གཞོན་སྐྱེས་ཚོའི་ནང་རྩ་བ་འཛུཊ་ཐབས་བྱ་རྒྱུ་གལ་ཆེན་པོ་རེད།

དེ་རིང་དབུ་མའི་ལམ་མི་མང་ལས་འགུལ་ཁང་གི་ཚོགས་ཆེན་སྐབས་ ༤ པ་དབུ་འཛུགས་ཐོག ལས་འགུལ་ཁང་གི་སྤྱི་ཁྱབ་འགན་འཛིན་ལགས་ཀྱིས་དབུ་མའི་ལམ་གཞུང་གིས་གཏན་ལ་ཕབ་པ་རེད་བསམ་ཏེ་ཡིན་ཤག་བྱས་ནས་བསྡད་པ་ཙམ་གྱིས་ཕན་གྱི་མེད་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠ ཐོག དྷ་ས་སྟོད་པ་སྐྱིད་སྡུག་ཚོགས་པའི་ཚོགས་ཁང་དུ། དབུ་མའི་ལམ་མི་མང་ལས་འགུལ་ཁང་གི་ཚོགས་ཆེན་སྐབས་བཞི་པ་དབུ་འཛུགས་གནང་སོང་བ་དང་། ཚོགས་འདུ་དབུ་འབྱེད་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་དབུས་སྤྱི་འཐུས་ཟླ་བ་ཚེ་རིང་ལགས་དང་། སྤྱི་འཐུས་རྨོག་རུ་བསྟན་པ་ལགས། དེ་བཞིན་དྷ་ས་ས་གནས་འཐུས་ཚོགས་དང་རང་བདེན་ཚོགས་ཆུང་། གཞུང་འབྲེལ་མ་ཡིན་པའི་ཚོགས་སྐྱིད་ཁག་བཅས་ཀྱི་སྐུ་ཚབ་རྣམ་པ་དང་། ལས་འགུལ་ཁང་ལ་ས་གནས་ཁག་སུམ་ཅུ་རུ་འབྲེལ་མཐུད་པ་ཡོད་པའི་ནང་ནས་ས་གནས་ཁག་ ༡༩ ཡི་ས་རྒྱུན་ ༥༠ ཙམ་ཚོགས་བཅར་གནང་ཡོད་པ་བཅས་ཁྱོན་མི་གྲངས་ ༡༠༠ ཡས་མས་འཛོམས་འདུག་ལ། ཚོགས་ཐོག་ཏུ་སྐུ་མགྲོན་གཙོ་བོ་མཆོག་གིས་ལས་འགུལ་ཁང་ལ་ཞལ་འདེབས་གནང་མཁན་གྱི་སྦྱིན་བདག་ཁག་ཅིག་ལ་ཁ་བཏགས་དང་ཕྱག་རྟགས་གནང་སོང་།

