དེ་རིང་ཕྱི་དྲོར་ཨ་རིའི་ཕྱི་སྲིད་དྲུང་ཆེ་ཇོན་ཁེད་རེ་ཡིས་ཨུ་རུ་སུའི་ཕྱི་སྲིད་བློན་ཆེན་ལ་ཐུག་འཕྲད་གནང་སྟེ་ཡུག་རེན་གཙོས་རྒྱལ་སྤྱིའི་དཀའ་རྙོག་ཁག་གཅིག་གི་ཐོག་གྲོས་མོལ་བྱ་རྒྱུ་ཡིན་འདུག
ཁ་སང་ཨ་རིའི་ཕྱི་སྲིད་ལྷན་ཁང་གིས་ཡིག་ཐོག་གི་གསལ་བསྒྲགས་ཤིག་སྤེལ་བའི་ནང་། དེ་རིང་ཕྱི་དྲོར་ཨ་རིའི་ཕྱི་སྲིད་དྲུང་ཆེ་ཇོན་ཁེད་རེ་ཡིས་ཨུ་རུ་སུའི་གྲོང་ཁྱེར་སཱོ་ཆི་རུ་ཨུ་རུ་སུའི་སྲིད་འཛིན་པུ་ཊིན་དང་ཕྱི་སྲིད་བློན་ཆེན་སར་གྷེ་ (Sergey Lavrov) རྣམ་གཉིས་ལ་ཐུག་སྟེ། ཨི་རན་དང་སི་རེ་ཡ། ཡུག་རེན་བཅས་ཀྱི་གནད་དོན་ཐོག་གྲོས་མོལ་བྱ་རྒྱུ་ཡིན་སྐོར་བསྒྲགས་ཡོད་ཀྱང་། ད་ལྟ་ཨུ་རུ་སུའི་གཞུང་གིས་ཇོན་ཁེད་རེ་དང་སྲིད་འཛིན་པུ་ཊིན་ཐུག་མིན་གྱི་ཁ་གསལ་བརྗོད་མི་འདུག
ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་མ་མཱ་རེ་ཧར་ཧྥེ་ (Marie Harf) ཡིས་རོའུ་ཌར་གསར་ལམ་ཐོག “ད་ཐེངས་ཕྱི་སྲིད་དྲུང་ཆེ་ཇོན་ཁེད་རེ་མཆོག་ཨུ་རུ་སུར་བསྐྱོད་ནས་ཨུ་རུ་སུའི་མཐོ་རིམ་དཔོན་རིགས་ཁག་ལ་ཐུག་འཕྲད་བྱས་ཏེ། ཨ་རིས་རྒྱལ་སྤྱིའི་གནད་དོན་ཁག་ལ་ལྟ་ཕྱོགས་གང་འདྲ་འཛིན་མིན་ཐད་གྲོས་མོལ་བྱ་རྒྱུ་རེད།” ཅེས་བརྗོད་འདུག
ཨུ་རུ་སུའི་སྲིད་འཛིན་པུ་ཊིན་གྱི་མགྲིན་ཚབ་པ་པེ་སི་ཁཱོ་ཝེ་ (Dmitry Peskov) ཡིས་མཱོ་སོ་ཁཱོ་དུས་བབ་ཐོག “ཇོན་ཁེད་རེ་ཡིས་ཨུ་རུ་སུར་རྒྱལ་དོན་སྐོར་སྐྱོད་བྱས་པ་དེས། ད་ལྟ་རྒྱལ་སྤྱིའི་བརྟན་བརླིང་གང་འདྲ་ཆགས་མིན་གྱི་རྐྱེན་རྩ་གཙོ་བོ་ནི་རྒྱལ་ཁབ་གཉིས་ཀྱི་འབྲེལ་ལམ་ལ་ཐུག་ཡོད་པ་ཤེས་ནས་ཡོང་བ་ཞིག་ཡིན་སྟབས། ང་ཚོས་མ་འོངས་པར་རྒྱལ་ཁབ་གཉིས་ཀྱི་འབྲེལ་ལམ་བསྐྱར་གསོ་བྱ་ཐུབ་པར་རེ་བ་རྒྱག་གི་ཡོད།”ཅེས་དང་། ཨུ་རུ་སུའི་ཕྱི་སྲིད་བློན་ཆེན་གཞོན་པ་སར་གྷེ་རབ་བྷེ་ཁཱོ་ཝེ་ (Sergei Ryabkov) ཡིས། “ད་ཐེངས་རྒྱལ་ཁབ་གཉིས་ཀྱི་ཕྱི་སྲིད་དཔོན་རིགས་རྣམ་གཉིས་ཀྱིས་འདི་ལོའི་ཕྱི་ཟླ་ ༢ པའི་ནང་ཡུག་རེན་དང་ཡུག་རེན་གྱེན་ལོག་ཤོག་ཁག་བར་མེ་འཕེན་མཚམས་འཇོག་གི་གྲོས་མཐུན་ཞིག་བཞག་ཡོད་པ་དེ་དང་། དཀྱིལ་ཤར་ཡུལ་གྲུའི་གནད་དོན་ཁག་གཅིག་ཐོག་གྲོས་མོལ་བྱ་རྒྱུ་ཡིན། ད་ལྟ་ཨ་རི་དང་ང་ཚོའི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པ་དེ་ ༢༠༡༤ ལོར་ཨོ་བྷ་མའི་གཞུང་གིས་ཡུག་རེན་གྱི་དམག་འཁྲུག་དེ་ང་ཚོས་ཇུས་འགོད་བྱས་པ་ཡིན་ཚུལ་རྒྱལ་སྤྱིའི་སྤྱི་ཚོགས་ལ་བསྒྲགས་ཏེ། ང་ཚོ་རྒྱལ་སྤྱིའི་སྡིངས་ཆ་ནས་ཟུར་འཕུད་བཏང་བ་མ་ཟད། ཨ་རིའི་མཐུན་གྲོགས་རྒྱལ་ཁབ་ཁག་གིས་ཀྱང་གཅིག་མཚུངས་ལངས་ཕྱོགས་འཛིན་དགོས་པའི་བརྒྱུད་སྐུལ་བྱས་པ་ལས་བྱུང་བ་ཞིག་ཡིན་པ་ལས། ད་བར་ཨུ་རུ་སུའི་ཕྱོགས་ནས་རྒྱལ་ཁབ་གཉིས་ཀྱི་འབྲེལ་ལམ་ལ་གཏོར་བཤིག་གཏོང་རྒྱུའི་ངན་བྱུས་གང་ཡང་བཤམས་མེད།”ཅེས་བརྗོད་འདུག
རྒྱ་གར་གྱི་ཛི་བརྙན་འཕྲིན་དང་དབྱིན་ཡུལ་གྱི་གྷར་ཌིན་ཐོག་གནས་ཚུལ་སྤེལ་བ་ལྟར་ན། ༢༠༡༣ ལོའི་ཟླ་ ༡༡ ནང་ཡུག་རེན་སྲིད་འཛིན་ཡཱ་ཎོ་ཁོ་བེ་ཆི་ (Viktor Yanukovych) ཡིས་ཡུ་རོབ་མཐུན་ཚོགས་དང་ལྷན་དུ་ཚོང་དོན་གྲོས་ཆོད་འཇོག་རྒྱུའི་ཐག་གཅོད་བྱས་ཡོད་ཀྱང་། མཐའ་མ་ཁོང་གིས་ཨུ་རུ་སུའི་གནོན་ཤུགས་འོག་གྲོས་མཐུན་ལ་མིང་རྟགས་བཀོད་མེད་སྟབས། ༢༠༡༤ ལོའི་ཟླ་ ༢ ཚེས་ ༢༢ ཉིན་ཡུག་རེན་གྲོས་ཚོགས་ཀྱིས་དམིགས་བསལ་བཞུགས་མོལ་ཚོགས་འདུ་བསྐོངས་ཏེ་ཡཱ་ཎོ་ཁོ་བོ་ཆི་སྲིད་འཛིན་གྱི་ལས་གནས་ནས་གནས་དབྱུང་བཏང་ཡོད་སྟབས། ཨུ་རུ་སུར་དགའ་མོས་བྱེད་མཁན་གྱེན་ལོག་ཤོག་ཁག་དང་ཡུག་རེན་གཞུང་བར་དམག་འཁྲུག་བྱུང་སྟེ། ཨུ་རུ་སུས་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱས་ནས་གོ་མཚོན་དང་དཔལ་འབྱོར་རོགས་རམ་སྤྲད་པ་མ་ཟད། ༢༠༡༤ ལོའི་ཟླ་ ༣ པའི་ནང་ཁེར་མེ་ཡ་བཙན་བཟུང་དང་ཡུལ་མི་ ༦༡༠༠ ལྷག་བསད་ཡོད་སྟབས། ཨ་རི་གཙོས་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་ཐེངས་ ༦ ཙམ་བཏང་ཡོད།
