ཉེ་ཆར་མངའ་རིས་ས་ཁུལ་རྩ་མདའ་རྫོང་གི་གྲོང་ནུབ་ནས་ཞང་ཞུང་སྐབས་ཀྱི་གནའ་བོའི་གཟི་ཞིག་གསར་རྙེད་བྱུང་ཡོད་འདུག
ཟླ་འདིའི་ཚེས་ ༩ ཉིན་མི་དམངས་དྲ་བ་དང་རྒྱ་ནག་གི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་ཆར་རྒྱ་ནག་སྤྱི་ཚོགས་ཚན་རིག་ཁང་གི་གནའ་རྫས་རྟོག་ཞིབ་མཁས་པ་ཁག་གཅིག་གིས་མངའ་རིས་ས་ཁུལ་རྩྭ་མདའ་རྫོང་གི་གྲོང་ནུབ་དང་གླང་ཆེན་ཁ་འབབ་ཀྱི་ལྷོ་རྒྱུད་ཀྱི་གནའ་བོའི་ཞང་ཞུང་སྐབས་ཀྱི་ཆུ་འཐག་བང་སོ་སྔོག་འདོན་བྱེད་སྐབས། བང་སོ་ཞིག་ནས་ས་རིམ་གསལ་བ་དང་ལོ་རབས་གསལ་པོ་ཡོད་པའི་གནའ་བོའི་གཟི་ཞིག་རྙེད་ཡོད་ཅིང་། དེ་ནི་མདོ་དབུས་མཐོ་སྒང་སྟེང་གནའ་བོའི་གཟི་དེ་འདྲ་གསར་རྙེད་བྱུང་བ་ཐོག་མ་ཆགས་ཡོད་ཚུལ་བཀོད་འདུག
བོད་རང་སྐྱོང་ལྗོངས་ཟེར་བའི་རིག་དངོས་སྲུང་སྐྱོབ་ཞིབ་འཇུག་ཁང་གི་འགན་འཛིན་གཞོན་པ་ལི་ལིན་ཧུའེ་ཡིས། “གཟི་དེས་བོད་ལྗོངས་ས་ཁུལ་གྱི་གཟི་ཐོན་པའི་ལོ་རབས་དང་གཟི་དབྱིབས་གཟི་རིས། དེ་བཞིན་བེད་སྤྱོད་གཏོང་ཚུལ་བཅས་ལ་རྟོག་ཞིབ་བྱ་རྒྱུར་དཔྱད་གཞི་དང་པོ་བྱུང་ཡོད་པ་མ་ཟད། གནའ་བོའི་ཞང་ཞུང་དུས་སྐབས་སུ་བོད་ནང་གཟི་ཡོད་པ་དང་དར་ཁྱབ་ཆེན་པོ་ཡིན་པ་ར་སྤྲོད་བྱེད་ཐུབ།”ཅེས་དང་། རྒྱ་ནག་སྤྱི་ཚོགས་ཚན་རིག་ཁང་གི་གནའ་རྫས་རྟོག་ཞིབ་ཁང་གི་འབུམ་རམས་པ་ཐུང་ཐའོ་ཡིས། “གནའ་རྫས་རྟོག་ཞིབ་མི་སྣས་མངའ་རིས་ས་ཁུལ་རྩྭ་མདའ་རྫོང་གི་གྲོང་ནུབ་ཀྱི་ཆུ་འཐག་བང་སོ་སྔོག་འདོན་བྱེད་སྐབས། བྲག་ཕུག་རྣམ་པའི་བང་སོ་ཁག་ལྔ་ཡོད་པ་མཐོང་ཡོད་པ་མ་ཟད། ཞང་ཞུང་སྐབས་ཀྱི་རྩ་ཆེའི་རིག་དངོས་འབོར་ཆེན་ཡང་མཐོང་ཡོད་ཅིང་། དེའི་ཁྲོད་ཀྱི་བང་སོ་ཞིག་ཏུ་གཟི་སྤུས་ལེགས་ཤིག་རག་ཡོད་པ་དེ་ནི་མདོ་དབུས་མཐོ་སྒང་དུ་གནའ་རྫས་རྟོག་ཞིབ་ལས་ཐོན་ཐེངས་དང་པོ་རེད།” ཅེས་བརྗོད་འདུག
གསར་རྙེད་བྱུང་བའི་གཟི་དེར་མགོ་གཞུག་སྙོམས་པ་དང་ཁུང་བུ་ཡོད་པ། རིང་ཚད་ལི་སྨི་ ༢།༨༥ དང་ཚངས་ཐིག་ཆེ་ཤོས་ལ་ལི་སྨི་ཀླད་ཀོར་ཚེག་དགུ་དང་། ཁུང་བུའི་ཚངས་ཐིག་ལ་ལི་སྨི་ཀླད་ཀར་ཚེག་གཉིས་ཡོད་འདུག གནའ་བོའི་གཟི་གསར་རྙེད་བྱུང་སའི་བང་སོ་དེ་ནི་ལོ་ངོ་ ༡༨༠༠ ལྷག་ཕྱིན་ཡོད་པའི་ཞང་ཞུང་སྐབས་ཀྱི་སྐུ་དྲག་ཅིག་གི་བང་སོ་ཡིན་འདུག
