རྒྱ་གར་གྱི་ས་ཁྲ་ཕྱེད་ཀ་མ།

ཉེ་ལམ་རྒྱ་གར་གྱི་སྲིད་བློན་རྒྱ་ནག་ནང་གཟིགས་སྐོར་དང་བསྟུན་ཏེ་རྒྱ་ནག་དབུས་བརྙན་འཕྲིན་ཁང་གིས་ཨ་རུ་ན་ཅཱལ་དང་ཇ་མུ་གཉིས་ཚུད་མེད་པའི་རྒྱ་གར་གྱི་ས་ཁྲ་ཞིག་བསྟན་པ་དེའི་ཐོག་གླེང་སློང་བྱེད་བཞིན་འདུག

ཉེ་ཆར་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་རྒྱ་ནག་དུ་སྐོར་སྐྱོད་བྱས་སྐབས་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཞི་ཨན་དུ་གནས་ལེན་དང་གཟིགས་སྐོར་ཕེབས་རོགས་བྱས་པའི་སྐབས་འདིར། རྒྱ་ནག་དབུས་བརྙན་འཕྲིན་ཁང་གིས་རྙོག་དྲ་ཅན་གྱི་རྒྱ་གར་ས་ཁྲ་ཞིག་བསྟན་ཡོད་པ་དེ། རྒྱ་གར་བརྒྱུད་ལམ་ཁག་ཏུ་གླེང་སློང་ཤུགས་ཆེན་པོ་བྱེད་བཞིན་ཡོད་པ་མ་ཟད། གནས་ཚུལ་དེ་ཞི་ཅིན་ཕིན་རྒྱ་གར་ལ་གཟིགས་སྐོར་ཕེབས་སྐབས། རྒྱལ་ཁབ་གཉིས་ཀྱི་མཐའ་མཚམས་དམག་མིའི་བར་ཁ་གཏད་ཀྱི་དོན་རྐྱེན་བྱུང་པ་དྲན་བཅུག་ཡོད་འདུག འོན་ཀྱང་། དེ་ནི་ཞི་ཅིན་ཕིན་གྱིས་གོ་སྒྲིག་བྱས་པ་ཞིག་ཡིན་མིན་ཐད་རྒྱལ་སྤྱིའི་བརྒྱུད་ལམ་ཁག་ཏུ་དབྱེ་ཞིབ་སྣ་ཚོགས་བྱེད་བཞིན་འདུག

དེ་རིང་ཞིན་ཐང་རིན་ཞེས་པའི་བརྒྱུད་ལམ་དུ། ཟླ་འདིའི་ཚེས་ ༡༤ ཉིན་རྒྱ་གར་གྱི་སྲིད་བློན་རྒྱ་ནག་ཞི་ཨན་ལ་འབྱོར་མ་ཐག རྒྱ་ནག་དབུས་བརྙན་འཕྲིན་ཁང་གིས་རྒྱ་ནག་གཞུང་ཕྱོགས་ནས་དཔར་བསྐྲུན་བྱས་པའི་རྒྱ་གར་གྱི་ས་ཁྲའི་ནང་དུ་རྒྱ་ནག་དང་རྩོད་གཞི་ཡིན་པའི་རྒྱ་གར་ཨ་རུ་ན་ཅལ་དང་། པ་ཀི་སི་ཐན་དང་རྩོད་རྙོག་ཡོད་པའི་ཇ་མུ་ཀཱ་ཤི་མིར་སོགས་མེད་པ་ཞིག་བསྟན་ཡོད་འདུག

སྐབས་དེར་རྒྱ་གར་བརྒྱུད་ལམ་ཁག་ཏུ་འདོད་བློ་མ་ཁེངས་པར། (firstpost) ཞེས་པའི་དྲ་རྒྱུའི་སྟེང་ས་ཁྲ་དེའི་སྐོར་ལ་གླེང་སློང་བྱས་པའི་ནང་། ‘མཐའ་མཚམས་ཀྱི་གྲོས་མོལ་བཞག་རོགས་གནང་། ཀྲུང་དབྱངས་བརྙན་འཕྲིན་གྱིས་རྒྱ་གར་ས་ཁྲ་བསྟན་པའི་ནང་། རྒྱ་ནག་ས་ཆའི་སྟེང་ལ་ཞེན་ཆགས་ཞེ་དྲགས་སྐྱེས་བཞིན་འདུག’ ཅེས་སོགས་བརྗོད་འདུག