ཟླ་འདིའི་ཚེས་ ༩ ཉིན་ཨུ་རུ་སུ་གཞུང་གིས་འཛམ་གླིང་དམག་ཆེན་གཉིས་པའི་སྐབས་ཨུ་རུ་སུ་འཇར་མན་ནེའི་བཙན་འཛུལ་ལས་རྒྱལ་ཁ་ཐོབ་སྟེ་ལོ་ ༧༠ འཁོར་བའི་དུས་དྲན་སྲུང་གཙུ་ཞུས་སྐབས་འཇར་མན་ནེའི་སྲིད་བློན་ཨན་གྷེ་ལ་མེར་གྷལ་མཆོག་བསླེབས་ཡོད་ཀྱང་། ཨོ་བྷ་མ་བསླེབས་མེད་པ་མ་ཟད། ཁ་སང་ཨུ་རུ་སུའི་ཕྱི་སྲིད་བློན་ཆེན་གཞོན་པས་ཨ་རིས་ང་ཚོར་དཔལ་འབྱོར་ཉེས་ཆད་ག་ཚོད་ཆད་ཀྱང་། ཨ་རིའི་ཁེ་ལས་བྷོ་ཨེན་ (Boeing) དང་ཧྥོར་ཌེ་(Ford)། ཇོན་ཌེ་རེ་ (John Deere) དང་ཨལ་ཁཱོ་ (Alcoa)། ཁཱོ་ཁ་ཁཱོ་ལ་ (Coca Cola) དང་པེབ་སི་(PepsiCo)། མར་སེ་ (Mars)དང་ཨེག་ཛུན་(ExxonMobil)། ཆི་རོན(Chevron) དང་ཁོ་ཎོ་ཁོ་ཧྥེ་ལེབ་(ConocoPhillips) བཅས་ཀྱིས་ཨ་རུ་སུའི་ས་ཐོག་ནས་ཚོང་བཞག་ནས་འགྲོ་རྩིས་བྱེད་ཀྱི་མི་འདུག གང་ཡིན་ཟེར་ན་ཁེ་ལས་པ་དག་ནི་ཨ་རིའི་གཞུང་ལྟར་མིན་པར་དོན་དངོས་གནས་ཚུལ་ཤེས་མཁན་ཞིག་ཡིན་སྐོར་བརྗོད་ཡོད་སྟབས། ད་ལྟ་ཨ་རི་དང་ཨུ་རུ་སུའི་འབྲེལ་ལམ་ཡག་ཏུ་འགྲོ་རྒྱུ་ཁག་པོ་ཡིན་ཞེས་སོགས་བཀོད་འདུག
དེ་རིང་ཨུ་རུ་སུའི་ཨིན་ཌར་ཧྥེག་སི་ (Interfax) ཞེས་པའི་གསར་འགྱུར་ལམ་ཐོག་མིང་སྨོས་མེད་པའི་ཨུ་རུ་སུའི་ལས་བྱེད་ཞིག་གིས། ཨུ་རུ་སུ་དང་ཨ་རིའི་འབྲེལ་ལམ་བསྐྱར་གསོ་ཐུབ་པར་ད་དུང་བཅུ་ཕྲག་ཅིག་ལྷག་འགོར་ སྲིད་པ་ཞིག་ཡིན་སྟབས། ཨ་རིས་ཡུག་རེན་གྱི་དཀའ་རྙོག་སེལ་ཐབས་ལ་དོན་འབྲས་སོན་པའི་ཆ་ཤས་ལེན་དགོས་པ་མ་ཟད། ལྷག་པར་དུ་ཡུག་རེན་གཞུང་དང་ཡུག་རེན་གྱི་ཤར་ཕྱོགས་ས་ཁུལ་ཌོ་ནེ་ཌི་སི་ཁི་(Donetsk) དང་ལུ་ཧན་སེ་ཁི་ (Luhansk) སྲིད་གཞུང་བར་ཐད་ཀར་གྲོས་མོལ་བྱེད་བཅུག་ནས་དཀའ་ངལ་སེལ་དགོས་པ་ཆགས་ཡོད་སྟབས། ད་རེབ་ཇོན་ཁེད་རེ་ཡིས་གནད་དོན་དེའི་ཐོག་གླེང་སློང་གང་འདྲ་བྱེད་མིན་ལ་རག་ལུས་ཡོད། ཅེས་བརྗོད་འདུག
ཇོན་ཁེད་རེ་ཡིས་ཨུ་རུ་སུའི་རྒྱལ་དོན་གྲོས་མོལ་ཁག་བསྒྲུབས་རྗེས། ཀྲར་ཀི་གྲོང་ཁྱེར་ཨན་ཌལ་ཡཱ་ (Antalya) ལ་བསྐྱོད་དེ་ནུབ་བྱང་དམག་ཁུལ་ཁང་གི་ཚོགས་མིའི་རྒྱལ་ཁབ་དབར་གྱི་ལྷན་ཚོགས་ཐོག་ཞུགས་རྒྱུ་ཡིན་འདུག
