་པ་བཅས་ཀྱི་ཐག་ གཅོད་ཀྱི་བཀོད་ཁྱབ་དང་། སླད་མར་ཡང་དེ་གའི་ས་གཞོན་ཚོགས་མིའམ་རྒྱུན་ལས་སུ་རུང་གིས་གཞོན་ལྷན་གི་མིང་ཐོག་ནས་ཞུ་སྒོ་ཆེ་ཆུང་ཅི་རིགས་ལ་གཞོན་ལྷན་གྱི་སྒྲིག་གཞི་དང་རང་ཉིད་ཀྱི་མཆོག་གསུམ་དབང་གཙུགས་ཀྱི་ཁས་ལེན་དམ་བཅའ་ལས་མི་འགལ་བ་ངེས་པར་གནང་དགོས་པ་མ་ཟད། སྲིད་དོན་དང་འབྲེལ་བའི་ལས་དོན་གལ་ཆེའི་རིགས་ངེས་པར་དུ་སྤྱི་ཁྱབ་དབུས་རྒྱུན་ལས་ལ་སྙན་སེང་གོ་བསྡུར་ཞུ་དགོས་པའི་ནན་བརྗོད་ཞུ་རྒྱུ་ཡིན། ཞེས་བཀོད་འདུག

ཕྱི་ཚེས་ ༣༡ ཉིན་ནེའུ་ཡོག་དང་ནེའུ་ཇར་སི་ས་གནས་གཞོན་ནུས་དོན་ཚན་ ༡༠ ཅན་གྱི་གསལ་བཤད་ཡི་གེ་ཞིག་དབུས་གཞོན་ནུར་བཏང་བའི་ནང་བཀོད་དོན། ༡༽ གཞོན་ནུའི་དབུས་སྤྱི་ཁྱབ་རྒྱུན་ལས་ནས་གནས་ཚུལ་གང་སར་ཞིབ་འཇུག་མེད་པར། ང་ཚོ་ད་ལྟ་འས་གནས་ཐོག་ཡོད་པའི་ས་གནས་གཞོན་ནའི་རྒྱུན་ལས་དང་། གསུམ་དུས་གྲ་སྒྲིག་འགན་འཁུར་གནང་མཁན་ནིའུ་ཡོག་དང་ནིའུ་ཇར་སི་བོད་རིགས་སྤྱི་ མཐུན་ཚོགས་པ་དང་། ས་གནས་བོད་ཀྱི་བུད་མེད་ལྷན་ཚོགས། ས་གནས་མདོ་ཁམས་ཆུ་བཞི་སྒང་དུག་བཅས་པར་མཐོང་ཆུང་ཁྱད་གསོད་ཀྱིས་དྲང་བདེན་ལ་ རྡོག་རོལ་བཏང་ནས། ད་བར་༧གོང་ས་མཆོག་དང་བོད་མིའི་སྒྲིག་འཛུགས་ལ་སྐྱོན་བརྗོད་ཁོ་ན་བྱེད་མཁན་ གྱི་མི་སྣའི་མངོན་འདོད་ལ་རྒྱབ་སྐྱོར་གྱིས་ས་གནས་ཚོགས་གཙོ་གནས་དབྱུང་བཏང་བ་དང་། སྔོན་ཚུད་ནས་གྲ་སྒྲིག་གིས་དེ་ཉིན་ཆེད་མངགས་རྙོག་ཟིང་སློང་མཁན་དང་། ལོག་པའི་དྲིལ་བསྒྲགས་བྱེད་མཁན་གྱི་གང་བཤད་ལ་ཆ་འཇོག་གིས་ཁོ་ཚོའི་རྒྱབ་ཏུ་ ལངས་པ་ནི། གཞིས་བྱེས་བོད་མི་སྤྱི་དང་། ལྷག་པར་ནིའུ་ཡོག་དང་ནིའུ་ཇར་སི་མངའ་ཁུལ་དུ་ཡོད་པའི་རྒྱལ་ཞེན་ལྷག་བསམ་ཅན་གྱི་བོད་མི་ཡོངས་རྫོགས་ཐུགས་ཕམ་གྱུར་གཞི་ལས་མ་འདས།

