སྲིད་སྐྱོང་མཆོག་གིས་ལས་བྱེད་ ༤༠ ཙམ་དགོས་ཀྱི་ཡོད་གསུངས་སོང་།

བོད་མིའི་སྒྲིག་འཛུགས་ཀྱི་གཞུང་ཞབས་ནང་ཡིག་རྒྱུགས་གཏོང་རྒྱུའི་སྔོན་འགྲོའི་ཟབ་སྦྱོང་དེ་མགོ་འཛུགས་གནང་ཡོད་་པ་དང་། ད་ལོ་ཟབ་སྦྱོང་བ་ཙམ་མིན་པར་སྲི་ཞུ་ལས་བྱེད་དང་ཕྱི་ལོགས་ནས་ཕེབས་མཁན་བཅས་ལ་གོ་སྐབས་གཅིག་མཚུངས་སྤྲོད་རྒྱུ་ཡིན་འདུག

གཟའ་པ་སངས་ཉིན་ནས་བཟུང་དྷ་རམ་ས་ལའི་ཉེ་འཁྲིས་དབུས་སྣེ་ལེན་ཁང་དུ། བོད་མིའི་སྒྲིག་འཛུགས་འདེམས་བསྐོ་ལྷན་ཁང་གིས་གོ་སྒྲིག་ཞུས་པའི་ཟླ་གཉིས་ལྷག་རིང་གི་ལས་བྱེད་དམིགས་སྒོའི་ཟབ་སྦྱོང་སྐབས་གསུམ་པ་དེ་དབུ་འཛུགས་གནང་ཡོད་ཅིང་། ཟབ་སྦྱོང་དབུ་འབྱེད་དེ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གནང་ཡོད་པ་དང་། ཐེངས་འདིའི་ཟབ་སྦྱོང་སྟེང་འཛུལ་ཞུགས་གནང་མཁན་སློབ་མ་ ༤༠ བྱུང་ཡོད་འདུག

ཟབ་སྦྱོང་སྐབས་དང་པོ་གཉིས་པ་དེ་དུས་ཡུན་ཟླ་དྲུག་ཡིན་ཡང་། ཐེངས་འདིར་དུས་ཡུན་ཟླ་བ་གཉིས་དང་ཕྱེད་ཙམ་ཡིན་འདུག་ལ། ལས་བྱེད་ཀྱི་ས་མིག་ཐོག་དངོས་སུ་ཡིག་རྒྱུགས་གཏོང་སྐབས། ཐེངས་འདིའི་ཟབ་སྦྱོང་ནང་ཞུགས་མཁན་ཙམ་མིན་པར། གཞུང་ཞབས་ལས་བྱེད་ཁྲོད་ནས་མཐོ་བོར་འགྲོ་འདོད་མཁན་དང་། ཕྱི་ལོགས་ནས་ཐད་ཀར་ཡིག་རྒྱུགས་ནང་ཞུགས་མཁན་སོགས་ལ་འདྲ་མཉམ་གྱི་གོ་སྐབས་སྤྲོད་རྒྱུ་ཡིན་འདུག