དབུ་མའི་ལམ་མི་མང་ལས་འགུལ་ཁང་གི་སྤྱི་ཁྱབ་འགན་འཛིན་སྤྲུལ་སྐུ་འཇམ་དབྱངས་ཡོན་ཏན་ལགས་ཀྱིས་ཚོགས་ཆེན་དང་འབྲེལ་བའི་གསུང་བཤད་གནང་སྐབས། དབུ་མའི་ལམ་ནི་གཞུང་གིས་དམངས་གཙོའི་ལམ་ནས་རིམ་གྱིས་གཏན་ལ་ཕབ་པའི་སྲིད་བྱུས་ཤིག་ཆགས་ཡོད་ཀྱང་། མང་ཚོགས་ཀྱི་ནང་ནས་དབུ་མའི་ལམ་ཡིན་ཟེར་ནས་ཡར་ཐོན་ཏེ་ལས་འགུལ་སྤེལ་རྒྱུ་ཧ་ཅང་གལ་ཆེན་པོ་ཡིན་པས། དབུ་མའི་ལམ་མི་མང་ལས་འགུལ་ཁང་གི་ངོས་ནས་ད་ལྟའི་བར་དུ་ས་གནས་ཁག་མང་པོ་ཞིག་ཏུ་དབུ་མའི་ལམ་ངོ་སྤྲོད་དང་གོ་རྟོགས་སྤེལ་བ་སོགས་དབུ་མའི་ལམ་དང་འབྲེལ་བའི་ལས་དོན་མང་པོ་གནང་ཡོད་པ་ལྟར། འདས་པའི་ལོ་གཉིས་ཀྱི་ནང་དུའང་ལས་དོན་གང་འཚམ་བྱུང་ཡོད་ལ། ལས་འགུལ་སྤེལ་བ་དེའང་ལས་འགུལ་ཁང་རང་གི་ངོ་བོའི་ཐོག་ནས་སྤེལ་བ་རེད་མ་གཏོགས་ཚོགས་པའི་ངོ་བོར་གནས་ཏེ། ཚོགས་མི་དང་ཚོགས་དངུལ་བསྡུ་རུབ་སོགས་ཀྱི་རིགས་ད་ལྟ་བར་དུ་བྱུང་མེད་ལ། མ་འོངས་པར་ཡང་དེ་འདྲ་བྱེད་པའི་འཆར་གཞི་གང་ཡང་མེད། ལས་འགུལ་ཁང་འཛུགས་དགོས་པའི་དམིགས་ཡུལ་ནི་བཙན་བྱོལ་སྤྱི་ཚོགས་ནང་དུ། དབུ་མའི་ལམ་གཞུང་གིས་གཏན་ལ་ཕབ་པ་རེད་ཅེས་ཡིན་ཤག་བྱས་ཏེ་བསྡད་པ་ཙམ་གྱིས་ཕན་གྱི་མེད་སྟབས། མ་སྐུལ་དང་བླངས་ཀྱི་ཐོག་ནས་ལས་འགུལ་ཁང་ནང་མཉམ་ཞུགས་གནང་བ་ཞིག་ཡིན་སྐོར་སོགས་གསུངས་སོང་།

མཛད་སྒོའི་ཐོག་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུ་མའི་ལམ་གྱི་ལས་འགུལ་སྤེལ་ཕྱོགས་དང་འབྲེལ་བའི་ལན་སྟོན་གནང་དོན། ང་ཚོའི་སྤྱི་ཚོགས་ནང་བོད་མིའི་སྒྲིག་འཛུགས་ཀྱི་སྲིད་བྱུས་རེད་ཟེར་དུས་ཡིན་ཤག་འདྲ་བྱས་ཏེ། མང་ཚོགས་ནང་ནས་དམིགས་བསལ་གྱིས་དོ་སྣང་མ་སྤྲད་པའི་སྐྱོན་གནས་དང་འཐུས་ཤོར་དེ་འདྲ་གཏན་གཏན་ཡོང་གི་ཡོད་པ་རེད། དཔེར་ན། དེང་སང་ཚོགས་འདུ་དེ་འདྲ་ཚོགས་པའི་སྐབས་སུ་དབུ་མའི་ལམ་གྱི་སྐོར་ལ་སྐད་ཆ་བཤད་རོགས་ཀྱིས་ལབ་དུས། སྐབས་རེར་ངོ་ཡང་ཚ་བ་འདྲ་བོ་འདུག དབུ་མའི་ལམ་གྱི་སྐོར་ལ་ག་ཚོད་བཤད་ཚར་བ་རེད། ད་དུང་མུ་མཐུད་ནས་བཤད་དགོས་པའི་གནས་སྟངས་ག་རེ་ཆགས་ཀྱི་འདུག ང་རང་འདྲ་བོ་ཡིན་ན། དབུ་མའི་ལམ་གྱི་སྐོར་ལ་བཤད་དགོས་ཀྱི་ཡོད་ན། གཞོན་སྐྱེས་སློབ་གྲྭར་འགྲོ་བཞིན་པ་ཚོར་དམིགས་སུ་བཀར་ནས་དོ་སྣང་བྱས་ཏེ་ཤོད་ཀྱི་ཡོད་ལ། སློབ་ཕྲུག་ཚོར་ཤོད་སྐབས་ཁོ་རང་ཚོར་ཚོར་བ་དང་དོ་སྣང་མ་འདྲ་ཞིག་སླེབ་ཀྱི་འདུག ཁོ་ཚོ་བློ་གསར་པ་དང་ལོ་གཞོན་གཞོན་ཡིན་པས། ལོ་རྒྱུས་དང་ད་ལྟའི་དངོས་ཡོད་གནས་སྟངས་ཀྱི་ཐོག་ནས་རྒྱུས་མངའ་མེད་པ་དེ་ཚོ། ང་ཚོས་ད་ལྟ་ནས་རྒྱུས་མངའ་བཟོ་ཐུབ་པ་ཡིན་ན་གཏན་གཏན་ཐུགས་ཕན་གསོ་ཐུབ་པ་རེད། ཅེས་དང་། ལས་འགུལ་ཁང་གི་ངོས་ནས་འགྲོ་སོང་གང་ཆུང་ཆུང་བྱས་ཏེ་ལས་འགུལ་མང་པོ་ཞིག་སྤེལ་ཐུབ་པ་བྱུང་བ་དེ་ཡག་པོ་ཡིན་ལ། མི་རབས་རྒན་པོ་ཚོ་རིམ་གྱིས་རྫོགས་འགྲོ་བཞིན་ཡོད་སྟབས། གཞོན་སྐྱེས་ཚོའི་ནང་དུ་རྩ་བ་བརྟན་པོ་འཛུགས་ཐུབ་ཆེད་མ་འོངས་པར་གཞོན་སྐྱེས་ཚོ་དང་། ལྷག་པར་དུ་མཐོ་སློབ་ཁག་གི་ནང་ཆེད་དུ་དམིགས་ཏེ་བགྲོ་གླེང་གོ་སྡུར་གནང་རྒྱུ་གལ་ཆེན་པོ་ཡིན་སྐོར་གསུངས་སོང་།