༢༽ འདི་ག་ས་གནས་རྒྱུན་ལས་ཀྱི་མིང་ཐོག་ནས་ ༢༠༡༥ ལོའི་ཟླ་ ༣ ཚེས་ ༢༩ ཉིན་དབུས་ལ་ཡིག་ལན་ཕུལ་གནས་ནང་། ད་ལམ་རྙོག་གླེང་གང་བྱུང་བ་དེ་དག་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་ མི་ཡིན་ཟེར་བ་སོགས་འགའ་ཞིག་གིས་ཆེད་མངགས་བཟོས་པ་ལས། ནིའུ་ཡོག་དང་ནིའུ་ཇར་སི་ཁུལ་གྱི་སེར་སྐྱ་མི་མང་བརྒྱ་ཆ་༩༩ མཐུན་ལམ་རྡོག་རྩ་གཅིག་སྒྲིལ་གྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ དང་དབུས་བོད་མིའི་སྒྲིག་འཛུགས་ཀྱི་དབུ་འོག་དཔུང་འདེགས་ཞུ་མཁན་ཤ་སྟག་ཡིན་པས་ ཐུགས་དོགས་གནང་མི་དགོས་པ་དང་། གསུམ་བཅུའི་དུས་དྲན་གྱི་བྱུང་རྐྱེན་སྐོར་རིང་མིན་ཟླ་ ༤ ཚེས་ ༤ ཉིན་སྐུ་ཚབ་དོན་གཅོད་དབུ་དཀར་ཚང་སྐལ་བཟང་རྡོ་རྗེ་ལགས་དང་། བྱང་ཨ་རིའི་སྤྱི་འཐུས་བཀྲིས་རྣམ་རྒྱལ་ལགས། དེ་བཞིན་བྱང་ཨ་རིའི་སྤྱི་འཐུས་ནོར་བུ་ཚེ་རིང་ལགས་བཅས་དབུ་བཞུགས་ཐོག་ཚོགས་པ་ དྲུག་གི་རྒྱུན་ལས་རྣམས་ཚོགས་འཛོམས་སར་སྦྱང་བཤད་ཀྱིས་དགེ་འདོན་སྐྱོན་སེལ་ གནང་གཏན་འཁེལ་བ་བཞིན་མཐའ་བསྡོམས་གནས་ཚུལ་གང་བྱུང་ཆད་ལུས་མེད་པ་དབུས་སྤྱི་ ཁྱབ་རྒྱུན་ལས་རྣམ་པར་སྙན་སྒྲོན་ཆོག་པ་ཞེས་གསལ་པོ་བཀོད་ཡོད་ཀྱང་། སྐུ་ཚབ་དོན་གཅོད་དང་། བྱང་ཨ་རིའི་སྤྱི་འཐུས་རྣམ་གཉིས་ཀྱི་ཞིབ་འཇུག་གནང་རྒྱུའི་ལས་འཆར་ལ་ཡིད་ཆེས་ མ་གནང་བར་བློ་ཕམ་ཆེ་གཤིས། ཞིབ་འཇུག་བྱེད་རྒྱུར་ཉིན་ཞག་བཞི་ལས་མེད་པ་སྒུག་མི་ཐུབ་པའི་རྒྱུ་མཚན་ཡིག་ ཐོག་གསལ་བཤད་ཡོད་པ་ཞུ།

༣༽ དབུས་ཀྱི་ཕྱག་བྲིས་ནང་དཔལ་ལྡན་བོད་མི་མང་སྤྱི་འཐུས་ཚོགས་ཐེངས་དགུ་པའི་ཐོག་ བློ་ཕམ་བྱུང་བའི་གླེང་སློང་བྱུང་ཚུལ་གསུངས་པ་ནི་ཕྱོགས་གཅིག་གི་གནས་ཚུལ་ཡིན་ ཞིང་། སྐབས་དེར་ས་གནས་ས་ཐོག་ཏུ་ཕེབས་ནས་གནས་ཚུལ་ཡོངས་རྫོགས་ཇི་མ་ཇི་བཞིན་དུ་ མཁྱེན་པ་དཔལ་ལྡན་ཤེས་རིག་བཀའ་བློན་མཆོག་གི་གསལ་བཤད་དང་། བྱང་ཨ་རིའི་བོད་མིའི་གནས་སྟངས་ལ་དུས་རྒྱུན་རྟོག་ཞིབ་གནང་མཁན་སྤྱི་འཐུས་ གཉིས་ཡོད་པ་ནས་སྤྱི་འཐུས་བཀྲིས་རྣམ་རྒྱལ་ལགས་སྐབས་དེར་ནིའུ་ཡོག་ཏུ་ཕེབས་ནས་ གནས་ཚུལ་ཆ་ཚང་མཁྱེན་གྱི་ཡོད་ཀྱང་། སྐུ་གཟུགས་བདེ་མིན་གྱིས་ཚོགས་ཆེན་དུ་ཕེབས་མ་ཐུབ་པས་སྤྱི་འཐུས་ནོར་བུ་ཚེ་ རིང་ལགས་ཀྱིས་གསལ་བཤད་མཐིལ་ཕྱིན་གནང་བ་དེ་དག་ལ་བརྩི་འཇོག་མེད་པར་རྡོག་རོལ་ གཏོང་རྐྱང་གནང་བར་བློ་ཕམ་ཡོད།

 ༤༽ ཡང་དབུས་ཀྱི་ཕྱག་བྲིས་ནང་། འདི་ལོའི་ནིའུ་ཡོག་གི་གསུམ་དུས་སྐབས་ཀྱི་གནད་དོན་ལ་ས་གཞོན་ཚོགས་གཙོ་ནས་བོད་ མིའི་ཆིག་སྒྲིལ་སོགས་བོད་ཀྱི་གཞོན་ནུ་ལྷན་ཚོགས་ཀྱི་རྩ་བའི་དམིགས་ཡུལ་དང་། ལས་དོན་བྱེད་ཕྱོགས་སོགས་ལ་འགན་འཁུར་གནང་མ་ཐུབ་པའི་དབང་གིས་འགལ་འཛོལ་བྱུང་ ལུགས་དང་། འདས་པའི་ལོ་ངོ་གཅིག་ལྷག་རིང་ས་གཞོན་ཚོགས་གཙོས་སྤྱི་ཁྱབ་དབུས་རྒྱུན་ལས་ཁང་ གི་ལམ་སྟོན་གསན་འཇོག་མ་གནང་བ་སོགས་བཀོད་པར་ང་ཚོ་ས་གནས་རྒྱུན་ལས་ནས་ངོས་ལེན་ རྩ་བ་ནས་ཞུ་ཐབས་མེད། གང་ལགས་ཟེར་ན། ད་ཕན་ང་ཚོ་ས་གནས་རྒྱུན་ལས་ནས་ལས་དོན་ཆེ་འབྲིང་ཆུང་གསུམ་གཞོན་ནུའི་སྒྲིག་ གཞི་དང་། མང་གཙོའི་འགྲོ་ལུགས་དང་མཐུན་པར་གྲོས་བསྡུར་སྦྱང་བཤད་ཀྱིས་སྤྱི་མོས་སམ་མང་ མོས་ཀྱི་ཐོག་ནས་ཐག་གཅོད་བྱས་པ་ཁོ་ན་ལས། ཚོགས་གཙོ་མི་སྒེར་གཅིག་གིས་རང་འཚམས་ཐག་གཅོད་བྱས་རིགས་རྩ་བ་ནས་མེད་པ་དེས་ནས། ཚོགས་གཙོ་བྱེ་བྲག་པར་སྐྱོན་འཛུགས་དགོས་དོན་གང་ཡང་མ་མཐོང་ཞིང་། ལར་ནས་དབུས་ནས་ཚོགས་གཙོ་ལས་མཚམས་འཇོག་དགོས་པའི་བཀོད་ཁྱབ་དེ་གཞོན་ནུའི་ ཁྲིམས་དང་སྒྲིག་གཞི་གང་ལ་གཞི་བཟུང་ནས་ཐག་གཅོད་གནང་བ་ཡིན་ནམ། ཉེ་ཆར་ཕྱི་ཟླ་ ༣ ཚེས་ ༢༠ ཉིན་ས་གནས་སུ་ཛ་དྲག་ཚོགས་འདུའི་སྐབས་ཚོགས་མི་རེ་ཟུང་ནས་ཚོགས་གཙོ་དགོངས་ཞུ་ དགོས་ཚུལ་བསམ་འཆར་བཏང་བར་རྒྱུན་ལས་གྲོས་བསྡུར་གྱིས་དགོངས་ཞུ་མི་དགོས་པའི་ མང་མོས་ཐག་གཅོད་ཀྱིས་གྲོས་ཆོད་བཞག་པ་དེར། དབུས་ནས་བརྩི་མེད་ཀྱིས་རྒྱུ་མཚན་དང་སྒྲིག་གཞི་ཁ་གསལ་མེད་པར་ལས་དོན་མཚམས་ འཇོག་དགོས་པའི་བཀོད་ཁྱབ་གནང་བར་ངོས་ལེན་ཞུ་ཐབས་མེད། ཅི་སྟེ་དབུས་ནས་དཔྱད་ཞིབ་གནང་ཡོད་ན། དབུས་ཀྱི་ཚོགས་གཙོ་ས་གནས་སུ་ཕེབས་སྟེ་རྒྱུན་ལས་དང་མང་ཚོགས་ནང་གསལ་བཤད་མཐིལ་ ཕྱིན་པ་གནང་བའི་རེ་འབུལ་ཞུ་རྒྱུ་ཡིན། ལྷག་པར་ང་ཚོས་ད་བར་ལས་དོན་ཆེ་འབྲིང་ཆུང་གསུམ་གང་འདྲ་ཞིག་ཡིན་ཡང་། གཞོན་ནུ་ལྷན་ཚོགས་ཀྱི་སྒྲིག་གཞིའི་དམིགས་ཡུལ་དོན་ཚན་དང་པོ་གཞི་ལ་བཞག་པའི་ ཐོག་ནས་ལག་ལེན་བསྟར་བ་ཤ་སྟག་ཆགས་ཀྱི་ཡོད་པས། དེ་ལ་ནོར་འཁྲུལ་གཟིགས་པར་ང་ཚོ་བློ་ཕམ་ཡོད། གལ་ཏེ་གཞོན་ནུའི་སྒྲིག་གཞིའི་དམིགས་ཡུལ་དང་པོ་དེ་འགྲིགས་ཀྱི་མེད་པ་དང་དབུས་ ནས་བརྩི་འཇོག་ཞུ་མི་དགོས་པ་ཞིག་དགོངས་ཀྱི་ཡོད་ན། སྒྲིག་གཞིར་འགྱུར་བ་གཏོང་དགོས་པ་མ་ཟད། ང་ཚོར་ཡང་ཡིག་ཐོག་ཏུ་ངེས་གནང་ཡོད་པ་ཞུ།

༥༽ འབྲོང་བསད་པ་མ་ཚད་རྔ་མའི་རྒྱལ་མཚན་གྱི་དཔེ་ལྟར་ས་གནས་མི་དམངས་ཀྱིས་འོས་ འདེམས་བྱས་པའི་ང་ཚོ་རྒྱུན་ལས་མི་ངོ་གསོན་པོ་རྣམས་དང་འོས་བསྡུ་བ་ནིའུ་ཡོག་ དང་ནིའུ་ཇར་སི་གཉིས་ཀྱི་ཚོགས་མི་ཡོད་བཞིན་དུ། དབུས་ནས་ས་གནས་ཚོགས་གཙོའི་ལས་གནས་མཚམས་འཇོག་ཡིན་ཟེར་བར། ས་གནས་གཞོན་ནུ་དང་མི་མང་ལ་མཐོང་ཆུང་བྱས་པར་ངོས་འཛིན་བྱེད་ཀྱིན་ཡོད། ལྷག་པར་དུའང་སྐབས་རྗེས་མའི་རྒྱུན་ལས་གསར་འདེམས་མ་བྱུང་བར་ས་གནས་ཚོགས་གཞོན་ ངག་དབང་བཀྲིས་ལགས་ནས་ཚོགས་གཙོའི་འགན་དབང་ལེན་དགོས་པའི་བཀོད་ཁྱབ་བཏང་བ་ནི། དེ་བས་ཀྱང་ང་ཚོར་མཐོང་ཆུང་དང་སྒྲིག་གཞིར་རྩིས་མེད་བཏང་བར་ངོས་འཛིན་བྱེད་ ཀྱི་ཡོད། སྐབས་བཅོ་ལྔ་པའི་གཞོན་ནུའི་ཚོགས་ཆེན་སྐབས་ཀྱི་གྲོས་ཆོད་ནང་བོད་ཀྱི་གཞོན་ནུ་ ལྷན་ཚོགས་དང་། བོད་རྒྱལ་ཡོངས་རང་བཙན་ལྷན་ཚོགས་གཉིས་བར་འབྲེལ་བ་མེད་ལ་མ་འོངས་པ་ལ་ཡང་འབྲེལ་ བ་གཏན་ནས་འཇོག་རྒྱུ་མིན་པ་ཚོགས་ཆེན་དེ་ཐོག་ནས་ཐག་གཅོད་བྱུང་ཞེས་གསལ་པོ་འཁོད་བཞིན་དུ་ནིའུ་ཡོག་ཏུ་གོང་གསལ་ཚོགས་པའི་ལས་འགུལ་སྔ་རྗེས་ལ་ངག་དབང་ བཀྲིས་ཀྱིས་དངོས་སུ་ཞུགས་ནས་གཏམ་བཤད་ཀྱང་བྱས་ཡོད་པ་མ་ཟད། ༧གོང་ས་མཆོག་ལ་དངོས་ཤུགས་བརྒྱུད་གསུམ་དུ་ཟུར་ཟ་དང་མཚན་སྨད་ཞུ་མཁན་གྱི་མི་ སྣ་དང་ཚོགས་པར་རྒྱུན་དུ་འབྲེལ་བ་བྱེད་ཀྱི་ཡོད་པ་མཁྱེན་བཞིན་དུ་ཚོགས་གཙོའི་ འགན་དབང་སྤྲད་པ་ནི་དབུས་ནས་ཚོགས་ཆེན་གྱི་གྲོས་ཆོད་ལ་རྩིས་མེད་རྡོག་རོལ་བཏང་ བ་ཞིག་རེད།

༦༽ ད་དུང་ཐེར་འདོན་བྱེད་རྒྱུར་དབུས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ནས་ ཀྱང་གོང་གསལ་བོད་རྒྱལ་ཡོངས་རང་བཙན་ལྷན་ཚོགས་ཟེར་བའི་ཚོགས་མི་རྒྱུན་དུ་༧གོང་ ས་མཆོག་ལ་དངོས་ཤུགས་བརྒྱུད་གསུམ་དུ་ཟུར་ཟ་དང་མཚན་སྨད་ཞུ་མཁན་དེ་ཚོར་དངོས་ སུ་འབྲེལ་བ་བྱས་པ་དང་། ངག་དབང་བཀྲིས་བརྒྱུད་ང་ཚོ་ས་གནས་གཞོན་ནུའི་རྒྱུན་ལས་ཀྱི་མཐུན་ལམ་གཏོར་བཤིག་ ཆེད་ལྐོག་གྲོས་ངན་གཡོའི་ལས་འགུལ་ནང་ཞུགས་པ། ལྷག་པར་༧གོང་ས་མཆོག་ལ་ཟུར་ཟ་དང་མཚན་སྨད་ཞུ་མཁན་དེ་རྣམས་ཀྱིས་ས་གནས་ཚོགས་ གཙོས་༧གོང་ས་མཆོག་གི་བཀའ་སློབ་ལ་བརྩི་བཀུར་དགོས་པའི་གཏམ་བཤད་ལ་མི་དགའ་བར་ ཚོགས་གཙོའི་ལས་འགན་ནས་དགོངས་ཞུ་དགོས་འདུན་སྔ་ཕྱི་བར་གསུམ་བཏོན་པར་དབུས་ ཚོགས་གཙོས་དངོས་སུ་རྒྱབ་སྐྱོར་གྱིས་ད་ཆ་ཁོ་ཚོའི་འདོད་དོན་སྒྲུབ་པ་འདི་ནི། དབུས་ཀྱི་གྲོས་ཆོད་དང་རྩ་འཛིན་ཁྲིམས་གཞིའི་ཡིག་ཆའི་འབྲུ་དོན་ལ་རྩ་འགལ་ཡིན་པར་མཐོང་གི་འདུག

