གུང་ཁྲན་ཏང་ཡོན་ཚོ་དང་ལྷག་པར་དུ་མཐོ་རིམ་ཏང་ཡོན་དཔོན་རིགས་ཁྲོད་ཆོས་དད་བྱེད་པ་དང་ཆོས་ཀྱི་བྱེད་སྒོར་ཞུགས་ཀྱི་ཡོད་པ་དག་ཏང་གི་རྩ་དོན་དང་འགལ་ཡོད་ཟེར།
ཁ་སང་རྒྱ་ནག་སྒྲིག་ཁྲིམས་ལྟ་སྐྱོང་དྲ་བའི་སྟེང་། “གུང་ཁྲན་ཏང་ཡོན་གྱིས་ཆོས་ལུགས་ལ་དད་པ་བྱ་མི་ཆོག་པའི་ལུགས་སྲོལ་བརྟན་སྲུང་” ཞེས་པའི་རྩོམ་ཡིག་ཅིག་སྤེལ་ཡོད་པའི་ནང་། ཉེ་ཆར་ཊེ་ཅང་ཞིང་ཆེན་ཝིན་ཀྲིའུ་གྲོང་ཁྱེར་གྱི་སློབ་གསོ་དང་འཕྲོད་བསྟེན། མཐོ་འབྲིང་སློབ་གླིང་གི་ཏང་ཡོན་ཚོ་ཆོས་ལུགས་ལ་དད་པ་དང་། ཆོས་ལུགས་ཀྱི་བྱེད་སྒོར་ཞུགས་པ་སོགས་ལ་རྟོག་ཞིབ་བྱས་ཡོད་སྐོར་བཀོད་འདུག
རྩོམ་ཡིག་དེའི་ནང་དུ་མཱ་ཁེ་སི་རིང་ལུགས་ཀྱི་འཇིག་རྟེན་ལྟ་ཚུལ་ནི་དངོས་གཙོའི་རིང་ལུགས་ཡིན་པ་དང་། ཆོས་ལུགས་པས་འཇིག་རྟེན་ལྟ་ཚུལ་དེ་སེམས་གཙོ་སྨྲ་བའི་སྡེ་ཚན་དུ་ཡོད་སྟབས། རིག་པའི་གཞུང་ལུགས་ཀྱི་སྟེང་ནས་བཤད་ན། དངོས་གཙོ་རིང་ལུགས་དང་སེམས་གཙོ་སྨྲ་བ་གཉིས་ཀྱི་རྩ་བ་ཐ་དད་ཡིན་པ་མ་ཟད། གང་ལྟར་མི་སྒེར་དང་ཆབ་སྲིད་གཉིས་ཐད་ནས་བརྗོད་ནའང་ནམ་ཡང་སྙོམས་པོ་དང་ལྷན་གཅིག་ཏུ་གནས་ཐུབ་མེད། མཱ་ཁེ་སི་ཡིས་ ‘གུང་ཁྲན་རིང་ལུགས་ནི་ཐད་གར་ཆོས་མེད་སྨྲ་བ་ནས་མགོ་འཛུགས་དགོས་’ ཞེས་ལུང་འདྲེན་བྱས་ཡོད་པ་དང་། གུང་ཁྲན་ཏང་ཡོན་གྱིས་ཆོས་ལུགས་ལ་དད་པ་བྱ་མི་ཆོག་པ་དེ། རྒྱ་ནག་གི་གུང་ཁྲན་ཏང་མགོ་བཙུགས་པ་ནས་བསམ་བློའི་རྩ་དོན་དང་སྒྲིག་འཛུགས་ཀྱི་རྩ་དོན་གལ་ཆེན་ཞིག་ཡིན་པར་དོགས་པ་མེད་སྐོར་སོགས་བྲིས་འདུག
རྩོམ་ཡིག་དེའི་ནང་། རྒྱ་ནག་གི་རྩ་ཁྲིམས་སུ་གཏན་འཁེལ་བྱས་པ་ལྟར་ན། རྒྱ་ནག་མང་ཚོགས་ལ་ཆོས་ལུགས་དད་པ་རང་དབང་ཡིན་ཡང་། གུང་ཁྲན་ཏང་ཡོན་ནི་སྤྱིར་བཏང་གི་མང་ཚོགས་དང་མི་འདྲ་བར། གུང་ཁྲན་ཏང་ཡོན་ནི་གུང་ཁྲན་རིང་ལུགས་ཀྱི་གོ་རྟོགས་སད་པའི་གདོང་ལེན་འཐབ་འཛིང་པ་དང་། བློ་བརྟན་འགྱུར་མེད་ཀྱི་མཱ་ཁེ་སི་རིང་ལུགས་པ། ཆོས་མེད་སྨྲ་བ་ཡིན་དགོས་སྟབས། གུང་ཁྲན་ཏང་ཡོན་ཚོས་ཆོས་ལུགས་ལ་དད་པ་བྱ་མི་ཆོག་པ་དང་། ཆོས་ལུགས་ཀྱི་བྱེད་སྒོར་ཞུགས་མི་ཆོག འོན་ཀྱང་། ད་ལྟ་གུང་ཁྲན་ཏང་ཡོན་ཁ་ཤས་ཤིག་ཆོས་ལུགས་ཀྱི་རྗེས་སུ་འབྲང་གི་ཡོད་པ་དང་། དམིགས་བསལ་མཐོ་རིམ་དཔོན་རིགས་ཁྲོད་ཆོས་ལུགས་ཀྱི་བྱེད་སྒོར་ཞུགས་པ་དང་། ཆོས་ལ་དད་པ་བྱེད་ཀྱི་ཡོད་པ་མ་ཟད། ཡང་ཁག་ཅིག་གིས་ལྷ་མཆོད་གནས་མཇལ་བྱས་ཏེ་བཀས་བཀོད་རྒྱུད་འཛིན་གྱི་རྨོངས་དད་དེ་དག་ཤུགས་ཆེ་རུ་གཏོང་གི་འདུག ཅེས་སོགས་འཁོད་འདུག