འདི་གའི་གསར་འགོད་པས་གཞུང་ཞབས་འདེམས་བསྐོ་ལྷན་ཁང་གི་དྲུང་ཆེ་མི་འགྱུར་རྡོར་རྗེ་ལགས་སུ་ད་རེབ་ཀྱི་ཟབ་སྦྱོང་སྐོར་ལ་བཅར་འདྲི་ཞུས་པར། ཁོང་གིས་འདི་ལྟར་གསུངས་བྱུང་། བཀའ་ཤག་ནས་ད་རེབ་ང་ཚོས་ཟབ་སྦྱོང་འདི་འདྲ་ཞིག་གནང་དགོས་འདུག་ཅེས་རེ་འདུན་བཏོན་གནང་བ་རེད། རྩ་བའི་དེའི་ཐོག་ལ་འགྲོ་སོང་ཡོངས་རྫོགས་འཛིན་སྐྱོང་གིས་གནང་གི་ཡོད་ཀྱང་། གོ་སྒྲིག་བྱ་རྒྱུ་དེ་ལས་བྱེད་འདེམས་བསྐོ་ལྷན་ཁང་ནས་བྱེད་དགོས་ཀྱི་ཡོད་སྟབས་གོ་སྒྲིག་ཞུས་པ་རེད། བཀའ་ཤག་གི་ངོས་ནས་ང་ཚོར་ག་རེ་གསུངས་ཡོད་པ་རེད་ཟེར་ན། ད་རེབ་མི་ ༤༠ ཐམ་པའི་དམིགས་སྒོ་ཡོད་པ་དེ་ནས་ ༡༠ ཅིག་བལ་ཡུལ་རང་ལ་ཟུར་ཆད་གནང་རོགས་གནང་གསུངས་ཡོད་སྟབས། ང་ཚོས་དེ་བཞིན་དུ་གསལ་བསྒྲགས་བཏང་ཡོད་ཀྱང་ཡིད་སྐྱོ་པ་ཞིག་ལ་བལ་ཡུལ་ནས་བུ་གཅིག་དང་བུ་མོ་གཅིག་མ་གཏོགས་རག་ཡོད་པ་མ་རེད། བོད་མིའི་སྒྲིག་འཛུགས་ལ་བུད་མེད་ཀྱི་ནུས་ཤུགས་སྤེལ་བའི་གཞི་རིམ་གྱི་སྲིད་བྱུས་ཤིག་ཡོད་པ་ལྟར། ད་རེབ་ལས་བྱེད་དམིགས་བསྐོའི་ཟབ་སྦྱོང་ནང་དུའང་བུ་ལས་བུ་མོ་མང་བ་འདུག ཅེས་གསུངས་བྱུང་།

ཁོང་ལ་ཟབ་སྦྱོང་སྐབས་སློབ་ཁྲིད་ཀྱི་སྒྲོམ་གཞི་གང་དག་འཆར་འགོད་བྱས་ཡོད་མེད་དྲིས་པར་ཁོང་གིས། ཁོང་ཚོར་བསླབ་གཞིའི་ཐད་ནས་བོད་མིའི་སྒྲིག་འཛུགས་ལ་ག་རེ་མཁོ་བ་དེ་གཙོར་འདོན་བྱས་ཏེ་བཞག་ཡོད་པ་རེད། རྩ་བའི་ལས་བྱེད་ནང་འཛུལ་འདོད་ཡོད་མཁན་ཁོང་རྣམས་ཀྱིས་མཐོ་སློབ་ཁག་ནས་སློབ་སྦྱོང་ཚད་མཐོ་བོ་བྱས་བཞག་པ་རྐྱང་ཡིན་སྟབས་གཞི་རིམ་གྱི་སློབ་སྦྱོང་སྤྲོད་དགོས་དོན་མེད་ཀྱང་། ལས་ཀ་དངོས་ལ་ཞུགས་སྐབས། བོད་མི་ནང་ཁུལ་གྱི་ནང་མའི་གན་རྒྱ་ཞིག་འཇོག་དགོས་ན་བོད་ཡིག་ནང་ཇི་ལྟར་འབྲི་དགོས་པ་དང་། ལས་ཁུངས་ཕན་ཚུན་ཡི་གེ་གཏོང་སྐབས་གང་འདྲ་བྱས་ནས་འབྲི་དགོས་པ་སོགས་ཡིག་བསྐུར་རྣམ་གཞག་དག་སློབ་ཁྲིད་བྱ་རྒྱུ་དང་། དེ་བཞིན། བླ་མ་ཞིག་ལ་སྐྱབས་ཞུ་རིགས་གང་འདྲ་བྱས་ནས་འབྲི་དགོས་པ་དང་། མཛད་སྒོ་རིགས་ལ་མགྲོན་ཤོག་ཅིག་འཕུལ་དགོས་ན་ཇི་ལྟར་འབྲི་དགོས་པ་སོགས་སློབ་ཁྲིད་བྱ་རྒྱུ་རེད། དེ་བཞིན། དབྱིན་ཡིག་ལ་ཆ་བཞག་ན། དེ་རིང་བཀའ་བློན་བྱེ་བྲག་པ་ཞིག་གིས་གཏམ་བཤད་ཅིག་གནང་དགོས་ལབ་སྟེ། དེའི་མ་ཟིན་ཞིག་རྒྱོབས་ཤོག་གསུང་སྐབས་ཇི་ལྟར་འབྲི་དགོས་པ་དང་། འཆར་གཞི་ཁག་ལ་སྙན་ཐོ་འབྲི་རྒྱུ་དང་འཆར་གཞི་བཟོ་རྒྱུ་སོགས་སློབ་ཁྲིད་བྱ་རྒྱུ་མ་ཟད། ལས་ཁུངས་ཁག་གི་ལས་དོན་བྱེད་ཕྱོགས་དང་། བོད་མིའི་སྒྲིག་འཛུགས་ཀྱི་བཅའ་ཁྲིམས་དང་སྒྲིག་གཞི་ཁག ལྷག་པར་དུ་ལས་བྱེད་པའི་བླང་དོར་དང་ལས་འགན། ཀུན་སློང་འཁུར་ཕྱོགས། གཞི་རྩའི་རྩིས་ཀྱི་འགྲོ་སྟངས་སོགས་ཀྱི་ཐོག་སློབ་ཁྲིད་བྱ་རྒྱུ་རེད། ཅེས་གསུངས་བྱུང་།

