ཉི་ཧོང་གི་སྲིད་བློན་ཤིང་ཛོ་ཨ་བྷེ་ཨ་རིའི་ནང་སྐོར་སྐྱོད་དང་འབྲེལ་ཏེ་ཨ་རིའི་གྲོས་ཚོགས་ནང་འཛམ་གླིང་དམག་ཆེན་གཉིས་པའི་ཁྲོད་རྐྱེན་འདས་སུ་སོང་བའི་ཨ་རིའི་དམག་མི་རྣམས་ལ་མྱ་ངན་ཞུས་ཡོད་འདུག
ཁ་སང་ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས་ཨ་རིའི་གྲོས་ཚོགས་གོང་འོག་གཉིས་ནང་། འཛམ་གླིང་དམག་ཆེན་གཉིས་པའི་སྐབས་ཨ་རིའི་དམག་མི་འདས་གྲོངས་སོང་པ་རྣམས་ལ་ལོ་རྒྱུས་རང་བཞིན་གྱི་ཐུགས་གསོ་གནང་ཡོད་ཀྱང་། ཁོང་གིས་འཐབ་འཁྲུག་ཁྲོད་ཨེ་ཤ་ཡའི་ལྷོ་ཀོ་རི་ཡ་དང་རྒྱ་ནག་སོགས་ཀྱི་བུད་མེད་མནར་གཅོད་མྱངས་མཁན་རྣམས་ལ་ཐུགས་གསོ་བྱས་མེད་པའི་ཐད་གླེང་སློང་སྣ་ཚོགས་འབྱུང་བཞིན་ཡོད་འདུག
ཉེ་ཆར་ཉི་ཧོང་གི་སྲིད་བློན་ཤིང་ཛོ་ཨ་བྷེ་ཨ་རིར་སྐོར་སྐྱོད་བྱེད་དོན་གཙོ་བོ་དེ་ཞི་བདེ་རྒྱ་མཚོའི་ཚོང་འབྲེལ་འཕེལ་རྒྱས་ཀྱི་གྲོས་མོལ་ཆེད་ཡིན་པ་དང་། ད་དུང་ཨ་རིའི་སྲིད་འཛིན་ཨོ་བྷ་མ་དང་ཁོང་གཉིས་ཀྱིས་དམག་དོན་མཉམ་ལས་ཀྱི་རྩ་འཛིན་གསར་བ་ཞིག་མོས་མཐུད་བྱས་ཡོད་པའི་ནང་། ཨ་རིའི་ཉི་ཧོང་གི་སྲུང་སྐྱོབ་ཐད་མི་མཐུན་འགན་འཁུར་རྒྱུ་དང་། ཞི་བདེ་རྒྱ་མཚོའི་མངའ་ཁུལ་དང་ཉི་ཧོང་དང་རྒྱ་ནག་གི་རྩོད་གཞིའི་འོག་ཡོད་པའི་ Senkakus གླིང་ཕྲན་བཅས་སུ་ཨ་རིས་སྲུང་སྐྱོབ་རོགས་འདེགས་བྱེད་རྒྱུ་སོགས་ཡིན་འདུག
ཁ་སང་བྷེ་བྷེ་སི་གསར་ཁང་གིས་གནས་ཚུལ་སྤེལ་བ་ལྟར་ན། འཛམ་གླིང་འཁྲུག་ཆེན་གཉིས་པ་དྲན་གསོ་ཉིན་མོ་ཨ་རིའི་རྒྱལ་ས་ཝ་ཤིན་ཊོན་ནས་བསྐོངས་སྐབས། ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས་འཐབ་འཁྲུག་ཁྲོད་ཚེ་སྲོག་ཤོར་བའི་ཨ་ རིའི་དམག་མི་ ༤༠༠༠༠༠ རྣམས་ལ་སྙིང་ཐག་པ་ནས་ཐུགས་གསོ་ཞུས་ཡོད་པ་དང་། ཁོང་གིས། “ངའི་སྙིང་ཉེ་བའི་གྲོགས་པོ་རྣམས། ངས་ཉི་ཧོང་དང་ཉི་ཧོང་གི་མི་དམངས་ཚོའི་ཚབ་བྱས་ཏེ་འཛམ་གླིང་འཁྲུག་ཆེན་གཉིས་པའི་ཁྲོད་ཚེ་སྲོག་ཤོར་བའི་ཨ་རིའི་དམག་མི་རྣམས་ཀྱི་བླ་སྲོག་ལ་ངས་སྙིང་ཁོང་རུས་པའི་གཏིང་ནས་ཐུགས་གསོ་བྱེད་བཞིན་ཡོད།” ཅེས་བརྗོད་ཡོད་འདུག