དབུས་རྒྱུན་སྤོག་ར་ས་འཐུས་ཚོགས་གཙོ་ཚེ་རིང་སྲིད་བརྟན་ལགས་ཀྱིས། ཕྱི་ལོ་ ༢༠༡༣ ཟླ་ ༤ པ་ནས་ ༢༠༡༥ ཟླ་ ༤ པ་བར་གྱི་ལས་བསྡོམས་སྙན་སྒྲོན་ཞུས་པའི་ནང་། ལས་འགུལ་ཁང་གི་གོ་སྒྲིག་འོག བཞུགས་སྒར་དྷ་རམ་ས་ལའི་གཙོས་ལ་དྭགས་སོགས་བོད་མི་འདུས་སྡོད་བྱས་ཡོད་པའི་ས་གནས་དང་སྡེ་ཚན་ཁག་ ༢༡ དང་། མ་སུ་རི་བོད་ཁྱིམ་དང་སེ་ལ་ཀོལ་བོད་ཁྱིམ། གྷོ་པ་པུར། དེ་བཞིན་སུ་ཇཱ་བོད་ཁྱིམ་སོགས་སློབ་གྲྭ་ཁག་ཅིག་བཅས་ཀྱི་ནང་དབུ་མའི་ལམ་གྱི་གོ་རྟོགས་སྤེལ་ཡོད་པ་དང་། དེ་བཞིན། དབུ་མའི་ལམ་གྱི་ཉིན་མོ་སྲུང་གཙི་དང་། རྒྱ་གར་གྱི་རྒྱལ་ས་ལྡི་ལིར་ཉིན་གྲངས་ ༣ རིང་དབུ་མའི་ལམ་གྱི་མི་མང་ལས་འགུལ་སྤེལ་བ། གཞན། ༧གོང་ས་མཆོག་གི་དབུས་ཁྲི་ཟུར་ཟམ་གདོང་རིན་པོ་ཆེ་མཆོག་དང་སྲིད་སྐྱོང་བློ་བཟང་སེང་གེ་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ཀྱིས། སྔ་རྗེས་སུ་གནང་བའི་དབུ་མའི་ལམ་དང་འབྲེལ་བའི་གསུང་བཤད་རྣམས་ཕྱོགས་བསྒྲིགས་གནང་བའི་འོད་སྡེར་གཉིས་ས་གནས་ཁག་ ༣༠ ལྷག་གི་ནང་ ༡༠༠༠ རེ་འགྲེམས་སྤེལ་གནང་ཡོད་པ་སོགས་བཀོད་འདུག