གསར་འགོད་པས་ཁོང་ལ་དེ་སྔོན་ཟབ་སྦྱོང་ཟླ་དྲུག་ཙམ་རིང་སྤྲོད་ཀྱི་ཡོད་ཀྱང་། ཐེངས་འདིར་ཟླ་གཉིས་ལྷག་ལས་མེད་དོན་གང་ཡིན་སྐོར་དྲིས་པར་ཁོང་གིས། སྐབས་སྔོན་མ་དག་ལ་ང་རང་རྒྱུས་མངའ་ཆེན་པོ་མེད་ཀྱང་། སྙན་ངག་དང་སུམ་རྟགས་སོགས་གཏིང་ཟབ་པོ་སློབ་ཁྲིད་བྱ་རྒྱུར་དགོངས་པ་བཞེས་པ་ཡིན་སྲིད་པ་རེད། ཟབ་སྦྱོང་དེ་ཟླ་གསུམ་བཞི་རྒྱུན་རིང་པོ་བྱས་ན་དོན་དག་ཐོག་ལ་ག་ཚོད་ཅིག་འབབ་ཀྱི་ཡོད་མེད་དང་། དུས་ཚོད་ཐུང་ཐུང་ནང་ཚ་ཚ་འུར་འུར་གྱིས་གནད་དོན་ཚང་མའི་ཐོག་ལ་ཤེས་རྟོགས་ཐུབ་པ་དང་། བསམ་བློའི་ནང་གོ་རྟོགས་སླེབ་ཐུབ་པ་ཞིག་བཟོ་རྒྱུ་གལ་ཆེན་པོར་མཐོང་སྟེ་དུས་ཡུན་ཐུང་དུ་བཏང་བ་རེད། ཅེས་གསུངས་བྱུང་།