༧༽ རྒྱ་གར་ལྷོ་ཕྱོགས་ཀྱི་ས་གཞོན་ཆེ་ཁག་དབུས་པའི་ས་གནས་གལ་འགངས་ཆེན་པོ་བརྒྱད་ ཀྱི་གཞོན་ནུ་ལྷན་ཚོགས་ནས་༧གོང་ས་མཆོག་གི་བཀའ་སློབ་ལམ་་སྟོན་གཞིར་བཟུང་ཤར་ བསྐྱོད་དང་དབུས་བོད་མིའི་སྒྲིག་འཛུགས་ལ་རྒྱབ་སྐྱོར་ཞུ་རྒྱུའི་དགོས་འདུན་ སྟོན་པ་འདི་ལ་དབུས་གཞོན་ནུ་ལྷན་ཚོགས་ཀྱི་རྒྱབ་སྐྱོར་ཞུ་རྒྱུའི་ཚབ་ལ། དེ་ལས་ཟློག་སྟེ་གཞོན་ནུའི་སྒྲིག་འཛུགས་ནས་ཕྱིར་འབུད་བཏང་བའི་ལེ་ཁག་དང་ཆབ་ སྲིད་ཀྱི་ནག་ཉེས་དེ་དབུས་སྤྱི་ཁྱབ་ཀྱི་ཚོགས་གཙོར་ཡོད།

༨༽ ༢༠༡༤ ལོའི་ཟླ་ ༡༡ ནང་༧གོང་ས་༧སྐྱབས་མགོན་ཆེན་པོ་མཆོག་ནིའུ་ཡོག་ཏུ་ཆིབས་བསྒྱུར་བཀའ་དྲིན་ཆེ་ བའི་གོ་སྐབས་དང་བསྟུན་ས་གནས་གཞོན་ནུ་ལྷན་ཚོགས་ནས་གཞོན་ནུའི་སྒྲིག་གཞིའི་ དམིགས་ཡུལ་དོན་ཚན་དང་པོའི་དགོངས་དོན་གཞི་བཟུང་བཀའ་སྲུང་ཅི་སྒྲུབ་ཞུ་རྒྱུའི་ སྙན་ཞུ་ཕུལ་བར་དབུས་ནས་མ་འཐུས་པའི་རྣམ་འགྱུར་དང་སྡིག་རའི་བཀའ་རྩད་ཕེབས་པ་མ་ ཟད། དབུས་ཚོགས་གཙོ་སྔ་ལོ་ནིའུ་ཡོག་ཏུ་ཕེབས་སྐབས་མི་མང་ལ་ཁུངས་ལུང་མེད་པའི་གཏམ་འཆལ་གྱི་གསུང་བཤད་གནང་བའི་རྒྱུ་རྐྱེན་ལ་བརྟེན་ནས། ས་གནས་སུ་མི་མང་ནང་ཁུལ་རྙོག་འཛིང་བྱུང་བ་དང་། དུས་དེ་ནས་བཟུང་རྒྱུན་ལས་ཚོགས་མི་ནང་ཁུལ་ཡང་བསམ་ཚུལ་མ་མཐུན་པའི་དཀའ་ངལ་བྱུང་བ་འདི་སྐོར་བརྙན་པར་ར་སྤྲོད་བྱ་རྒྱུ་ཡོད་ཀྱང་། བོད་མིའི་ཆིག་སྒྲིལ་དང་གཞོན་ནུ་ལྷན་ཚོགས་ཀྱི་སྒྲིག་འཛུགས་ལ་བསམ་ནས་བཟོད་ སྒོམ་དང་། མང་ཚོགས་ལ་བརྡབ་གསིག་མི་འབྱུང་བ་གཙོ་དོན་བྱས་ཡོད། ལྷག་པར་དེ་རིང་གི་ཕྲག་བྲིས་ནང་ད་བར་དབུས་ཀྱི་ལམ་སྟོན་ལ་གསན་འཇོག་གནང་མ་སོང་ གསུངས་པ་དེ་ནི་བདེན་པ་མིན་པའི་སྐྱག་རྫུན་ཁོ་ན་རེད། འབྱུང་འགྱུར་འདི་འདྲ་སུ་ལའང་མི་གནང་བའི་འབོད་སྐུལ་ཞུ་གི་ཡོད།