དེ་རིང་བྷེ་བྷེ་སི་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བ་ལྟར་ན། ༡༩༩༡ ལོའི་ཟླ་ ༡ ནང་རྒྱ་ནག་དབུས་རྩ་འཛུགས་ལྷན་ཁང་གིས། ཆོས་ལུགས་ལ་དད་པ་ཡོད་པའི་གུང་ཁྲན་ཏང་ཡོན་གྱི་གནད་དོན་ཐག་གཅོད་འོས་འཚམས་བྱེད་ཐབས་སྐོར་གྱི་བརྡ་ཁྱབ་ཅིག་བཏང་ཡོད་པ་དེ། གཙོ་བོ་གྲངས་ཉུང་མི་རིགས་ས་ཁུལ་དག་གི་ཆོས་ལུགས་ཀྱི་སྟོབས་ཤུགས་དང་བག་ཆགས་ཟབ་ས་དག་ལ་དམིགས་ཡོད་ཅིང་། དཔེར་ན། བོད་དང་ཡུ་གུར་སོགས་རེད། འོན་ཀྱང་། ཉེ་བའི་ལོ་གཉིས་རིང་རྒྱ་ནག་གི་ལྐོག་ཟ་རུལ་སུངས་ལ་རྒོལ་རྡུང་དང་། གུང་ཁྲན་ཏང་ཡོན་དག་ཐེར་གྱི་ལས་འགུལ་ཁྲོད། ཆོས་ལུགས་ལ་དད་པ་དང་ཆོས་ལུགས་ཀྱི་བྱེད་སྒོར་འཛུལ་ཞུགས་བྱས་པ་སོགས་ཀྱི་གནད་དོན་དབུས་རྟོག་ཞིབ་རུ་ཁག་གིས་གླེང་སློང་བྱེད་པ་ཐོག་མ་དེ་ཆགས་ཡོད། ཅེས་སོགས་འཁོད་འདུག
༢༠༡༤ ལོའི་ཟླ་ ༧ པའི་ཟླ་མཇུག་ནས་མགོ་བཙུགས་པའི་དབུས་རྟོག་ཞིབ་རུ་ཁག་གིས་ཐེངས་གཉིས་རྟོག་ཞིབ་བྱེད་པའི་ཁྲོད། ཊེ་ཅང་ཞིང་ཆེན་གྱི་ས་གནས་དཔོན་རིགས་ཁ་ཤས་ཀྱིས་ཆོས་ལུགས་ལ་དད་པ་དང་། ཆོས་ལུགས་བྱེད་སྒོར་འཛུལ་ཞུགས་བྱས་པའི་གནད་དོན་སྐོར་ལ་རྟོག་ཞིབ་པ་ཚོས་དམིགས་བསལ་གླེང་སློང་བྱས་ཡོད་འདུག
དབྱེ་ཞིབ་པ་ཞིག་གིས། ཊེ་ཅང་ཞིང་ཆེན་ཝིན་ཀྲིའུ་གྲོང་ཁྱེར་དུ་ཡེ་ཤུའི་ཆོས་ལུགས་རྗེས་འབྲང་པ་ཁྲི་ ༡༠༠ ལྷག་ཡོད་པ་དེ་གྲོང་ཁྱེར་དེའི་མི་གྲངས་ཀྱི་བརྒྱ་ཆ་ ༡༥ ཙམ་ཟིན་ཡོད་འདུག ཝིན་ཀྲིའུ་གྲོང་གསེབ་དུ་ཡེ་ཤུའི་ལྷ་ཁང་ ༤༠༠ ཡོད་པ་དང་། ཆ་སྙོམ་བྱས་ན་གྲོང་སྡེ་གཅིག་ལ་ལྷ་ཁང་གཅིག་རེ་ཡོད་པ་དང་། རྒྱ་ནག་གི་གྲོང་ཁྱེར་ཆེ་བ་བརྒྱ་ཕྲག་ལྷག་ཡོད་པའི་ནང་དུ། ཝིན་ཀྲིའུ་ནི་ཡེ་ཤུའི་ཆོས་ལ་དད་པ་བྱེད་མཁན་ཆེས་མང་བའི་ས་ཁུལ་ཞིག་ཆགས་ཡོད་འདུག ཅེས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