ཝ་ཤིན་ཊོན་གྱིས་གནས་ཚུལ་སྤེལ་པ་ལྟར་ན། འཛམ་གླིང་དམག་ཆེན་གཉིས་པ་མཇུག་བསྒྲུལ་ནས་ལོ་ ༧༠ འཁོར་བའི་དུས་དྲན་སྲུང་གཙིའི་སྟེང་ཨ་རིའི་གྲོས་ཚོགས་ཀྱིས་ནན་སྐུལ་བྱས་ཏེ་གླེང་དགོས་པ་ཞིག་ནི། ཉི་ཧོང་གི་དམག་མིས་ཨེ་ཤ་ཡའི་བུད་མེད་སྟོང་ཕྲག་མང་པོར་བཙན་གཡེམ་བྱས་པ་དེ་ཡིན་པ་དང་། དེ་ནི་ཨ་རིའི་ཐུན་གྲོགས་རྒྱལ་ཁབ་ལྷོ་ཀོ་རི་ཡའི་ན་ཟུག་ཆེ་ཤོས་ཤིག་ཡིན་ཡང་། ད་རེབ་ཉི་ཧོང་སྲིད་བློན་གྱིས་གནད་དོན་དེར་གཡོལ་ཐབས་བྱས་ཡོད་འདུག ཁོང་གིས། “དམག་འཁྲུག་ལ་སེམས་གཏིང་ནས་གནོང་འགྱོད་བྱེད་ཀྱིན་ཡོད།” ཅེས་དང་། “ང་ཚོའི་བྱ་སྤྱོད་ཀྱིས་ཨེ་ཤ་ཡའི་རྒྱལ་ཁབ་ཀྱི་མི་རྣམས་ལ་སྡུག་བསྔལ་བསྐྲུན་ཡོད་ཀྱང་ང་ཚོས་དུས་ནམ་ཡང་ཕྱོགས་གཅིག་ལ་བལྟས་ན་འགྲིག་གི་མེད།” ཅེས་བརྗོད་འདུག
ལྷོ་ཀོ་རི་ཡའི་མནར་གཅོད་མྱངས་པའི་བུད་མེད་ ༥༣ ཡོད་པའི་ཁྲོད་ཀྱི་གཅིག་ད་ལྟ་ལོ་ན་ ༨༣ ཡིན་པའི་ཡོན་སོན་ལེ་ (Yong Soo-lee) འཁོར་ལོའི་རྐུབ་སྟེགས་སུ་བསྡད་དེ་ཚོགས་ཞུགས་བྱས་ཡོད་པ་དང་། ཁོ་མོ་ནི་ཨ་རིའི་དམངས་གཙོ་ཚོགས་པའི་གྲོས་ཚོགས་འཐུས་མི་མཱ་ཁེ་ཧོན་དྷ་ (Mike Honda) ཡིས་གདན་འདྲེན་བྱས་ཡོད་པ་དང་། ཁོ་མོས་ “ སྲིད་བློན་ཤིང་ཛོ་ཨ་བྷེ་ཡིས་ཁོའི་སྲིད་གཞུང་གི་འགན་ཁུར་ཏེ་ཉི་ཧོང་གོང་མའི་དམག་མིས་བུད་མེད་ཚོར་མནར་གཅོད་བཏང་བར་ཐུགས་གསོ་མ་བྱས་པ་དེ་ནི་ངོ་གནོང་དགོས་པ་ཞིག་དང་ཧ་ལས་དགོས་པ་ཞིག་རེད།” ཅེས་བརྗོད་འདུག
ཞི་བདེ་རྒྱ་མཚོའི་ཚོང་འབྲེལ་གླེང་མོལ་བྱེད་སྐབས། ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས་ཨ་རིའི་གྲོས་ཚོགས་འཐུས་མི་ཚོར། ཞི་བདེ་རྒྱ་མཚོའི་ཚོང་འབྲེལ་འཕེལ་རྒྱས་ཀྱི་གྲོས་མོལ་ལ་རྒྱབ་སྐྱོར་བྱེད་པ་ནི་བུ་རབས་ཚ་རྒྱུད་ཀྱི་སླད་དུ་ཡིན་པ་དང་། ཞི་བདེ་རྒྱ་མཚོའི་ཚོང་འབྲེལ་འཕེལ་རྒྱས་ཀྱི་གྲོས་མོལ་ནི་རྒྱལ་ཁབ་ ༡༢ ཡི་གུ་ཡངས་ཚོང་ར་ཡིན་པ་དང་། ཨ་རི་དང་ཉི་ཧོང་གཉིས་ནི་དེའི་ཁྲོད་ཀྱི་རྒྱལ་ཁབ་གཙོ་བོ་ཡིན་ལ། གྲོས་མོལ་འདི་ནི་ཁྲིམས་ལུགས་དང་དམངས་གཙོ། རང་དབང་སོགས་ཀྱི་རིན་ཐང་གོང་སྤེལ་གྱི་ལམ་བུ་གཙོ་བོ་ཞིག་ཡིན་ཚུལ་སོགས་བརྗོད་འདུག
