སྲིད་སྐྱོང་ཆེད་མཁས་ཚོང་པའི་གཟེངས་རྟགས་སྤྲོད་རྒྱུ་ཡིན།

བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱིས་སྲིད་སྐྱོང་ཆེད་མཁས་ཚོང་པ་ཞིག་ལ་གཟེངས་རྟགས་ཧིན་སྒོར་འབུམ་ ༢༡ དང་། ཆེད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་ཆེད་ཚོང་པ་གསུམ་ལ་ཧིན་སྒོར་འབུམ་ ༡༥ སྤྲོད་རྒྱུ་ཡིན་འདུག

དེ་རིང་ཞོགས་པའི་དུས་ཚོད་ ༡༡:༣༠ སྟེང་། གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། དཔལ་འབྱོར་ལས་ཁུངས་ཀྱི་དྲུང་ཆེ་འཕྲིན་ལས་རྒྱ་མཚོ་རྣམ་གཉིས་ཀྱིས་གསར་འགོད་གསལ་བསྒྲགས་སྤེལ་ཏེ། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་བཙན་བྱོལ་བོད་མིའི་ཁེ་ལས་ཡར་སྐུལ་གྱི་རམ་འདེགས་སྡེ་ཚན་ (TED) དང་། ཁེ་ན་ཌའི་ཏཱ་ལའི་བླ་མའི་ཐེབས་རྩ་ཚོགས་པ་གཉིས་མཉམ་འབྲེལ་འོག གསར་གཏོད་དང་འགྲན་བསྡུར་གྱི་རྣམ་པའི་ཐོག་ནས་༼ སྲིད་སྐྱོང་ཆེད་མཁས་ཚོང་པའི་གཟེངས་རྟགས། ༢༠༡༥ ༽ཞེས་པར་ཧིན་སྒོར་འབུམ་ ༡༡ དང་། ཚོང་ལས་གསར་དུ་གཉེར་མཁན་ཚོར་དམིགས་པའི་༼ ཆེད་མཁས་ཚོང་པ་གསར་བའི་མ་དངུལ་རོགས་སྐྱོར་གཟེངས་རྟགས། ༽ལ་ཧིན་སྒོར་འབུམ་ ༡༥ བཅས་བསྩོལ་རྒྱུ་གཏན་འཁེལ་བྱུང་ཡོད་སྐོར་གསལ་བསྒྲགས་གནང་སོང་།

ལས་གཞི་འདི་ནི། བཙན་བྱོལ་བོད་མིའི་ཚོང་ལས་ཡར་རྒྱས་ཆེད་བཙུགས་པའི་དཔལ་འབྱོར་ལས་ཁུངས་འོག་གི་ ‘བཙན་བྱོལ་བོད་མིའི་ཚོང་ལས་རམ་འདེགས་ལས་འཆར་ཚན་པ།’ ཞེས་པར་ཁེ་ན་ཌའི་ཏཱ་ལའི་བླ་མ་ཐེབས་རྩ་ཁང་གིས་མཐུན་སྦྱོར་གནང་གོ་སྒྲིག་བྱས་པ་ཞིག་ཡིན་འདུག

 ལས་གཞི་འདིའི་དམིགས་ཡུལ་གཞིས་ཆགས་ཁག་གི་བོད་མི་གཞོན་སྐྱེས་ཚོར་ལས་ཞུགས་གོ་སྐབས་བསྐྲུན་ཏེ་སོ་སོའི་གཞིས་ཁོངས་སུ་གནས་ཐབས་དང་། དཔལ་འབྱོར་རྒྱབ་སྐྱོར་གྱི་དགོས་མཁོར་ཐུག་པའི་ཚོང་པ་གསར་པ་ཚོར་མ་དངུལ་མཐུན་སྦྱོར་སོགས་ཀྱི་སེམས་ཤུགས་སྤེལ་ཏེ། ཚོང་ལས་ཐོག་ནས་གཞིས་ཆགས་རྒྱུན་གནས་ཐུབ་ཐབས་ལ་ཞབས་འདེགས་བསྒྲུབ་རྒྱུའི་ནུས་པ་སྤེལ་ཐབས་སོགས་ཡིན་འདུག