རྒྱ་གར་གྱི་དེ་རིང་ (Indiatoday) དང་ཧིན་རྡུ་སི་ཐན་དུས་བབ་སོགས་སུ། རྒྱ་ནག་བརྙན་འཕྲིན་ཁང་གིས་རྒྱ་གར་ས་ཁྲ་བསྟན་པ་དེ་ནི་ནོར་འཁྲུལ་ཞིག་ཡིན་པ་དང་། སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་དེའི་ཐད་མང་ཚོགས་ཁོང་ཁྲོ་ཆེན་པོ་ལངས་ཏེ། རྒྱ་ནག་ལ་སྐྱོན་བརྗོད་ཆེན་པོ་བྱེད་བཞིན་ཡོད་པ་རེད་ཅེས་སོགས་བཀོད་འདུག  

ཨ་རིའི་ ‘རྒྱ་ནག་ཚང་དོན་’ དུས་དེབ་རྩོམ་སྒྲིག་པ་ཝོ་ཧྥན་ (Wu Fan) གྱིས། “རྒྱ་ནག་གིས་ས་ཁྲ་དེ་འདྲ་ཞིག་བསྟན་པ་དེ་ནི་ཞི་ཅིན་ཕིན་གྱིས་ཆེད་དུ་གོ་སྒྲིག་བྱས་པ་རེད་དམ། ཡང་ན་ལིའུ་ཡོན་ཧྲན་ (Liu Yunshan) གྱིས་བཟོས་པ་རེད། དེ་མིན་ན་རྒྱ་ནག་དམག་དོན་ཕྱོགས་ནས་བཟོས་པ་རེད་དམ། མུ་དྷེས་ལ་བྱེད་སྟེངས་འདི་འདྲ་བྱས་ན་རྒྱ་གར་མི་དམངས་ཚོས་ངོས་ལེན་རྩ་བ་ནས་བྱ་རྒྱུ་མ་རེད།” ཅེས་བརྗོད་འདུག

ཁོང་གིས་མུ་མཐུད་དུ། “རྒྱ་ནག་གིས་དཔར་སྐྲུན་བྱས་པའི་ས་ཁྲའི་སྟེང་། མེག་མོ་ཧན་ས་ཐིག་( McMahon Line) སྤྱི་ལེ་གྲུ་བཞི་མ་ཁྲི་ ༩ ལྷག་ཡོད་པ་དེ་རྒྱ་ནག་ལ་བདག་ཚུལ་བཀོད་ཡོད་པ་དང་། རྒྱ་གར་གྱི་ས་ཁྲའི་སྟེང་ལ་རྒྱ་གར་ལ་དབང་བའི་སྐབས་འདིར། ཀྲུང་དབྱངས་བརྙན་འཕྲིན་ཁང་གིས་རྩོད་རྙོག་ཡོད་པའི་ས་ཁྲ་བསྟན་པ་དེ་ནི་རྒྱུན་ལྡན་ཞིག་མ་རེད།” ཅེས་བརྗོད་འདུག

སྤྱིར་བཏང་ད་རེབ་མུ་དྷེས་རྒྱ་ནག་ཏུ་སྐོར་སྐྱོད་བྱས་སྐབས་ཞི་ཨན་གནའ་བོའི་གྲོང་ཁྱེར་ནང་ཕེབས་བསུ་བྱས་ཡོད་པ་དང་གནའ་བོའི་དམག་དཔུང་དང་ཕོ་བྲང་བུད་མེད་ཚོའི་འཁྲབ་སྟོན་གྱིས་ཕེབས་བསུ་དང་། དེ་བཞིན་ཐང་རྒྱལ་རབས་ཀྱི་དཔོན་རིགས་ཚོའི་གྱོན་པ་གོན་ནས་ཕེབས་བསུ་བྱས་ཡོད་པ། ཞི་ཅིན་ཕིན་དང་ལི་ཁེ་ཆང་སོགས་རྒྱ་ནག་གི་དཔོན་རིགས་མཐོ་གྲས་ཚོ་ས་ཐག་རིང་པོ་ནས་ཞི་ཨན་དུ་མུ་དྷེས་ལ་མཇལ་འཕྲད་དུ་བསླེབས་པ་མ་ཟད། ཞི་ཅིན་ཕིན་གྱི་གཟིགས་སྐོར་ཕེབས་རོགས་འོག ཐང་རྒྱལ་རབས་ཀྱི་བཙུན་པ་ཞེན་བཙང་ (Xuan Zang) གིས་རྒྱ་གར་ནས་ཆོས་ལེན་པའི་དྲན་རྟེན་ ‘ཏཱ་ཡོན་མཆོད་རྟེན་’ནང་གནས་གཟིགས་གནང་ཡོད།