གསར་འགོད་པས་ཁོང་ལ་སྔོན་མ་ཡིན་ན་ལས་བྱེད་དམིགས་སྒོའི་ཟབ་སྦྱོང་ནང་འཛུལ་བཞུགས་བྱེད་མཁན་དང་སྙན་ཞུ་འབུལ་མཁན་ལ་མ་གཏོགས་དངོས་གཞིའི་ལས་བྱེད་ཀྱི་ཡིག་རྒྱུགས་ཁོངས་བཞུགས་ཆོག་གི་མེད་པ་མ་ཟད། ཟབ་སྦྱོང་ནང་འཛུལ་བཞུགས་གནང་མཁན་ཚོར་དངོས་གཞིའི་ཡིག་རྒྱུགས་ཁྲོད་ཕྱོགས་བསྡོམས་སྐར་གྲངས་གང་ཐོབ་ཐོག་སྐར་གྲངས་ ༣ ནས་ ༡༠ བར་བསྣན་སྲོལ་ཞིག་བྱུང་ཡོད་པས། ཐེངས་འདིར་བསྒྱུར་བཅོས་གང་གནང་ཡོད་དྲིས་པར་ཁོང་གིས། ཟབ་སྦྱོང་འདི་ནི་ལས་བྱེད་དམིགས་སྒོའི་ཟབ་སྦྱོང་ཡིན་པ་ལས་ཁོ་ཚོ་ལས་བྱེད་དམིགས་སྒོའི་ཐོག་བཞག་པ་ཡིན་ཟེར་ནས་གང་ཡང་ལབ་ཡོད་པ་མ་རེད། འོན་ཀྱང་ཁ་སང་སྲིད་སྐྱོང་མཆོག་གིས་ལས་བྱེད་ ༤༠ ཙམ་དགོས་ཀྱི་ཡོད་གསུངས་སོང་། ང་རང་ཚོའི་ཡིག་ལམ་ཐོག་ལ་ལས་བྱེད་ ༢༤ དགོས་ཀྱི་ཡོད་པ་རེད། ད་ལྟ་བཀའ་ཤག་གིས་དེའི་ཐོག་ལས་བྱེད་ ༡༦ ཁ་སྣོན་གྱིས་ལས་བྱེད་ ༤༠ འདེམས་སྒྲུག་གནང་རྒྱུའི་དགོངས་པ་འདུག ཡིན་ནའང་མ་འོངས་པར་དངོས་གཞིའི་ཡིག་ཚད་དེ་ཚང་མར་གོ་སྐབས་སྤྲོད་རྒྱུ་རེད། ད་ཡོད་ལས་བྱེད་ནང་གནས་རིམ་མཐོ་བོར་ཡིག་ཚད་གཏོང་འདོད་མཁན་ཡོད་པ་རེད་ལ། ཕྱི་ལོགས་ནས་ཐད་ཀར་ཡིག་ཚད་ནང་ཞུགས་མཁན་ཡང་ཡོང་གི་རེད་བམས་གྱི་འདུག དེ་དག་ལ་གོ་སྐབས་མ་སྤྲད་ན་དྲང་བདེན་ཆགས་ཀྱི་མེད་པ་མ་ཟད་བཟང་སྤྱོད་ཐོག་ནས་ཀྱང་འགྲིག་གི་མེད་སྟབས། ཐེངས་འདིའི་ཟབ་སྦྱོང་ནང་ཞུགས་མཁན་ཚོར་དམིགས་བསལ་གང་ཡང་ཡོད་པ་མ་རེད། ཅེས་བརྗོད་བྱུང་།

