རྒྱ་ནག་གི་བཙོན་པའི་དབང་བོ་གསོན་ལེན་གནས་ཚུལ་ཇེ་གསལ་དུ་སོང་།

འདས་པའི་ལོ་ཤས་གོང་ནས་རྒྱ་ནག་གིས་ཆོས་འཁོར་རྩ་རླུང་སྒོམ་སྒྲུབ་པ་གཙོས་པའི་སྲོག་ཆད་བཙོན་པ་ཚོའི་དབང་བོ་གསོན་ལེན་བྱེད་ཀྱིན་ཡོད་པའི་གནས་ཚུལ་ཞིག་ཁྱབ་ཡོད་ཅིང་། ཉེ་ལམ་སྲིད་གྲོས་ཚོགས་འདུའི་མཇུག་ཏུ། རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་ཟུར་བ་ཧོང་ཅེད་ཧྥོ་ཡིས་གནས་ཚུལ་དེ་ངོས་ལེན་བྱས་ཡོད་འདུག

ལོ་ངོ་བཅུ་གྲངས་གོང་ནས་བཟུང་རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པ་གཙོ་བྱས་པའི་བཙོན་པ་ཚོའི་དབང་བོ་གསོན་ལེན་བྱེད་བཞིན་ཡོད་པའི་གནས་ཚུལ་ཞིག་ཕྱིའི་བརྒྱུད་ལམ་ཁག་ཏུ་ཁྱབ་ཡོད་པ་དང་། ༢༠༠༦ ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས་རྒྱ་གཞུང་གི་བཙོན་པའི་དབང་བོ་གསོན་ལེན་ལ་ཞིབ་འཇུག་བྱས་བར་འབྲས་བུ་ཆེན་པོ་ཞིག་ཐོན་ཐུབ་མེད་ཀྱང་། ༡༩༩༩ ལོ་ནས་རྒྱ་ནག་ནི་རྒྱལ་སྤྱིའི་སྟེང་དབང་བོ་བརྗེ་ལེན་བྱེད་མཁན་ཨང་གཉིས་པ་ཆགས་ཡོད་པའི་ངོས་འཛིན་གཅིག་ཅར་དུ་བྱུང་ཡོད། རྒྱ་ནག་གཞུང་གིས་གནས་ཚུལ་དེར་ངོས་ལེན་རྩ་བ་ནས་བྱས་མེད་པ་མ་ཟད། བཙོན་པའི་དབང་བོ་གསོན་ལེན་བྱེད་བཞིན་པའི་ལས་གཞི་མང་པོ་ཞིག་ཧ་ཅང་གསང་རྒྱ་དམ་པོའི་ཐོག་མུ་མཐུད་ལག་བསྟར་བྱས་ཡོད་འདུག

སྐབས་དེར་རྒྱ་ནག་ལ་དབང་བོ་ཞལ་འདེབས་ཀྱི་ཐེབས་རྩ་ཚོགས་པ་མེད་སྟབས། རྒྱ་ནག་ནང་གི་མིའི་དབང་བོ་མང་པོའི་ཡོང་ཁུངས་གསལ་བོ་མེད་པ་དང་། ༢༠༠༥ ལོའི་ཟླ་ ༧ བའི་ནང་རྒྱལ་སྤྱིའི་མཆིན་པ་བརྗེ་ལེན་ (World Conference of liver transplant) ཀྱི་ཚོགས་ཆེན་སྟེང་། རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་ཟུར་བ་ཧོང་ཅེད་ཧྥོ་ཡིས་ (Huang Jiefu) ཟེར་བས་རྒྱ་ནག་གིས་སྲོག་ཆད་བཙོན་པ་ཚོའི་དབང་བོ་བེད་སྤྱོད་གཏོང་གི་ཡོད་པ་ངོས་ལེན་བྱས་ཡོད་ཀྱང་། རྒྱ་ནག་གཞུང་ཕྱོགས་ནས་གནས་དེའི་སྐོར་ལ་གསལ་བཤད་གང་ཡང་བྱས་མེད། ཉེ་ཆར་རྒྱ་ནག་དབུས་སྲིད་གྲོས་ཚོགས་ཆེན་རྗེས་ལ། ཧོང་ཅེད་ཧྥོ་ཡིས་བཙོན་པའི་དབང་བོ་གསོན་ལེན་བྱེད་པ་ནི་ཛ་དྲག་གི་ནད་པ་སྐྱོབ་ཆེད་ཡིན་སྐོར་བརྗོད་ཡོད་པ་དང་། དེའི་རྗེས་ཧོང་ཀོང་རྨ་བྱའི་དྲ་བའི་སྟེང་བཙོན་པའི་དབང་བོ་གསོན་ལེན་བྱེད་པ་ནི་ཀྲུའུ་ཡོན་ཁཱང་གི་ནག་ཉེས་ཡིན་སྐོར་གྱི་གླེང་གཞི་ཞིག་བྱུང་ཡོད།