ལས་གཞིའི་འདིའི་ཁོངས་སུ་ཞུགས་འདོད་ཡོད་རིགས་ཚོས་ཕྱི་ཟླ་ ༧ ཚེས་ ༣༡ གི་སྔོན་ལ་སྙན་ཞུ་རྒྱག་དགོས་པ་དང་། སྲིད་སྐྱོང་ཆེད་མཁས་ཚོང་པའི་གཟེངས་རྟགས་ཏེ་མི་གཅིག་ལ་སྤྲོད་རྒྱུ་ཡིན་པ་དང་། ཆེད་མཁས་ཚོང་པ་གསར་པའི་མ་དངུལ་རོགས་སྐྱོར་དེ་ད་ཆར་མི་འགྲོ་གྲངས་ཚད་ངེས་བརྟེན་མེད་ཀྱང་། སྙན་ཞུ་འབུལ་མཁན་ཁྲོད་མཐའ་མའི་འདེམས་སྒྲུག་བྱུང་བ་རྣམས་ལ་ཆ་བགོས་བྱེད་རྒྱུ་ཡིན་འདུག མི་འགྲོ་འདེམས་སྒྲུག་བྱེད་མཁན་དེ་ཚོང་ལས་རམ་འདེགས་ཚན་པའི་ཚོགས་ཆུང་ཡིན་པ་དང་། གཟེངས་རྟགས་ཐོབ་མཁན་རྣམས་ཕྱི་ཟླ་ ༩ ནང་ཡོངས་ཁྱབ་གསལ་བསྒྲགས་སྤེལ་རྒྱུ་ཡིན་འདུག

སྲིད་སྐྱོང་ཆེད་མཁས་ཚོང་པའི་གཟེངས་རྟགས་ཞེས་པ་དེ་ནི། ད་ཡོད་བཙན་བྱོལ་སྤྱི་ཚོགས་ནང་གི་ཚོང་པ་རང་ཉིད་ཀྱིས་བཙན་བྱོལ་བོད་མིའི་སྤྱི་ཚོགས་སྤྱི་ལ་ཕན་ནུས་ཅི་དང་གང་ཐོན་ཡོད་མེད། རང་གི་ཚོང་ལས་དེའི་ཐོག་ནས་འབྱུང་འགྱུར་གྱི་ཚོང་པ་གསར་པར་བློ་སྤོབས་དང་སྐུལ་སློང་ཐེབས་པའི་དཔེ་བཟང་མི་སྣར་འགྱུར་མིན་སོགས། སྤྱི་ཚོགས་དང་དཔལ་འབྱོར་གཉིས་ཀྱི་ངོས་ནས་ཚོང་པའི་འཇོན་ཐང་ལ་ཆེས་བསྟོད་ཆེད་ཧིན་སྒོར་ ༢༡༠༠༠༠༠ གནང་རྒྱུ་ཡིན་པ་དང་། ཆེད་མཁས་ཚོང་པ་གསར་བའི་མ་དངུལ་རོགས་སྐྱོར་གཟེངས་རྟགས་ཞེས་པ་དེ་ནི། ཚོང་དོན་ལ་གསར་དུ་འཇུག་མཁན་གཞོན་སྐྱེས་ཚོའི་ཁྲོད་དུ། ཚོང་ལས་ལ་མོས་འདུན་དང་དེའི་ལས་འཆར་སོགས་གང་ཅིའི་ཐད་ནས་ཚད་ལྡན་ཡིན་ནའང་། དཔལ་འབྱོར་གྱི་རྒྱབ་བརྟེན་ཅི་ཡང་མེད་མཁན་ཚོར་དམིགས་ཏེ། མ་འོངས་པའི་ཚོང་པ་གསར་པ་མ་དངུལ་རོགས་སྐྱོར་ཧིན་སྒོར་ ༡༥༠༠༠༠༠ གནང་རྒྱུ་བཅས་གཏན་འཁེལ་ཡོད་འདུག

གསར་འགོད་གསལ་བསྒྲགས་ཐོག་འཕྲིན་ལས་རྒྱ་མཚོ་ལགས་ཀྱིས་ཐེངས་འདིའི་གཟེངས་རྟགས་བསྩོལ་ཕྱོགས་དང་འཐུས་མི་འདེམས་ཕྱོགས། དེའི་ཆ་རྐྱེན་སོགས་ངོ་སྤྲོད་གནང་བ་དང་། སྲིད་སྐྱོང་བ་བློ་བཟང་སེང་གེ་མཆོག་གིས། མ་འོངས་བོད་མིའི་ཉོ་འཚོང་ལས་རིགས་ལ་ཁ་ཕྱོགས་ཏེ། ང་ཚོ་བོད་པའི་སློབ་ཕྲུག་ཚོས་འཛིན་རིམ་བཅུ་བ་དང་བཅུ་གཉིས་སྐབས་ཀྱི་ (CBSE) སྦྱོང་གཞིའི་ནང་གི་རྩིས་རིག་གཅིག་པུ་ཙམ་མ་ཡིན་པར། གཞན་ཚོང་གཉེར་གྱི་མ་དངུལ་འཚོལ་སྒྲུབ་བྱེད་སྟངས་དང་འཛིན་སྐྱོང་དོ་དམ་བྱེད་ཕྱོགས། བཟོ་ལས་ཐོན་བསྐྱེད་བྱེད་སྟངས། དེ་བཞིན་ཉོ་འཚོང་ལས་རིགས་ཀྱི་དཔལ་འབྱོར་འདུ་འགོད་སོགས་ལ་དོན་གཉེར་གནང་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་གསུངས་སོང་།