༩༽ གོང་གསལ་གསུམ་བཅུའི་དུས་དྲན་གྱི་བྱུང་རྐྱེན་སྐོར་འདི་ལོ་ཟླ་ ༤ ཚེས་ ༤ ཉིན་སྐུ་ཚབ་དོན་གཅོད་མཆོག་དང་བཀུར་འོས་བྱང་ཨ་རིའི་སྤྱི་འཐུས་རྣམ་གཉིས་དབུ་ བཞུགས་ཐོག་ཚོགས་པ་དྲུག་གི་རྒྱུན་ལས་ཚོགས་འཛོམས་སར་སྦྱང་བཤད་དགེ་འདོན་སྐྱོན་ སེལ་གནང་གཏན་འཁེལ་བ་བཞིན་མཐའ་བསྡོམས་ལ་ང་ཚོས་གུས་བརྩི་ཞུ་རྒྱུ་ཡིན་རུང་། ད་ཆ་དེ་གའི་བཀོད་ཁྱབ་ལ་བརྟེན་ནས་ཚོགས་འདུར་འགོག་རྐྱེན་རྙོག་ཟིང་བྱུང་ཚེ་དེའི་ལེ་ཁག་དབུས་ལ་ཡོད་པས་འགན་བཞེས་གནང་དགོས།

༡༠༽ ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་སྐབས་རྗེས་མའི་རྒྱུན་ལས་འོས་ བསྡུའི་ཐད་ཟླ་ ༤ ཚེས་ ༡༢ ཉིན་བྱེད་རྒྱུར་རྒྱུན་ལས་ཚོགས་འདུའི་གྲོས་ཆོད་དགོངས་དོན་གཏན་འབེབས་གསལ་ བསྒྲགས་བྱས་ཟིན་པ་ལྟར། ས་གནས་གཞོན་ནུའི་འགན་དབང་འོས་ཐོན་རྒྱུན་ལས་གསར་པར་བཀྲིས་ལོ་ལེགས་ངང་རྩིས་ འབུལ་ཞུ་འཆར་ཡིན་ཡང་། ད་ཆ་དབུས་ཀྱི་ཁུངས་མེད་ཕྱག་བྲིས་ལ་བརྟེན་ནས་འོས་བསྡུ་བྱེད་མ་ཐུབ་པའམ་གླེང་ རྙོག་བྱུང་ན་དེའི་འགན་དབང་ཆ་ཚང་དབུས་ནས་བཞེས་དགོས། མཐའ་དོན་དབུས་གཞོན་ནུ་ལྷན་ཚོགས་ནས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་ གཞིའི་ལེ་ཚན་བཞི་པ་དམིགས་ཡུལ་གྱི་དོན་ཚན་དང་པོ་ནང་གསལ་ ༼གཞིས་བྱེས་བོད་མི་ཡོངས་ཀྱི་བློ་གཏད་བཅོལ་ཡུལ་གཅིག་ཉིད་༧གོང་ས་༧སྐྱབས་མགོན་ ཆེན་པོའི་དབུ་ཁྲིད་ལམ་སྟོན་ཡང་དག་མུན་སེལ་འོག་ཤར་བསྐྱོད་བྱ་རྒྱུ་ཁས་ལེན་དམ་ བཅའ་བཞག་རྒྱུ༽ཞེས་འཁོད་ཡོད་པ་དེ་འགྲིཊ་པ་ཡིན་ན་ང་ཚོས་ད་བར་ལས་དོན་གང་ བརྩམས་ཡོད་པར་ནོར་འཁྲུལ་བརྟན་ནས་མེད། གལ་སྲིད་དམིགས་ཡུལ་དོན་ཚན་དང་པོ་ཞི་བཟུང་ལས་འགུལ་སྤེལ་བར་དབུས་ནས་ནོར་འཁྲུལ་དུ་གཟིགས་ཀྱི་ཡོད་ན། ས་གཞོན་ལ་དབུས་ནས་ཡིག་ཐོག་ཏུ་འབྲེལ་བཤད་ཡོད་པ་ཞུ། ཞེས་སོགས་འཁོད་འདུག

གསར་འགོད་པ། དོན་གྲུབ།