རྩོམ་སྒྲིག་འགན་འཛིན་ཝོ་ཧྥན་གྱིས། ཞི་ཅིན་ཕིན་གྱིས་འགུལ་སྐྱོད་ཀྱི་རྒྱུད་རིམ་ལ་བལྟས་ན་ཁོས་རྒྱ་གར་ལ་ཀུན་སློང་ བཟང་པོ་ཞིག་འཁྱེར་ཡོད་པ་མཚོན་ཐུབ། ལོ་སྔོན་མར་ཞི་ཅིན་ཕིན་རྒྱ་གར་ལ་སྐོར་སྐྱོད་བྱས་སྐབས། ཁོས་ལོ་ལྔའི་ནང་རྒྱ་གར་ལ་ཨ་སྒོར་དུང་ཕྱིར་ ༢༠ ཡི་མ་དངུལ་རོགས་སྐྱོར་བྱ་རྒྱུ་བྱས་ཡོད། དེར་བརྟེན། ད་རེབ་རྒྱ་གར་ས་ཁྲའི་གནད་དོན་དེའང་ཞི་ཅིན་ཕིན་གྱིས་རྐང་བཙུགས་ནས་ཇུས་འགོད་བྱས་པ་ཞིག་ཡིན་མི་སྲིད། ཅེས་སོགས་བརྗོད་འདུག

ཞིན་ཐང་རིན་གྱི་ ‘ཝེའུ་བརྙན་འཕྲིན་’ལས་ཚན་མདོ་འཛིན་པ་ཀྲའོ་ཕེས་ (Zhao Pei) ཀྱིས། ང་རང་གི་བསམ་ཚུལ་ལྟར་ན། ཉེ་ཆར་ཞི་ཅིན་ཕིན་གྱིས་རྒྱ་གར་ལ་ཀུན་སློང་བཟང་པོ་འཁྱེར་ཡོད་ཀྱང་། རྒྱ་ནག་ནང་ཁུལ་མོས་མཐུན་མེད་སྟབས་ད་རེབ་ཀྱི་དེའང་ཞི་ཅིན་ཕིན་ལོ་སྔོན་མའི་ཟླ་ ༩ བའི་ནང་རྒྱ་གར་ལ་སྐོར་སྐྱོད་བྱེད་པ་དང་གཅིག་མཚངས་རེད། ཅེས་བརྗོད་འདུག ད་དུང་ཁོང་གིས། “དང་ཐོག་ཞི་ཅིན་ཕིན་རྒྱ་གར་ལ་སྐོར་སྐྱོད་བྱས་པའི་ཉིན་མོ་དེར་རྒྱ་ནག་དང་རྒྱ་གར་གཉིས་ཀྱི་མཐའ་མཚམས་སུ་དམག་མི་སྟོང་ཕྲག་མང་པོས་ཕན་ཚུན་ལ་ཁ་གཏད་དུ་ལངས་རེས་བྱས་ཡོད་པ་དང་། ད་རེབ་ཀྲུང་དབྱངས་བརྙན་འཕྲིན་ཁང་གིས་རྩོད་རྙོག་ཅན་གྱི་ས་ཁྲ་བསྟན་པ་དེའང་ ༢༠༡༤ ལོའི་གནས་ཚུལ་བསྐྱར་དཔར་བྱས་པ་རེད། ཞི་ཅིན་ཕིན་ལ་ངོ་ཚ་བཟོས་པ་དང་། རྒྱ་ནག་དང་རྒྱ་གར་གཉིས་ཀྱི་མཛའ་བརྩེ་ལ་བར་ཆད་བཟོས་པ་རེད།” ཅེས་སོགས་བརྗོད་འདུག