ཟླ་འདིའི་ཚེས་ ༡༣ ནས་བཟུང་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཚེ་རིང་དོན་འགྲུབ་མཆོག་སུད་སི་ཁུལ་དུ་ཆིབས་བསྒྱུར་གྱིས་ས་གནས་ཀྱི་བོད་རིགས་རྣམས་ཀྱི་སྒྲུབ་ཀྱིན་པའི་ལས་འགུལ་ཁག་ཅིག་ལ་མཉམ་ཞུགས་དང་གསུངས་བཤད་གནང་སོང་།
ཟླ་འདིའི་ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་བཀའ་བློན་ཚེ་རིང་དོན་འགྲུབ་མཆོག་སུད་སིར་ལོ་ལྟར་གོ་སྒྲིག་ཞུ་བཞིན་པའི་འབུམ་ཚོགས་ཆེན་མོར་མཉམ་ཞུགས་དང་། ཉིན་རྒྱབ་དེ་གའི་གསར་དུ་བདམས་ཐོན་བྱུང་བའི་སྐབས་བཅུ་དྲུག་པའི་འཐུས་མི་རྣམས་ལ་གསུང་བཤད་གནང་དོན། དེ་རིང་འདིར་ས་གནས་འཐུས་མིར་གཞོན་སྐྱེས་མང་པོ་ཞིག་སླེབས་འདུག་པ་དེ་ངོས་ནས་དགའ་བོ་ཞེ་དྲགས་བྱུང་ལ་༧གོང་ས་མཆོག་གི་དགོངས་པ་དང་མཐུན་པ་རེད། བཙན་བྱོལ་བའི་ལས་དོན་རྣམས་མུ་གནས་ཐུབ་པའི་རྟགས་མཚན་གསལ་བོ་ཞིག་ཀྱང་རེད། ང་ཚོས་སྤྱི་ཚོགས་ཀྱི་ལས་ཀྱི་སྣེ་མོ་རྣམས་རིམ་བཞིན་འགྱུར་བ་འགྲོ་བཞིན་ཡོད་ཀྱང་། བོད་མིའི་སྒྲིག་འཛུགས་ནི་མུ་མཐུད་དུ་གནས་དགོས་པ་ཞིག་ཡིན་ཕྱིར་གཞོན་སྐྱེས་ཚོས་ངེས་པར་སྒྲིག་འཛུགས་འདི་གལ་ཆེན་དུ་བརྩིས་ནས་འགན་འཁུར་དགོས་ལ་བརྩི་བཀུར་བྱ་རྒྱུ་དེ་ལས་ཀྱང་གལ་ཆེན་རེད། ཅེས་གསུངས་སོང་།
ཁོང་གིས་དཔྱ་ཁྲལ་ལག་དེབ་མེད་པ་ནས་ཅི་ལྟར་ཡོད་པར་གྱུར་བ་དང་། དེ་ནས་རང་ཅག་གི་སྤྱི་ཚོགས་ཧྲིལ་བོའི་ལག་དེབ་དེར་གཙིགས་སུ་ཅི་ལྟར་བཟུང་ཚུལ། དང་བླངས་ཀྱི་ངོ་བོ་ནས་དཔྱ་ཁྲལ་ལ་འགྱུར་བའི་རྒྱུད་རིམ། མཐར་འདི་ལྟ་བུའི་ཕྱི་སྡོད་བོད་མིའི་ངོ་རྟགས་ཆོད་པའི་ལག་དེབ་ཞིག་ཏུ་གྱུར་ཚུལ་སོགས་ངོ་སྤྲོད་གནང་སོང་།
