དེ་རིང་ཐོ་རངས་ཙམ་ལ་དྷ་རམ་ས་ལའི་དབུས་སྣེ་ལེན་ཁང་གི་ལས་བྱེད་ཅིག་ལ་མེ་མདས་བརྒྱབ་སྟེ་ད་ལྟ་ཅན་དྷི་གྷར་སྨན་ཁང་དུ་ཡོད་འདུག
དེ་རིང་ཐོ་རངས་ཆུ་ཚོད་ ༤ པ་ཡས་མས་སུ། དྷ་རམ་ས་ལའི་དབུས་སྣེ་ལེན་ཁང་གི་ལས་བྱེད་དབང་ཕྱུག་ཞུ་བར་མི་ཞིག་གིས་མེ་མདས་བརྒྱབ་སྟེ། དཔུང་པར་རྨས་སྐྱོན་ཕོག་ཡོད་པ་དང་། ད་ལྟ་ཅན་དྷི་གྷར་པི་ཇི་ཨེ་སྨན་ཁང་དུ་སྨན་བཅོས་བྱེད་བཞིན་ཡོད་འདུག་ལ། སྨན་པས་ཁོང་གི་སྲོག་ལ་ཉེན་ཁ་མེད་སྐོར་བརྗོད་ཡོད་འདུག ད་ལྟའི་ཆར་ཁོང་ལ་མེ་མདའ་རྒྱག་མཁན་སུ་ཡིན་དང་ཅིའི་ཕྱིར་བརྒྱབ་པ་ཡིན་གསལ་བོ་ཤེས་མི་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ལས་བྱེད་ཀུན་དགའ་བཀྲ་ཤིས་ལགས་སུ་བཀའ་འདྲི་ཞུས་པར་ཁོང་གིས། དེ་རིང་ཞོགས་པར་དབུས་སྣེ་ལེན་ཁང་དུ་གནས་ཚུལ་དེ་བྱུང་རྗེས། ལམ་སང་བདེ་སྲུང་དྲུང་ཆེ་མར་ཕེབས་ཏེ། རྨས་མ་ཅན་དྷི་གྷར་པི་ཇི་ཨེ་(PGI)སྨན་ཁང་དུ་བསྐྱལ་ནས་སྨན་བཅོས་བྱེད་བཞིན་ཡོད་ལ། སྨན་ཁང་གིས་ཁོང་གི་སྲོག་ལ་ཉེན་ཁ་མེད་སྐོར་བརྗོད་སོང་། དེ་རིང་ང་ཚོས་གཙོ་བོ་ལས་ཀ་གཉིས་བྱས་པ་རེད། དང་པོ་མེ་མདའ་ཕོག་པའི་ལས་བྱེད་ལམ་སང་སྨན་ཁང་དུ་བསྐྱལ་བ་དང་། གཉིས་པ་ང་ཚོ་རྒྱ་གར་ས་ཐོག་ཏུ་ཡོད་དུས་གནས་ཚུལ་དེ་བྱུང་བ་དང་ས་གནས་ཉེན་རྟོག་ལས་ཁུངས་ལ་སྙན་གསེང་ཞུས་པ་རེད། ཅེས་བརྗོད་བྱུང་།
མེ་མདའ་རྒྱག་མཁན་སུ་ཡིན་གྱི་དོགས་གཞི་འདྲ་ཡོད་མེད་དྲིས་པར་ཁོང་གིས། ད་ལྟ་གནས་ཚུལ་གསལ་བོ་ཆགས་ཡོད་པ་མ་རེད། གང་ཡིན་ཟེར་ན། གཅིག་ནས་གནས་ཚུལ་དེ་བྱུང་ནས་ཆུ་ཚོད་ཁ་ཤས་མ་གཏོགས་ཕྱིན་མེད་པ་དང་། གཉིས་ནས་མེ་མདའ་ཕོག་མཁན་གྱིས་ལམ་སང་སྐད་ཆ་མང་པོ་བཤད་རྒྱུ་ཡོད་པ་མ་རེད། ད་ལྟའི་ཆར་མེ་མདའ་རྒྱག་དགོས་པའི་རྒྱུ་མཚན་དང་རྒྱག་མཁན་སུ་ཡིན་སོགས་གསལ་བོ་ཤེས་ཀྱི་མི་འདུག