༄༅ ཟླ་སྔོན་མའི་རྒྱ་ནག་རྒྱལ་ཡོངས་སྲིད་གྲོས་སྐབས་བཅུ་གཉིས་པའི་ཚོགས་འདུ་གསུམ་པའི་གསར་འགོད་གསལ་བསྒྲགས་སྟེང་། རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་ཟུར་བ་དང་ད་ལྟའི་རྒྱལ་ཡོངས་སྲིད་གྲོས་རྒྱུན་ལས། རྒྱ་ནག་དབང་བོ་ཞལ་འདེབས་ཐེབས་རྩ་ཚོགས་པ་དང་དབང་བོ་སྤོ་འཛུགས་ཁང་གི་མགོ་གཙོ་ཧོང་ཅེད་ཧྥོ་ཡིས་ “རྒྱ་ནག་གིས་ ༢༠༠༩ ལོའི་སྔོན་ལ་སྲོག་ཆད་བཏང་བའི་བཙོན་པ་ཚོའི་དབང་བོ་བླངས་པ་ནི། དབང་བོ་ནུས་སྟོབས་ཉམས་པའི་ནད་པ་ཚོའི་ཚེ་སྲོག་སྐྱོབ་ཆེད་རེད། སྐབས་དེར་སྤྱི་དམངས་ནང་ལ་རང་མོས་ཀྱིས་དབང་བོ་ཞལ་འདེབས་རྒྱག་མཁན་མེད་སྟབས་ཐབས་གཞན་མེད་སོང་བ་རེད། ཡིན་ནའང་ཁ་གསལ་བོ་བྱས་ཏེ་ཞུས་ན་བྱ་སྤྱོད་དེ་ནི་དུག་ཆང་བཏུངས་ནས་སྐོམ་པ་སེལ་ཐབས་བྱེད་པ་དང་གཅིག་མཚུངས་རེད།” ཅེས་བརྗོད་ཡོད་འདུག

ཟླ་སྔོན་མའི་ཚེས་ ༡༥ ཉིན། ཧོང་ཀོང་རྨ་བྱ་གསར་ཁང་གི་གསར་འགོད་པས་ཧོང་ཅེད་ཧྥོ་ལ་སྲོག་ཆད་བཙོན་པའི་དབང་བོ་གསོན་ལེན་སྐོར་ལ་བཅར་འདྲི་ཞིག་ཞུས་སྐབས། ཁོས་རྫི་གསང་དོད་པོས་ “ཁ་གསལ་བོ་བྱས་ནས་བཤད་མི་ཐུབ།” “རྒྱལ་ཁབ་ཀྱི་གསང་བ་ཡིན” སོགས་ཀྱི་ལན་ཙམ་ལས་གསལ་བོར་བརྗོད་མེད་ཀྱང་། བཙོན་པའི་དབང་བོ་གསོན་ལེན་དང་། དབང་བོ་ཉོ་ཚོང་བྱེད་མཁན་ནག་ཚོགས་དག་གི་རྒྱབ་ཕྱོགས་ཀྱི་སྟག་རྒན་གཙོ་བོ་དེ་ཀྲུའུ་ཡོན་ཁང་ཡིན་པའི་རྣམ་འགྱུར་གསལ་བོར་བསྟན་ཡོད་འདུག

ཧོང་ཅེད་ཧྥོ་ནི་རྒྱ་ནག་གི་དབང་བོ་གསོན་ལེན་གནས་ཚུལ་དང་སྟག་རྒན་ཚོའི་བར་འབྲེལ་བ་ཡོད་ཚུལ་གླེང་སློང་བྱེད་མཁན་ཐོག་མ་དེ་ཆགས་སྟབས། ཟླ་སྔོན་མའི་ཚེས་ ༢༣ ཉིན་ཞཱིན་ཐང་རིན་བརྙན་འཕྲིན་དྲ་བའི་སྟེང་། དབྱེ་ཞིབ་པ་ཁ་ཤས་ཀྱིས། དེ་ནི་རྒྱ་ནག་གཞུང་གིས་ཀྲུའུ་ཡོན་ཁཱང་གད་སྙིགས་ཀྱི་སྣོད་ལྟ་བུར་བེད་སྤྱོད་བྱས་ཏེ། རྒྱལ་སྤྱིའི་སྟེང་གི་རྒྱ་ནག་གི་དབང་བོ་གསོན་ལེན་གྱི་ནག་ཉེས་ཡོད་ཚད་ཀྲུའུ་ཡོན་ཁཱང་གི་སྟེང་གི་མགོ་ལ་གཡོག་འདོད་པ་ཡིན་ཚུལ་བརྗོད་འདུག