ཡང་ཁོང་གིས་མུ་མཐུད་དུ་གསུངས་དོན། རང་ཅག་བོད་མིའི་སྒྲིག་འཛུགས་ཀྱི་ངོས་ནས་རྒྱལ་ཁབ་སུམ་བཅུ་ལྷག་གི་ནང་དུ་གནས་སྡོད་བྱེད་པའི་བོད་མིའི་དཔྱ་ཁྲལ་མ་དངུལ་འབུལ་ཆེད་ལག་དེབ་ལྗང་ཁུའི་དཀའ་ངལ་དག་སེལ་ཐབས་སུ་འབད་པ་བྱ་རྒྱུ་དང་། དཔྱ་ཁྲལ་ཡུན་རིང་ཕུལ་མེད་རིགས་ལ་ ༢༠༠༨ བར་ཆག་ཡང་སོགས་ཀྱི་དགོངས་པ་ཆེར་བཞེད་བྱ་དགོས་དོན་ནི་མ་དངུལ་བསྡུ་རྒྱུ་གཅིག་པོ་ཡིན་པར་སྒྲིག་འཛུགས་དང་མི་མང་བར་གྱི་འབྲེལ་ལམ་མི་ཆད་པར་ཡུན་གནས་བྱ་ཐུབ་རྒྱུ་དེ་ཡིན། བོད་མི་ཁག་ཅིག་གིས་དཔྱ་ཁྲལ་མ་དངུལ་ནི་རང་ཅག་སྒྲིག་འཛུགས་ཀྱི་ལོ་རེའི་མ་དངུལ་བརྒྱ་ཆའི་ཚད་ངེས་ཅན་ཟིན་ཡོད་པའི་དྲན་ཚོར་འདུག་པས་འདིར་ཞུ་དགོས་པ་ཞིག་ནི་དཔྱ་ཁྲལ་མ་དངུལ་གྱིས་རང་ཅག་བོད་མིའི་སྒྲིག་འཛུགས་ཀྱི་ལོ་རེའི་འགྲོ་གྲོན་མ་དངུལ་གྱི་བརྒྱ་ཆའི་ ༦༠ ལས་ཟིན་གྱི་ཡོད་པ་མ་རེད། ཅེས་གསུངས་འདུག
ཚེས་ ༡༧ ཉིན་བཀའ་བློ་མཆོག་རི་ཀོན་དགོན་དུ་ཆེད་ཕེབས་ཏེ་བོད་མིའི་སྒྲིག་འཛུགས་ཀྱིས་བཀའ་བཀོད་ལྟར་བོད་པ་འདུས་སྡོད་ཀྱི་རྒྱལ་ཁབ་གང་སར་གོ་སྒྲིག་ཞུ་བཞིན་པའི་པཎ་ཆེན་ཆོས་ཀྱི་ཉི་མ་རྒྱ་མིའི་བཙོན་འོག་ཏུ་ཚུད་ནས་མི་ལོ་ཧྲིལ་བོ་ ༢༠ འཁོར་བའི་ཉིན་མོ་དང་བསྟུན། ཆུང་སྲིད་རིན་པོ་མཆོག་གཙོས་བོད་ནང་གི་ཆབ་སྲིད་བཙོན་པ་ཡོངས་རྫོགས་ཀློད་གྲོལ་གཏོང་ཆེད་མཆོད་འབུལ་སྨོན་ལམ་དང་གསང་གསོལ་གནང་སོང་།
ཚེས་ ༡༨ ནས་ ༢༡ ཉིན་བར་བཀའ་བློན་མཆོག་འཛུ་རིག་སྦིན་སི་བོད་རིགས་མི་མང་ཚོགས་ཁང་དུ་ཞོགས་པའི་ཆུ་ཚོད་ ༩ ནས་དགུང་མོའི་དུས་ཚོད་ ༦ བར་དུ་སུད་སའི་ཁུལ་དུ་ཡོད་པའི་ལག་དེབ་ལྗང་ཁུའི་དཀའ་ངལ་ཡོད་རིགས་ལ་དངོས་སུ་ཐུག་འཕྲད་ཀྱིས་དཀའ་ངལ་སེལ་ཐབས་གནང་རྒྱུ་ཡིན་འདུག
