ཕྱི་ཚེས་ ༦ ཉིན་སུད་སི་ཇི་ནི་ཝ་མཉམ་འབྲེལ་རྒྱ་ཚོགས་མདུན་ཐང་དུ་ཁྱིན་ཚང་བཞིའི་བོད་དོན་ཞུ་གཏུག་གི་ལས་འགུལ་ཐེངས་ ༤༡ སྤེལ་ཡོད་པ་དང་། ཐེངས་འདིར་ཨ་མི་རི་ཁའི་གླིང་གི་རྒྱལ་ཁབ་ཁག་དང་ཡུ་རོབ། ཨོ་སི་ཁྲི་རོ་ལེ་ཡའི་གླིང་གི་རྒྱལ་ཁབ་ཁག་ཅིག་བཅས་ཁྱོན་བསྡོམས་རྒྱལ་ཁབ་ ༣༡ ཙམ་གྱི་གཞུང་ཚབ་ལ་བོད་མིའི་སྒྲིག་འཛུགས་ཀྱིས་བཏོན་པའི་བོད་ནང་གི་བོད་འགྲོ་བ་མིའི་ཐོབ་ཐང་གི་སྙན་ཐོ་དང་། ལས་འགུལ་བ་རྣམས་ཀྱིས་ཆེད་དུ་བཏོན་པའི་སྙན་ཞུ་ཁག་བཅས་ཕུལ་ཡོད་འདུག
སུད་སིར་གནས་སྡོད་སྟག་ཚང་དཀོན་ཅོག་ནང་མི་དང་། བཀྲ་བསྟན་ཚང་པ་སངས། ངག་དབང་ཚང་ངག་དབང་དཔལ་ལྡན། རྒྱལ་ཚང་བཀྲ་ཤིས་ལྷ་མོ་ནང་མི་བཅས་ཁྱིམ་ཚང་བཞིས་སུད་སི་ཇི་ནི་ཝ་མཉམ་འབྲེལ་རྒྱལ་ཚོགས་མདུན་དུ་ནམ་རྒྱུན་ལྟར་བོད་དོན་ཞུ་གཏུག་གི་ལས་འགུལ་ཐེངས་ ༤༡ སྤེལ་ཡོད་ཅིང་། ཨ་རི་དང་ཡུ་རོབ། ཨོ་སི་ཁྲི་རོ་ལེ་ཡའི་གླིང་གི་རྒྱལ་ཁབ་ཁག་ཅིག་བཅས་ཁྱོན་བསྡོམས་རྒྱལ་ཁབ་ ༣༡ ཙམ་གྱི་གཞུང་ཚབ་ཁང་དུ་བོད་མིའི་སྒྲིག་འཛུགས་ཀྱིས་བཏོན་པའི་བོད་ནང་གི་བོད་འགྲོ་བ་མིའི་ཐོབ་ཐང་གི་སྙན་ཐོ་དང་། ལས་འགུལ་བ་རྣམས་ཀྱིས་ཆེད་དུ་བཏོན་པའི་སྙན་ཞུ་ཁག་ཅིག་བཅས་ཕུལ་ཡོད་འདུག་པ་མ་ཟད། རྒྱ་ནག་དང་ཡུ་རོབ་ཁུལ་གཙོས་འཛམ་གླིང་གི་ཡུལ་སྐོར་སྤྲོ་འཆམ་པ་མང་པོར་བོད་གནས་ཡིག་ཆ་འགྲེམ་སྤེལ་སོགས་གནང་ཡོད་འདུག
ཐེངས་འདིའི་ལས་འགུལ་ནང་སུད་སིར་གནས་སྡོད་ཡ་རོང་ཚང་བློས་གྲོས་རྒྱ་མཚོ་ལགས་མཉམ་ཞུགས་གནང་ཡོད་འདུག རྒྱལ་ཚོགས་མདུན་བོད་དོན་ཞུ་གཏུག་གི་ལས་འགུལ་འདི་ནི་ཕྱི་ལོ་ ༢༠༡༢ ལོའི་ཟླ་ ༡༢ ཚེས་ ༡༠ ནས་ཁྱིམ་ཚང་གཉིས་ཀྱིས་དབུ་བཙུགས་ཤིང་། རིམ་གྱིས་བཀྲ་བསྟན་ཚང་པ་སངས་ལགས་དང་། ངག་དབང་ཚང་ངག་དབང་དཔལ་ལྡན། རྒྱལ་བསྟན་ཚང་བཀྲ་ཤིས་ལྷ་མོ་བཅས་མཉམ་ཞུགས་ཀྱིས་ད་ཆར་ཁྱིམ་ཚང་བཞི་ཡི་ལས་འགུལ་དུ་གྱུར་ཡོད་འདུག
ལས་འགུལ་འདི་བཞིན་སུད་སིད་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ལས་ཁུངས་མདུན་དང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་མདུན་ཐང་བཅས་སུ་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་གྲངས་དང་མཉམ་པའི་བོད་ཀྱི་རྒྱལ་དར་སྒྲེང་འཛུགས་དང་། བོད་ནང་གི་དཀའ་སྡུག་གི་གནས་བབ་འཁོད་པའི་ཡིག་ཆ་ཁག་འགྲེམས་སྤེལ། སྐུ་ལུས་མེར་བསྲེགས་གནང་མཁན་འབོད་སྒྲའམ་དགོས་འདུན་འཁོད་པའི་ཡིག་ཆ་ཁག སྐུ་ལུས་མེར་བསྲེགས་གནང་བའི་ཐད་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ལངས་ཕྱོགས་དང་དགོངས་ཚུལ་ག་རེ་ཡིན་པ་སོགས་དབྱིན་དང་ཧྥ་རན་ཆི་(FRENCH)བཅས་ཀྱི་ནང་འགྲེམ་སྤེལ་བྱེད་ཀྱི་ཡོད་འདུག