པེ་ཅིན་དུ་གནས་སྡོད་ཆབ་སྲིད་དཔྱད་བརྗོད་པ་ཧྭ་ཕོ་ (Hua Po) ཡིས། “རྒྱ་ནག་གཞུང་གིས་ཀྲུའུ་ཡོན་ཁཱང་གད་སྙིགས་ཀྱི་སྣོད་ཆས་བྱས་ཏེ་རྒྱལ་སྤྱིའི་སྟེང་རྩིས་སྤྲོད་བྱ་རྒྱུ་གཏན་འཁེལ་རེད། ཁྲིམས་འགལ་ཐོག་དབང་བོ་གསོན་པོ་ཉོ་ཚོང་བྱེད་མཁན་གྱི་ནག་ཚོགས་ཁྲོད་ཀྲུའུ་ཡོན་ཁཱང་ལྐོག་འཛུལ་བྱས་ཏེ། སྲོག་ཆད་བཙོན་པའི་དབང་བོ་གསོན་ལེན་བྱེད་པའི་ལས་དོན་ཡོངས་རྫོགས་ཀྲུའུ་ཡོན་ཁཱང་གིས་འཆར་གཞི་ཇུས་འགོད་བྱས་པའི་གནས་ཚུལ་ཁ་ཇེ་གསལ་དང་རྣམ་གྲངས་ཇེ་མང་དུ་འགྲོ་བཞིན་ཡོད། འོན་ཀྱང་སྲིད་གཞུང་གིས་གནས་ཚུལ་ཡོད་ཚད་ཤེས་རྟོག་བྱུང་ཡོད་ཀྱང་ཆ་ཤས་ཙམ་ལས་ཕྱིར་བསྒྲགས་བྱས་མེད། ལྷག་པར་དུ་ཀྲུའུ་ཡོན་ཁཱང་གི་ཕྱོགས་གཞན་གྱི་ནག་ཉེས་ཕྱིར་བསྒྲགས་བྱ་མི་སྲིད།” ཅེས་བརྗོད་འདུག ཁོང་གིས་མུ་མཐུད་དུ། “གལ་སྲིད་བཀག་བསྐྱིལ་འོག་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པ་རྐྱང་པའི་གནད་དོན་ལ་གཏིང་ཟབ་མོར་རྩད་ཞིབ་བྱས་ན། ཏང་གཅིག་གིས་སྲིད་དབང་འཛིན་པའི་གནོད་སྐྱོན་འབྱུང་བཞིན་སྟབས། ཁོ་ཚོས་དེ་ནི་སྲོག་ཆད་བཙོན་པ་ཚོའི་དབང་བོ་གསོན་ལེན་གྱི་གནད་དོན་ཡོངས་རྫོགས་ལ་འབྲེལ་བ་ཡོད་ཚུལ་བརྗོད་ཡོད།” ཅེས་བརྗོད་འདུག

ཟླ་སྔོན་མའི་ཚེས་ ༢༠ ཉིན། རྒྱ་ནག་སོ་ཧོ་དྲ་བས་གནས་ཚུལ་སྤེལ་ལ་ལྟར་ན། ༢༠༠༩ ལོའི་སྔོན་ལ་རྒྱ་ནག་གི་དབང་བོ་བརྗེ་ལེན་ལས་དོན་ཁྲོད་ཀྱི་དབང་བོའི་ཡོང་ཁུངས་བརྒྱ་ཆ་ ༦༠ ཙམ་སྲོག་ཆད་བཙོན་བའི་དབང་བོ་ཡིན་པ་དང་། བརྒྱ་ཆ་ ༧ ཙམ་རང་འགུལ་གྱིས་ཞལ་འདེབས་བརྒྱབ་ཡོད་པ། བརྒྱ་ཆ་ ༢༨ ཙམ་དབང་བོ་གསོན་ལེན་བྱས་(འབྱུང་ཁུངས་གསལ་བོ་མེད་པ།)ཡོད་པ་སོགས་ཀྱི་གནས་ཚུལ་འཁོད་འདུག