སྤྱི་ཚོགས་ཐོག་གནས་ཚུལ་དེ་ལས་འཕྲོས་པའི་ག་རེ་གླེང་གི་ཡོད་ཀྱང་། བདེ་སྲུང་ལས་ཁུངས་ངོས་ནས་ད་ལྟ་གསལ་བོ་ཞུ་རྒྱུ་མི་འདུག གང་ཡིན་ཟེར་ན། ཞུས་པ་དེ་དངོས་དོན་དང་མཐུན་པ་ཞིག་དགོས་པ་རེད། ས་གནས་ཉེན་རྟོག་ལས་ཁུངས་ནས་ཞིབ་འཇུག་བྱེད་བཞིན་ཡོད་སྟབས། ག་ལེར་གསལ་བོ་ཆགས་ཡོང་གི་རེད་བསམ་གྱི་འདུག ཅེས་བརྗོད་བྱུང་།
སྣེ་ལེན་ཁང་ནང་རྐུན་མ་འཛུལ་བའི་སྐད་ཆ་ཞིག་ཡོང་གི་ཡོད་པ་དེ་བདེན་མིན་དྲིས་པར་ཁོང་གིས། ཁ་ཤས་ཀྱིས་རྐུན་མ་རེད་མདོག་མདོག་ཤོད་ཀྱི་ཡོད་ཀྱང་། ད་ལྟའི་ཆར་རྐུན་མ་ཡིན་མིན་གསལ་བོ་གང་ཡང་ཡོད་པ་མ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
དང་ཐོག་གསར་འགྱུར་ཡག་པོ་སྤེལ་འདུག་པར་ཐུགས་རྗེ་ཆེ་ཞུ། གནས་ཚུལ་ཚབས་ཆེན་འདི་འདྲ་རིགས་ང་རང་ཚོའི་བརྒྱུད་ལམ་ཁག་ཏུ་ཐོན་དགོས་པ་དེ་གལ་ཆེན་པོ་རེད། དབུས་སྣེ་ལེན་ཁང་ནང་མེ་མདའ་བཟུང་ནས་ཡོང་མཁན་ཞིག་ཡིན་ན། ཏག་ག་སེ་རྐུན་མ་འདྲ་བོ་མ་རེད། གནས་ཚུལ་ཚབས་ཆེན་ཡིན་པས། རྒྱ་གར་གཞུང་དང་བདེ་སྲུང་གིས་ངེས་པར་དུ་ཐུགས་གཟབ་གནང་དགོས་པ་རེད། འདི་ང་ཚོར་བརྡ་ཞིག་བརྒྱབ་པ་རེད།
གསར་འགྱུར་ཆེན་པོ་དང་གནས་ཚུལ་ཛ་དྲག་པོ་དེ་འདྲ་གང་ཡང་མ་རེད་དོ།།
ཞེད་སྣང་བྱེད་དགོས་པ་དང་དཀྲོག་གཏམ་བཟོ་དགོས་པ་ཡོད་མ་རེད། རྡ་རམ་ས་ལར་ལོ་རྟག་པར་མི་གཉིས་གསུམ་རེ་རྒྱུན་ལྡན་མིན་པའི་ཐོག་ནས་རྐྱེན་འདས་འགྲོ་བཞིན་ཡོད་ཡོད་པ་རེད། ང་རྡ་རམ་ས་ལར་ལོ་མང་པོར་བསྡད་མྱོང་མཁན་ཞིག་ཡིན། ན་ནིང་སྦག་སུའི་མགྲོན་ཁང་ཞིག་ཏུ་བུད་མེད་ཅིག་གྲོངས་པ་རེད། སྦག་སུའི་རྒྱུག་ཆུའི་ནང་དུ་ཕོ་གསར་ཞིག་གི་ཕུང་བོ་རེག་པ་རེད། དེ་དག་ཐོག་མ་མི་ཞིག་གི་བསད་པ་ཡིན་མདོག་མདོག་བཤད་པ་རེད། རྗེས་སུ་གཞན་གྱིས་བསད་མེད་པ་ཁུངས་སྐྱེལ་བྱུང་བ་རེད། རྡ་རམ་ས་ལ་གཅིག་པུ་མ་རེད་མི་མང་པོ་འདུས་སྡོད་བྱེད་སའི་སྤྱི་ཚོགས་གང་དུ་ཡིན་ནའང་གནས་ཚུལ་དེ་ཡོང་གི་ཡོད་པ་རེད།