ལས་འགུལ་ཁང་གི་སྤྱི་ཁྱབ་འགན་འཛིན་གཞོན་པ་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་རྩིས་ཁྲ་སྙན་སྒྲོན་གནང་བ་ལྟར་ན། ལས་འགུལ་ཁང་ལ་ཁྱོན་ཧིན་སྒོར་འབུམ་བཞི་དང་ལྔ་ཁྲི་ཆིག་སྟོང་བརྒྱ་མེད་དགུ་བཅུ་གོ་བརྒྱད་(༤༥༡༠༩༨ )བྱུང་བའི་ནང་ནས། ཧིན་སྒོར་འབུམ་གསུམ་དང་དགུ་ཁྲི་བདུན་སྟོང་བདུན་བརྒྱ་བཅུ་མེད་བཞི་( ༣༩༧༧༠༤) འགྲོ་སོང་བཏང་རྗེས། ད་ལྟ་ཧིན་སྒོར་ཁྲི་ལྔ་དང་སུམ་སྟོང་སུམ་བརྒྱ་དགུ་བཅུ་གོ་གསུམ་(༥༣༣༩༣) ལྷག་ཡོད་འདུག

ཐེངས་འདིའི་ཉིན་གྲངས་ ༣ རིང་གི་ཚོགས་ཆེན་ཐོག འགན་འཛིན་ལྷན་ཚོགས་ཐེངས་གསུམ་པའི་གྲོས་ཆོད་ཁག་དབུས་ས་གཉིས་ནས་ལག་ལེན་ཇི་ལྟར་འཁེལ་ཡོད་མེད་དང་། ལོ་གཅིག་དང་ཕྱེད་ཀྱི་ལས་བསྡོམས་དང་རྩིས་ཁྲ་སྙན་སྒྲོན་དང་འབྲེལ་དེའི་ཐོག་དོགས་འདྲི་གོ་སྡུར་གནང་རྒྱུ་དང་། བོད་ནང་གི་ཛ་དྲག་ལ་གདུང་སེམས་མཉམ་སྐྱེད་ཀྱིས་ལས་འགུལ་སྤེལ་ཕྱོགས། དེ་བཞིན་༧གོང་ས་མཆོག་གི་སྐུ་ཕྱྭ་དང་དོལ་རྒྱལ་ཁ་ལ་འཁྱེར་མཁན་ཉུང་ཤས་ཀྱིས་༧གོང་ས་མཆོག་ལ་མཚན་སྨད་དང་བོད་མིའི་འཐབ་རྩོད་ལ་གཏོར་བཤིག་འགོག་རྐྱེན་བཟོ་བཞིན་པར་ལན་འདེབས་གནང་ཕྱོགས། གཞན་ཡང་། རྒྱ་གཞུང་གིས་ཉེ་སྔོན་བཏོན་པའི་རྒྱབ་ཤ་དཀར་པོ་ཞེས་པའི་ཐོག་བགྲོ་གླེང་དང་འབྲེལ། དེའི་ནང་བོད་དང་དབུ་མའི་ལམ་གྱི་སྐོར་ལ་འཁྱོག་བཤད་བྱས་པར་ལན་འདེབས། བོད་མིའི་སྒྲིག་འཛུགས་དང་ཕྱར་གྲུ་མཉམ་འདེགས་ཀྱིས་དབུ་མའི་ལམ་གྱི་གོ་རྟོགས་གོང་སྤེལ་དང་། ལས་འགུལ་ཁང་སྲ་བརྟན་ཚགས་ཚུད་ཡོང་ཐབས་སོགས་གྲོས་གཞི་ཁག་ ༩ ཡི་ཐོག་གྲོས་སྡུར་དང་། དབུས་རྒྱུན་གསར་འདེམས་བཅས་གནང་རྒྱུ་ཡིན་འདུག

གསར་འགོད་པ། པདྨ་མཚོ།