༢༠༠༦ ལོའི་ཟླ་ ༣ ཚེས་ ༨ ཉིན་ཏཱ་ཅི་ཡོན་དྲ་ཚིགས་སྟེང་། རྒྱ་ནག་གཞུང་གིས་ཆོས་འཁོར་རྩ་རླུང་སྒོམ་སྒྲུབ་བཙོན་པ་ཚོའི་དབང་བོ་གསོན་ལེན་བྱེད་པའི་གནས་ཚུལ་ཐོག་མར་བདེན་དཔང་ར་སྤྲོད་བྱས་ཡོད་འདུག སྐབས་དེར་དངོས་མིང་བརྗོད་འདོད་མེད་མཁན་མིང་གཞན་ལ་ཕེ་ཊིར་ (Peter) ཞེས་པ་ཞིག་གིས་གནས་ཚུལ་མཁོ་སྤྲོད་བྱས་ཡོད་འདུག ཕེ་ཊིར་ནི་རྒྱ་མི་ཞིག་ཡིན་པ་དང་ཁོ་རྒྱ་ནག་ནང་སྡོད་སྐབས་ཉི་ཧོང་གི་བརྙན་འཕྲིན་ལས་ཁང་ཞིག་གི་རྒྱ་ནག་གི་གསར་འགོད་པའི་ལས་ཀ་བྱས་ཡོད་འདུག ཁོང་གིས། རྒྱ་ནག་གི་ཧྲིན་ཡཱང་ཞིང་ཆེན་སུའུ་ཅ་ཊོན་ (苏家屯)གྱི་ས་ཆར་ཕ་ཤའི་ལུགས་ (fascist)དང་མཚངས་བའི་གསང་བའི་བཙོན་ཁག་ཞིག་ཡོད་པ་དང་། བཙོན་ཁང་དེའི་ནང་ཆོས་འཁོར་རྩ་རླུང་སྒོམ་སྒྲུབ་པ་ ༦༠༠༠ ལྷག་བཙོན་འཇུག་བྱས་ཡོད་པ། བཙོན་ཁང་དེའི་ནང་དུ་མིའི་ཕུང་བོ་མེར་བསྲགས་གཏོང་ས་ཞིག་ཀྱང་ཡོད་འདུག བཙོན་ཁང་དེར་འཁྲིད་ཟིན་པའི་བཙོན་པ་གཅིག་ཀྱང་གསོན་པོར་ཕྱིར་ལོག་མྱོང་མེད་པ་དང་། དེ་གར་བཙོན་པ་ཚོའི་ཁོག་པའི་དབང་བོ་ཚང་མ་བླངས་ནས་ཉོ་ཚོང་རྒྱག་གི་ཡོད་པ་མ་ཟད། དབང་བོ་བླངས་རྗེས་ཕུང་བོ་མེར་བསྲེགས་གཏོང་གི་འདུག ཅེས་སོགས་བརྗོད་ཡོད་པ་དང་། ཁོང་གིས་མུ་མཐུད་དུ། ཉེ་ཆར་ཧྲིན་ཡཱང་མཱ་སན་ཅཱ་དང་། ཏཱ་པེ་བཙོན་ཁང་གི་ཆོས་འཁོར་རྩ་རླུང་སྒོམ་སྒྲུབ་བྱེད་མཁན་བཙོན་པ་ཚོའང་སུའུ་ཅ་ཊོན་དུ་གནས་སྤོར་བྱེད་བཞིན་པ་མ་ཟད། རྒྱ་ནག་ཤར་བྱང་ཞིང་ཆེན་གསུམ་གྱི་ཆོས་འཁོར་རྩ་རླུང་སྒོམ་སྒྲུབ་བཙོན་པ་རྣམས་ཀྱང་སུའུ་ཅཱ་ཊོན་ལ་གནས་སྤོར་བྱེད་ཀྱི་འདུག ཅེས་སོགས་བརྗོད་འདུག