ཟབ་སྦྱོང་དབུ་འབྱེད་ཐོག་སྲིད་སྐྱོང་མཆོག་གིས་གསུང་བཤད་གནང་དོན། དེ་སྔོན་ཟབ་སྦྱོང་ཐེངས་དང་པོ་དང་གཉིས་པའི་སྐབས་གནས་ཚུལ་རེ་གཉིས་བྱུང་ཡོད་པ་རེད། དགེ་རྒན་གྱི་ཟབ་ཁྲིད་སྐབས་སློབ་མ་རེ་ཟུང་གིས་སོ་སོའི་ལག་ཐོགས་ཁ་པར་སྔོག་བསྡད་པའི་འདྲ་པར་དྲ་ལམ་དུ་ཁྱབ་པ་དང་། སྲི་ཞུ་བ་ཁག་གཅིག་མཚན་མོ་འཕྱི་པོར་ཉལ་ཁང་ནང་ལོག་པའི་གནས་ཚུལ་དེ་འདྲ་བྱུང་ཡོད་སྟབས། ཁྱེད་རང་ཚོར་ཡང་ལས་བྱེད་མ་ཆགས་གོང་ལ་མིང་ཆལ་ཡོང་རྒྱུའི་ཉེན་ཁ་ཡོད། གཞི་རྩའི་སྲི་ཞུ་བ་ཚོར་མི་མང་གིས་སྐྱོན་བརྗོད་བྱེད་དགོས་དོན་ནི། མི་མང་གིས་སྲི་ཞུ་བར་ཡིད་ཆེས་དང་རེ་བ། རྒྱབ་སྐྱོར་དང་ཤ་ཞེན་ཆེན་པོ་བྱེད་ཀྱིན་ཡོད་པའི་རྟགས་རེད། ད་རེས་ཁྱེད་རང་ཚོས་སློབ་སྦྱོང་ལ་དོ་སྣང་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ལས་བྱེད་འདེམས་ལྷན་ནས་རྣམ་པ་ཚོར་ཟབ་སྦྱོང་སྤྲོད་ཆེད་བཀའ་ཤག་ལ་སྒོར་འབུམ་ ༡༡ གི་སྔོན་རྩིས་བཀའ་འཁྲོལ་ཞུས་ཡོད། དེ་མི་ ༤༠ ལ་བགོས་ན་མི་རེར་ཧིན་སྒོར་ ༢༧༥༠༠ རེ་གཏོང་གི་ཡོད་སྟབས། ཟབ་སྦྱོང་སྐབས་སློབ་སྦྱོང་ཡག་པོ་མ་བྱས་ན། ཁྱེད་རང་ཚོའི་དུས་ཚོད་འཕྲོ་བརླག་དང་བོད་མིའི་སྒྲིག་འཛུགས་ཀྱི་དངུལ་ཡང་འཕྲོ་བརླག་ཆགས་ཀྱི་ཡོད་སྟབས། དེ་རིང་ཉིན་དང་པོ་རང་ནས་ཁྱེད་རང་ཚོས་སྲི་ཞུ་བ་བྱེད་རྒྱུ་ཡིན་མིན་བསམ་བློ་ཡག་པོ་གཏོང་དགོས། སོ་སོས་འཚོ་བ་བསྐྱལ་ཏེ་དཔལ་འབྱོར་ཡག་པོ་བཟོ་དགོས་བསམ་ན་ལམ་ཁ་གཞན་མང་པོ་ཡོད་པ་རེད། ཅེས་གསུངས་འདུག

སྲིད་སྐྱོང་མཆོག་གིས་བོད་མིའི་སྤྱི་ཚོགས་ནང་གཞུང་ཞབས་ཚོར་ལྟ་ཕྱོགས་གང་འདྲ་ཡོད་མེད་གསུངས་དོན། སྤྱི་ཡོངས་ནས་བོད་པའི་སྤྱི་ཚོགས་ནང་བོད་མིའི་སྒྲིག་འཛུགས་ནང་སྤུན་མཆེད་ཡོད་མཁན་ཚོ་མ་གཏོགས་ལས་བྱེད་ནང་ཚུད་ཀྱི་མེད་པ་དང་། ལྐོག་ཟ་རུལ་སུངས་ཡོད་པ་རེད་ཅེས་བཀའ་མོལ་ཡོང་གི་ཡོད་ཀྱང་། ངས་མཐོ་སློབ་ཁག་དང་མང་ཚོགས་ཐུག་སྐབས་དེ་འདྲ་བྱེད་མཁན་ཡོད་ན་ང་ལ་ཐད་ཀར་ཡི་གེ་གཏོང་རོགས་ཞེས་ཞུ་བཞིན་ཡོད། བོད་མིའི་སྒྲིག་འཛུགས་ནང་ལྐོག་བཟའ་རུལ་སུངས་རྩ་བ་ནས་མེད་ཅེས་ཞུ་གི་མེད། ལྐོག་བཟའ་དང་འབྲེལ་བའི་གནས་ཚུལ་རེ་ཟུང་བྱུང་ཡོད་པ་དེ་དག་ལ་ང་ཚོས་ཉེས་ཆད་བཏང་བ་བྱུང་ཡོད། ཅེས་སོགས་གསུངས་འདུག