ཁ་སང་ཁེ་ཉིན་རྡ་རམ་ས་ལའི་ཁང་སྟོང་ཞིག་གི་ནང་དུ་མི་ཞིག་གྲོངས་ཡོད་པ་དེའང་ས་བསྒྲགས་གནམ་བསྒྲགས་བྱས་ཏེ་ཅིག་རེད་མདོག་མདོག་བྱས་པ་དང་། དེ་རིང་གི་གནས་ཚུལ་དེ་ཡང་ཧ་ཆང་ཞེད་སྣང་ཚ་བོ་ཞིག་རེད་མདོག་མདོག་བྱེད་པ་དེ་འདྲ་དགོས་པ་མ་རེད། གལ་སྲིད་དེ་འདྲའི་ཞེད་སྣང་ཚ་བོ་ཞིག་བྱེད་རྩིས་ཡོད་མཁན་ཞིག་ཡིན་ན་རྡ་རམ་ས་ལའི་ས་ཁང་ནང་ལས་ཀ་བྱས་སྡོད་མཁན་ར་བཟི་བ་ཞིག་དང་། སྣེ་ལེན་ཁང་གི་ལས་བྱེད་དཀྱུས་མ་ཞིག་གསོད་དགོས་དོན་སྣེ་གཅིག་ཀྱང་ཡོད་མ་རེད།
ང་རང་གིས་ཚོད་དཔག་བྱས་ན་དེ་རིང་གི་གནས་ཚུལ་དེའང་དེ་འདྲ་ཞེ་སྣང་བྱེད་གོས་པ་གང་ཡང་ཡོད་མ་རེད་བསམ་གྱི་འདུག། གང་ཡིན་ཟེར་ན་སྣེ་ལེན་ཁང་ཡོད་སའི་ས་སྟོང་དེ་ནས་ལས་བྱེད་དཀྱུས་མ་ཞིག་ལ་མེ་མདས་བརྒྱབ་ནས་གསོད་དགོས་པ་ཡོད་པ་མ་རེད། གཅིག་བྱས་ན་རྐུན་མ་ལག་ཏུ་མེ་མདའ་འཁུར་ཡོད་མཁན་ཞིག་སྟབས་མ་ལེགས་པར་ཁོ་རང་ཐོག་ཏུ་ཁེལ་ནས་རྐུན་མས་ཞེད་སྣང་གིས་མེ་མདའ་བརྒྱབ་པ་རེད་བསམ་གྱི་འདུག ད་ལྟའི་རྐུན་མ་ཚོས་སོ་སོ་སྲུང་སྐྱོབ་བྱེད་ཆེད་མཚོན་ཆ་ཞིག་ཡོད་ཡོད་པ་རེད། དེང་སྐབས་རྡ་རམ་ས་ལ་དང་གངས་སྐྱིད་གཡས་གཡོན་ན་རྐུན་མ་ཧ་ཅང་མང་པོ་ཡོད་པ་སྐད་གྲགས་ཆགས་བསྡད་ཡོད་པ་རེད། ད་ལོའི་ལོ་གསར་གྱི་སྔ་རྗེས་ལ་རྡ་རམ་ས་ལ་དང་གངས་སྐྱིད་ཀྱི་མི་ཚང་20ཙམ་གྱི་ནང་ལ་འཛུལ་ཚར་བ་རེད། གཙུག་ལག་ཁང་ཉེ་འཁྲིས་ཀྱི་རྒྱལ་བ་རིན་པོ་ཆེའི་སྐུ་སྲུང་བ་ཞིག་གི་སྐྱེས་དམན་ལའང་རྐུན་མས་ཉེས་རྡུང་བཏང་སྟེ་གསོད་གྲབས་ཤིག་བྱས་ཡོད་པ་རེད།
དྷ་སར་བོད་རིགས་གཅིག་གི་རོ་རྙེད་། བོད་རིགས་གཅིག་ལ་མེ་མདའ་བརྒྱབས། ཨ་ཁ་ཁ།།