ལོ་དེའི་ཟླ་ ༣ བའི་ནང་བསླར་ཡང་རྒྱ་ནག་གཞུང་གིས་བཙོན་བའི་དབང་བོ་གསོན་ལེན་བྱེད་བཞིན་པའི་བདེན་པ་ར་སྤྲོད་བྱེད་མཁན་ཞིག་བྱུང་ཡོད་པ་དང་། ཁོ་མོའི་དངོས་མིང་བརྗོད་འདོད་མེད་པར་མིང་གཞན་ལ་ཨད་ཉེ་ (Anne)ཟེར་བ་ཞིག་གིས། ཁོ་མོའི་ཁྱོ་ག་སྔོན་མ་སྨན་པ་ཞིག་ཡིན་པ་དང་། ཁོ་རང་གིས་ཆོས་འཁོར་རྩ་རླུང་སྒོམ་སྒྲུབ་ ༢༠༠༠ ལྷག་གི་མིག་གསོན་ལེན་བྱས་མྱོང་ཚུལ་བརྗོད་ཡོད་འདུག ཨད་ཉེ་མོ་རང་ཡང་ཧྲིན་ཡཱང་ལའོ་ཉེན་སུའུ་ཅཱ་ཊོན་རྒྱ་ནུབ་ཟུང་འབྲེལ་སྨན་ཁང་ (沈阳辽宁苏家屯血栓中西医结合医院) གི་ཅ་དངོས་མཁོ་སྒྲུབ་བདག་ཉར་བ་ཡིན་པ་དང་། སྐབས་དེར་མོས་སྨན་ཁང་དེའི་ཉེ་འགྲམ་གྱི་ས་འོག་ཏུ་གཞི་རྒྱ་ཆེ་བའི་ཁང་པ་ཞིག་ཡོད་པ་དང་། ཁང་པ་དེའི་ནང་ཆོས་འཁོར་རྩ་རླུང་སྒོམ་སྒྲུབ་པ་ ༦༠༠༠ ལྷག་བཀག་ཉར་བྱས་ཡོད་པ་ཤེས་རྟོགས་བྱུང་ཡོད་འདུག དེའི་རྗེས་སྒོམ་སྒྲུབ་པ་ ༤༠༠༠ ཙམ་རྩ་མེད་བཟོས་ཡོད་ཀྱང་ད་དུང་བཙོན་པ་ ༢༠༠༠ ཙམ་ཤུལ་དུ་ཡོད་སྟབས། ཁོང་ཚོའི་ཚེ་སྲོག་བསྐྱབ་ཐུབ་ན་སྙམ་པའི་རེ་བའི་འོག་གནས་ཚུལ་དེ་ཁྱབ་བསྒྲགས་བྱས་པ་ཡིན་ཚུལ་བརྗོད་འདུག

༢༠༠༦ ལོར་རྒྱ་ནག་ཕྱི་ཕྱོགས་ཀྱི་གསར་ལམ་ཁག་ཏུ། རྒྱ་གཞུང་གིས་བཙོན་པ་ཚོའི་དབང་བོ་གསོན་ལེན་བྱེད་ཀྱིན་ཡོད་པའི་གླེང་སློང་ཤུགས་ཆེན་པོ་བྱུང་བ་དང་བསྟུན་ཏེ། ལོ་དེའི་ཕྱི་ཟླ་ ༣ བའི་ནང་རྒྱ་ནག་ཕྱི་འབྲེལ་འགྲིན་ཚབ་པ་ཆིན་ཀཱང་ (Qin Gang) གིས། “ ཀྲུང་གོས་བཙོན་པའི་དབང་བོ་གསོན་ལེན་བྱས་ཏེ་གཞན་ལ་སྤོ་འཛུགས་བྱེད་བཞིན་ཡོད་པའི་གླེང་གཞི་དེ་ནི་ཁུངས་ལུང་མེད་པའི་རྫུན་གཏམ་དང་། ཀྲུང་གོར་མི་དགའ་མཁན་ཚོས་ཆེད་དུ་བཟོས་པའི་འུར་སྒྲོག་ཅིག་རེད།”ཅེས་བརྗོད་འདུག

༢༠༠༦ ལོའི་ཟླ་ ༤ ཚེས་ ༡༠ ཉིན། རྒྱ་གཞུང་འཕྲོད་བསྟེན་ལས་ཁུངས་ཀྱི་གསར་འགྱུར་མགྲིན་ཚབ་པ་མའོ་ཆིན་ཨན་ (Mao Qun’an)གྱིས་ “སྐམ་ས་ཆེན་མོའི་དབང་བོ་ཡོང་ཁུངས་གཙོ་བོ་དེ་སྤྱི་དམངས་འདས་གྲངས་ཕྱིན་པ་ཚོས་རང་མོས་ཐོག་དབང་བོ་ཞལ་འདེབས་བརྒྱབ་པ་ཡིན།”ཞེས་བརྗོད་པ་དང་། ཟླ་དེའི་ཚེས་ ༡༡ ཉིན་མའོ་ཆིན་ཨན་གྱིས་ཡང་བསྐྱར་ “ཕྱིའི་བརྒྱུད་ལམ་ཁག་ཏུ་རྒྱ་ནག་གིས་སྲོག་ཆད་བཙོན་པ་ཚོའི་དབང་བོ་གསོན་ལེན་བྱེད་ཀྱིན་ཡོད་པའི་གནས་ཚུལ་ནི་རྒྱ་ནག་ལ་གནག་སེམས་འཆང་སྟེ་སྒྲུང་བཟོས་པ་ཞིག་དང་། དེའི་དམིགས་ཡུལ་རྒྱལ་ཁབ་ལ་ཁྲིམས་འཛིན་ལུགས་སྲོལ་མེད་ཚུལ་བསྒྲུབས་ཏེ་མང་ཚོགས་ལ་མགོ་སྐོར་གཏོང་ཐབས་བྱེད་ཀྱིན་ཡོད་པ་རེད། ” ཅེས་བརྗོད་འདུག

༢༠༠༦ ལོའི་ཟླ་ ༡༡ པའི་ནང་རྒྱ་ནག་འཕྲོད་བསྟེན་ལྷན་ཁང་གི་འགན་འཛིན་ཧོང་ཅེད་ཧྥོ་ཡིས་རྒྱ་གཞུང་གིས་སྲོག་ཆད་བཙོན་པ་ཚོའི་དབང་བོ་གསོན་ལེན་བྱས་ཏེ། མི་གཞན་ལ་སྤོ་འཛུགས་བྱེད་བཞིན་ཡོད་པ་ངོས་ལེན་བྱས་ཡོད་པ་དང་། ༢༠༡༢ ལོར་ཧོང་ཅེད་ཧྥོ་ཡིས་རྒྱལ་སྤྱིའི་སྨན་རིག་དུས་དེབ་ (The Lancet) ཟེར་བའི་སྟེང་དབྱིན་ཇིའི་རྩོམ་ཡིག་ཅིག་སྤེལ་བའི་ནང་། “རྒྱ་ནག་ནི་འཛམ་གླིང་སྟེང་ལམ་ལུགས་ལྟར་སྲོག་ཆད་བཙོན་པའི་དབང་བོ་སྤོ་འཛུགས་ལག་བསྟར་བྱེད་མཁན་རྒྱལ་ཁབ་གཅིག་པུ་དེ་ཡིན་པ་དང་། སྲོག་ཆད་བཙོན་པ་ཚོའི་དབང་བོ་ནི་རྒྱ་ནག་གི་དབང་བོ་སྤོ་འཛུགས་ཀྱི་ཡོང་ཁུངས་གཙོ་བོ་ཆགས་ཡོད།” ཅེས་བརྗོད་འདུག

སྔ་ལོའི་ཕྱི་ཟླ་ ༡༢ ཚེས་ ༤ ཉིན། རྒྱ་ནག་སྨན་བའི་དབང་བོ་བརྗེ་ལེན་མཐུན་ཚོགས་ཀྱི་ཚོགས་གཙོ་ཧོང་ཅེད་ཧྥོ་ཡིས། རྒྱ་ནག་གི་སྨན་པའི་ལྷན་ཚོགས་ཀྱི་ཚོགས་འདུའི་སྟེང་ ༢༠༡༥ ལོའི་ཟླ་ ༡ ཚེས་ ༡ ཉིན་ནས་བཟུང་རྒྱ་ནག་གཞུང་གིས་སྲོག་ཆད་བཙོན་པ་ཚོའི་དབང་བོ་བེད་སྤྱོད་མཚམས་འཇོག་བྱ་རྒྱུ་ཡིན་པ་ཁྱབ་བསྒྲགས་བྱས་ཡོད་པ་དང་། རྒྱ་ནག་སྤྱི་དམངས་ཀྱིས་རང་མོས་ཐོག་དབང་བོ་ཞལ་འདེབས་སུ་ཕུལ་ཏེ་མི་གཞན་པའི་དབང་བོ་བརྗེ་སྤོར་གྱི་ལམ་ལུགས་ཐོག་འགྲོ་རྒྱུ་ཡིན་སྐོར་ཁྱབ་བསྒྲགས་བྱས་འདུག

གསར་འགོད་པ། འཇིགས་མེད་རྒྱ་མཚོ།